Ahoypaw Byapaenaw Raekhonaw Zia

Ah balynte byapaenaw hae ah rae oh. Byapaenaw a lunghua tuh hingnaw, Zahova te vaeccawkunaw kya hoynaw tuhkhyhze hoyleinaw a ungsah kho. Tousenawze, pawkyamou ung lang, ahoopaw phua pawtemou mue lang te zu tuhkhyhze vawpaw hoi lang tou cipaw byapae lang ahoo kho. Ahoypaw byapaenaw rae zetuh lungpaw lang ungpaw hingnaw kha mue lang zah Zahova rynaw mah a muekuh kho.

1. Ahoypaw byapaenaw rae kho nawlang Baebu kha pawtemou na mang kho?

Byapaenaw rae maw Zahova bungnaw mue nawlang sawsang kuh. (Phungtangbya 2:3-6 kha ria.) Zahova nynh akong abang kya accaepaw kawbya yn pya. Tuh-e kha zuipaw tuh ahoy huapaw nynh thua.

Baebu kya accaepaw kawbya a ungkhyh ze so? Zahova nynh pou lang ae hroi cih zah “zui lan accanpaw laanpi” kha ae muihsah cih. (Isaiah 48:17) Pawtemou? Baebu phunglang hae kha yn pya. Baebu phunglang hae tuh Pachia tuanaw te muihnaw hae kha a langsahpaw abapipaw byaccing hae nynh thua. Baebu kya-e akong ccangkheit ria langze tuh-e te asekuhte Pachia nynh pawtemou a tua cipaw kha ah ny kho oh. Zahova tuanaw kha ny langze amaw nynh a rypaw byapaenaw rae kho lang.

2. Byapaenaw na rae maw pawhaemou tua lang accang?

Baebu nynh hynhte a ci: “a hawpaw nynh tuh a ccianaw laanpi kha hoyte a doku.” (Phungtangbya 14:15) Asuilang tuh byapaenaw rae maw a ccyh lawkuh te tua lang cipaw nynh thua. Byapaenaw na rae maw namaw te namaw hynhte khiakuh: ‘Paw Baebu phunglang hae mou ka zui cih? Pawte byapae langze mou ahoyhua cih? Ka byapaenaw keiccuze minccang paw hae tungvaw pawtemou ung cih? Abapi tetuh ka byapaenaw keiccuze Zahova so a lungpaw cih tou?’​—Deuteronomy 32:29.

Zahova tuh ahoy, hoy khyh cipaw honaw kaw a hoi. Pachia kawbya hae te phunglang hae kha ahoyte ny lang zah zuipaw tuh athah ahoy phiathyanaw thinlung kha ccangpyapaw nynh thua. Athah ahoy phiathyanaw thinlung nynh maw cyisanaw tuh ame tou me khyh tou cipaw kha yn nysah. (Rom 2:14, 15) Ccangpyakupaw athah ahoy phiathyanaw thinlung nynh ahoypaw byapaenaw rae lang yn bung cih.

HOUH CCANGKUH LANG HOUH MUIH LANG

3. Baebu langhroinaw kha zui

VIDEO: Baebu Phunglang Hae Kha Zui (5:54)

• Ry thahthyh pokunaw kaw cipaw tuh pawmou?

• Zahova nynh ry thahthyh pokunaw kaw kha pawcce yn pya?

• Pachia nynh ahoypaw byapaenaw rae kho nawlang pawmou yn pya?

Baebu phunglang ccangkheit hanglang, Efesa 5:15, 16 kha ria. Tuhkoute akaw lang-e hae kya ‘accyh mangkuh thyanaw’ zia kong hokuh oh . . .

• Baebu ccaw merarihte rianaw.

• zu tuhkhyhze vawpaw hoypaw, nungpaw hoypaw te ccanung ccapaw hoypaw thuanaw.

• khrihccawbuu pungkunaw hae kya pungkunaw.

4. Ahoypaw byapaenaw raenaw lang athah ahoy phiathyanaw thinlung kha ccangpah

VIDEO: “Athyaapaw Athah Ahoy Phiathyanaw Thinlung Kha Kyngkuh” (5:13)

• E video kya, unonung nynh athah ahoy phiathyanaw thinlung kha ccangpya lang, Zahova a rypaw byapaenaw rae lang pawmou la cyi?

