Zahova Kalang Houh Naekuh

1, 2. Atunin pawkyamou rekunaw muih kho lang?

KHISE a tho nin a tolang langpi na cceih cite na mimae kya ung sah ku tua. Vawlae palae mang zah khozawlae, te ria akaw bia. Aromaw khua myarya yng ccang vae. Rekunaw he na ccung vae. Nyathya tuh phuikaring lang rekunaw he na muih tuh na lung ngae phe a ngang cih kha zaw!

² Atunin mah tuhawte a lokuh paw she kya nynh ah hing vae oh. Laephi she hynh houhhouh aruu vae. ‘Paw kya ve mah rekunaw hynh ka muih kho cih?’ cite na tua kho. Sam sazae paw nynh hynhte azei: ‘“Zahova Pachia tuh ka rekunaw, ka ingpi, ka doliakupaw Pachia nynh a thua cite ka ho cih”’. (Sam 91:2) Zahova nynh atulya ah tung oh paw piahccahnaa hae kyate yn thungkhaw kho zah, malangshe ze mah ngae-ang lang ung paw ngaehoinaw yn pya kho.

3. Zahova tuh ah rekunaw oh pawtemou thua sah kho lang?

³ Zahova nynh pawtemou yn khung cih? Aening ruunaw vawsawnaw yn pya hae paw lae ze thungnaw patae ahoi hua keiccuze ah tung oh paw piahccahnaa hae kyate yn thungkhaw kho. Atuccyh lya tuh hoyleinaw ung sah la ze mah, malang tuh Zahova nynh ahoy lang te yn cyi pah thui vae cih cipaw ah zyn ngang oh. Baebu nynh hynhte thawzung yn pya: “Pachia sungsanaw kya tyng zungzae oh.” (Jude 21) Ruunaw vawsawnaw ah tung oh ccyh lya maw khe Zahova nynh yn bung nawlang amaw kalang naeku zungzae ahoo cih. Thuasalama pawtemou naeku kho lang?

PACHIA SUNGSAHNAW KHA LIARU

4, 5. Zahova nynh yn sungsahnaw kha pawtemou a lang sah?

⁴ Zahova kalang houh naekunaw liate amaw nynh hohcihciatemou yn sungsah cipaw kha ny thya lang. Zahova nynh aening hanglang yn cyi pya hae paw kha tua tua. Myarya a puithya paw khokhu, lorangsaw hae te ung ry myarya ung zah a puithya paw laephi kha yn pya. Myarya thua paw aepaw, niapaw te thya rarih paw tui kha mah yn pya. Baebu kyate, Zahova nynh amin te ngae-ang thua lang ung paw a ziazae hae kong kha yn ho pya. Tupiaze myarya a sungsahpaw a ccahpaw, Zisu, kha aening hanglang a hingnaw pya khylang laevaw lang yn saw pyanaw liate yn sungsahnaw kha a lang sah. (Johan 3:16) E sithoinaw liate ngae-ang lang ung paw malang ngaehoinaw ah hoi oh.

⁵ Pachia nynh yn pahccyng pyapaw Messiah Penaw nynh vawlang te laephi yng uh cih zah aromaw ze ruunaw vawsawnaw miakaw kha yng thang sah vae cih. Tuh-e Penaw nynh laephi hynh Paradais lang yng tang sah cih zah, ccungccaw miakaw pawpaw kya a ung oh ze mah daenaw te lungtualungpaw tenynh hing lang vae. (Sam 37:29) Zahova nynh yn sungsahnaw kha atulya pawtenynh hing lang cipaw yn ccangpyanaw liate a lang sah. Ka kalang khe saw yng sang oh a ci, te ah sawsangnaw balyng kha ngaepya lang zungzae paccyngku te nynh a ung. Zahova nynh aening lukheih raveih yn sungsah cipaw ccaerarih lang a lang sah.

6. Zahova nynh ae sungsahnaw kha pawtemou na liaru cih?

⁶ Zahova nynh ae sungsahnaw kha pawtemou na liaru cih? Ae cyi pyapaw miakaw hanglang na lungtuanaw kha lang sah. Ngaethya lang ung paw tuh, atunin ccungccaw patae hae tuh lungtuanaw bya ho vae khyh hae. Zisu laevaw lang a la ung lya hawte nynh a loku. Vaekheih tuh, Zisu nynh vaethya kae hae paw luhaw kha a la dang sah hae, thuasalama lukheih kyalya nynh lungtuanaw bya a la ho. (Luka 17:12-17) Aening mah Zisu kya lungtuanaw bya a hopaw tenynh loku bua ah ry cih oh. Zahova kha ah lungtuanaw bya zungzae ho pya ah ry oh.

