PIACHIHPAW HAE
1 ZAHOVA
Pachia min tuh Zahova nynh thua. A min asuilang tuh “Ungsatu” cipaw nynh thua. Zahova tuh alesae huaccepaw te atyng are raetu Pachia nynh thua. Cyilang cite bya a paeku thyh hawte atyng are cyi kho naw thungnaw a hoi.
Hebruhae Baebu kya, Pachia min kha ccahfang ccangpali te nynh a la zei hae. Mihraw Baebu kya, Pachia min kha YHWH tukhyhze JHVH cite a leih hae. Masaty Hebruhae Baebu kya, Pachia min kha a vae 7,000 hang a ung. Laephi vawlang-e ccungccaw hae nynh Zahova min kha mih maw mih bya honaw ccahfang thyhte a phuinphuin te a ko hae.
2 BAEBU TUH “PACHIA HYSAWNUAPAW” NYNH THUA
Baebu zeisatu tuh Pachia nynh thua, thuasalama Baebu zeilang kha ccungccaw hae nynh a mang. Tuh-e tuh paaw nynh a ccapaw kha a cyi ry paw te a tuanaw hae kha a zei sah paw hawte nynh a loku. Pachia nynh Baebu zeitu hae kha a tuanaw hae zei sah khylang a thyamuihsaw kha a mang. Miming kha Pachia thyamuisaw nynh langpi a phuinphuin te a cciakhae hae, ccyhkhakheihze maangccang tukhyhze maanglang te a muih sah hae.
3 PHUNGBYA HAE
Phungbya nynh Baebu kya-e amepaw kong kha yn ccangpya. Tousenawze, phungbya nynh, “Hawiccaw hoyleipaw nynh ziazae hoypaw a ro sah,” cite yn ccangpya. Tukeiccuze hawiccaw hae nynh ahoypaw tukhyhze ahoy leipaw uh-ccaw yn cyi sah kho hae. (1 Korinhae 15:33) Te phungbya nynh, “Ccungccaw nynh a tu thyte a rue cih,” cite yn ccangpya. Hoynaw rae ze hoynaw muelang zah hoyleinaw rae ze hoyleinaw tung lang.—Galatihae 6:7.
4 HOTY BYA
Hoty bya tuh Pachia kyate yn thua paw nynh thua. Tuh-e nynh Pachia rynaw, ozia, a kawbya tukhyhze Pachia bapaenaw hae kong yn ny sah. Malang ze yng cyihkuh lang paw kong mah yn hopyaty. Baebu kya-e hoty bya patae tuh a ccing lalia vae.
5 MESSIAH KONG HOTY BYA HAE
Messiah kong Baebu hoty bya hae tuh Zisu lukheih kya nynh yn ccing. “Messiah kong hoty bya hae” a cihkuhpaw aki kipali lungkhu-e kha do.
▸ Aba. 2, ccawr. 17, akl.
6 LAEPHI HANGLANG ZAHOVA EENAW
Zahova nynh amaw a sungsahpaw ccungccaw hae hanglang laephi kha paradais khokhu lang a lah rae. A eenaw tuh mazi rulae kuh khyh. Aromaw, Pachia nynh hoyleinaw miakaw yng zo sah vae cih zah a ccungccaw hae kha zungzae hingnaw a pya vae cih hae.
7 LINGTU SETAN
Setan tuh Pachia rawsetu vawccungccahpaw lukheih nynh thua. Amaw kha Setan cite ko a thua. Asuilang tuh “doutu” cipaw nynh thua. Pawccecize Zahova kha rawsete a dou keiccu nynh thua. Lingtu cite mah ko a thua. Asuilang tuh “thethyasatu” cipaw nynh thua. Ccungccaw hae kha ling hae zah Pachia kong ame leilang a ho keiccuze lingtu cite ko a thuanaw paw thua.
