Pachia Penaw Cipaw Tuh Pawmou?

1. Pachia Penaw cipaw tuh pawmou?

Pachia Penaw cipaw tuh vawlang khua e accoza nynh thua. Tuh e accoza nynh ccungccaw ccoza hynh marya aroh cihza, Pachia rynaw kha vawlang hawte laevaw lang mah ynccingsah vae cih. Tuh e tuh thehoypaw sou. Aromawze Pachia Penaw nynh laevaw ccungccaw hae hanglang ary abou paw balyng pung ynpya vae cih. Tetuh ccungccaw lung pungnging vae cih.​—Daniel 2:44, 45; Matthai 6:9, 10; 24:14 haekha ria tua.

Accoza ccangkheih tuh uhtu cipaw a ung cih. Tukeiccuze Zahova Pachia nynh a Ccahpaw kha vawlang accoza uhtu lang apo vae.​—Byaphy 11:15 kha ria tua.

Pachia Peenaw Tuh Pawmou? video kha do.

2. Zisu tuh pawccemou ahoihuapaw Siapharang a thua?

Zisu tuh thawccinaw hoiza dingrarihte rya alaw keiccuze nynh thua. (Matthai 11:28-30) Apiaze Zisu nynh vawlangte laephi hynh yn uh vaecih za ccungccaw bung khonaw thawzung mah a hoi. Zisu tuh a thothui koute vawlang kaeza Pachia ranglang khe ah ha-ung. Pawccecize uhnaw Aanaa amue langpaw ccyh nynh a ngaw. (Hebru 10:12, 13) Nyalang tuh Pachia nynh uhnaw Aanaa kha apya vae.​—Daniel 7:13, 14 kha ria tua.

3. Zisu te a uhkheih cih haepaw tuh hunghae mou?

‘Mihthya hae’ acihkuh haepaw bu bukheih tuh vawlang khua Zisu ryte uhnaw amue cih hae. (Daniel 1:27) E mithya hae lungkhuze kou a poty haepaw tuh zyntyng haepaw Zisu zuitu hae nynh athua hae. Zyntyngpaw tuh nohpi mah pise mah mihthya hae lang Pachia nynh apo hae. Atunin cia bangbang apo ung hae. Zisu hawte miming mah muihsaw pyngte a thothui cih hae.​—Johan 14:1-3; 1 Korin 15:42-44 haekha ria tua.

Vawlang tuh luhohzeihmou akae cih hae? Zisu nynh Miming kha “Tuubu taraw” hae cite min aphu hae. (Luka 12:32) Mibalyngte 144,000 acih hae. Miming nynh Zisu ry te vawlang khuate laephi yn uh cih hae.​—Byaphy 14:1 kha ria tua.

4. Zisu Aanaa he amuete pawtemou aci ku?

1,914 kum khe Zisu nynh uh naw Aanaa he amue.a Siapharang lang he atangtuh Setan te muihsaw hoy lei haepaw kha vawlang te laevaw lang boh ynsaw vae hae. Setan nynh athing eih ria keiccuze laephi pyngpi piahccanaa a lungsah vae. (Byaphy 12:7-10, 12) E ccyh kya tetuh laevaw lang riathae vawsawnaw houh houh alungthung vae. Rawtuhkunaw, ccahkangnaw, cciihawnaw, innrysue kunaw houh houh a lungthungnaw pawhynh Pachia Penaw nynh laevaw piahccahna miakaw ynphishing pahvaecih cipaw nynaw ‘syngtawnaw’ nynh thua.​—Luka 21:7, 11, 31 kha ria tua.

5. Pachia Penaw nynh pawryamou ynlawpya?

Pachia Penaw nynh laephi pyngpi phunghonaw liate minphuin takyh kyate bu bukheih lang tangsah za, lung angingsah zakaw asangsahkuh paw riataelei ccungccaw hae tuh Zisu uhnaw zakaw kya nynh a ung vae hae. Miming tuh laephi ynro vaeze khungnaw amue cih hae. Tukeiccuze Pachia Penaw kya hythua mue arypaw nynh Zisu kawngae kho nawlang ccangku a ho.​—Byaphy 7:9, 14, 16, 17 kha ria tua.

Zisu uhnaw akum thungkheih lungkhu tuh Pachia nynh atakaw lyaze a eenaw hawkhate bua ynccing sah vae cih. Laephi pyngpi hynh myarya puithyapaw paradise khokhu lang yntangthui vaecih. Zisu nynh a Penaw kha Zahova Pachia kalang bua a ah cih. (1 Korin 24:26) Pachia Penaw kong kha lukhahkheih kya naho pahry khyh tou?​—Sam 37:10, 11, 29 kha ria tua.