CCANGKUNAW 26
Hoyleinaw Te Riathae Vawsawnaw Hae Hynh Pawccemou A Ung?
Ccungccaw lukheit nynh hoyleinaw hae tung vae ze “pawcce hynhte a cyikuh?” cite a khiathya hae. E bakhianaw aphi Baebu kya a ung keiccuze lungtua lang a ung!
1. Setan nynh laephivaw lang hoyleinaw hae a ung nawlang pawmou la cyi?
Setan nynh Pachia kha a la rawse. Setan nynh minccang paw hae kha a uh ry keiccuze masaty ccungccaw Adam te Evua nynh Zahova kha a rawse nawlang hae a la cyi. Setan nynh Evua kha a la ling. (Genesis 3:1-5) Evua kha Zahova nynh ahoypaw uccaw abang yn pya ry khyh cipaw tuanaw a la hoisah. Pachia kaw ngae khyh ze ccungccaw hae tuh mih lung houh paw cih cihlangte a ho. Setan nynh Evua kha na chih lang khyh cite a hopaw bya tuh masaty hynbya nynh thua. Tuhkeiccuze, Baebu nynh Setan kha “a hynpaw thua zah hynbya a paaw nynh thua” cite a ci.—Johan 8:44.
2. Adam te Evua nynh pawcyi lang mou la pokuh hae?
Zahova tuh Adam te Evua tungvaw myarya a hysah. Thingku kuhkheit laelang khokhu kya-e thingku miakaw e athae kha aenaw khue a pya hae. (Genesis 2:15-17) Thuasalama minming nynh a kheekuhpaw aku kya-e athae kha nynh ae lang bya la paekuh hae. Evua nynh “tuh-e thingku athae kha lokuh zah a ae.” Tuhkoute, Adam nynh mah “a ae.” (Genesis 3:6) Mih luning mawte Pachia kaw ngae khyh hae. Adam te Evua tuh a ccing hae paw thua keiccuze amepaw cyi lang ruu khyh. Thuasalama Pachia kaw kha ruasuate ngae leite seinaw rae hae zah Pachia uhnaw kha a vua hae. Tuhkeiccuze vawsawnaw patae a la tung hae.—Genesis 3:16-19.
3. Adam te Evua byapaenaw keiccuze pawmou ah tung oh?
Adam te Evua seinaw a rae hae tetuh ccing vae khyh hae. E ccingleinaw kha a ccaw hae kha ro lang a ccousah vae hae. Adam te asekute Baebu nynh hynhte a ci: “Ccungccaw lu kheit keiccuze seinaw tuh laephi kalan yn thua zah, seinaw liate chinaw tuh yn thua, tukeiccuze ccungccaw balyn tuh chinaw nynh pong oun thuanua vae.”—Rom 5:12.
Akonglang aphuinphuin keiccuze riathae vawsawnaw ah tung oh. Ahoy leipaw byapaenaw ah rae oh keiccuze riathae vawsawnaw ah tung oh. Vaekhakheit tuh minccang paw hae nynh ahoy leipaw byapaenaw a rae hae keiccuze riathae vawsawnaw ah tung oh. Vaekhakheit tuh ung lang a ccang leinaw ccyh te ungnaw kya ah ung oh keiccuze riathae vawsawnaw ah tung oh.—Phunghotu 9:11 kha ria.
HOUH CCANGKUH LANG HOUH MUIH LANG
Laephivaw kya-e hoyleinaw te riathae vawsawnaw hae hanglang Pachia kya pawcce taevue a hoi khyh, aening vawsawnaw ah tung vae oh ze Pachia tuh pawtemou a ung cipaw kha tuatua.
4. Riathae vawsawnaw ah tung oh paw hanglang a hungmou taevue a hoi?
Pachia nynh laephi pyngpi kha a uh cite ccungccaw a lunghua nynh a zyn hae. Tuh-e tuh ame tou? VIDEO kha pia.
James 1:13 te 1 Johan 5:19 kha ria tuhkoute e bakhianaw kha hokuh oh:
Riathae vawsawnaw te hoyleinaw hanglang Pachia kya taevue a hoi tou?