8 VAWCCUNGCCAW HAE
Zahova nynh laephi la rae mawze hynhsepi mawte vawccungccaw hae kha a la rae ty vae hae. Miming tuh vawlangkhua a ung lang hae cite rae hae paw nynh thua. Vawccungccaw hae hynh ccaang patae a cih hae. (Daniel 7:10) Min hoi hae zah mih ung tuzia mah lokuh khyh hae. Lungzi hae paw vawccungccaw hae tuh ccungccaw hae nynh a beih hae paw kha zakawsangsakunaw te a ei hae. Miming tuh a loku khyh thyh hae hawte mih ryalawnaw mah lokuh khyh hae. Abang tuh Zahova bawiha-ungnaw kya, ccungccaw hae bya ho pyanaw kya, laephivaw-e a see hae thungkhawnaw te cciakhaenaw kya, a bapaenaw cciakhaenaw kyate phungho ryalaw thadounaw kya rya a la hae. (Sam 34:7; Byaphy 14:6; 22:8, 9) Malangze, miming tuh Armakeddon kya Zisu ryte pyngkheih lang raw a dou kheih cih hae paw nynh thua hae.—Byaphy 16:14, 16; 19:14, 15.
▸ Aba. 3, ccawr. 5; Aba. 10, ccawr. 1
9 SEINAW
Ahoy leipaw kha a thinlung kya ah tua oh ze, tukhyhze Zahova nynh a ry leipaw ah cyi oh ze seinaw nynh thua. Pawccecize Pachia te ah ccuepekunaw oh a ro kho keiccu nynh thua. Kawbya te phungbya hae yn pya zah seinaw rae khyh nawlang kawbya te phungbya nynh yn bung. Rae takaw lya tuh atyngre kha Zahova nynh a ccing lang te nynh a la rae. Thuasalama Adam te Evua nynh Zahova kaw ngae leilang a la poku kou hae tetuh miming tuh sei hae zah a ccingpaw thua vae khyh hae. Nyalang tuh taw hae zah a chih vae hae. Aening mah puikhae paw seinaw ro ah ccou oh keiccuze ah taw oh zah ah chih bua vae oh.
▸ Aba. 3, ccawr. 7; Aba. 5, ccawr. 3
10 ARMAKEDDON
E tuh Setan laephi te hoyleinaw miakaw a roh cih paw Pachia rawpi nynh thua.
▸ Aba. 3, ccawr. 13; Aba. 8, ccawr. 18
11 PACHIA PENAW
Pachia Penaw tuh vawlangkhua kya Zahova nynh a thadyng sah paw accozah ccangkheih nynh thua. Tuh-e Penaw kya Siapharang tuh Zisu Khrih nynh thua. Malang see kya, Zahova nynh hoyleinaw miakaw zo sah khylang a Penaw kha yng mang cih. Tetuh Pachia Penaw nynh laephi pyngpi kha yng uh vae cih.
12 ZISU KHRIH
Pachia nynh atyng are la rae maw ze Zisu nynh a la rae ty. Zahova nynh Zisu kha ccungccaw miakaw hanglang chii sah pya khylang laevawlang yng saw. Zisu tuh chia a thua koute, Zahova nynh a tho sah thui. Atulya Zisu tuh vawlang Pachia Penaw kya Siapharang lang a tang vae.
13 LONAW 70 KONG HOTY BYA
Messiah yng langkuh cih cite Baebu nynh a la hoty vae. Lonaw 69 cite a ho paw ccyh a thangnin kya khe Messiah tuh yng langkuh cih a ci. Tuh-e tuh B.C.E. 455 kum kyate tho zah C.E. 29 kum kya nynh a thang.