7. Zahova ah sungsahnaw oh kha pawtemou lang sah lang?

⁷ Aening mah Zahova ah sungsahnaw oh kha lang sah bua ahoo. Zisu nynh a zuitu hae kha nae thinlung balyng, nae tuanaw balyng, nae hingnaw balyng te Zahova kha sungsah oh a ci pya hae. (Matthai 22:37 ria.) Tuh-e tuh paw suilang mou?

8, 9. Zahova ah sungsahnaw oh kha pawtemou lang sah kho lang?

⁸ Zahova tuh ka sungsah ci kyalya te zaw vae tou? Zaw loh khyh. Zahova kha ah thinlung balyng, ah tuanaw balyng, ah hingnaw balyng te ah sungsah oh ze, ah sungsahnaw oh kha cyisanaw te lang sah lang. (Matthai 7:16-20) Pachia ah sungsah lang oh ze, a kawbya hae kha zuilang cite Baebu nynh ccaeteccae lang yn ccangpya. Tuh-e tuh ruu tou? Ruu khyh, Zahova ‘a phungbya hae tuh zuilang myarya aruupaw thuakhyh.’—1 Johan 5:3 ria.

⁹ Zahova kaw ngae lang ze tuh lungpawnaw te ahoypaw hingnaw mue lang. (Isaiah 48:17, 18) Thuasalama Zahova te naeku kho nawlang pawnynhmou yn bung cih? Dotua oh sih.

ZAHOVA KALANG HOUH NAEKUH

10. Zahova kong pawccemou houhhouh ccangku lang a ccang?

¹⁰ Zahova vaeccaw lang pawtemou na tang kho cih? Baebu na ccangkunaw liate Zahova kalang naekunaw zia kha nae nyh cih zah amaw te na vaeccawku naw oh kha mah houh yng lethung vae cih. E vaeccawkunaw tuh mae houh na rua sahchih ry paw hawte nynh a loku. Mae houhhouh a ruanaw lang maething houh phungnua ahoo hawte, Zahova te na vae ccawkunaw oh a tyng kho nawlang mah amaw kong pei ccangku ahoo cih.—Phungtangbya 2:1-5.

11. Baebu ccangkunaw nynh pawtemou thanenaw ae pya?

¹¹ Baebu houhhouh na ccangku lang thua ze, na ccangku hae paw nynh na thinlung solei ae tung mahming cih. Zisu nynh zuitu luning hae kha Baebu profeh kong a ho pah kou hae tuh pawtemou a cyiku cipaw kha tuathui tua. Miming nynh, “Langpi kya ah cciakheih lya oh ze oun hopya lya te Ccathya oun ccaesapya lya kha ah lungkhu kya mae nynh oun upaw hawte thuakhyh zaw?” cite a ho hae.—Luka 24:32.

12, 13. (a) Pachia ah sungsahnaw oh hynh pawmou a cyih kuh thya? (b) Zahova te ah sungsahkunaw oh kha a tyng nawlang pawtemou pei cyi lang?

¹² Zuitu hae nynh ccahthya kong a la thaethya hae tuh milung a tung hae hawte, nang mah Baebu kong he nae thaethya tuh na lung ae tung maming cih. Tuh-e nynh Zahova nylang te amaw kha sungsah lang ae bung cih. Zahova te na sungsahkunaw oh kha na zo sah ry lang khyh.—Matthai 24:12.

¹³ Zahova vaeccaw na tang vae ze tuh, na vaeccawkunaw oh kha a tyng kho nawlang houhhouh zuaku ahoo cih. Zahova te Zisu kong houhhouh na ccangku lang ze, na ccangku paw kha na hingnaw kya pawtemou mang lang cipaw kha mah nae thaethya vae cih. (Johan 17:3) Baebu na ria tukhyhze na ccangku vae ze, hynhte khiaku tua: ‘E nynh Zahova Pachia kong pawmou yn ccangpya? Amaw kha pawccemou ka thinlung balyng, ka hingnaw balyng te sungsah lang a ccang?’—1 Timote 4:15.

