Ccangkunaw ccang 6
Pachia penaw cipaw hynh paw mou?
Pachia penaw hynh paw kya mou ung? (1)
Siangpahrang soh ahung mou? (2)
Siangpahrang te auh kheih lang haepaw soh ung mou? A ung lang thua ze lohhoh zeih mou cihcih hae? (3)
Nyathya nin ccyh nynh a hing vae oh cipaw hynh paw nynh mou yn ccae sah pah cih? (4)
Pachia penaw nynh mah lang ccyh ze ccung ccaw hae hang lang paw mou yn ci pah cih. (5-7)
1. Zisu nynh lae phi vaw ung lya ze Pachia penaw e lang saw nae sang cih oh cite accang pya hae. Penaw cipaw tuh siangpahrang ccang kheih nynh ccia khae paw accozah ccang khieh nynh thua. Pachia penaw tuh accoza hua ccang kheih nynh thua. Vawlang te lae vaw lang yn uh lang cih. Pachia min kha cci ha heih lang yn ung cih. Pachia rynaw tuh vaw lang khua hawte lae vaw lang mah yn ccing cih.—Matu 6:9, 10.
2. Pachia nynh Zisu hynh apenaw lung khu ze siangpahrang lang a tang cih cite bya a king ku. (Luka 1:30-33) Zisu tou lou nynh lae vaw lang aung lya ze, ccung ccaw ngae thya ung sah paw ading paw, accingpaw siangpahrang lukheih lang yn tang cih ci paw alang sah. Vaw lang he akae ning kae te siangpahrang palou tang loh khyh. (Hebru 10:12, 13) 1914 kum khe nynh Zahova nynh abaking hawte Zisu kha a aanaa apya. Tuh e kumte nynh vaw lang khua khe siangpahrang uh naw amue.—Denia 7:13, 14.
3. Zahova nynh lae phi ccung ccah nung ccung ccah paw abang kha vaw lang kae lang apohae. Mihming nynh Zisu te pyng kheih lang siangpahrang lang, bapiatu lang, rangpibawi lang tangcih haezah ccung ccaw hae kha auh cih hae. (Luka 22:28-30; Biathlam 5:9, 10) Ape naw kya ze uhtu lang atang kheih cih hae paw kha “tuubu taraw” cite min aphu hae. Mi balyng te 144000 sah si acih cih hae.—Luka 12:32; Biathlam 14:1-3.
4. Zisu nynh siangpahrang he a mue takaw maw te setan te vaw mi sei hae miakaw blyng kha lae vawlang hing bue yn saw hae. Tukeiccu 1914 kum te tuh lae vaw lang houh houh hoi vae khyh. (Biathlam 12:9, 12) Rawtuh kunaw, ccah kang naw, ccinaw, hoileinaw houh lungzah, ou e nynh Zisu uhnaw amue vae ci pawte atu e see thang naw anaevae cipaw alang sah. Syntawnaw muih sawnaw nynh thua.—Matu 24:3, 7, 8, 12; Luka 21:10-12; 2 Timote 3:1-5.
5. Aro maw ze Zisu nynh ccung ccaw miakaw bya pia lang tuu ring paw nynh tuu te mia phiahawte yn phia vae cih hae. “Tuu” hae cipaw tuh akaw ngaete zyntyn hae paw kha nynh thua. Mih ming tuh lae phi vaw zung zae hing naw amue cih hae. “Mia” hae tuh Pachia penaw kyate de athua cih hae. (Matu 25:31-34, 46) Aro maw ze miate alokuh hae paw blyng tuh Zisu nynh pung yn roh vae cih hae. (2 Tesalon 1:6-9) Zisu tuu thua na ry ze Pachia penaw the hoi paw bya kha ngae lah nanyna thae paw blyng kha zui.—Matu 24:14.
6. Atu lya e lae phi hynh rang patae lang aphia kuh. Rang ta kyh accozah be aung kou. Rang kheih te rang kheih pei adou kuh hae. Thua sla mah Pachia penaw te yn rulae cih zah, lae phi pyng pi Pachia ccozah ccang kheih rou nynh pung yn uk vae cih. (Denia 2:44) Tuh koute tuh raw tuh kunaw, chia kunaw, hoi lei naw miakaw blyng ung vae lang khyh. Ccung ccaw mia kaw nging rahrih dae rahring te pyng kheih lang ung kheih lang vae.—Mika 4:3, 4.
7. Zisu kum 1000 uk naw lung khu tuh zyn tyn paw ccung ccaw tuh mih ccing a thua cih zah, laephi pyng pi paradise lang pung yn tang vae cih. Zisu kum 1000 uh naw yn thang te Pachia nynh anaw paw miakaw pung yn lyng vae cih. Te tuh amaw nynh penaw kha a paw klang bua yn ah vae cih. (1 Korin 15:24) Pachia penaw nynh yn rae pya langpaw kong kha nabang hae te na sung sah hae paw miakaw hopya lang hae ze hoi khyh tou?
[Hmanthlak biu 13]
Zisu uh naw zakaw tuh hua ku naw te lung ungnaw ung vae lang khyh