Tuh-e tuh C.E. 29 kum kya nynh a thang cite pawtemou ah ny oh? Lonaw 69 tuh Nehemiah nynh Zerusalem khua bua sahthuinaw kaw a mue ccyh B.C.E. 455 kum te nynh atho. (Daniel 9:25; Nehemiah 2:1, 5-8) “Dazin” cipaw baccang hynh nambah 12 cite ah ny oh hawte, “lonaw” cipaw baccang mah nambah 7 cite ah ny oh. Hoty bya kya-e lonaw hae hynh ninsari cci ung paw lonaw hae kha thua leite, kum sari cih paw lonaw nynh a ho ry. Profeh bya kya tuh “nin kheih kha kum kheih hanglang” nynh a mang hae. (Nambar 14:34; Ezekiel 4:6) E asuilang tuh lonaw nawkheih takyh ze kum sari ro zah lonaw 69 kya tuh kum 483 a cih (69 x 7). Kum 483 hynh B.C.E. 455 kum te ria lang ze, C.E. 29 kum cia nynh thua. E kum tuh Zisu tuipi-ing zah Messiah lang he a tang ccaccing kum nynh thua!—Luka 3:1, 2, 21, 22.
Lonaw nawkheih ze kum sari a cih paw a ccangpaw lonaw kong mah a hoty paw bya a ung. C.E. 33 kum kya Messiah tuh chia yng thua cih cipaw kong, C.E. 36 kum te tuh Pachia Penaw thehoypaw kong kha Zudah hae kyalya thua leite minphuin miakaw kalang ho yng thua cih cipaw kha mah a la hoty.—Daniel 9:24-27.
14 LUTHUNGPY PACHIA CCANGPYAKUNAW HYNH ME KHYH
Baebu nynh Zahova Pachia tuh Raetu nynh thua cipaw te atyngre a rae maw Zisu kha a rae ty cite yn ccangpya. (Kolosehae 1:15, 16) Zisu tuh Athung huaccepaw Pachia thua khyh. Zisu nynh Pachia te kae ngangkuh cite hotuh hotuh mah ho boi khyh. Zisu nynh, ‘Ka Paaw tuh kae lae ze a lehua,’ cite a ho. (Johan 14:28; 1 Korinhae 15:28) Thuasalama beihnaw abang nynh Pachia tuh Paaw, Ccaw, thyamuihsaw Luthungpy Pachia chiakheih nynh thua cite a ccangpya hae. “Luthungpy Pachia” cipaw baccang hynh Baebu kya-e thua khyh. E tuh ame leipaw ccangpyakunaw nynh thua.
Thyamuihsaw tuh Pachia thungnaw huhang thua zah, a rynaw rae khylang a mang paw muih kho leipaw thungnaw nynh thua. E tuh pyng thua khyh. Tousenawze, masaty Khrihccaw hae tuh “Mih balyngte Thyamuisawte a beih hae.” Zahova nynh, “Ccungccaw miakaw kya ka muisaw ka bu cih,” a ci.—Zuituhae 2:1-4, 17.
▸ Aba. 4, ccawr. 12; Aba. 15, ccawr. 17
15 VAELANGTUNG
Amepaw Khrihccaw hae nynh Pachia a beihnaw hae kya vaelangtung mang khyh hae. Pawccemou a mang khyh hae?
Ame leipaw beihnaw kya vaelangtung a mangnaw hae hynhsepi a cih vae. Langmaw lya ze vaelangtung hynh hangkhakheih te raepaw azuh la beihnaw hae kya nynh la mang hae. Zisu a chih koute kum 300 lungkhu cia, Khrihccaw hae nynh mih beihnaw kya vaelangtung hynh la mang khyh hae. Vaelangtung hynh Romhae Uhtu paw Kostintain (Constantine) nynh Khrihccaw syntawnaw ccangkheih lang nyalang te a la rae paw nynh thua. E syntawnaw hynh Khrihccaw hae nynh beihnaw kya mang lang houhhouh yng zuaku vae hae. Thuasalama Zisu Khrih tuh vaelangtung te a sekunaw hae mazi ung khyh. The New Catholic Encyclopedia ccah-uh nynh hynhte a ccae sah: “Vaelangtung hynh Khrihccaw a thua hae paw te Khrihccaw a thua lei hae paw kya mah muih kho a thua.”