14. Zahova ah sungsahnaw oh a tyng nawlang pawtemou sawsangku lang?

¹⁴ Vaeccaw hoypaw na hoi lang ze, amaw te bya pei na ho kuh kheih cih oh zah na vaeccawkunaw oh kha houh a tyng kho nawlang na cyih ry maming cih. Tuhawte, Zahova kalang saw pei ah sang oh ze tuh ah sungsahnaw oh kha houh yng tyng vae cih. (1 Thesalonhae 5:17 ria.) Sawsangnaw tuh vawlang ung paw ah Paaw nynh yn pyapaw ngae-ang lang ung paw lasung nynh thua. Ah thinlung ccaccing te saw kha pei sang lang a ccang. (Sam 62:8) Ah ho mae oh paw bya kha vaeleih vaeleih ho lang ccang khyh, thuasalama ah thinlung kya-e ah ho ry oh paw bya kha nynh holang a ccang. Baebu pei ccangku te ah thinlung ccaccing te saw pei ah sangku lang oh thuaze, Zahova ah sungsahnaw oh kha houhhouh yng tyng vae cih.

ZAHOVA KONG MING HAE MAH HO PAH BUA HAE

15, 16. Phungho ryalaw hynh pawtemou na muih?

¹⁵ Zahova ah sungsahnaw oh kha pei ah tyng sah ry oh ze, ah zynnaw kong kha ming hae mah hopya bua lang hae ahoo. Zahova kong ming hae hopya bua paw tuh aphu myarya tepaw lasung ccangkheih nynh thua. (Luka 1:74) Tuh-e tuh Zisu nynh amepaw Khrihccaw hae yn pyapaw ryalaw ccangkheih nynh a thua. Ah balyng maw te Pachia Penaw thehoypaw kong kha ho lang a ccang. Nang so na ho bua vae tou?—Matthai 24:14; 28:19, 20.

¹⁶ Zuitu Paul nynh phungho ryalaw hynh “sisua” cite la ko zah aphu myarya tepaw cite a la muih. (2 Korinhae 4:7) Na cyi kho paw lungkhu ze azici huapaw tuh Zahova kong te a eenaw kong kha ming hae ho pya bua paw nynh thua. Zahova rya na law paw kha amaw nynh aphu myarya a te sah. (Hebruhae 6:10) Phunghonaw nynh namaw te a ngaetupaw kyacia thanenaw a ung sah, pawccecize namaw te a ngaetupaw tuh Zahova te houh na vaeccawkuh kho cih oh zah zungzae hingnaw na mue kho oh keiccu nynh thua. (1 Korinhae 15:58 ria.) E ryalaw lae ze ngaengangnaw ae pya kho paw a ccangpaw ryalaw ung ung tou?

17. Phungho ryalaw hynh arang mawte pawccemou law ahoo?

¹⁷ Phungho ryalaw hynh myarya azici paw nynh thua. “Thehoypaw phy lang” ccang zah, “phy zungzae lang” mah a ccang. (2 Timote 4:2) Ccungccaw hae nynh Pachia Penaw kong a thae hae ahoo. Baebu nynh, ‘Zahova Pachia nin tuh anae vae, anae vae! Arang te nynh yng ccia!’ A thangnaw tuh ‘nyathya leite solei yng thua cih,’ a ci. (Zefaniah 1:14; Habakkuk 2:3) Zahova nynh hoyleinaw te phebeih paw Setan uhnaw hynh aro lang paw ccyh myarya a nae vae. Tuh-e nin yng thua maw, Zahova ryalaw lang poku khylang ccungccaw hae kha raeringnaw pya hae ahoo.

18. Amepaw Khrihccaw hae ryte Zahova kyalya pawccemou beih lang a ccang?

¹⁸ Zahova nynh aening kha amepaw Khrihccaw hae ryte amaw kyalya kha beih lang a ry. Baebu nynh, “Lukheih te lukheih bungkunaw kha langsakute ahoypaw rya kha lah oh si. Minghae nynh ah daetaw hae zema pyngkheilang ah tungkunaw oh tuh daetaw nang oh si. Tulaeze, Bawipaw nin tuh houhhouh anae vae keiccuze lukheih te lukheih palia kha thawzung pyakuh oh sih,” a ci. (Hebruhae 10:24, 25) Pungkunaw miakaw hynh aening hanglang ahoy huaccepaw a thua nawlang cyi ahoo. Pungkunaw miakaw hynh aening lukheih te lukheih thawzung pyakunaw hanglang ahoy huaccepaw ccyh nynh thua.

