CCANGKUNAW 43
Khrihccaw Hae Nynh Arah Kha Pawtemou Muih Lang A Ccang?
Laephi pyngpi kya, ccungccaw patae tuh arah te asekuhte muihnaw aphuinphuin a hoi hae. Abang tuh mih bang hae ryte a neihkheih thya hae. Mazi a neih lei hae paw a ung hawte rui lang cia a neih hae paw mah a ung. Arah te asekuhte Baebu hopaw tuh pawmou?
1. Arah niapaw tuh a sei tou?
Baebu nynh arah niapaw kha khee khyh. Pachia nynh yn pyapaw lasung hae lungkhu kya ‘ccungccaw lung kha a pawsahpaw misutui’ mah a pabua. (Sam 104:14, 15, NW) Baebu kya-e zyntyng hae paw nopi, pise hae abang mah arah kha la neih hae.—1 Timote 5:23.
2. Baebu nynh arah a neih hae paw kha paw tuanaw mou a pya hae?
Zahova nynh arah nialuepaw te ruipaw kha a khee. (Galati 5:21) Baebu nynh hynhte a ci: “Misutui myarya neih hae paw ryte mungkuh nan oh.” (Phungtangbya 23:20) Tuhkeiccuze ahmaw makhaete—nia lang zemah—tuanaw, byaho, cyisanaw te ngedangnaw kha a roh lang cia nia lang ccang khyh. Mawtemaw uhkuh kho khyh ze nia khyhpaw tuh houh ahoyhua.
3. Arah te asekuhte minccang paw hae byapaenaw kha saw ka tua cipaw pawtemou ah langsah kho oh?
Arah kha nia lang tou, nia lei lang tou cipaw kha mawtemaw nynh byapaenaw raekuh lang. Beihtaraw a neihpaw kha byapia lang a ccang khyh hawte a neih ry leipaw kha mah nia lang nangse lang ccang khyh. (Rom 14:10) Maw nynh arah nia keiccuze minccang paw hae hanglang ruunaw a ungsah lang thuaze nia khyhpaw tuh ahoy. (Rom 14:21 kha ria.) Aening nynh ‘maw hanlan thanenaw kha ccungkuh leite, ming hae hanlan thanenaw kha ah ccung oh.’—1 Korin 10:23, 24 kha ria.
HOUH CCANGKUH LANG HOUH MUIH LANG
Arah ka neih cih tou, hohzeihmou ka neih cih cipaw byapaenaw kya aebung kho cihpaw Baebu phunglang hae kha tuatua. Tuhkoute arah niapaw kha na sungkuh kho khyh ze pawmou na cyi kho cipaw kong kha ccung tua.
4. Ka neih cih tou, ka neih lang khyh tou cipaw kha byapaekuh
Zisu nynh arah niapaw kha pawtemou a muih? Zisu nynh masaty a cyipaw ngaeangnaw kya aphi muih kho a thua. Johan 2:1-11 kha ria tuhkoute e bakhianaw hae kha hokuh oh:
E ngaeangnaw liate arah te arah a neih hae paw kha Zisu nynh pawtemou a muih hae?
Zisu nynh arah niapaw kha a khee khyh keiccuze a neih hae paw kha Khrihccaw hae nynh pawtemou muih lang a ccang?
Thuasalama, Khrihccaw lukheit nynh arah nia kho a thua ci nyn kaete pawpaw ccyh kya mah nia kho a thua cipaw thua khyh. Phungtangbya 22:3 kha ria tuhkoute akaw lang-e hae kya nia lang a ccang tou, ccang khyh tou cipaw kha hokuh oh:
Mawtaw, cycle hae mung lya, seh karihza uccaw hae te ryalaw law ccyh kya.
Ccaw hoi lya.
Arah na neih lang khyh cite sibawipaw nynh ae ci lya.
Hohzeihmou ka neih cih cipaw kha uhkuh kho khyh lya.
Arah niapaw kha upadi nynh a khee ccyh kya.
Arah nia lya uhkuh kho khyh zah arah a sungkuhpaw te pyngkheih lang ung kheih lya.