Zisu tuh vaelangtung kya chih khyh. “Vaelangtung” cihkuh paw hynh Greek bya te “lawbabing paw thingtung,” “thingphe,” tukhyhze “thing” cipaw nynh thua. The Companion Baebu nynh hynhte a ccae sah: “Greek Baebu Ccahthaw kya ze thingphe ccangning kohpaw cipaw baccang ung boi khyh.” Zisu tuh lawbabing paw thingtung kya nynh a chii.
Zahova nynh ah beihnaw oh kya azuh tukhyhze syntawnaw mangpaw kha mazi ry khyh.—Exodas 20:4, 5; 1 Korinhae 10:14.
16 TUATHUINAW PUAI
Zisu nynh a zuitu hae kha a chii nin Tuathuinaw Puai tuaa lang a tawsya hae. Miming nynh kum takyh Nisan saw 14 nin khe nynh a tuaa hae. Tuh-e tuh Israel hae nynh Kawtaw Puai a tuaanaw hae ninsaw te a lokuh. Sanglou te misu tui tuh Zisu a saw te a chi ccelang thua zah, Tuathuinaw Puai kya lukheih raveih pyaleku a thua. Vawlangkhua kya Zisu ryte a uh kheih cih hae paw rou nynh Sanglou kha ae hae zah misu tui kha a neih hae. Laephi vaw zungzae hinglang cite a ngaehoi hae paw mah Tuathuinaw Puai kya sawtua te a pungkuh hae, thuasalama sanglou kha mazi ae khyh hae zah misu tui mah mazi neih khyh hae.
17 A HYSUEPAW (SOUL)
Baebu kya-e “A hysuepaw” cipaw baccang hynh (1) ccungccaw, (2) rangsaw, (3) ccungccaw tukhyhze rangsaw hingnaw hanglang nynh a mang. Tousenaw abang hae tuh:
Ccungccaw. “Noah she lya, . . . zyataripaw ccungccaw [“a hysuepaw,” NW] lutarya kha tui kyate khung a thua hae.” (1 Piter 3:20, BI) E kya “a hysuepaw” cipaw baccang hynh ccungccaw hae nynh a ho ry—Noah te a zu, a ccaw hae luthung, te a ccaw hae zu nynh thua.
Rangsaw. ‘Pachia nynh hynhte a ho: “Tui kya a ung lang paw tuisaw [“a hysuepaw,” NW] te vawlang a zou lang paw pavaw hae kha rae thua sah.” Te Pachia nynh hynhte bua a ho: “Laephivaw lang a ung lang paw rangsaw [“a hysuepaw,” NW] a phing hae innzua saw te a vawthyapaw te sarepaw hae kha rae thua sah.” A hothyh hawte a ccing.’—Genesis 1:20, 24.
Ccungccaw tukhyhze rangsaw hingnaw. Zahova nynh Mawsi kha hynhte a ho pya: “Nang [“Na hysuenaw,” NW] chia lang cite ae ccung hae paw ccungccaw hae miakaw kha a chih vae hae.” (Exodas 4:19) Zisu laevaw ung lya, hynhte a ho: “Kae tuh ahoypaw tuuringtu nynh ka thua; ahoypaw tuuringtu nynh tuh a hiinnaw [“a hysuenaw,” NW] kha tuu hae hanglang a pyaku.”—Johan 10:11.
Ccungccaw lukheih nynh hangkhakheih kha “a hysuenaw balyng” te a law, tuh-e asuilang tuh a cyi kho naw balyng te lungtua lungpawte a law cipaw nynh a thua. (Matthai 22:37; Deuteronomi 6:5) “A hysuepaw” cipaw baccang hynh a hing lang raepaw hae mih rynaw thinlung kha a lang sa ry ze mah e baccang hynh mang kho a thua. A chih paw ccungccaw tukhyhze a chih paw pyng kha a hysuepaw a chih cite mah ho kho a thua.—Nambar 6:6; Phungtangbya 23:2; Isaiah 56:11; Haggai 2:13.
