Ae Ning A Ny Ry Oh Paw Baphi

Imua hae milae nyleilang aru te hopaw bya kha paw cih kuh mou?—a “Baphi bya cih kuh.” Baebu kya mah baphi bya a ung. Pachia kya te ynthua paw athua keiccuze “a phutepaw baphi” a cih kuh. Langmaw lya a hung ccungccaw nynh sang mah ala ny khyh hae keiccuze baphi a cih kuh. E baphi kong lang hynh vawccungcaw hae nynh hae hei a nyh ry hae. Nang ningso na nyh ry khyh oh tou?

Lang maw lya ze Pachia nynh pise te nopi a la rae hae. Mih min tu Adam te Evua a ci ku hae. Pachia nynh mihming kha myarya a puithya paw Edin khokhu kya ala nung hae. Adam te Evua nynh Pachia kaw ala ngae hae ze tuh mihmaw te mihccaw hae kya cia laephi pyngpi tuh myarya a puithya paw paradis lang a rae kho ci hae. Edin khokhu kya zungzae a ung ci hae. Thuasalama Adam te Evua nynh pawmou la ci hae, imua hae na ny oh tou—

Adam te Evua nynh Pachia bya la ngae khyh hae. Tuhkeiccuze aening mah paradis kya a ung kho vae khyh oh. Thuasalama Pachia nynh laephi tuh myarya a puithya paw Paradis lang ynrae pathui vae cih za lungtua lungpaw te laephi ccungccaw miakaw nynh ungnaw lang vae. Pawtemou Pachia nynh ynrae pathui cih? Kum hynh seepicia e hynh hung ccungccaw nynh mah lah nyh khyh hae. Tuhkeiccuze nynh baphi a ci kunaw paw a thua.

Zisu laevaw lang ynrung lyaze e baphi kong lang hynh hoite aho pya hae. Tuh e baphi tuh Pachia Penaw nynh thua. Na Penaw thua ccahvae sah cite saw lasang oh aci pya hae. E Penaw rou nynh laephipi tuh myarya a puithya paw Paradis lang ynrae pathui cih.

E baphi kong na ny vae oh keiccuze imua hae nae lung tua tou?— Zahova bya a ngae haepaw rou nynh Paradis kya a ung cihae cipaw kha ning nang oh. Zahova bya ala ngae haepaw patae la ung hae cite Baebu nynh ynho pya. Mihming kong lang na nyh ry oh tou?— Mihming tuh a hung hae mou, mihming te lo ku kho nawlang pawmou cilang cipaw pou ria tua oh sih.