Pachia Muihnaw Kya Pawtemou Thyaa Kho Lang?

Sungsakunaw hoipaw nung lukheit nynh a ccapaw taraw kha siainn lang ccia lang a paccynpah cciamang cite na mihmae kya ungsah kuh tua. Tui sing zah a thyaapaw uccaw kha a kisah. Tuh-e nynh imua kha a ngedangsah apiaze a nung a paaw hae nynh ahoyte peki hae cipaw kha a langsah. Tuhhawte, sungsakunaw hoipaw ah Paaw Zahova nynh aening kha​—pyngsaw lang te ziazae lang temah yn thyaasah ry. Thyaanaw nynh aening kha thanenaw yn muesah hawte Pachia the mah a hoysah.

1. Pyngsaw lang pawtemou thyaa kho lang?

Zahova nynh hynhte a ci: “Nanning mah thyaa oh.” (1 Peter 1:16) Pyngsaw langte ziazae langte mah thyaa ahoo. Pyngsaw thyaa nawlang merarihte tui singkuh lang. Uccaw, inn, mawtaw te cycle hae kha thyaararih lang nung lang. Beihnaw Inn thyaa nawlang ah bung kho oh. Pyngsaw lang thyaanaw tuh Zahova kha thehoysahpaw nynh thua.​—2 Korin 6:3, 4.

2. Athyaa leipaw paw ziazae haemou sihae kuh lang?

“Pynsaw te muisaw nungsikunaw miakaw kyate ccikankuh” lang Baebu nynh thaw yn pya. (2 Korin 7:1) Tuhkeiccuze, pyngsaw te thinlung kha a nungsisakuhpaw miakaw kha sihae kuh lang. Athyaa leipaw tuanaw hae kha taening thyhte sihae kuh lang. Tuhte ze nynh ah tuanaw hae tuh Pachia a rypaw thua kho cih. (Sam 104:34) Anungsikuhpaw bya hopaw mah sihae kuh lang.​—Kolose 3:8 kha ria.

Pawnynhmou pyngsaw lang tuhkhyhze ziazae lang kya yn thusah kho? Pyngsaw a thusahkhopaw maezu, koinza, khaini te ruinaw ihsei hae kha ah sihae kuh oh. Tuh-e nynh ah nge houh yn dangsah zah hingnaw lasung kha phu ka tesah cipaw ah langsah oh paw nynh thua. Mawtemaw pyngsaw hoysakunaw, athunangpaw sahkhung te ccaw hae dopaw cita hawpaw ozia hae kha rulaekuh te ziazae lang kya thyaanaw lang ah zuakuh oh. (Sam 119:37; Efesa 5:5) E ziazae hae tae lang a ruu zemah Zahova nynh yn bung kho.​—Isaiah 41:13 kha ria.

HOUH CCANGKUH LANG HOUH MUIH LANG

3. Pyngsaw lang thyaanaw nynh Zahova the a hoysah

Langmaw Israel hae a pya hae paw kawbya hae kya thyaanaw kha Zahova nynh pawtemou a muih cipaw muih kho a thua. Exodus 19:10 te 30:17-19 kha ria tuhkoute e bakhianaw hae kha hokuh oh:

• E Baebu ccaw hae liate pyngsaw lang thyaanaw kha Zahova nynh pawtemou a muih?

• Pyngsaw lang thyaanaw lang pawhaemou cyi kho lang?

Pyngsaw lang thyaanaw lang a ccyh te thawzung pya ahoo. Pawpaw kya a ung kuh zemah, a hoipaw thuasah a ryachi ccihpaw thuasah thyaararih lang a ungkuh kho. VIDEO kha pia, tuhkoute akaw lang-e bakhianaw kha hokuh oh.

VIDEO: Pachia Nynh A Thyaapaw Kha A Sungsah (4:10)

• Maw hoi hae paw kha thyaararih lang nungpaw nynh phunghonaw kha pawtemou the a hoysah?

4. Ahoy leipaw ziazae hae kha roh

Maezu, ruinaw ihsei hae kha hoysanaw langte na mang ze e ahoy leipaw ziazae hae kha roh lang myarya a ruu cipaw na nyh maming cih. Pawnynhmou ae bung kho? E ahoy leipaw ziazae hae nynh nang kha pawtemou ae rosah kho cipaw kha tuatua. Matthai 22:37-39 kha ria tuhkoute e kong hae kha hokuh oh. Maezu zupaw, ruinaw ihsei mangpaw nynh . . .

