CCANGKUNAW 37
Ryalaw Te Phua Kong Baebu Nynh A Hopaw
Ryalaw tuhkhyhze phua hanglang na thingphang boi tou? Aepaw niapaw hanglang ryalaw zuakuh la liate Zahova kha beih lang cipaw tuh a ruu kho. Baebu nynh yn bung kho paw zui lang a ccangpaw tuanaw yn pya.
1. Ryalaw te asekuhte Baebu nynh pawmou a ho?
Pachia nynh aening kha ryalaw kya ah lung yn pawsah ry. Baebu nynh hynhte a ci “reihkute ryalawpaw kya lungpawnaw muepaw laeze ahoy huapaw um vae khyh.” (Phunghotu 2:24) Zahova tuh ryalaw a zuakuh. Aening mah Pachia dosuikuh te ryalaw zuakuh langze tuh Pachia a lungpaw cih zah aening mah ah lungpaw cih.
Ryalaw tuh abapipaw nynh thua. Thuasalama Zahova beihpaw laeze ryalaw kha masaty lang nunglang ccang khyh. (Johan 6:27) Pachia kha masaty lang nunglang ze ahoo hae paw kha kae bung cih oh cite bya yn kingpya kuh.
2. Phua te asekuhte ataraw te muihnaw tuh pawmou?
‘Phua nynh yn thungkhaw’ cite Baebu nynh a ci. Thuasalama phua hoi kyalya te lungpaw kho leilang cite mah raeringnaw yn pya. (Phunghotu 7:12) Phua duaa leilang, ‘na hoi oh paw uccaw hae khate nae lung ngaengankhae kuh oh’ cite thaw yn pya. (Hebru 13:5 kha ria.) A ungpaw te lung ngaengankhae kuh keiccuze rynaw ccing khyh zah lungronaw cipaw ung khyh. Ahoo leite lae ungkuh khyh. (Phungtangbya 22:7) Phua te zuenaw hae, ame leipaw langpi te hoirung lang zuakuh keiccuze ruunaw tung cipaw ung khyh.
3. Phua kha maw hanglang thua leite pawtemou mang lang?
Zahova tuh myarya a hysahpaw Pachia nynh thua. Aening mah ‘a hysahpaw thuate neethungbua lang paccynku naw’ liate Pachia kha ah dosuinkuh oh. (1 Timote 6:18) Khrihccawbuu, bungnaw ahoo hae paw ccungccaw hae, abapite zynnaw a lokuh hae paw kha bungnaw lang phua kha hysah te ah mang kho oh. Ah pya oh paw phua alung azya kha thua leite thinlung kha Zahova nynh abapi lang a nung. Thinlung kyate hysah te pya langze ahmaw mah ah lungpaw zah Zahova mah a lungpaw cih.—Locceihtu 20:35 kha ria.
HOUH CCANGKUH LANG HOUH MUIH LANG
Ryalaw tungvaw amepaw muihnaw te ngaengankhaekunaw thanenaw hae kong kha do tua.
4. Ryalaw lawnaw zia te Zahova kha phu-esah
Zahova te ccuepekunaw nynh ryalaw te asekuhpaw muihnaw tungvaw thanenaw ung lang a ccang. VIDEO kha pia, tuhkoute akaw lang-e bakhianaw hae kha hokuh oh.
E video kya ryalaw tungvaw Jason muihnaw te asekuhte pawkhamou na ry?
Jason nynh ryalaw kha amaw a ccyh te ryalaw kho nawlang pawmou a cyi?
Kolose 3:23, 24 kha ria tuhkoute e bakhianaw kha hokuh oh:
Ryalaw te asekuhpaw ah muihnaw tuh pawcce azici?
Ryalaw tuh azici. Thuasalama Zahova beihpaw kha masaty lang houh nung lang a ccang
5. Lung ngaengankhaekunaw nynh thanenaw yn pya
Ccungccaw patae nynh phua patae mue nawlang thawzung balyn te a zuakuh hae. Thuasalama Baebu ccaw nynh hynhte tuanaw yn pya. 1 Timote 6:6-8 kha ria tuhkoute e bakhianaw kha hokuh oh:
Baebu ccaw nynh pawtemou tuanaw yn pya?
Aening kya phua patae ah hoi khyh oh zemah ah lungpaw kho. VIDEO kha pia, tuhkoute akaw lang-e bakhianaw kha hokuh oh.
E innbyng hae tuh phua patae a hoi khyh hae zemah pawcce mih lung a paw?
Patae ah hoi vae oh zemah houh rylang ze so? Zisu nynh tuh-e tuh ri lang a ung cipaw kha tousenaw te a ho. Luka 12:15-21 kha ria tuhkoute e bakhianaw kha hokuh oh:
Zisu nynh a hopaw tousenaw kyate pawmou na ccangku?—Adihpaw 15 kha do.
Phungtangbya 10:22 te 1 Timote 6:10 kha ria lah dokhia. Tuhkoute e bakhianaw hae kha hokuh oh:
Pawmou houh azici hua cite na tua? Zahova te ahoypaw ccuepekunaw tou phua patae hoipaw tou? Pawcce?
Phua patae hoi rynaw nynh paw piahccahnaa hae mou a ungsah?
6. Zahova nynh ah hoo oh paw kha yn pya cih
Ryalaw te phua muelang a ruu ccyh kya Zahova tungvaw zynnaw ung tou ung khyh tou cipaw a nyhkuh. Tuh-e ccyh kya pawmou cyi kho lang cipaw ny nawlang, VIDEO kha pia, tuhkoute akaw lang-e bakhianaw hae kha hokuh oh.
E video kya-e unopaw tuh paw ruunaw hae mou a la tung?
Ruunaw hae kha tae kho nawlang pawmou a la cyi?
Matthai 6:25-34 kha ria tuhkoute e bakhianaw kha hokuh oh:
Zahova nynh amaw kha masaty lang a nung hae paw kha paw byaking mou a pya hae?
CCUNGCCAW ABANG NYNH HO HAE PAW: “Innbyng hanglang ryalaw ka zuakuh cih. Naw takyh ka pungkuh kho lang khyh.”
Zahova beihnaw kha masaty lang nungpaw tuh ahoy huapaw byapaenaw nynh thua cipaw kha paw Baebu nynh mou ae zynsah kho?
ADYNGNAWTE
Ryalaw, phua hoi lang tuh ahoopaw nynh thua, thuasalama Zahova beihnaw hanglang a khawkuhpaw thuasah lang ccang khyh.
Bua Liathuinaw
Ryalaw te asekuhte ahoypaw muihnaw hoi lang pawnynhmou ae bung kho?
Lung ngaengankhaekunaw nynh pawtemou thanenaw ae pya?
Zahova nynh a minphuin hae kha a bung cih hae cihkuhpaw byaking kha ka zyn cipaw pawtemou na langsah kho?
HOUH CCUNGCHIH
Baebu nynh phua tuh hoy khyh cite a cih tou cipaw ria tua.
“Phua Tuh Hoyleinaw A Phuinphuin A Thonaw Tou?” (Website ccaw)
Pawte pyapaw mou Pachia nynh a ry cipaw ccangkuh tua.
Phua te zuenaw tuh ri lang ungleipaw zuenaw tou?
Phua te a zuepaw, a ruhthyapaw ccungccaw lukheit pawcce a rulaekuh cipaw ria tua.
“Marang Taekunaw Hae Kha Myarya Ka La Ry” (Rawvianaw, November 1, 2011)