▸ Aba. 6, ccawr. 5; Aba. 15, ccawr. 17
18 MUIHSAW (SPIRIT)
Hebruhae te Greek baccang “muihsaw” cipaw baccang hynh Baebu kya tuh a phuinphuin lang a mang. Miming nynh ccungccaw hae nynh muih kho leipaw hangkhakheih khah nynh zungzae a ho ry hae. Tousenawze, cungccaw hae te sarangpaw hae nynh ah sue oh paw tukhyhze khivae tahaw paw kya mah muihsaw cite a mang. E baccang hynh muihsaw pyng hae te thyamuihsaw citahaw paw kya mah a mang. Baebu nynh ccungccaw lukheih a chih koute muih kho leipaw hangkhakheih pou a hing ung cite yn ccang pah khyh.—Exodas 35:21; Sam 104:29; Matthai 12:43; Luka 11:13.
▸ Aba. 6, ccawr. 5; Aba. 15, ccawr. 17
19 KEHENNA
Kehenna tuh Zerusalem khua pe kya ung paw athu-nangpaw a ruanaw hae tukhyhze a ronaw hae vuakarung min nynh thua. E vuakarung tuh Zisu she lya ze lorangsaw hae tukhyhze ccungccaw hae vawrihvawsaw a pyanaw hae thua khyh. Tukeiccuze Kehenna tuh ccungccaw a chih hae paw zungzae vawrihvawsaw a tungnaw hae cipaw syntawnaw thua khyh. Zisu nynh Kehenna kalang vua a thua hae paw cite a ho paw tuh, mazi ronaw kong a ho paw nynh thua.—Matthai 5:22; 10:28.
20 BAWIPAW SAWSANGNAW
E tuh Zisu nynh a zuitu hae kha sawsangnaw zia a ccangpya hae paw sawsangnaw nynh thua. E hynh Ah Paw sawsangnaw tukhyhze dosuinku lang paw sawsangnaw cite mah ah ny oh. Zisu nynh sawsangnaw zia yn ccangpya paw tuh:
“Na min thyaa tuh sawtua ung sah”
Hyngbya miakaw kyate Zahova min a thyaa nawlang tukhyhze a khing ung nawlang aening saw ah sang oh. E tuh vaw te laephi kya a ung paw miakaw nynh Pachia min kha aphute sah lang zah sawtua lang cinaw paw nynh thua.
“Na Penaw thua ccah vae sah”
Setan laephi hoyleinaw ro lang zah laephipi uh lang, te laephi pyngpi hynh Paradais lang bua yng tang sah thui nawlang aening nynh Pachia accozah hanglang saw ah sang oh.
“Vaawlangze na rynaw rae . . . laevaw lang mah rae bua thua sah”
Zahova nynh ccungccaw hae a rae takaw lya a rynaw hawkhate laephi vawlang Pachia eenaw yng ccingnaw hanglang te kawngae paw ccungccaw hae tuh Paradais kya zungzae hing kho nawlang mah saw ah sang oh.
21 SAWNAWME
Zahova nynh ccungccaw hae seinaw te chiinaw kyate luenaw hanglang sawnawme yn pahccyng pya. Sawnawme tuh masaty ccungccaw, Adam nynh a la shungpaw a ccingpaw ccungccaw hingnaw kha bua mue kho nawlang te Zahova te ccungccaw hae ccuepekunaw bua mue kho nawlang yn pya pyapaw ame nynh thua. Pachia nynh laephi misei hae hanglang chii khylang Zisu kha laevaw lang yng saw. Pawccecize Zisu chiinaw nynh ccungccaw miakaw zungzae hingnaw te a ccingpaw hingnaw yn pya kho keiccu nynh thua.
