CCANGKUNAW 24
Vawccungccaw Hae Kong Amepaw
Zahova nynh vaawlang innbyng kong yn ccangsah kuh ry. Tuh-e innbyng kya vawccungccaw hae pabua hae zah minming kha ‘Pachia ccaw hae’ cite ko a thua. (Job 38:7) Vawccungccaw hae kong Baebu nynh pawtemou a ho? Vawccungccaw hae nynh pawmou a cyi hae? Vawccungccaw hae miakaw tuh Pachia innbyng hae tou?
1. Vawccungccaw hae tuh hunghaemou?
Zahova nynh laephi a raemaw vawccungccaw hae kha a rae hae. Pachia hawte muihsaw pyng hae thua hae zah vaawlang khua nynh a ung hae. (Hebru 1:14) Ccaang azalu te ung hae zah ziazae kocci a hoi hae. (Byaphy 5:11) “[Zahova] a hopaw bya kha kawngae hae zah a kawpyapaw a zui hae.” (Sam 103:20) Langmaw she lya tuh, Zahova nynh amaw bya kha ho lang, a ccungccaw hae kha bung te khung khy lang vawccungccaw hae kha leih a saw hae. Atu she mah, vawccungccaw hae nynh Khrihccaw hae kha Pachia kong a ccangkuh ry hae paw kalang lang a hroi hae.
2. Setan te muihsaw hoylei hae paw tuh hunghaemou?
Vawccungccaw abang tuh Zahova tungvaw zyn la tyn khyh hae. Masaty rawsetu vawccungccapaw tuh “laephi pynpi a lingpaw, Raerangsaro te Satan a ci hae paw” nynh thua. (Byaphy 12:9) Minccang paw hae a uh rypaw Setan nynh Adam te Evua kha la ling hae zah ccangpaw vawccungccaw hae kha mah rawsenaw kya a pasah bua hae. Rawsetu vawccungccaw hae kha muihsaw hoylei haepaw cite ko a thua. Zahova nynh minming kha laephi kalang vua hae zah aromaw ze yn roh vae cih hae.—Byaphy 12:9, 12 kha ria.
3. Setan te muihsaw hoylei hae paw nynh ccungccaw hae kha pawtemou a ling hae?
Setan te muihsaw hoylei hae paw nynh muihsaw hoyleipaw thyanaw, muihsaw hoylei hae paw te a ccuepekupaw ahoy leipaw thyanaw mangte ccungccaw hae kha a ling hae. Tousenaw langze, awsi do a thya hae paw, malang e kong a ho thya hae paw, a bawithuapaw tuhkhyhze a pawepaw hae kha khia hae paw nynh thua. Muihsaw hoyleipaw thyanaw te ihsei a kukuh hae paw mah a ung. Mih chii hae te bya hokuh kho a thua cite mah a ling hae. Thuasalama Zahova nynh hynhte raeringnaw yn pya: “Chihiinleihthya hae paw, apawe hae paw te mitleihthya hae paw kha doliakuh nan oh.” (Levitikas 19:31) E tuh Setan te muihsaw hoylei hae paw raw kyate yn thungkhaw ry keiccu nynh thua. Minming tuh Pachia raw hae thua hae zah aening kha vawsawnaw yn pya ry hae paw nynh thua hae.
HOUH CCANGKUH LANG HOUH MUIH LANG
Vawccungccaw hae nynh ahoypaw rya a lawnaw hae kong, ri lang ungpaw muihsaw hoyleipaw thyanaw, Setan te muihsaw hoylei hae raw kyate thungkhawkuhkhonaw kong kha ccangkuh tua.
4. Zahova kong ccangkuh lang vawccungccaw hae nynh ccungccaw hae kha a bung hae
Pachia vawccungccaw hae nynh ccungccaw hae kha daereih tetuh phung hopah khyh hae. Thuasalama, Pachia beih hae paw kha Pachia kong a nyh ry hae paw kalang lang a hroi hae. Byaphy 14:6, 7 kha ria tuhkoute e bakhianaw hae kha hokuh oh:
Phunghonaw kya vawccungccaw hae bungnaw pawcce ahoo?
Vawccungccaw hae nynh Baebu kong a nyh ry hae paw kalang namaw kha lang ae hroi kho hae cipaw na nynaw nynh thawzung ae hoisah tou? Pawcce?