Kuihkyngkunaw poi hae, ccangpaw poi hae kya arah na dang lang hae a ccang tou cipaw ny nawlang, VIDEO kha pia.
Rom 13:13 te 1 Korin 10:31, 32 kha ria. Tuhkoute e bakhianaw kha hokuh oh:
E Baebu phunglang nynh Zahova nynh a rypaw byapaenaw rae lang pawtemou yn bung kho?
Khrihccaw lukheit nynh arah nia lang tou, nia lei lang tou cipaw kha mawtemaw nynh byapaenaw raekuh lang. A nia thya zemah nia leite a ung ccyh mah a ung kho
5. Hohzeihmou ka neih cih cipaw kha byapaekuh
Arah niapaw kha Zahova nynh a khee khyh zemah nialuepaw tuh a khee cipaw kha syntaw kuh. Pawcce a khee? Hosea 4:11, 18 kha ria tuhkoute e bakhianaw kha hokuh oh:
Ccungccaw lukheit nynh arah patae a nia ze pawmou a cyihkuh kho?
Arah patae nia khyh nawlang pawtemou sungkuh kho lang? Zakawsangsakunaw hoi lang, maw cyi kho leipaw kha nykuh lang ahoo. Phungtangbya 11:2 kha ria tuhkoute e bakhianaw kha hokuh oh:
Hohzeihmou ka neih cih cite khyakupaw tuh pawcce ahoy?
6. Arah patae nialue khyh nawlang sungkhonaw zia
Samaruipaw lukheit arah phiah kho nawlang pawnynhmou a bung cipaw kong kha do tua. VIDEO kha pia, tuhkoute akaw lang-e bakhianaw hae kha hokuh oh.
E video kya, Dmitry nynh arah a rui ze pawmou a cyi?
Amaw nynh arah kha vaeleih la phiah kho tou?
Nyathya tuh arah kha pawtemou la phiah kho?
1 Korin 6:10, 11 kha ria tuhkoute e bakhianaw hae kha hokuh oh:
Arah ruipaw tuh hohcih cia mou seinaw a le?
Samarui hae a rulaekuh kho hae cipaw kha pawnynhmou a langsah?
Matthai 5:30 kha ria tuhkoute e bakhianaw kha hokuh oh:
Kuih tyakupaw cipaw tuh Zahova rynaw mue lang ccangkhakheit vuapaw kha nynh a ho ry. Arah na sue ze pawmou na cyi kho?a
1 Korin 15:33 kha ria tuhkoute e bakhianaw kha hokuh oh:
Arah neihlue hae paw te mungkuh langze pawmou a cyihkuh kho?
CCUNGCCAW LUKHEIT NYNH KHIAPAW: “Arah niapaw tuh a sei tou?”
Pawtemou na phi cih?
ADYNGNAWTE
Zahova nynh ccungccaw hae lungpaw nawlang arah kha yn pya zemah nialuepaw te ruipaw kha tuh a khee.
Bua Liathuinaw
Arah te asekuhte Baebu nynh pawmou a ho?
Arah nialuenaw ri lang a ungnaw hae tuh pawmou?
Arah te asekuhte minccang paw hae byapaenaw kha saw ka tua cipaw pawtemou ah langsah kho oh?
HOUH CCUNGCHIH
Arah te asekuhte kum hawlae hae nynh ahoypaw byapaenaw kha pawtemou a rae kho hae?
Arah na sue ze pawmou na cyi kho cipaw kha ria tua.
Khrihccaw lukheit nynh a rah banang hangte sawsang lang a ccang tou?
“Ccaw Ria Hae Paw Kyate Bakhianaw” (Rawvianaw, February 15, 2007)
Arah la sungkuh khopaw lukheit kong kha “Arah Myarya Neihkhopaw Nynh Ka Thua” cihkuhpaw ccaw kya ria tua.
“Baebu Nynh Hingnaw Hae Kha A Rulaesah Kho” (Rawvianaw, May 1, 2012)
a Arah a sue hae paw tuh arah phiah lang sibawi te a thya hae paw bungnaw ahoo kho. Niapaw sungkuh kho khyh ze mazi nia lang ccang khyh cite sibawi hae nynh tuanaw a pya hae.