▸ Aba. 8, ccawr. 21; Aba. 9, ccawr. 13
22 1914 KUM HYNH PAWCCE AZICI PAW KUM A THUA?
Daniel alepaw 4 kya-e hoty bya nynh 1914 kum kya Pachia nynh a Penaw tuh yng thadang sah cih cipaw yn ccangpya.
Hoty bya: Zahova nynh Nebukhanezza Siapharang kha a lepipaw thingku kha nge a thua cih cipaw kong maang a sah sah. A maang kya ze, thingkupi ccunglamuin kha bua a tuathui khyh nawlang “kumsari ccyh” lungkhu sohin te varyng vee a thua cih cite a muih sah. Nyalang tuh, kha-e thingkupi kha bua yng tuathui cih cite mah a muih sah.—Daniel 4:1, 10-16.
Hoty bya hynh aening hanglang paw suilang mou a ung: Thingku tuh Pachia uhnaw kha nynh a ho ry. Kum hynhsepi cia, Zahova nynh Zerusalem khua kyate Israel minphuin hae kha uh lang siapharang hae kha a mang. (1 Sherianaw 29:23) Thuasalama tuh-e siapharang hae tuh zyn la tyng khyh hae keiccuze mih uhnaw mah karyh a thang. Zerusalem khua tuh B.C.E. 607 kum kya karyh a roh vae. Tuh-e tuh “kumsari ccyh” athonaw nynh thua. (2 Siapharang 25:1, 8-10; Ezekiel 21:25-27) Zisu nynh, “Zerusalem tuh Pachia ny leihae paw nynh mih ccyh thang mawlaezung mih ccu kaw naungte a syde cih hae,” cite a ho paw hynh “kumsari ccyh” kong a ho rynaw paw nynh thua. (Luka 21:24) Tukeiccuze “kumsari ccyh” hynh Zisu laephivaw lang a ung lya lah thang loh khyh. Zahova nynh “kumsari ccyh” a thang kya Siapharang lukheih ka khang cih cite bya yn king. E uhnaw thawpaw kya Siapharang tuh Zisu thua zah Laephivaw lang-e Pachia ccungccaw hae kha zungzae hythuanaw a pya vae cih hae.—Luka 1:30-33.
“Kumsari ccyh” a ronaw: “Kumsari ccyh” hynh kum 2,520 a ro. B.C.E. 607 kyate ria lang ze 1914 kum cia hynh Kum 2,520 a cih. Vawlang Pachia Penaw kya Zahova nynh Zisu [Messiah] kha 1914 kum khe Siapharang lang a khang vae.
2,520 nambah hynh pawtemou ah law oh? Baebu nynh kumthungkhoi ccyh hynh nin 1,260 te a ngangkuh a ci. (Byaphy 12:6, 14) Tukeiccuze “kumsari ccyh” hynh lehning paw thua zah nin 2,520 a cih. Nin 2,520 hynh kum 2,520 tenynh a loku, pawccecize Profeh bya kya tuh “a nin hangpaw hynh kum” a mang.—Nambar 14:34; Ezekiel 4:6.
23 VAW BAWI MIKHAEL
“Vaw bawi” cipaw asuilang tuh “vawccungccaw hae cciakhaetu” cipaw nynh thua. Baebu kya a ho paw vaw bawi tuh lukheih kyalya thua zah a min tuh Mikhael a cih kuh.—Daniel 12:1; Jude 9.
Mikhael tuh Pachia rawkaw zyntyng paw vawccungccaw hae cciakhaetu nynh thua. Byaphy 12:7 kya hynhte a ho: “Mikhael te a vawhae nynh fupi tuh a dou hae, fupi te a vawhae nynh ze mah a douru hae.” Byaphy ccah-uh kya Pachia rawkaw hae cciakhaetu a cipaw tuh Zisu nynh thua. Tukeiccuze Mikhael cipaw tuh Zisu min ccangkheih nynh thua.—Byaphy 19:14-16.