19. Khrihccaw unonung unopaw hae nynh sungsahku thya nawlang pawtemou yn bung kho hae?

¹⁹ Pungkunaw kya na pungku bua vae ze, Zahova beih lang ae bung kho cih paw banghoypaw hae kha nae muihkuh cih. Alokuh lei hae paw unonung unopaw hae te nae tungkuh cih oh zah Zahova kha kou hoy lang te ah beih hae paw kha na naw a ccah maming cih. Namaw hawte miming mah a ccing lei hae paw, asei ame thya hae paw nynh thua hae. A cyisei vae hae ze, ngaeethyaku kalang lang paccyngku tenynh a ung hae. (Kolosehae 3:13 ria.) Ahoypaw ziazae hoi hae paw Khrihccaw unonung unopaw hae ryte Zahova pei beihkheih lang ze tuh, miming kha sungsah thya lang hae Zahova kalang naeku kho nawlang ae bung cih hae.

AMEPAW HINGNAW

20, 21. “Amepaw hingnaw” tuh pawmou?

²⁰ Zahova nynh amaw te a vaeccawkuh hae paw miakaw kha ahoyhua ccepaw hingnaw hoi hae sah ci a ry. Baebu nynh malang she tuh a ccingpaw hingnaw te hing lang vae zah atushe-e hingnaw te lokuh vae lang khyh cite yn ccangpya.

²¹ Malang she tuh kum 70 tukhyhze 80 hung hingpaw thua vae leite azungzae hing lang vae. Myarya apuithyapaw Paradais kya a ccingpaw ngedangnaw, daenaw, lungpawnaw te “zungzae hing” lang vae. Kha-e hingnaw kha Baebu nynh “amepaw hingnaw” cite a ci. Zahova nynh amepaw hingnaw kae pya cih oh cite bya yn king, thuasalama amepaw hingnaw kha “vahryng kyngku” lang zah kha-e mue kho nawlang atulya lawlang a ccangpaw rya kha lawlang a ccang.—1 Timote 6:12, 19.

22. (a) “Amepaw hingnaw kha pawtemou varyng kyngku” lang? (b) Zungzae hingnaw tuh pawccemou cyisahnaw te mue kho paw a thua khyh?

²² “Amepaw hingnaw kha pawtemou varyng kyngku” lang? “Uccahoypaw raelang” te “rya hoypaw kya mirum thualang” ahoo. (1 Timote 6:18) E a suilang tuh Baebu kya-e ah ccangku oh paw hawte zui ahoo cinawpaw nynh thua. Thuasalazema, uccahoypaw rae liate amepaw hingnaw mue lang cinawpaw tuh thua khyh. Zungzae hingnaw muenaw e-lang cyisahnaw te mue kho paw thua khyh. E tuh Zahova nynh zyntyngpaw a see hae ‘ngaethya ungsanaw’ te yn pyapaw lasung nynh thua. (Romhae 5:15) E lasung tuh vawlang ungpaw ah Paaw nynh zyntyng hae paw a see hae kha myarya yn pya ry ccahccing paw nynh a thua.

23. Atu lya adingpaw ryalaw poku lang pawccemou ahoo?

²³ Namaw te namaw kha hynhte khiaku tua, ‘Pachia nynh a ho paw a langpi hawte ka beih tou?’ Hangkhakheih rulaeku ahoo cipaw na nyku thya vae ze, amepaw langpi kha zuilang a ccang. Zahova kha doliaku te a kawbya kha ah ngae oh ze tuh Zahova tuh ah rekunaw oh paw lang yng tang vae cih. Amaw kya zyn pou a tyng hae paw a ccungccaw hae kha ahoy leipaw Setan laephi a thangnaw kya te a khung cih hae. Tetuh Zahova nynh a bakingku hawte, Paradais kya zungzae hing kho nawlang yn rae pah thui vae cih. Atu lya adingpaw rya lawlang na poku ze tuh amepaw hingnaw solei na mue kho cih!