CCANGKUNAW 34
Zahova Ah Sungsah Oh Cipaw Kha Pawtemou Ah Langsah Kho Oh?
Baebu ccangkuh takaw lya laeze Zahova Pachia te houh ka naekuh vae cite na tua tou? Pachia te houh na naekuh ry tou? Zahova kha houh na sungsah ze Zahova nynh mah nang kha houh ae sungsah cih zah pe ae ki cih cipaw kha ning nang. Tuhte thua langze Zahova kha ka sungsah cipaw pawtemou na langsah kho?
1. Zahova ah sungsah oh cipaw kha pawtemou ah langsah kho oh?
Zahova ah sungsah oh cipaw kha a kaw ngaenaw liate ah langsah oh. (1 Johan 5:3 kha ria.) Pachia nynh a kaw ngae lang yn nangse khyh. A kaw ngae lang, ngae lei lang cipaw mawtemaw pokunaw khue yn pya. Pawcce? Zahova nynh “thinlung te” kaw yn ngaesah ry keiccu nynh thua. (Rom 6:17) Taevue keiccu thua leite sungsah keiccu kaw ngaepaw kha a ry. Pachia a rypaw kha cyi te a ryleipaw kha sihaekunaw liate Zahova kha ka sungsah cipaw langsakhonaw lang e ccah-uh phianaw 3 te 4 nynh ae bung kho.
2. Zahova ah sungsanaw kha langsah lang pawcce a ruu kho?
“Miding tuh vawsawnaw patae a teing.” (Sam 34:19) Ah balynte pyngsaw ccingleinaw hae kha ah dou oh. Phua vawsawnaw, dingleinaw te ccangpaw ruunaw hae kha mah ah tung kho oh. Ruunaw tung ccyh kya Zahova nynh yn cyisah rypaw kha cyi lang a ruu kho. Pawccecize ame leipaw langpi zui lang houh a zoi keiccu nynh thua. Thuasalama Zahova bya kha zyntyn te na zui zetuh pawpaw laeze Pachia kha houh ka sungsah, Pachia tungvaw rou nynh zyn ka tyn cipaw kha na langsahpaw nynh thua. Pachia nynh mah na tungvaw zyn a tyn cih. Amaw nynh mazi ae vua lang khyh.—Sam 4:3 kha ria.
HOUH CCANGKUH LANG HOUH MUIH LANG
A kaw na ngaenaw tuh Zahova hanglang abapipaw nynh thua cipaw te Pachia tungvaw houh zyntyn nawlang pawnynhmou ae bung kho cipaw kha tuatua.
3. Setan nynh sei ae be
Job Baebu ccaw liate, Setan nynh Job kele thua leite Zahova a beih ry hae paw miakaw kha mah sei a be hae. Job 1:1, 6–2:10 kha ria tuhkoute e bakhianaw hae kha hokuh oh:
Setan bya liate, Zahova kaw kha Job nynh pawcce a ngae?—Job 1:9-11 kha do.
Namaw balyn te ccungccaw miakaw kha Setan nynh pawtemou sei a be hae?—Job 2:4 kha do.
Job 27:5b kha ria tuhkoute e bakhianaw kha hokuh oh:
Job nynh Zahova kha a sungsah ccaccing cipaw pawtemou a langsah?
Zyntynnaw liate Zahova kha a sungsah cipaw Job nynh a langsah
Zyntynnaw liate Zahova kha ah sungsah oh cipaw ah langsah oh
4. Zahova a lung kha tuasah
Phungtangbya 27:11 kha ria tuhkoute e bakhianaw hae kha hokuh oh:
Hawnaw te a kaw na ngae ze Zahova tuh pawtemou ung cih? Pawcce?
5. Zahova tungvaw zyn na tyn kho
Zahova kha ah sungsah oh zetuh amaw kong minccang paw hae kha ah hopah ry cih oh. Amaw tungvaw zyn ah tyn oh keiccuze ruunaw laku kya mah ah ho oh. VIDEO kha pia, tuhkoute akaw lang-e bakhianaw hae kha hokuh oh.
Zahova kong minccang paw hae hopya lang na ruusah boi tou?
E video kya Grayson kha rinaw taenaw lang pawnynhmou a bung?
Pachia nynh a sungsah hae paw kha sungsah te a hua hae paw kha hua lang zetuh Zahova tungvaw zyntyn lang houh a zoi. Sam 97:10 kha ria tuhkoute e bakhianaw hae kha hokuh oh:
Na ccangkuh vae hawte Zahova nynh pawhaemou sungsah zah pawhaemou a hua?
Ahoypaw kha sungsah te ahoy leipaw kha hua thya nawlang pawnynhmou ae bung kho?
6. Zahova kaw ah ngae oh ze thanenaw ah mue oh
Zahova kaw ngaepaw tuh zungzae thanenaw a ung. Isaiah 48:17, 18 kha ria tuhkoute e bakhianaw hae kha hokuh oh:
Zahova nynh aening hanglang pawnynh ahoyhua cipaw kha zungzae a nyh cipaw zynngan ung tou? Pawccemou?
Baebu te amepaw Pachia Zahova kong na ccangkuh keiccuze paw thanenaw mou na mue vae?
CCUNGCCAW ABANG NYNH HO HAE PAW: “Ka cyisanaw tuh Pachia hanglang azici khyh.”
Ah cyisanaw hae nynh Zahova a lungpaw kho zah a ngae mah a thah kho cipaw ccaesah lang paw Baebu ccaw mou na mang kho?
ADYNGNAWTE
Zahova kaw ngaenaw, ruunaw laku kya zyntynnaw liate Zahova ka sungsah cipaw na langsah kho.
Bua Liathuinaw
Job kyate pawmou na ccangkuh kho?
Zahova ka sungsah cipaw pawtemou na langsah cih?
Zahova tungvaw zyntyn nawlang pawnynhmou ae bung cih?
HOUH CCUNGCHIH
Zahova te Khrihccaw buu tungvaw zyntynkhonaw kong kha ccung tua.
Setan nynh ccungccaw hae kha pawtemou sei a be hae cipaw kha ria tua.
“Job Nynh Dingnaw A Tynsah” (Baebu—Paw Thungpang Mou A Ung? phianaw 6)
Imua hae nynh Zahova a sungsah hae cipaw a langsakhonaw hae kha do tua.
Ruibang nangsenaw a tung hae paw ngawphue hae nynh Zahova tungvaw pawtemou zyntyn kho hae?