CCANGKUNAW 10
Zahova Ccaeccei Hae Pungkunaw Hae Nynh Pawtemou Ae Bung Kho?
Zahova Ccaeccei hae pungkunaw kya na pungkuh boi tou? Na pungkuh boi khyhze vaekheitnaw pungkuh lang na rih kho. Hynhte na tua kho: ‘Pungkunaw hae kya pawmou cyi hae? Pungkunaw hae tuh pawcce azici? Pawcce pungkuh bua lang a ccang?’ E ccangkunaw kya minccangpaw hae ryte pungkukheihnaw nynh Pachia te houh yn naesah kuh kho zah namaw hanglang bungnaw a ungsah cipaw ccangkuh lang.
1. Pungkukheihnaw abapi konglang tuh pawmou?
Minccangpaw hae ryte pungkukheihnaw abapi konglang kha Baebu zeitupaw nynh hynhte a ho: “Zapi pumkunaw kyakhe Bawipaw kha ka thehoysah.” (Sam 26:12) Zahova Ccaeccei hae mah a pungkukheih hae keiccuze mih lung a paw. Laephi pyngpi kya Pachia kha beih lang, thehoypaw lawsah lang te sawsang lang nawtakyh a pungkuh hae. Pungkukheihnaw lang civoi pi hae mah kum takyh a ung.
2. Pungkunaw hae kya pawhaemou ccangkuh kho lang?
Pungkunaw hae kya Baebu kha abapite ccangpyakuh a thua, Baebu e “asuilan a ccaesahpya hae.” (Nehemiah 8:8 kha ria.) Na pungkuh ze Zahova te Zahova kya-e ahoypaw ziazae hae kong nae nyh cih. Na tungvaw a langsapaw Pachia sungsakunaw kha nae nyh tuh Pachia te houh nae naekuh vae cih. Ngaengannaw ungpaw hingnaw muekhonaw lang Pachia nynh ae bungnaw kong mah nae nyh cih.—Isaiah 48:17, 18.
3. Pungkunaw kya minccangpaw hae ryte mungkunaw kyate pawtemou thanenaw na mue kho?
Zahova nynh ‘sungsaku nawlan te ahoypaw rya kha law khylan lungthosaku te pynkheihlan pumkunaw kha umtaw nan oh’ a ci. (Hebru 10:24, 25) Pungkunaw hae kya lukheit te lukheit pekiku ccaccing hae paw te maw hawte Pachia kong a ccangkuh ry hae paw te tungkuh lang. Baebu kya-e thawzung ungpaw bya hae mah thae lang. (Rom 1:11, 12 kha ria.) Piahccahnaa hae ahoyte a phishing kho hae paw ryte bya hokuh kheih ccyh mah na mue cih. E hae tuh Zahova nynh aening kha pyngkheih lang yn pungsah kuh ry paw konglang hae kya-e abang nynh a thua ung!
HOUH CCANGKUH LANG HOUH MUIH LANG
Zahova Ccaeccei hae pungkunaw hae tuh pawtemou, zuakuh te pungkupaw tuh pawcce thanenaw a ung cipaw kha do tua.
4. Zahova Ccaeccei Hae Pungkunaw Hae
She kheitnaw Khrihccaw hae tuh Zahova kha beih lang merarih te a la pungkuh hae. (Rom 16:3-5) Kolose 3:16 kha ria tuhkoute e bakhianaw kha hokuh oh:
She kheitnaw Khrihccaw hae nynh Zahova kha pawtemou la beih hae?
Atu she, Ccaeccei hae tuh beihnaw inn kya merarih te a pungkuh hae. Mih pungkunaw hae tuh pawtemou cipaw ny lang, VIDEO kha pia. Tuhkoute, abuu pungkunaw pungkuh hae paw sahkhung kha do lah e bakhianaw hae kha hokuh oh.
Beihnaw inn kya a cyi hae paw te Kolose 3:16 ria lyakhe paw a lokunaw hae mou na syntaw?
Video kya tuhkhyhze sahkhung kya pungkunaw te asekute paw kong hae mou na ry?
2 Korin 9:7 kha ria tuhkoute e bakhianaw kha hokuh oh:
Zahova Ccaeccei hae pungkunaw kya pawcce phua a khoi khyh hae?
Atu lonaw pungkunaw kya paw kong mou hokuh lang cipaw kha Baebu ae ccangpahtupaw te hokuh oh.
Pungkunaw e paw phianaw mou na ryhua tuhkhyhze paw thanenaw mou a ung hua?
Na nyh tou?
Laephi pyngpi pungkunaw hmuin te a ccyh kha jw.org kya na ccung kho.
Pungkunaw kya phunghonaw, muihsanaw te video hae a ung. Pungkunaw a thonaw te a thangnaw kya lawsah te sawsangnaw a ung
Pungkunaw phianaw abang kya a pungkuh hae paw nynh aphi a pya hae
Innbyng, liaccaw ccangvae, ataw hae paw te imua miakaw kha—cciadue a thua
Zahova Ccaeccei hae pungkunaw kha ame leite na pungkuh kho. Teenaw me phua khoi ung khyh
5. Pungkuh lang zuakuh a hoo
Zisu a innbyng kong tuatua. Kum takyh tuapaw poi kae lang Nazareth khua te Jerusalem khua cia mee 60 leikaw muavaw langpi kya mih ccu te la cceih hae. Luka 2:39-42 kha ria tuhkoute e bakhianaw hae kha hokuh oh:
Jerusalem lang ccia lang zuakuh a hoo cite na tua tou?
Pungkuh lang pawcce zuakuh a hoo?
Zuakuh nape a tuh cih cite na tua tou? Pawkeiccumou?
Baebu nynh Zahova beih lang pungkuhkheih lang myarya azici cite a ci. Hebru 10:24, 25 kha ria tuhkoute e bakhianaw kha hokuh oh:
Merarih te pungkuh lang pawcce a ccang?
CCUNGCCAW ABANG NYNH HO HAE PAW: “Minccangpaw hae ryte pungkuhkheih hoo khyh. Amaw te amaw innvaw kya Baebu riaze a zaw vae.”
Zahova rynaw kha paw Baebu tuhkhyhze paw Baebu phungpaw nynh mou a langsah?
ADYNGNAWTE
Pungkunaw hae nynh Zahova kong houh ny lang, Pachia te houh naekuh lang te minccangpaw hae ryte Pachia beihkheih kho lang yn bung.
Bua Liathuinaw
Zahova nynh pungkuhkheih lang pawcce thaw yn pya?
Zahova Ccaeccei hae pungkunaw hae kya pawhaemou ny lang?
Pungkuh lang ze ccangpaw paw thanenaw hae mou mue lang cite na tua?
HOUH CCUNGCHIH
Pungkuh lang na ri ze so? Tuhte a rih boipaw lukheit pungkuh a ry vae paw kong kha do tua.
Ngawphuepaw lukheit pungkupaw kha ry zah pei pungkukho nawlang pawhaemou a la cyi cipaw do tua.
Pungkupaw kha abang nynh pawtemou a tua hae.
“Beihnaw Inn Kya Pawcce Pungkuh Lang A Ccang?” (Website ccaw)
Zahova Ccaeccei hae pungkunaw kya a pungkuh koute mihoylei hae a pua hae paw phu kya-e ccungccaw lukheit a hingnaw a rulaekunaw kong kha do tua.
“Maethe Ccyngku Leite Paw Kalang Mah Ka Cceih Khyh” (Rawvianaw, July 1, 2014)