Zahova Pachia Kong Jeremiah Ho Leite Ung Boi Khyh

Zahova Pachia kong aho vae oh ze vae khakheih ccungccaw hae nynh yn nuin se cih hae, mih thin mah a ria cih. Tetuh Zahova Pachia kong ho ry ung vae khyh. Imua hae, e hawte na tung boi oh tou?— Zahova Pachia asungsah zemah amaw kong aho ry vae lei paw ngaw phue paw lukheih Baebu kya a ung. A min tuh Jeremiah a ci kuh. Amaw kong lang hynh ria tua oh sih.

Ahoilei paw rya lah nang vae oh cite ccungccaw hae khah ho pah hae cite ngaw phue paw Jeremiah kha Zahova Pachia nynh ryalaw a naw. Jeremiah ho ngang khyh. A rih. Te amaw nynh Zahova kha: ‘pawmou ka ho pa cih hae. Myarya ka dih ung’ a ci. Zahovah nynh: ‘Rih nang. Kae bung cih’ a ci pya.

Te ahoilei paw rya pei na law oh ze tuh detahnaw nae mue cih oh cite raeringnaw apya hae. Jeremiah aho paw kha ccungccaw hae nynh ngae hae tou?— Ngae khyh hae. A nuin se hae, abang tuh mih thin a ria. Abang tuh Jeremiah kha a chia bia ry hae! Jeremiah tuh pawtemou a ung cih?— Myarya a rihcih. Tetuh: ‘Zahova Pachia kong ka ho vae lang khyh’ cite la tua ku. Ho leite la ung ccahccing tou?— Unglae khyh. Zahova Pachia myarya a sungsah keiccuze ho leite ung boi khyh. Jeremiah pou la ho keiccuze Pachia nynh ala khung.

Vaekheih tuh, mih thinlung ahoilei hae paw nynh tui unglei paw tuikhaw lungkhu lang Jeremiah kha a saw hae. Ae paw nia paw mah pya khyh hae. Tuh e tuikhaw lungkhu kya chihsah ci ary hae. Thuasalamah Zahova Pachia nynh phe a khung!

Jeremiah kyate paw hawnawmou lawku lang?— Jeremiah a ri lya mah a ung. Thuasalamah Zahova Pachia kong kha ho leite unglae khyh. Imua hae Pachia kong na ho oh ze ccungccaw hae nynh ae nuin se cih oh. Mihthin mah a ria cih. Tetuh nae mae yn thah cih, nae rih cih oh. Thuasalamah Zahova Pachia kong ho leite ung nang oh la ii. Zahova Pachia nynh Jeremiah kha a bung hawte nang ning mah solei ae bung cih oh.