• ccungccaw lukheit te Zahova ccuepekunaw kha pawtemou a rosah kho.

• ccungccaw lukheit a innbyng te minccang paw hae kha pawtemou a ungsah kho hae.

Ahoy leipaw ziazae hae ro lang paccyn kuh.a VIDEO kha pia.

VIDEO: Sungkukhonaw Hoi Lang Zuakuh (2:47)

Filipi 4:13 kha ria tuhkoute e bakhianaw kha hokuh oh:

• Merarihte sawsangnaw, Baebu leihlanaw, pungkunaw hae nynh ahoy leipaw ziazae hae ro lang pawtemou thawzung yn pya kho?

5. Athyaa leipaw tuanaw te ziazae hae kha dou

Kolose 3:5 kha ria tuhkoute e bakhianaw hae kha hokuh oh:

• Athunangpaw sahkhung te ccaw dopaw, sexting (athunangpaw sahkhung te ccaw hae kha phone te kypaw), mawtemaw pyngsaw hoysakunaw hae tuh Zahova muihnaw kya thyaa khyh cipaw pawtemou ah ny oh?

• Ziazae thyaa nawlang Zahova nynh yn ngiapaw tuh athane cite na tua tou? Pawccemou?

Athyaa leipaw tuanaw hae doukhonaw kong kha ccung tua. VIDEO kha pia.

VIDEO: Thyaa Nawlang Zuakuh (1:51)

Ziazae thyaa nawlang byapaenaw hawte cyi lang a ccang cipaw kha Zisu nynh tousenaw mangte yn ho pya. Matthai 5:29, 30 kha ria tuhkoute e bakhianaw kha hokuh oh:

• Zisu nynh pyngsaw vaemaw mue lang yn cyisahpaw thua leite cyisanaw te langsah lang ahoo cipaw kha nynh a ho ry. Athyaa leipaw tuanaw tua khyh nawlang pawmou cyi lang?b

Athyaa leipaw tuanaw hae dou lang na zuakupaw kha Zahova nynh phu a tesah. Sam 103:13, 14 kha ria tuhkoute e bakhianaw kha hokuh oh:

• Ahoy leipaw ziazae kha roh lang na zuakuh ze e Baebu ccaw nynh pawtemou thawzung ae pya?

Ahoy leipaw ziazae bua cyisei zemah ungtaw nang!

‘Ka sung zah ka ungtaw ry vae’ cite tua lang a zoi kho. Thuasalama e kong hynh tuatua: Ccuenaw kya a taekuh buapaw lukheit pawkuh sei zah a khuhlya kuh ze a sung vae, atakaw te bua ccue lang cipaw a ho rypaw thua khyh. Tuhhawte, ahoy leipaw ziazae hae bua cyiseipaw tuh e ziazae hae ka dou kho vae khyh, ka zuakuhpaw miakaw tuh alakaw lang nynh a tang vae cipaw a ho rypaw thua khyh. Ahoy leipaw ziazae bua cyiseipaw tuh a cyihkuh thyapaw nynh thua. Tuhkeiccuze ungtaw nang! Zahova bungnaw te ahoy leipaw ziazae hae kha na dou kho.

ADYNGNAWTE

Pyngsaw, thinlung, ziazae hae a thyaa lang pou ah ung oh zetuh Zahova rynaw mue lang.

Bua Liathuinaw

• Thyaa lang pawcce myarya azici?

• Pyngsaw lang kya pawtemou a thyaakuh kho?

• Na tuanaw te na ziazae hae thyaa lang pawtemou na cyi kho?

HOUH CCUNGCHIH

Na hoirung khyh zemah pyngsaw lang kya thyaa nawlang paw azoipaw hae mou na cyi kho?

Ngedangnaw Te Thyaanaw —Kuih Singkunaw (3:01)

Maezu sungkuh kho nawlang pawmou cyi lang cipaw kha ria tua.

“Pawtemou Maezu Sungkuh Kho Lang” (Thaekuh!, May 2010)

Athunangpaw sahkhung te ccaw hae a hoyleinaw kong kha ria tua.

“Athunangpaw Sahkhung Te Ccaw—Ri Lang Ung Tou, Ung Khyh Tou?” (Rawvianaw, August 1, 2013)

Athunangpaw sahkhung suepaw kha la taekhopaw pise paw kong kha ria tua.

“Avae Patae Ka Sung Zemah Nyathya Tuh Ka Tae Kho” (Rawvianaw No. 4 2016)