CCANGKUNAW 04
Pachia Tuh A Hungmou?
Ccungccaw hae nynh she takyh kya khozi pachia hae te khozinung hae patae a la beih hae. Thuasalama, Baebu kya “ccangpaw pachia hae laeze a lesaehuapaw” Pachia lukheit kong a langsah. (2 Sherianaw 2:5) Tuh-e Pachia tuh a hungmou? Ccungccaw hae nynh a beih hae paw ccangpaw pachia hae laeze pawcce a lesaehua? Pachia nynh amaw kong pawtemou yn nysah cipaw kha e ccangkunaw kya ccangkuh tua.
1. Pachia min tuh hungmou, amaw nynh a min yn nysah ry cipaw pawtemou ny kho lang?
Baebu kya Pachia nynh amaw te amaw yn nysah kuh. Hynhte a ci: “Kae tuh Bawipaw [Zahova, NW] nynh ka thua. Tuh-e tuh ka min nynh thua.” (Isaiah 42:5, 8 kha ria.) “Zahova” cipaw Hebru min asuilang tuh “Amaw Nynh A Ungsah” cipaw nynh thua. Zahova nynh aening kha amaw min yn nysah ry. (Exodus 3:15) Pawcce hynhte ho kho a thua? Baebu kya Pachia min vae 7,000 lae a ho keiccu nynh thua!a Zahova cipaw tuh “ahangnaw vaawram te anenaw laephi kya ze Pachia” min nynh thua—Deuteronomy 4:39.
2. Baebu nynh Zahova konglang pawmou a ho?
Ccungccaw hae nynh a beih hae paw pachia hae kya Zahova kele rou nynh amepaw Pachia cite Baebu nynh a ho. Pawccemou? Akonglang patae a ung. Zahova kele nynh kawhoi huaccepaw thuazah amaw rou nynh “laephi pynpi kya Ahang Huaccepaw” a thua. (Sam 83:18 kha ria.) Pachia tuh “Athung huaccepaw” thuazah pawpaw miakaw cyikhonaw thungnaw a hoi. Vaw te laephi kya ungpaw “pawpaw balyn kha”—amaw nynh a la rae. (Byaphy 4:8, 11) Zahova kele rou nynh zungzae a hing.—Sam 90:2.
HOUH CCANGKUH LANG HOUH MUIH LANG
Pachia sawtuanaw min hae te a lokuh leipaw min a laenaw kha ccangkuh tua. Pachia nynh a min kha pawtemou, pawcce a langsah cipaw kha mah ccangkuh tua.
3. Pachia kya sawtuanaw min hae patae ahoi zemah min ccangkheit kele nynh ahoi
Sawtuanaw min te min a laenaw kong nykhonaw lang, VIDEO kha pia, tuhkoute akaw lang-e bakhianaw kha hokuh oh.
“Bawipaw” cipaw sawtuanaw min te min pawmou a lae?
Baebu nynh ccungccaw hae tuh pachia hae bawipaw hae kha a beih hae a ci. Sam 136:1-3 kha ria tuhkoute e bakhianaw kha hokuh oh:
“pachia hae Pachia” te “bawipaw hae Bawipaw” tuh a hungmou?
4. Zahova nynh a min kha yn nysah ry zah yn mangsah ry
Zahova nynh a min kha yn nysah ry cipaw pawnynhmou a langsah? VIDEO kha pia, tuhkoute akaw lang-e bakhianaw hae kha hokuh oh.
Zahova nynh a min yn nysah ry cite na tua tou? Pawccemou?
Zahova nynh a min kha yn mangsah ry. Rom 10:13 kha ria tuhkoute e bakhianaw hae kha hokuh oh:
Zahova cipaw Pachia min manglang hohcihmou azici?
Lukhakheit nynh na min kha syntaw zah na min te ae ko ze pawtemou na ung?
Ccungccaw hae nynh a min a mang hae ze Zahova tuh pawtemou ung cih cite na tua?
5. Zahova nynh amaw te yn naesakuh ry
Cambodia ram e Soten cikuh nung nynh “Pachia min ka ny keiccuze ka lung myarya paw” cite a ci. VIDEO kha pia, tuhkoute akaw lang-e bakhianaw kha hokuh oh.
E video kya Pachia min a nynaw nynh Soten tungvaw paw thanenaw mou la ung?
Ccungccaw lukheit te vaeccaw thuakhonaw lang a min nytou a hoo. James 4:8a kha ria tuhkoute e bakhianaw hae kha hokuh oh:
Zahova nynh nang kha paw cyi lang mou ae hyy?
Pachia min ny te mangnaw nynh amaw te pawtemou houh yn naesakuh kho?
CCUNGCCAW ABANG NYNH HO HAE PAW: “Pachia lukheit kele a ung keiccuze pawpawte ko zemah pawtua ung khyh.”
Pachia min Zahova cipaw na zyn tou?
Pachia nynh a min yn mangsah ry cipaw kha pawtemou na ccaesah cih?
ADYNGNAWTE
Zahova cipaw tuh lukheit kele amepaw Pachia min nynh thua. Pachia nynh a min kha yn nysah ry zah yn mangsah ry. Tuhte nynh Pachia te naekuh kho lang.
Bua Liathuinaw
Zahova tuh ccungccaw hae nynh a beih hae paw ccangpaw pachia hae te pawtemou a lae?
Pachia min kha pawcce manglang a ccang?
Zahova nynh amaw te yn naesakuh ry cipaw pawtemou ny kho lang?
HOUH CCUNGCHIH
Pachia a ung cipaw zynkhonaw akonglang ccangpangaw kha khinkhia tua.
Pachia tuh zungzae a hing cipaw zynngangkhonaw konglang kha khinkhia tua.
“Pachia Kha A Hungnynhmou A Rae?” (Rawvianaw, August 1, 2014)
Athonaw Pachia min konaw roi kong ny khyh zemah Pachia min kha pawcce manglang a ccang cipaw kha ccangkuh tua.
Pachia cite kopaw tuh pawtua ung tou? Pachia kya min ccangkheit kele a hoi cite pawcce ah ho kho oh.
a Pachia min asuilang te Baebu leihnaw abang kya Pachia min a mangkhyhnaw hae kong houh na ny ry ze Laephithaw Leihnaw Baebu Piachihpaw A4 [Myanmar] kya do.