ABALU HAWLAEKHEIH
Riathae Vawsawnaw Hynh Pawccemou A Lung?
1, 2. Ccungccaw patae nynh paw bakhianaw mou a khia hae?
SUNAMI nynh khuarang a ro. Maethe kyngpaw nynh Beihinn kya-e ccungccaw patae kha a chia hae. Khensa cciinaw keiccuze ccaw lupangaw a sah vae paw nungpihnung kha a chih.
2 Ruunaw ah tung ccyh hae kya khe “pawccemou” hynhte a cyiku cite ccungccaw patae nynh a khia hae. Ccungccaw patae nynh huakunaw te riathae vawsawnaw hynh pawccemou hynhcihciate a lung cite a khia thya hae. E hae kong te asekuhte namaw te namaw soh na khia kuh boi tou?
3, 4. (a) Habakkuk nynh paw bakhianaw mou a khia? (b) Zahova nynh pawtemou a phi pya?
3 Pachia kya zynnaw myarya tyngpaw nynh e bakhianaw a la khia boi cipaw Baebu kya ah ccangku vae oh. Tousenawze, profeh Habakkuk nynh Zahova kha, ‘Dingleinaw hynh pawcce nae muih sah? Hoyleinaw hynh soh pawccemou nae muih sah? Luakunaw, taekunaw hynh pawcce ka malang ze pei a ung? Pawcce lukheih te lukheih eikunaw, maekunaw hynh pei a ung?’ cite a la khia.—Habakkuk 1:3.
4 Habakkuk 2:2, 3 kya, Pachia nynh Habakkuh bakhianaw te abakingnaw amenaw kong a phi pyapaw kha ah ria oh. Zahova nynh ccungccaw hae kha myarya yn sungsah. Baebu nynh hynhte a ho: “Aning tuh nangning hanglang a tua paw nynh thua.” (1 Piter 5:7, BI) Athua, Baebu nynh ruunaw vawsawnaw hynh aening laeze Pachia nynh houh a hua hua cipaw yn thae sah thya. (Isaiah 55:8, 9) Tukeiccuze, laephivaw lang ruunaw vawsawnaw hynh pawccemou hynhcih balang a lung? cipaw bakhianaw kha hoku tua oh sih.
RUUNAW VAWSAWNAW HYNH PAWCCEMOU A LUNG?
5. Ruunaw vawsawnaw te asekuhte beihnaw kya ccangpatu hae nynh pawtemou a ho hae? Baebu nynh soh pawtemou yn ccangpya?
5 Ccungccaw hae nynh ruunaw vawsawnaw a tung hae paw hynh pastor hae, siabawi hae te beihnaw kya ccangpatu hae nynh Pachia rynaw a ci hae. Abang nynh ccungccaw lukhakheih ruunaw a tung vae hae ze Pachia nynh a ccang sah paw thua zah pawccemou tuhte a tung sah cipaw kha thaethya kho leilang cite leih a ho hae. Abang ccungccaw nynh mah imoh taraw a chii vae ze vawlang khua Pachia te nynh a ung kheih vae hae cite a ho hae. Thuasalama tuh-e tuh me khyh. Zahova nynh hoyleinaw kha hohtuh hohtuh ze mah rae boi khyh. Baebu nynh, ‘Athung huaccepaw Pachia nynh hoyleinaw tuh rae sae boi lang khyh zah seinaw mah rae sae boi lang khyh,’ cite a ci!—Job 34:10.
6. Ccungccaw hae nynh laevaw-e ruunaw vawsawnaw hanglang pawccemou Pachia kha sei a be hae?
6 Ccungccaw hae nynh laephi hynh Pachia nynh a uh cite a tua hae keiccuze laevaw-e ruunaw vawsawnaw hanglang Pachia kha a sei sah hae. Thuasalama Cabalu 3 naw kya, e laephi a uh ccahccing paw tuh Mihoy leipaw Setan nynh thua cipaw ah ccangku vae oh.
