CCANGKUNAW 30
Na Sungsahpaw Mih Chii Hae Bua Yn Hing Cih Hae!
Chiinaw nynh ngaethyanaw te thinlung ccinaw yn hoisah. Tuhkeiccuze Baebu nynh chiinaw kha raw cite a ko. (1 Korin 15:26) Ccangkunaw 27 kya, ah ccangkuh vae hawte e raw kha Zahova nynh yn tae vae cih. Tuhte thua langze a chih vae hae paw so? E ccangkunaw kya, ccungccaw ccang patae bua hingthui kho nawlang hae, zungzae hingnaw mue lang—Zahova nynh yn cyipah cih cihkuhpaw myarya hoypaw byakingnaw kong kha ccangkuh lang. Pachia nynh mih chii hae kha bua yn thosah thui cih hae! Tuh-e tuh a thua kho ccaccing cih tou? Vaawlang kya ung lang tou tuhkhyhze laephivaw kya ung lang tou a thothui cih hae?
1. Ah sungsahpaw a chih hae paw hanglang Zahova rynaw tuh pawmou?
Zahova nynh a chih hae paw kha bua hingsah thui lang myarya a ry. Zyntyng paw Job nynh amaw a chii vae ze Pachia nynh yn ning lang khyh cipaw kha a zyn. Amaw nynh Pachia kha hynhte a ci: “Nae ko cih zah [Sawku kyate] kae oi cih.”—Job 14:13-15 kha ria.
2. Mih chii hae bua a thothui cih hae cipaw pawtemou ah ny oh?
Zisu laevaw kya la ung lya, ccungccaw hae kha bua thosah thuikhonaw thawzung kha Pachia nynh a la pya. Zisu nynh kum-12 nung imohnung te nuhmaenung a ccaw kha bua a la thosah thui hae. (Marka 5:41, 42; Luka 7:12-15) Nyalang tuh Zisu vaeccapaw Lazaruh a la chih. Lazaruh tuh a unaw hae nin pali a ci vae zemah, Zisu nynh bua a hingsah thui. Pachia kalang sawsang koute: “Lazaruh yn pou” cite a ko tetuh “a chih paw tuh yn pou”—Lazaruh tuh bua hing vae! (Johan 11:43, 44) Lazaruh a innbyng te vaeccaw hae tuh pawcihmou mih lungpaw cih cipaw kha na mihmae kya ungsah kuh tua!
3. Na sungsahpaw a chih hae paw hanglang paw ngaehoinaw mou a ung?
Baebu nynh hynhte bya yn king pyakuh: “Thoothuinaw a um cih.” (Locceihtu 24:15) Zisu nynh a thosah thui hae paw tuh vaawlang kae khyh hae. (Johan 3:13) Laephivaw bua yn hing thui hae keiccuze mih lung myarya a paw. Tuhhawte, Zisu nynh ccungccaw ccang patae kha bua yn thosah thui cih hae zah laephi Paradise kya zungzae a ungsah cih hae. Ccungccaw hae nynh a ning vae hae zemah Pachia nynh tuh a ning khyh hae keiccuze “shaw hae kya a um hae paw balyn”—bua yn thothui cih hae cite—Zisu nynh a ci.—Johan 5:28, 29.
HOUH CCANGKUH LANG HOUH MUIH LANG
Mih chii hae a thothui kho hae, yn thothui cih hae cipaw Baebu bya kha leihla tua. Thothuinaw nynh soihbianaw te ngaehoinaw yn pyakhonaw zia kha ccangkuh tua.
4. Zisu nynh mih chii hae kha bua a thosah thui kho cipaw kha a langsah
A vaeccapaw Lazaruh hanglang Zisu nynh la cyipyapaw kha houh ccangkuh tua. Johan 11:14, 38-44 kha ria tuhkoute e bakhianaw hae kha hokuh oh:
Lazaruh a chih ccaccing cipaw kha pawtemou ah ny oh?—Adihpaw 39 kha do tua.
Lazaruh tuh vaawlang a kae vae langze Zisu nynh laevaw kya bua hing lang a thosah thui cih cite na tua tou?
5. Ccungccaw patae yn thothui cih hae!
Sam 37:29 kha ria tuhkoute e bakhianaw kha hokuh oh:
Yn thothui cih hae paw ccungccaw ccang a thung tuh pawkyamou a ung cih hae?
Zahova kha a beih hae paw kele thua leite ccungccaw patae kha Zisu nynh yn thosah thui cih hae. Locceihtu 24:15 kha ria tuhkoute e bakhianaw kha hokuh oh:
A hung a thothui paw kha mou na muih ry?
E hynh tuatua: A paaw nynh a ihpaw a ccaw kha a tho hawte Zisu Khrih nynh a chih hae paw kha zoibaheih lang a thosah thui kho hae
6. Thothuinaw nynh soihbianaw te ngaehoinaw ae pya kho
Baebu kya-e Zairu a ccanung kong nynh mih ngaethah hae paw kha soihbianaw te thawzung a hoisah hae. Luka 8:40-42, 49-56 kya a cyihkuh ccaccingpaw kha ria tua.
Zisu nynh Zairu a ccanung kha a thosah thui maw: “Rih nan, zyn kyalya zyn” cite Zairu kha a ci. (Adihpaw 50 kha do tua.) Thothuinaw ngaehoinaw nynh pawtemou ae bung . . .
Na sungsahpaw lukheit a chii vae ze?
Na hingnaw hanglang ri lang ungpaw na tung ccyh kya?
VIDEO kha pia, tuhkoute akaw lang-e bakhianaw kha hokuh oh.
Thothuinaw ngaehoinaw keiccuze Phelicity nungpaw hae nynh soihbianaw te thawzung pawtemou a mue hae?
CCUNGCCAW ABANG NYNH HO HAE PAW: “Mih chii hae yn thothui cih hae cipaw tuh pawtemou thua kho cih.”
Nang pawtemou na tua?
Thothuinaw a ung cipaw kha paw Baebu ccaw mangte mou na ccaesah cih?
ADYNGNAWTE
A chih hae paw ccungccaw ccang patae hae tuh bua yn thothui cih hae. Zahova nynh minming kha bua a hingsah thui ry hae. Amaw nynh Zisu kha thosah thui kho paw thungnaw a pya.
Bua Liathuinaw
Zahova te Zisu nynh mih chii hae kha bua a hingsah thui ry hae cipaw pawtemou ah ny oh?
Yn thothui cih hae paw ccungccaw ccang patae tuh pawkyamou ung cih hae—vaawlang kya tou tuhkhyhze laephivaw kya tou? Pawcce tuhte na ho kho?
Na sungsahpaw a chih hae paw tuh bua yn thothui cih hae cipaw kha pawnynhmou ae zynsah?
HOUH CCUNGCHIH
Ngaethyanaw taekhonaw kong kha ria tua.
Baebu phunglang hae nynh a ngaethah paw kha a bung kho tou?
Sungsahpaw lukheit a chii vae ze imua hae teing kho nawlang pawnynhmou a bung kho hae?
Vaawlang a thothui cihpaw a ung tou? A hunghaemou thothui lang khyh hae?