CCANGKUNAW 23

Tuipi-ingnaw—Athanepaw Eenaw!

Printed Edition

Zisu nynh Khrihccaw hae tuh tuipi-ing lang ahoo cite yn ccangpya. (Matthai 28:19, 20 kha ria.) Thuasalama tuipi-ing cipaw tuh pawmou? Tuipi-ing kho nawlang pawmou cyi lang?

1. Tuipi-ing cipaw tuh pawmou?

“Tuipi-ing” cipaw tuh “tui lungkhu phungkuhpaw” cite a suilang ungpaw Grik bya kyate yn thuapaw nynh thua. Zisu tuipi a ing lya Jordan Vaw kya phe phungkuh. Tuhkoute “tui lungkhu te yn pou.” (Marka 1:9, 10) Tuhhawte amepaw Khrihccaw hae mah tuipi-ing vae ze tui kya phe phungkuh te ing lang.

2. Tuipi-ingnaw nynh pawmou a langsah?

Tuipi-ingnaw nynh Zahova Pachia kalang mawtemaw pyng ka pyakuh kou vae cipaw kha a langsah. Ccungccaw lukheit nynh pawtemou pyng a pyakuh kho? Pyngpyakuh cipaw tuh tuipi-ing maw makhaete sawsangte Zahova kha zungzae ka beih ry cipaw hopaw nynh thua. Zahova kele kha ka beih cih zah ka hingnaw kya Pachia rynaw kha masaty lang ka nung cih cite byakingkupaw nynh thua. “Amaw te amaw kha vuakuh” lang, Zisu hingnawzia te ccangpyakunaw hae kha ‘zungzae zui’ lang bya a paekuh. (Matthai 16:24) Pyngpyakunaw te tuipi-ingnaw nynh Zahova te unopaw unonung hae temah ahoypaw vaeccawkunaw yn hoisah.

3. Tuipi-ing lang cia kaethung nawlang pawmou cyi lang?

Tuipi-ing maw Zahova kong ccangkuh te zynnaw tyn nawlang zuakuh lang. (Hebru 11:6 kha ria.) Hawnaw te zynnaw yn lungthung vae zetuh Zahova kha houh nae sungsah vae cih. Pachia kong nae ho ry vae cih zah Pachia phunglang temah nae ung ry vae cih. (2 Timote 4:2; 1 Johan 5:3) Pachia rynaw mue lang “Bawipaw te angaekuhpaw hiinnaw te na hiin,” vaeze hingnaw kha pyngpyakuhte tuipi-ing rynaw thinlung yn ung vae cih.—Kolose 1:9, 10.a

HOUH CCANGKUH LANG HOUH MUIH LANG

Zisu tuipi-ingnaw kyate pawmou ny lang, tuipi-ing kho nawlang pawmou cyi lang cipaw kong kha do tua.

4. Zisu tuipi-ingnaw kyate nypaw akong hae

Zisu tuipi-ingnaw kong houh ny nawlang Matthai 3:13-17 kha ria. Tuhkoute e bakhianaw hae kha hokuh oh:

Zisu tuipi-ing lya tuh apui takaw paw tou?
Zisu pawtemou tuipi la ing? Tui bukuh te tou?

Zisu tuh tuipi-ing koute Pachia nynh a pyapaw myarya hoypaw ryalaw kha a tho vae. Luka 3:21-23 te Johan 6:38 kha ria tuhkoute e bakhianaw kha hokuh oh:

Zisu tuipi-ing koute a hingnaw kya pawmou abapi lang la cyi?

5. Tuipi-ingnaw tuh na phyakhopaw eenaw nynh thua

Pyngpyakuh te tuipi-ing lang tuh a thua kho cih tou cite na tua kho. Thuasalama, Zahova kong pou ccangkuh te Pachia kong nae ny kaleih vae zetuh e azicipaw byapaenaw rae lang zynkunaw houh nae hoy vae cih. Tuhte la cyih hae paw kong ny nawlang, VIDEO kha pia.

VIDEO: Zahova Te Vaeccawkuh Lang Zuakuh (1:11)

Johan 17:3 te James 1:5 kha ria tuhkoute e bakhianaw kha hokuh oh:

Ccungccaw lukheit kha tuipi-ing nawlang ungty lang pawnynhmou a bung kho?