7, 8. Laevaw lang ruunaw vawsawnaw hynh pawccemou myarya a lung?
7 Baebu nynh ‘Laephi tuh Setan nynh a uh’ cite a ci. (1 Johan 5:19) E laephi uhtu Setan tuh mihoy leipaw te are aropaw nynh thua. Amaw tuh ‘laephi pyngpi lingtu’ nynh a thua. (Byaphy 12:9) Ccungccaw patae nynh amaw kaheih a lawku hae. Tukeiccuze laevaw lang lingkunaw, huakunaw, te ziaku buakunaw houh a lungnaw paw a thua.
8 Laevaw lang ruunaw vawsawnaw a lungnaw paw a ccangpaw a konglang hae a ung ung. Adam te Evua nynh a la rawse hae kou tetuh, a ccaw hae kha seinaw ro a la ccou sah vae hae. A ccing leipaw ccungccaw hae keiccuze nynh ruunaw vawsawnaw a ungnaw paw a thua. Ming hae laeze ka hanghua sah cite a zuaku hae. Tukeiccuze lukheih te lukheih khung a taekuh hae, raw a tuhku hae, te mingccang paw hae kha vawsaw riathaenaw a pya hae. (Phunghotu 4:1; 8:9) ‘Tualeipi ccyh kya a cyihkuh paw’ keiccuze ccungccaw hae ruunaw vawsawnaw ah tung oh paw nynh thua. (Phunghotu 9:11) Ccungccaw hae tuh ung lang a ccang leinaw ccyh kya ah ung oh keiccuze tuaty leipaw ruunaw te hoyleipaw miakaw ah tung vae oh.
9. Zahova nynh ruunaw ungnaw kaw a uanaw akonglang hynh a ung maming cih cite pawccemou ah zynngang oh?
9 Ruunaw vawsawnaw tuh Zahova keiccu mazii thua khyh. Rawtukunaw, upadi zuileipaw seinaw te vawsaw riathaenaw hae hanglang amaw kha sei sah lang paw thua khyh. Innruisuekunaw, khisethonaw te tuilenaw hae tahaw paw ruunaw hae hynh Pachia keiccu thua khyh. Thuasalama, ‘Zahova tuh vawlaepi kya thungnaw ahoihua ccepaw a thua lang ze, riathae vawsawnaw miakaw hynh pawccemou a zo sah khyh?’ cite na tua kho. Pachia nynh pe myarya yn ki cipaw kha ah ny oh, tukeiccuze riathae vawsawnaw hynh ungnaw kaw a uanaw paw akonglang solei a ung mah ming cih.—1 Johan 4:8.
PACHIA NYNH RIATHAE VAWSAWNAW UNGNAW KAW A UANAW KONG
10. Setan nynh Zahova kha pawtemou a la rawse?
10 Edin khokhu kya, mihoy leipaw nynh Adam te Evua kha a la ling hae. Setan nynh Pachia kha ahoy leipaw Uhtu cite sei a be. Adam te Evua kha Pachia nynh nae hanglang ahoypaw hangkhakheih ae phisi pya bang oh a ci pya hae. Setan nynh miming uhtu lang Zahova lae ka hoyhua zah mih hanglang Pachia hoo khyh cite zyn hae sah ci a ry.—Genesis 3:2-5; Piachihpaw 27 kya do.
11. Paw bakhianaw aphi kha mou aening ny lang ahoo?
11 Adam te Evua nynh Zahova kaw ngae leite a rawse hae. Athah thua sah ahoy thua sah kaemaw te kaemaw bya kae paekuh kho cite a la tuaku hae. Rawsetu hae tuh a sei hae cipaw te aening hanglang ahoy huaccepaw a nynaw kha Zahova nynh pawtemou a lang sah cih?
12, 13. (a) Zahova nynh rawsetu hae kha pawccemou vaeleih a ro khyh hae? (b) Zahova nynh Setan kha laephi uh lang te ccungccaw hae mimaw te mimaw uhku lang pawccemou kaw a ua?