24 NYATHYA NIN HAE
E kya nyathya nin hae a cipaw tuh Pachia Penaw nynh Setan laephi aromaw laephi vaw lang yng cyihkuh lang paw ruunaw ccyh kha nynh a ho ry. “She thangnaw lang paw” te “Ccungccaw Ccapaw yng thuanaw ccyh” muihsanaw hynh Baebu hoty bya kya tuh nyathya nin cite nynh a mang. (Matthai 24:3, 27, 37, BI) “Nyathya nin hae” tuh vawlangkhua kya Pachia Penaw uhnaw he athotakawnaw 1914 kum te tho zah Armakeddon kya Setan laephi yng roh te nynh a thang cih.—2 Timote 3:1; 2 Piter 3:3
25 THOTHUINAW
A chih vae paw ccungccaw lukheih kha Pachia nynh bua a hing sathui paw kha thothuinaw cite a ko. Baebu kya a thothui hae paw lutakua a cih. Eliza, Elisa, Zisu, Piter te Paul hae nynh a tho sah thui hae paw nynh thua. E tuh Pachia thungnaw liate a cyihkuh paw ngae-ang lang ung paw nynh thua. Zahova nynh “adingpaw te ading leipaw paryh” laephi vaw lang hinglang ka tho sah thui cih hae cite bya yn king. (Locceihtu‛ae 24:15, BI) Baebu nynh vawlang kae lang a thothui cih hae paw kong mah a ho. E po hae paw tukhyhze sathothuh hae paw tuh vawlangkhua kya Zisu ryte ung kheih lang Pachia nynh a tho sah thui cih hae paw nynh thua hae.—Johan 5:28, 29; 11:25; Filipihae 3:11; Byaphy 20:5, 6.
26 MUIHSAW HOYLEIPAW THYAHAWNAW
Muihsaw hoyleipaw thyahawnaw kha daereih tukhyhze naw a thyapaw, chihhingleihpaw kyate ccuepeku lang zuakupaw tuh ahoy leipaw nynh thua. Ccungccaw hae nynh a chih hae paw hynh mih muihsaw kha pou a hing ung cipaw te thungnaw hoipaw lang nynh a tang vae hae cipaw ame leipaw ccangpyakunaw kha a zyn hae keiccuze muihsaw hoyleipaw thyahawnaw kha a mang hae. Muihsaw hoylei hae paw nynh mah ccungccaw hae kha Zahova kawbya a ngae khyh nawlang hae thawte a zuaku hae. Kuihdothyanaw, malang-e kong hoty thyanaw, mihleih thyanaw, puimaw thyanaw, amaw zynnaw kyalya a kyngpaw, nawthyanaw, te Setan thyanaw hae mah muihsaw hoyleipaw thyahawnaw nynh thua hae. Ccah-uh hae, makazing hae, video hae, ccaw a taw hae paw te law hae kya mah rilang a ung leilang tukhyhze lungtho lang a ung lang te muihsaw hoylei paw thyahawnaw kha a mang hae. Ruamuanaw phungzae paete a ung, tousenawze michii hanglang aepaw niapaw nungpyanaw, lawki phung hawte ruangawpaw, sawku paenaw, numae hae hanglang phungzae hae te mihchii kha iileite phang ngawpaw phung hae mah muihsaw hoylei hae paw te a kyngkuh paw nynh thua hae. Ccungccaw hae nynh muihsaw hoylei hae paw thungnaw mang te sikuu lang a zuaku vae hae ze si kha a mang hae.—Galatihae 5:20; Byaphy 21:8.
