CCANGKUNAW 08
Zahova Vaeccaw Lang Na Tang Kho
Zahova nynh amaw kong kha houh yn nykaleih hae sah ci a ry. Pawkeiccumou? Pachia a ziazae hae, lanpi hae te a eenaw hae kong ny vae zetuh Pachia te vaeccaw tangrynaw thinglung yn lungthung cih keiccu nynh thua. Pachia vaeccaw lang na tang kho cih tou? (Sam 25:14 kha ria.) Pachia te vaeccaw tangkhonaw lang pawmou cyi lang? Baebu kya e bakhianaw hae aphi te Zahova te vaeccaw lang tangpaw tuh pawcce hoyhua zah a hanghua cipaw mah a langsah.
1. Zahova nynh nang kha pawcyi lang mou ae hyy?
“Pachia kalan naekuh oh lah, aning mah nae kalan a naekuh cih.” (James 4:8) Pawmou a ho ry? Zahova nynh amaw te vaeccaw lang tang lang ae hyy. Abang nynh tuh Pachia te vaeccaw lang tang lang tuh ho nang, muih leipaw ccungccaw te vaeccaw lang tangpaw tuh pawtemah thua kho lang khyh cite a tua hae. Thuasalama Zahova nynh amawte asekute ny lang ccangpaw miakaw kha Baebu kya a langsah. Zahova kha muih boi khyh zemah Baebu ria lang ze Zahova konglang houh ny lang.
2. Zahova tuh pawcce ahoyhuapaw vaeccaw a thua?
Minccangpaw hae nynh nang kha ae sungsah hae laeze Zahova nynh houh ae sungsah hua. Na lung ae pawsah ry zah bungnaw na hoo ccyh kya ae ngia sah ry. “Aning tuh nanning ae do-oih oh paw athua keiccuze nae thinphangnaw balyn kha amaw tungvaw khaleih nung oh.” (1 Peter 5:7) Zahova tuh a vaeccaw hae kha bung lang, soihbia lang te bya ngaepya lang zungzae a ungty.—Sam 94:18, 19 kha ria.
3. Zahova vaeccaw tangkhonaw lang pawmou cyi lang?
Zahova nynh ccungccaw balyn kha a sungsah. “Miding hae tuh Bawipaw nynh a zyn hae paw nynh thua.” (Phungtangbya 3:32) Ahoy cite Pachia nynh a tua hae paw kha yn cyisah ry zah hoy khyh cite Pachia nynh a tua hae paw kha yn sihaesah kuh ry. Abang nynh athah ahoy te asekute Zahova phunglang te ung lang thua kho lang khyh cite a tua hae. Thuasalama Zahova tuh ngaethya ungsah thyapaw nynh thua. Pachia a sungsah ccaccing paw te Pachia lungrythua kho nawlang ahoyte a zuakupaw miakaw kha leh a khan.—Sam 147:11; Locceihtu 10:34, 35.
HOUH CCANGKUH LANG HOUH MUIH LANG
Zahova te vaeccaw thuakhonaw kong te Zahova tuh pawcce ahoyhuapaw Vaeccaw nynh thua cipaw kong mah ccangkuh tua.
4. Zahova vaeccaw Abraham
Baebu kya a langsah paw Abraham (Abram cite mah ko a thuapaw) kong nynh Pachia vaeccaw cipaw asuilang kha thaethya lang yn bung. Genesis 12:1-4 kya Abraham kong ria tua. Tuhkoute e bakhianaw hae kha hokuh oh:
Zahova nynh Abraham kha pawmou a cyisah?
Zahova nynh paw byakingnaw mou a pya?
Zahova a hopaw kha Abraham nynh pawtemou a liaru?
5. Zahova nynh a vaeccaw hae kyate a ngaehoi paw
Vaeccaw hae kyate ah ngaehoi oh paw hae a ung.
Nangso na vaeccaw hae kyate pawmou na ngaehoi?
1 Johan 5:3 kha ria tuhkoute e bakhianaw kha hokuh oh:
Zahova nynh a vaeccaw hae kyate pawmou a ngaehoi?
Zahova kaw ngaenaw lang cyisanaw hae ziazae hae kha rulaekuh a hoo cih. Isaiah 48:17, 18 kha ria tuhkoute e bakhianaw kha hokuh oh:
Zahova nynh vaeccaw hae kha rulaekuh lang pawcce a ngia hae?
Vaeccaw hoypaw ame ze aening yn thungkhaw paw, thanenaw ungpaw ryalaw lang raeringnaw yn pya. Zahova mah tuhte nynh a cyi
6. Zahova nynh a vaeccaw hae hanglang a cyipaw
Zahova nynh a vaeccaw hae kha piahccahnaa hae phishing kho nawlang a bung hae. VIDEO kha pia, tuhkoute akaw lang-e bakhianaw kha hokuh oh.
Video lungkhu e nopinung kha ahoy leipaw tuanaw hae doukhonaw lang Zahova nynh pawtemou a bung?
Isaiah 41:10, 13 kha ria tuhkoute e bakhianaw hae kha hokuh oh:
Zahova nynh a vaeccaw hae miakaw elang paw cyipya lang mou bya a kingku?
Zahova tuh ahoypaw vaeccaw a thua kho cih cite na tua tou? Pawkeiccumou?
Vaeccaw hoypaw hae nynh a hoo ccyh kya yn bung hae. Zahova nynh mah tuhte ae bung cih
7. Zahova te vaeccaw lang tang lang bya hoku a hoo
Bya hokunaw nynh vaeccawkunaw houh yn tynsah. Sam 86:6, 11 kha ria tuhkoute e bakhianaw hae kha hokuh oh:
Zahova te pawtemou bya hokuh kho lang?
Zahova nynh aening kha pawtemou bya yn hopya?
Aening nynh Zahova kalang sawsang te bya ah ho oh; Zahova nynh Baebu liate aening kha bya yn hopya
CCUNGCCAW ABANG NYNH HO HAE PAW: “Pachia te vaeccaw lang tang lang pawtemou thua kho cih.”
Zahova te vaeccaw lang tang kho a thua cipaw paw Baebu nynhmou a langsah?
ADYNGNAWTE
Zahova nynh namaw te vaeccaw lang tang ry zah vaeccaw tangkhonaw lang mah ae bung cih.
Bua Liathuinaw
Zahova nynh a vaeccaw hae kha pawtemou a bung hae?
Zahova nynh a vaeccaw hae kha rulaekuh lang pawcce a ngia hae?
Zahova nynh a vaeccaw hae kha a lue langte a ngaehoi hae cite na tua tou? Pawkeiccumou?
HOUH CCUNGCHIH
Pachia te vaeccaw lang tangnaw nynh na hingnaw tungvaw paw thanenaw mou a ung?
“Zahova—Nykaleih Lang A Ccangpaw Pachia” (Rawvianaw, February 15, 2003)
Pachia te vaeccaw lang tangkhonaw kong kha ccangkuh tua.
“Pachia Vaeccaw Lang Pawtemou Thua Kho lang?” (Ngawphue Hae Bakhianaw, Uh 2 naw, abalu 35)
Zahova te vaeccaw lang tangnaw nynh nopinung lukheit a hingnaw a khungnaw kong kha do tua.
Zahova te asekute kumhaw lae hae nynh mih thinglung e a ho hae paw kha ngae tua.