12 Zahova nynh Adam te Evua kha palou la roh khyh hae. Amaw nynh miming kha ccaaw sahnaw kawcia a la pya ung hae. Zahova nynh Adam te Evua hawte mih ccaaw hae mah uhtu lang a ry hae paw kha poku kho naw kaw a la pya hae. Zahova a eenaw tuh laephi pyngpi a ccingpaw ccungccaw te phe bia lang zah mihoy leipaw Setan ryalawnaw mazii ung nang sah cite nynh a lah ee.—Genesis 1:28; Isaiah 55:10, 11.
13 Setan nynh Zahova kha riataelei vawccungcaw hae mahlang khe a la rawse. (Job 38:7; Daniel 7:10) Tukeiccuze a rawsenaw kha me tou me khyhtou cipaw a ria nawlang Zahova nynh Setan kha ccyh a pya. Pachia nynh amaw bungnaw leite uhku lang hoy tou hoy khyhtou cipaw a ria nawlang Setan cciakhaenaw te mimaw te mimaw uhku lang ccungccaw hae kha kaw a pya hae.
14. Atu ccyh nynh pawmou a lang sah?
14 Kum hynhsepi kya ccungccaw hae nynh mimaw te mimaw uhku lang azuaku hae, thuasalama uhku kho khyh hae. Setan tuh hyngbya hotu cipaw a lang vae. Ccungccaw hae tuh Pachia bungnaw ah hoo oh. Profeh Jeremiah nynh a ho paw hynh myarya a me: ‘Pou Zahova, ccungccaw nynh mih langpi kha uhkuh kho khyh hae, a ccialya hae khe mih ccuhnoh hae sang mah bya piathya khyh hae cipaw kha ka ny.’—Jeremiah 10:23.
ZAHOVA NYNH PAWCCEMOU CCYH HYNHSEPI A UA?
15, 16. (a) Zahova nynh ruunaw hynh pawccemou ccyh a sae lang ungnaw kaw a ua? (b) Setan keiccuze a langkuh paw piahccahnaa hae kha Zahova nynh pawccemou a zo sah loh khyh?
15 Zahova nynh riathae vawsawnaw hynh pawccemou ccyh a sae lang ungnaw kaw a ua? Hoyleinaw miakaw hynh pawccemou a zo sah lah khyh? E tuh Setan uhnaw hynh hoy ccahccing khyh cipaw a ria nawlang nynh thua. Ccungccaw hae nynh uhkunaw a phuinphuin te a uhku tua hae ze mah ahoy lang te uhkuh kho khyh hae. Ccungccaw hae tuh science te a ccangpaw thyahawnaw a mang hae ze mah, dingleinaw, ryachicciinaw, upadi zuileipaw seinaw hae te rawtukunaw tuh houh houh a lungthung maming. Tukeiccuze Pachia leite ccungccaw nynh mawtemaw ahoyte ah uhkuh kho khyh oh cipaw phe a ria.
16 Pawte thuaze mah, Setan keiccuze a lang kuh paw piahccahnaa hae kha Zahova nynh zo sah lah khyh. E hynh a zo sah lang ze Pachia nynh Setan uhnaw kha a bung cinawpaw nynh a thua vae. Amaw nynh mazii zo sah lang khyh. Ccungccaw hae nynh mawtemaw ahoyte kae uhkuh kho cih cite a zynku hae. Thuasalama tuh-e tuh me khyh, hyngbya nynh thua, te Zahova nynh mah thaw pya khyh. Amaw tuh hyng mah mazii hyng boi khyh.—Hebruhae 6:18.
17, 18. Setan keiccuze a langkuh paw riathae vawsawnaw hae kha Zahova nynh pawtemou a cyih vae cih?