▸ Aba. 10, ccawr. 10; Aba. 16, ccawr. 4
27 AANAA HOI HUAPAW ZAHOVA
Zahova tuh Athung Huaccepaw Pachia nynh thua. Vawlaepi balyng hynh amaw nynh a rae. (Byaphy 15:3) Tuh-e atyng are aanaa tuh amaw rou nynh Ahoi cipaw, tukhyhze a rae hae paw tungvaw kya uhnaw kaw phe a ccing lang ahoi cinawpaw nynh thua. (Sam 24:1; Isaiah 40:21-23; Byaphy 4:11) A rae paw atyng are tungvaw kya kawbya pyanaw kaw ahoi. Zahova tuh mingccangpaw hae mah uhtu lang kaw pyanaw kaw ahoi. Zahova kha ah sungsah oh zah a kawbya ah ngae oh paw tuh aanaa hoi huapaw Pachia rou nynh ka nawccaw cinawpaw nynh thua.—1 Sherianaw 29:11.
28 CCAW RONAW
Ccaw ronaw tuh a pui lohleipaw imua kha chia paw nynh thua. E tuh a cyihkuh seipaw thualeite ccungccaw pyng kha raerae a nyhkuh pite chia rarou paw nynh thua. Nung lungkhu he alongkuh takawpaw imua lukheih tuh a ccangpaw a nung pyng a paekalia paw thua khyh. Imua tuh a ccangpaw ccungcaw lukheih nynh a thua vae.
29 CHI RUINKUNAW
E tuh ccungccaw lukheih pyng kya-e chi kha lukheih pyng lungkhu lang ruinpaw nynh thua. Chi ccypaw kha miccangpaw kalang ruinte sikuuku paw hynh chi ruinku te sikuukunaw ccangpali lungkhu ze ccangkheih nynh a thua. Tuh-e chi phuinpali hae tuh chi acci paw, (plasma) chi ase paw, (red blood cells) chi araw paw (white blood cells) te chi atui tararaw (platelets) hae nynh thua.
30 THUIHEINAW
Baebu kya-e “thuiheinaw” cipaw baccang hynh detanaw khylang a mang rypaw baccang thua khyh. Aening yn thuiheipaw tuh hawnaw lang te rulaekunaw lang nynh thua. Zahova tuh hotuh hotuh mah thuiheinaw hae kha ahoy leilang tukhyhze arero lang te mang khyh. (Phungtangbya 4:1, 2) Zahova tuh nungpaw hae hanglang dosuinku lang ahoy huaccepaw nynh thua. Amaw nynh yn thuiheipaw tuh ccungccaw lukheih nynh thuiheinaw a ngae paw a thua kho nawlang a ccungkia huapaw nynh thua. (Phungtangbya 12:1) Zahova nynh a ccungccaw hae kha a sungsah hae keiccuze a ccangpya hae. Amaw nynh miming kha ahoy leipaw mih tuanaw kha rulaeku lang te tuanaw hoypaw ccangku lang zah a rynaw langpi thyh hawte ung lang kaw a pya hae. Nungpaaw hae nynh ccaw hae kha pawccemou kaw ngae lang a ccang cipaw a thaethya nawlang hae thuihei lang hae. E tuh Zahova kha sungsah lang zah a Bya hae kha ngae lang, te a phungbya hae thaethya nawlang ccaw hae kha a ccangpah cih hae cipaw asuilang nynh thua.
31 KHOHZII HAE
Miming tuh muih kho lei hae paw thua zah ccungccaw laeze thungnaw hoi hae paw muihsaw hoylei hae paw nynh thua. Muihsaw hoylei hae paw tuh vawccungccaw hoylei hae paw nynh thua. Miming nynh Pachia kawbya ei lang mimaw te mimaw yng raekuh hae tetuh muihsaw hoyleipaw lang yng tang vae hae. (Genesis 6:2; Jude 6) Setan ryte Zahova kha pou yng rawse vae hae.—Deuteronomi 32:17; Luka 8:30; Zuituhae 16:16; James 2:19.