5. Muihsaw hoyleipaw thyanaw kha vua
Setan te muihsaw hoylei hae paw tuh Zahova raw hae a thua hae hawte ah raw hae mah a thua hae. Luka 9:38-42 kha ria tuhkoute e bakhianaw kha hokuh oh:
Muihsaw hoylei hae paw nynh ccungccaw hae kha pawtemou vawsawnaw a pya hae?
Muihsaw hoylei hae paw te mazi ah ccuepekuh ry khyh oh. Deuteronomy 18:10-12 kha ria tuhkoute e bakhianaw hae kha hokuh oh:
Muihsaw hoylei hae paw nynh aening tungvaw fuhang hoi lang, ccuepekuh lang pawtemou a zuakuh hae? Na ungnaw kya paw cyisahnaw haemou a lung?
Muihsaw hoyleipaw thyanaw kha Zahova nynh a kheepaw tuh a ngaekuh cite na tua tou? Pawcce?
VIDEO kha pia, tuhkoute akaw lang-e bakhianaw hae kha hokuh oh.
Palesa nynh a ccanung kha vawsawnaw tung khyh nawlang thungkhawnaw kuihnaw kha nawsakuh lang accang cite na tua tou? Pawcce?
Muihsaw hoyleipaw raw kyate thungkhawnaw mue lang Palesa nynh pawmou cyi ahoo?
Amepaw Khrihccaw hae nynh muihsaw hoylei hae paw kha zungzae a dou hae. Locceihtu 19:19 te 1 Korin 10:21 kha ria tuhkoute e bakhianaw kha hokuh oh:
Muihsaw hoyleipaw thyanaw te asekupaw na hoipaw uccaw miakaw kha pawcce ro lang azici?
6. Setan te muihsaw hoylei hae paw kha na tae kho
Setan nynh muihsaw hoylei hae paw kha a uh hae. Thuasalama zyntynpaw vawccungccaw hae tuh Zisu cite ko a thuapaw vawccungccaw hae Bawi Mikhael nynh lang a hroi hae. Mikhael tuh hohcihciamou a thung? Byaphy 12:7-9 kha ria tuhkoute e bakhianaw hae kha hokuh oh:
A hungmou a thunghua? Mikhael te vawccungccaw hae tou, Setan te muihsaw hoylei hae paw tou?
Setan te muihsaw hoylei hae paw kha Zisu zuitu hae nynh ri ahoo cite na tua tou?
Setan te muihsaw hoylei hae paw dounaw kya na tae kho. James 4:7 kha ria tuhkoute e bakhianaw kha hokuh oh:
Setan te muihsaw hoylei hae paw raw kyate pawtemou na thungkhawkuh kho?
CCUNGCCAW ABANG NYNH HO HAE PAW: “Muihsaw hoyleipaw te asekupaw game hae zuepaw, video hae dopaw tuh pawtua ung khyh. Tuh-e tuh lungpaw nawlang nynh hung thua.”
Tuhte tuapaw tuh pawcce ri lang a ung?
ADYNGNAWTE
Zyntyn hae paw vawccungccaw hae nynh yn bung hae. Zahova raw thua hae paw Setan te muihsaw hoylei hae paw nynh tuh muihsaw hoyleipaw thyanaw mangte ccungccaw hae kha a ling hae.
Bua Liathuinaw
Ccungccaw hae kha Zahova kong ny nawlang vawccungccaw hae nynh pawtemou a bung hae?
Setan te muihsaw hoylei hae paw tuh hunghaemou?
Muihsaw hoyleipaw thyanaw kha pawcce na sihaekuh ry?
HOUH CCUNGCHIH
Zisu tuh vawccungccaw hae Bawi Mikhael nynh thua cipaw ria tua.
“Vawccungccaw Hae Bawi Mikhael Tuh A Hungmou?” (Website ccaw)
Muihsaw hoyleipaw tuh pyng lungkhu ungpaw ahoy leipaw thinlung thua khyh cipaw kong kha ria tua.
Muihsaw hoyleipaw fuhang kyate nopinung lukheit a luenaw kong kha ria tua.
Muihsaw hoyleipaw thyanaw mangte Setan nynh ccungccaw hae a lingnaw kong kha ria tua.