Kaw Ngae Paw Zisu

Imua hae nungpaw bya kha zungzae na ngae oh tou?— Vae khakheih tuh na ngae khyh oh kha zaw? Zisu soh a hung hae bya mou a ngae?— Zahova Pachia bya, nungpaw bya balyng a la ngae. Zisu akong lang na ny zetuh nungpaw bya na ngae ry cih. Atu, imua hae Zisu akong lang kae ho pa oh ii.

Zisu lae vaw yn rung maw vawlang khua apaw Zahova Pachia te khaw la ung kheih vaehae. Laephi vaw kya mah Zisu nungpaw a hoy. Apaw tuh Josef, anung tuh Meri a ci kuh. Miming tuh pawtemou Zisu nungpaw la thua hae? Imua hae na nyh oh tou?—

Zahova Pachia nynh vawlang e Zisu ahing naw kha Meri vue lungkhu lang a sang. Tuhkeiccuze nynh Zisu tuh ae ning hawte ccungccaw langte yn pui vae. Ngae ang thua lang a ung kha zaw? nung vue lungkhu takyh takyh na lethung oh hawte Zisu mah Meri vue lungkhu kya takyh takyh yn lethung. Satakua yn cih tuh yn pui vae. Meri te Josef tuh Laevaw kya Zisu nungpaw lang a thua vae hae.

Zisu hae innbyng tuh Zahova Pachia beih lang myarya sawnaw Zerusalem khua lang la cceih hae. Tulyatuh Zisu Kum 12 kele lah ci ung zemah vawlang khua ungpaw apaw Zahova Pachia kha pawcihcia temou asungsah cipaw alang sah. Aki hae tuh Josef te Meri nynh Zisu kha muih vae khyh hae. Zisu pawkyamou ala ung?—

Josef te Meri tuh Zerusalem lang a rangte ki hae zah Zisu kha a ccung vae hae. Muih kho khyh hae zah mithin phe la phang. Ninthung aro tenynh Zisu kha beihnaw inn kyakhe a muih hae! Zisu tuh beihnaw inn kya pawcce a ung sya?— Pawcce cilangze Apaw Zahova kong nyh zah tenynh thua. Zisu nynh Zahova kha myarya sungsah zah alung mah apaw sah ry. Yn le temah Zahova bya zungzae a ngae. Ngae lang a ru lya zemah thuasah, runaw tunglang cipaw any zemah Pachia bya kha a la ngae. Josef te Meri bya soh la ngae tou?— A ngae cite Baebu nynh a ci.

Zisu kyate paw hawnawmou lawku lang?— Nungpaw bya kha na ngae ry khyh lya mah a ung cih, thuasalamah zungzae ngae lang a ho. Imua hae nungpaw bya na ngae cih oh tou?—