Zahova Lungpaw Sary Paw Rebeka

Rebeka tuh Zahova a sungsah paw luhkheih nynh a thua. A vawpaw min tuh Isah acih kuh. Isah mah Zahova a sungsah paw nynh a thua. Rebeka te Isah hynh pawtemou latung ku hae? Zahova a sungsah naw Rebeka nynh pawtemou langsah zah pawmou a ci? Amaw kong lang do tua oh sih.

Isah a paw te a nung tuh Abraham te Sarah nynh thua. Mihming tuh Khanaa rang nynh ala ung hae. Khanaa ccungccaw hae tuh Zahova beih khyh hae. Tuhkeiccuze Abraham nynh a ccahpaw zulang kha Zahova abeih paw rou nynh ady pya ry. Te Abraham nynh a shepaw luhkheih Haran rang lang khe sawzah a ccahpaw zulang paw kha a ccung sah. A shepaw min tuh Eliaza a thua kho.

Te Eliaza tuh Abraham a she hae ryte myarya asaw naw lang khycce a cceih vae hae. Ae lang pawte lahsung lang paw kha patae phukuh haezah Kalauh sahaw tungvah lang a khang hae. Isah hanglang Eliaza nynh paw tahaw paw nopi mou a ccung pya? Haran rang he athua hae tuh tuihkhaw ccangkheih pe khe a hae ung hae. Pawccecize tuihkhaw kalang Haran nopi hae nynh tui palei yn the cih hae cipaw kha Eliaza nynh a ny keiccu. Te Eliaza nynh Zahova kalang hynhte saw asang: ‘Nopi luhkheih kha ka maw te Kalauh hae hanglang tui yngpya bua kacih ngawzah yn pya bua paw nopi nung kha Pachia na maw nynh nae popya paw cite katua cih’ aci pya.

Rebeka tuh tuihkhaw pelang he ynthua vae. Baebu nynh Rebeka tuh myarya a puithya a ci. Eliaza nynh nialang paw tui khah a ngia kuh tuh Rebeka nynh kae pya cih aci pya. Kalauh hae hanglang balyng kaethe pacih aci pya. Kalauh hae tuh tui patae aneih kho hae paw athua keiccuze Rebeka tuh tui athe naw pawcihmou abang cih tua tua oh. Ryalaw azua ku paw Rebeka a zuh hynh na muih oh tou?— Saw asang thyh hawte Zahova nynh aphi pya keiccuze Eliaza a ngae ang myarya thua.

Eliaza nynh Rebeka kha myarya a phute paw lahsung patae a pya. Rebeka nynh mah Eliaza te abang hae kha Mih inn lang thua lang ako hae. Inn kya he athua hae tuh Eliaza nynh Abraham nynh a sawnaw kong te Zahova nynh saw a sangnaw athae pya naw kong kha aho pya vae hae. Tetuh Rebeka kha a innbyng hae nynh mah Isah zulang mih naw a ccah vae.

Rebeka nynh so Isah te kuihkyngku lang ry ve ma?— Rebeka nynh mah Eliaza hynh Zahova nynh ynsaw paw cipaw a ny. Tuhkeiccuze a innbyng hae nynh Khanaa rang lang ccialang zah Isah te kuih na kyng kuh ry tou cite a khia hae. Ka kyng kury, ka cceih bua cih a cipya hae. Tetuh Eliaza kya palou acceih bua vae. Khanaa rang he athua hae tuh Isah te kuih akyng ku vae hae.

Rebeka tuh Zahova a rynaw haw khate a tua keiccuze hythua patae a ccou. Zahova nynh Rebeka tuh hythua pyaza kum hynh seepi aro tuh a-cihang kyate Zisu tuh ynpui vae! Nang ning mah Rebeka hawte Zahova lung na paw sabua oh zetuh hythua patae ae pya bua ci oh.