Ccungccaw Hae A Bungry Paw Timote

Timote tuh bungrynaw ahoy paw ngaw phue taraw nynh thua. Khotahkhyh cceih zah ccungccaw hae kha ala bung hae. Tuhkeiccuze a hingnaw tuh myarya la hoi. Amaw kong na ny ry oh tou?—

Timote tuh Lystra khua kya nynh ala le thung. A ming nung Lois te a nung Eunis hae nynh adihtaraw lya mawte Zahova kong ala ccang pya hae. Timote yn le tuh ccungccaw hae kha Zahova Pachia kong aho pah ry vae hae.

Ninkheih tuh Paul nynh ‘accang lang phungho lang na cceihbua rytou’ cite ngaw phue paw Timote kha a khia. Timote nynh: ‘Ka cceihbua ry’ a ci! Ccungccaw hae kha bung lang Timote tuh pahccyngku te a ung vae.

Timote tuh Paul te Mesidonia rang kya e Thesalonika khua lang acceihbua vae. Tuh e khua lang tuh myarya saw zah ccu te ccia naw nynh a thua. Kohlung nynh acci kuh hae. Athua hae tuh Zahova Pachia kong kha a ho vae hae. Ccungccaw abang nynh mihthin riazah vawsawnaw apya ry hae. Tuhkeiccuze Paul te Timote tuh accang paw khua lang khe nynh aho vae hae.

Asaw takoh yn ro tuh Paul nynh Thesalonika e uno haekha pawtemou ung hae cipaw Timote kha bua ado sah. Vawsawnaw apya hae paw khua lang bua kilang cipaw tuh rawthung myary a ho cih khah zaw! Thuasalama tuin kya e uno hae hanglang athin phang pawte bua a cceih. Yn ki tuh uno hae mih rya lawnaw myarya ahoi cite Paul kha aho pya!

Timote tuh Paul te akum hynh seepi ryalaw ala lah kheih hae. Tuhkeiccuze khrihccaw bu bungtu lang Timote nynh ahoi hua cite Paul nynh ccaw a la zei. Pawcce cize Timote tuh Zahova te ccungccaw hae kha asungsah keiccuze nynh thua.

Imua hae, nangning soh ccungccaw hae kha na sungsah cih oh tou? Mihming khah Zahova kong na ho pah ry cih oh tou?— Ccungccaw hae kha sungsahte Pachia kong na ho pya oh zetuh Timote hawte lungtuanaw te ahoipaw hingnaw kha na mue cih oh!