Maw nynh byapae langpaw kha pawcce minccang paw kha byapaesah lang a ccang khyh? Hebru 5:14 kha ria tuhkoute e bakhianaw hae kha hokuh oh:

• Minccang paw hae kha byapaesah lang a zoi zemah mawtemaw nynh pawmou phiathya lang?

• Athah ahoy phiathyanaw thinlung kha ccangpya lang, ahoypaw byapaenaw rae lang paw bungnaw mou a ung?

5. Minccang paw hae athah ahoy phiathyanaw thinlung kha sawtua

Lukheit te lukheit byapaenaw tuh lokuh lang khyh. Minccang paw hae e athah ahoy phiathyanaw thinlung kha saw ah tua oh cipaw kha pawtemou langsah kho lang? Akong ccangning kha tuatua:

Akong 1: Tungkunaw hae, beihnaw te asekuh leipaw ryalawnaw hae kya langpatung saepaw leih nawkuh thyapaw unonung lukheit tuh langpatung saepaw nawkupaw a ry lei hae paw unonung hae a ungnaw hae Khrihccawbuu kalang yn nuekuh.

Rom 15:1 te 1 Korin 10:23, 24 kha ria tuhkoute e bakhianaw hae kha hokuh oh:

• E Baebu ccaw hae liate tuh-e unonung tuh pawtemou bya a paekuh kho? Minccang paw lukheit tuh mawte athah ahoy phiathyanaw thinlung a lokuh khyh ccyh kya nang pawmou na cyi kho?

Akong 2: Unopaw lukheit tuh arah kha azawnawte niapaw tuh Baebu nynh khee khyh cipaw a ny zemah arah kha mazi neih khyh. Tungkunaw ccangkheit kya a cceih tuh unopaw hae nynh arah a neih hae paw kha a muih.

Phunghotu 7:16 te Rom 14:1, 10 kha ria tuhkoute e bakhianaw hae kha hokuh oh:

• E Baebu ccaw liate tuh-e unopaw tuh pawtemou bya a paekuh kho? Maw athah ahoy phiathyanaw thinlung nynh kawua leipaw kha minccang paw lukheit nynh a cyipaw na muih ze pawmou na cyih cih?

Ahoypaw byapaenaw yn raesah kho paw akong hae

1. Byapaenaw rae kho nawlang Zahova kalang sawsang.​—James 1:5.

2. E kong te asekupaw phunglang hae kha ny nawlang Baebu, Baebu abapi nungpaw ccah-uh hae kha ccung lah leihla. Muihnaw a lung vae paw Khrihccaw hae kha mah na khia kho.

3. Mawte minccang paw hae athah ahoy phiathyanaw thinlung tungvaw pawtemou thanenaw ung cih cipaw kha tua.

ADYNGNAWTE

Byapaenaw na rae maw Zahova muihnaw kha tua lah maw cyisanaw nynh minccang paw hae tungvaw hoynaw tuhkhyhze hoyleinaw a ungsah cih tou cipaw kha mah tuabia.

Bua Liathuinaw

• Zahova nynh a rypaw byapaenaw pawtemou na rae kho?

• Athah ahoy phiathyanaw thinlung kha pawtemou na ccangpya kho?

• Minccang paw hae athah ahoy phiathyanaw thinlung kha saw ka tua cipaw pawtemou na langsah kho?

HOUH CCUNGCHIH

Pachia te houh ae naesakuh cihpaw byapaenaw hae kha pawtemou na rae kho?

“Pachia Phu-esahpaw Byapaenaw Hae Rae” (Rawvianaw, April 15, 2011)

Zahova nynh hawnaw yn pyanaw zia kha houh ccangkuh.

Zahova Nynh A Minphuin Hae Kha Lang A Hroi Hae (9:50)

Ccungccaw lukheit nynh a ruupaw byapaenaw la raekhonaw kong kha do tua.

Myarya Ahoypaw Hythuanaw Kha Zahova Nynh Aamah A Khang (5:46)

Accaepaw langhroinaw a ung khyh ze Zahova rynaw pawtemou mue kho lang cipaw kha houh ccangkuh.

“Baebu Kawbya Ccangkheit Zungzae Ahoo Tou?” (Rawvianaw, December 1, 2003)