17 Rawsetu Setan te ccungccaw hae keiccu a langkuh paw ruunaw hae hynh Zahova nynh ahoy langte bua yn rae pah thui kho cih tou? Yng rae thui kho cih. Setan rawsenaw hae kha Zahova nynh paw ccyh kya mou phishing lang ze ahoy cipaw kha a ny. Nyalang tuh a la eenaw hawte, e laephi hynh Paradais lang yng tang sah vae cih. Pachia nynh a syntaw hae paw tuh “mih saw kyate” yng thothui cih hae. (Johan 5:28, 29) Ccungccaw hae tuh mazii ccih vae lang khyh hae zah chih vae lang khyh hae. Setan keiccuze a langkuh paw hoyleinaw miakaw kha Zisu nynh yng zo sah vae cih. Zahova nynh “Setan ryalawnaw ro khylang” Zisu kha yng mang cih. (1 Johan 3:8) Aening tuh ah lung myarya tua lang a ccang, pawccecize Zahova lungsaenaw keiccuze akonglang ccangku kho naw ccyh ah mue oh za amaw kha Uhtu lang poku kho naw ccyh mah ah mue kho oh. (2 Piter 3:9, 10 ria.) Ruunaw vawsawnaw ah tung vae oh ze, amaw nynh ngaesang kho naw mah yn pya.—Johan 4:23; 1 Korinhae 10:13 ria.
18 Zahova nynh aening uhtu lang a maw kha yng pokuh oh cite yn riase khyh. Ccungccaw hynh ry thahthyh pokunaw kaw yn pya. E a phutepaw lasung hynh aening hanglang paw suilang mou ung cipaw kha dotua oh sih.
RY THAHTHYH POKUNAW KAW YN PYAPAW HYNH PAWTEMOU NA MANG CIH?
19. Zahova nynh paw a phutepaw lasung mou yn pya? E lasung hanglang pawcce lungtua lang a ccang?
19 Zahova nynh sarang paw hae te a lokuh leilang te ry thathyh pokunaw kaw yn pyapaw hynh a phu myarya tepaw lasung nynh thua. Lorang saw hae tuh mih ry thyh te nynh a ung hae. Thuasalama aening tuh nythya tuathyanaw ah hoi oh keiccuze ah ry thyhte hing lang ah pokuh kho oh. Zahova a rynaw te ka hing sah cite mah bya ah paekuh kho oh. (Phungtangbya 30:24) Aening tuh ccungccaw hae nynh hynhte cyih sah, hynhte cyih nang sah cite a rae hae paw seh te ah lokuh khyh oh. Aening tuh pawmou ka cyi ry, a hungmou banglang ka poku cih, ka hingnaw kya pawtemou kae ung cih cipaw ry thahthyh te ah pokuh kho oh. Zahova nynh lungtua lungpaw te hing hae sah ci yn ry.
20, 21. Atulya paw ahoy huaccepaw mou na pokuh cih?
20 Zahova nynh kamaw kha yng sungsah hae sah ci a ry. (Matthai 22:37, 38) Zahova tuh a ccahpaw nynh a paaw kha “kae sungsah” cite a ho paw bya kha thae za a lungpawpaw Paaw lukheih te nynh a loku, tuh-e bya tuh ming hae nynh a tou hae paw thua leite a thinlung ccahccing te a ho paw bya nynh thua. Zahova nynh a rya lawlang, law leilang cipaw kha ry thahthyh pokunaw kaw yn pya. Setan, Adam te Evua nynh Zahova kaw ei lang a lah poku hae. Nang so ry thahthyh pokunaw kaw ae pyapaw kha pawtemou na mang cih?
21 Ry thahthyh pokunaw kaw na muepaw kha Zahova ryalaw nawlang mang. Ccungccaw ccaang patae hae tuh Setan kaw kha ei hae zah Zahova rya lawlang bya a paeku vae hae. (Phungtangbya 27:11) Riathae vawsawnaw hynh yng roh te Pachia Uhnaw laephi thawpaw kya hinglang vae keiccuze atulya nang pawmou na cyih cih? E bakhianaw aphi hynh malang-e abalu nynh yn phi pah cih.