5. Setan uhnaw keiccuze a cyihkuh hae paw kong kha tuatua
Genesis 3:1-6 kha ria tuhkoute e bakhianaw hae kha hokuh oh:
Setan nynh pawtemou a hyn?—Adihpaw 4 te 5 kha do tua.
Zahova nynh ccungccaw hae kha ahoypaw uccaw ccangkhakheit pya leite nynh a nung hae cite a tua hae ccaw Setan nynh pawtemou a ho?
Ccungccaw hae lungpaw nawlang Zahova uhkunaw hoo khyh cihlangte Setan nynh pawtemou a ho?
Phunghotu 8:9 kha ria tuhkoute e bakhianaw kha hokuh oh:
E laephi hynh Zahova nynh a uh khyh keiccuze pawhaemou a cyihkuh?
Adam te Evua tuh ccing hae zah Paradise kya ungnaw khue a mue hae. Thuasalama Setan bya ngaete Zahova kha la rawse hae
Rawsenaw keiccuze seinaw, riathae vawsawnaw te chiinaw hae ah tung oh
Zahova nynh seinaw, riathae vawsawnaw te chiinaw hae kha yn roh vae cih. Ccungccaw hae tuh bua yn ccingthui cih hae zah Paradise kya a ungthui cih hae
6. Riathae vawsawnaw ah tung oh paw kha Zahova nynh pe a ki
Riathae vawsawnaw ah tung vae oh ze Pachia nynh pe a ki tou? Siapharang David te zuitu Peter nynh a zei hae paw kha tuatua. Sam 31:7 te 1 Peter 5:7 kha ria tuhkoute e bakhianaw kha hokuh oh:
Ah vawsawnaw kha Zahova nynh a muih, pe a ki cipaw na nyh zah pawtemou na ung?
7. Pachia nynh riathae vawsawnaw miakaw kha yn roh vae cih
Isaiah 65:17 te Byaphy 21:3, 4 kha ria tuhkoute e bakhianaw kha hokuh oh:
Zahova nynh hoyleinaw miakaw kha yn roh vae cih cipaw na nynaw nynh pawcce lung ngaengannaw ae muesah?
Na nyh tou?
Setan nynh masaty hynbya hote Zahova kha the a thyasah. Tuh-e nynh Zahova tuh a dingpaw, sungsakunaw hoipaw uhtu thua khyh cite ccungccaw hae kha a tuasah hae. Aromawze Zahova nynh riathae vawsawnaw miakaw kha a roh cih zah amin kha a thyaasah cih. A uhnaw tuh ahoy huapaw nynh thua cipaw kha a langsah cih. Zahova min thyaasapaw tuh vaaw te lae kya azici huapaw nynh thua.—Matthai 6:9, 10.
CCUNGCCAW ABANG NYNH HO HAE PAW: “Ccungccaw hae riathae vawsawnaw tungpaw tuh Pachia rynaw nynh thua.”
Nangso pawtemou na tua?
ADYNGNAWTE
Setan te masaty ccungccaw hae tuh laephivaw e hoyleinaw hae hanglang abapite taevue a hoi hae. Zahova nynh vawsawnaw ah tung oh paw kha myarya pe yn ki zah aromawze vawsawnaw hae kha yn ropah vae cih.
Bua Liathuinaw
Evua kha Setan nynh pawtemou a ling?
Adam te Evua rawsenaw keiccuze pawmou ah tung oh?
Vawsawnaw ah tung oh paw kha Zahova nynh pe yn ki cipaw pawtemou ah ny oh?
HOUH CCUNGCHIH
Seinaw kong Baebu ccaesanaw kha ccangkuh tua.
Setan nynh Edin khokhu kya piahccahnaa a ungsanaw kong kha ria tua.
“Pachia Nynh Riathae Vawsawnaw Hae Kha Pawcce Khue A Ua?” (Rawvianaw, January 1, 2014)
Phi lang ruupaw bakhianaw hanglang lung ngaengan lang ungpaw aphi kha leihla tua.
“Ccungccaw Patae Chianaw Hae Kha Pachia Nynh Pawcce A Khee Khyh?” (Website ccaw)
Riathae vawsawnaw hynh pawcce a ung cipaw yn nyhpaw pisepaw lukheit kong kha do tua.