A. Sawsangnaw liate Pachia kalang pyngpyakuh cciamang paw nopinung lukheit.

B. E nopinung tuh tui lungkhu phungkuh te Zahova Ccaeccei lukheit lang tuipi a ing.

Zahova kha zungzae ka beih ry cite ho te pyng ah pyakuh oh
Tuipi-ingpaw tuh Pachia kalang pyng ka pyakuh kou vae cipaw kha ccungccaw hae malang langsahpaw nynh thua

6. Tuipi-ing vae zetuh Zahova innbyng lang a thuakuh vae

Tuipi-ing vae zetuh lungngin paw laephipi innbyng lang a thuakuh vae. Pawpawkya ung zemah, pawte ungtuzia a lokuh khyh zemah kae zynnaw lokuh zah Baebu phunglang te nynh kae ung. Sam 25:14 te 1 Peter 2:17 kha ria tuhkoute e bakhianaw kha hokuh oh:

E Baebu ccaw hae liate tuipi-ing langze paw thanenaw hae mou mue lang?

Collage: Tuipi-ing kou paw unonung nynh Khrihccawbuu e amaw te minccang paw hae ahoypaw ccuepekunaw hae kong kha lungpaw te a tua cciamang. 1. Amaw nynh unonung lukheit kha bya a hopya. 2. Amaw nynh a tawpaw unonung kha langpi ccia lang a bung. 3. Amaw nynh mih kong a lokuh lei hae paw a bang hae ryte aepaw a aekheih hae. 4. Amaw nynh ccangpaw unonung bungnaw te pisepaw lukheit kha phung a hopya. 5. Amaw nynh civoipi ccangkheit kya minphuin a lokuh lei hae paw Witness luning ryte selfie a khungkuh hae.

CCUNGCCAW ABANG NYNH HO HAE PAW: “Tuipi-ing lang ka ungty la khyh.”

Nangso tuipi-ing lang ungty lang pou na zuakuh ry tou?

ADYNGNAWTE

Zisu nynh Khrihccaw hae tuh tuipi-ing lang ahoo cite yn ccangpya. Tuipi-ing kho nawlang Zahova tungvaw a tynpaw zynnaw hoi lang, Pachia phunglang te ung lang zah Pachia kalang pyngpyakuh lang.

Bua Liathuinaw

Tuipi-ing cipaw tuh pawmou, tuipi-ing lang pawcce azici?
Pyngpyakunaw te tuipi-ingnaw tuh pawtemou asekuh?
Pyngpyakuh te tuipi-ing kho nawlang pawmou cyi lang?

Ccangkunaw a thang nin:

Eenaw

Tuipi-ing lang ungty khonaw kong kha Phianaw 4 a thangnaw kya-e, “Khrihccawbuu Ryte Phungho Lang Ka Paccynkuh Vae Tou?” te “Tuipi-ing Lang Ka Paccynkuh Vae Tou?,” cihkuhpaw akong hae kha tua lang.

Ccangpaw:

Your other goal

HOUH CCUNGCHIH

Tuipi-ing cipaw tuh pawmou a ho ry, pawmou ho ry khyh.

“Tuipi-ing Cipaw Tuh Pawmou?” (Website ccaw)

Tuipi-ing langcia kaethung lang pawmou cyi lang cipaw kha ria tua.

“Zahova Sungsanaw Nynh Tuipi-ing Lang Lung Yn Thosah” (Rawvianaw, March 2020)

Ccungccaw lukheit kha tuipi-ing lang pawnynhmou a lung a thosah cipaw ria tua.

“Byaccing Kha Mawtemaw Ccung Lang Thaw Ka La Pyakuh” (Rawvianaw, February 1, 2013)

Tuipi-ing lang eenaw nungkuhpaw tuh pawcce athane, pawtemou paccynkuh lang cipaw kha tuatua.

“Tuipi-ing Lang A Ccang Tou?” (Ngawphue Hae Bakhianaw, Uh 2, abalu 37)

a Beihnaw ccangpaw kya tuipi-ing kou vae zemah tuipi bua ing ahoo cih. Pawccemou? Tuh-e beihnaw nynh Baebu byaccing kha ccangpah khyh hae keiccu nynh thua.—Locceihtu 19:1-5 te Ccangkunaw 13 kha do tua.