CCANGKUNAW 42
Zu Te Vawpaw A Hoipaw Te Ahoi Leipaw Kong Baebu Nynh A Hopaw
Ungtuzia abang kya, zu tuhkhyhze vawpaw hoi langze nynh ah lungpaw cih cite ccungccaw hae nynh a tua hae. Thuasalama, zu tuhkhyhze vawpaw a hoipaw miakaw nynh mih lung a pawpaw thua khyh hawte zu tuhkhyhze vawpaw a hoi leipaw miakaw nynh mih lung a paw leipaw thua khyh. Baebu nynh zu tuhkhyhze vawpaw hoi leipaw, zu tuhkhyhze vawpaw hoipaw phuinning balyn tuh lasung nynh thua cite a ci.
1. Zu tuhkhyhze vawpaw hoi leipaw thanenaw hae tuh pawmou?
Baebu nynh hynhte a ci: “A haaw vae paw a liaccanung kha zu lang a hoikuhpaw tuh uccaw hoypaw nynh a rae; thuasalama zu a hoi leipaw ccungccaw tuh houh hoypaw uccaw kha a rae.” (1 Korin 7:32, 33, 38 kha ria.) Zu tuhkhyhze vawpaw hoi leipaw tuh pawtemou “houh a hoyhua”? Zu tuhkhyhze vawpaw a hoilei hae paw Khrihccaw hae tuh zu tuhkhyhze vawpaw kha pekite do-oih hoo khyh zah mih khe houh ccung. Tousenaw langze, Zahova hanglang rya houh lah kho hae zah ccangpaw ram lang cciate thehoypaw bya a ho kho hae. Abapi hua tuh Zahova te vaeccawkukho nawlang a ccyh houh a pya kho hae.
2. Tazavuin kuihkyngkunaw thanenaw hae tuh pawmou?
Zu tuhkhyhze vawpaw hoipaw tuh hoi leipaw hawte nynh thanenaw a ung. “Lu kheit laeze lu ning ahoyhua” cite Baebu nynh a ci. (Phunghotu 4:9) Baebu phunglang a zui hae paw Khrihccaw zuvaw hae hanglang e kong tuh myarya ame. Tazavuin kuihkyngkuh hae paw zuvaw hae tuh lukheit te lukheit sungsakuh te sawtuakuh lang bya a kingkuh hae. Tuhkeiccuze, kuihkyngkuh leite a ungkheih hae paw zuvaw hae laeze lung daenaw houh a mue hae. Mih ccaw hae mah lung daenaw a muesah hae.
3. Kuihkyngkunaw kha Zahova nynh pawtemou a muih?
Zahova nynh masaty innbyng kha a thadyngsah lya, hynhte a ci: “Pisepaw nynh a nung te a paaw kha cciataw zah a zu te a umkheih hae.” (Genesis 2:24) Zahova nynh zuvaw hae kha lukheit te lukheit sungsahkuh lang, hing lungkhu zungzae ungkheih hae sah ci a ry. Zu tuhkhyhze vawpaw lukhakheit nynh nupi pise seinaw a rae ze nynh phiakunaw khue a ung. Tuhmaw hae hei, phiakuh lang tou phiakuh lei lang tou cipaw kha seinaw a hoi leipaw zu tuhkhyhze vawpaw kha pokunaw khue a pya.a (Matthai 19:9) Zahova nynh Khrihccaw hae kha zu, vawpaw lukheit kyalya nynh hoi lang kaw a ua hae.—1 Timote 3:2.
HOUH CCANGKUH LANG HOUH MUIH LANG
Zu tuhkhyhze vawpaw a hoipaw thuasah a hoi leipaw thuasah lungpawkhonaw kong te —Zahova kha lungpaw sahkhonaw kong—kha ccangkuh.
4. Zu tuhkhyhze vawpaw hoi leipaw lasung kha thanenaw ung langte mang
Zisu nynh zu tuhkhyhze vawpaw hoi leipaw kha lasung langte nynh a muih. (Matthai 19:11, 12) Matthai 4:23 kha ria tuhkoute e bakhianaw kha hokuh oh:
A Paaw Pachia ryalaw lang, minccang paw hae kha bung lang zu hoi leipaw a hingnaw kha Zisu nynh pawtemou la mang?
Khrihccaw hae mah Zisu hawte zu tuhkhyhze vawpaw hoi leipaw hingnaw kha thanenaw ung lang a mang kho hae. VIDEO kha pia, tuhkoute akaw lang-e bakhianaw kha hokuh oh.
Khrihccaw hae nynh zu tuhkhyhze vawpaw hoi leipaw hingnaw kha thanenaw ung lang pawtemou a mang kho hae?
Na nyh tou?
Baebu nynh kum hohzeih cihte nynh zu tuhkhyhze vawpaw hoi lang cite ho khyh. Thuasalama, ‘liaccaw ccangvae thuanaw ccyh a lue ccyh’ cia ngaw lang thaw yn pya. Ngawphue ccyh kya tuh chiisaw rynaw eih le zah ahoypaw byapaenaw rae lang a ruu kho.—1 Korin 7:36, NW.
5. Zu tuhkhyhze vawpaw kha hawnaw te pokuh
Zu tuhkhyhze vawpaw pokuhpaw tuh hingnaw kya abapi huapaw byapaenaw ccangkheit nynh thua. Matthai 19:4-6, 9 kha ria tuhkoute e bakhianaw kha hokuh oh:
Khrihccaw lukheit tuh pawcce a rangte zu tuhkhyhze vawpaw hoi lang a ccang khyh?
Baebu nynh zu hoy, vawpaw hoypaw kya hoi lang a ccangpaw ziazae hae kha a langsah. Azici huapaw tuh Zahova a sungsahpaw kha nynh pokuh lang paw nynh thua.b 1 Korin 7:39 te 2 Korin 6:14 kha ria. Tuhkoute e bakhianaw hae kha hokuh oh:
Khrihccaw te Khrihccaw kele nynh zu te vawpaw lang hoi lang pawcce a ccang?
Pachia a sungsah leipaw kha zu tuhkhyhze vawpaw lang hoi langze Zahova tuh pawtemou ung cih cite mou na tua?
A phuin lokuh leipaw ramsaw hae tungvaw puihnawpaw ccong khang lang ze asipi kho lang khyh. Tuhhawte, zyntu thualeipaw te zu tuhkhyhze vawpaw hoi lang zemah piahccahnaa a lung kho
6. Kuihkyngkunaw kha Zahova hawte muih
Langmaw Israel pise hae abang nynh mihmaw hoynaw hanglang mih zu hae kha a mya hae. Malakhi 2:13, 14, 16 kha ria tuhkoute e bakhianaw kha hokuh oh:
Zahova nynh Baebu te a rawsekuh leipaw akong te myakupaw kha pawcce a hua?
Ohhuakunaw, myakunaw nynh seinaw hoi leipaw zu tuhkhyhze vawpaw te imua hae kha ruunaw patae a tungsah kho hae
VIDEO kha pia, tuhkoute akaw lang-e bakhianaw kha hokuh oh.
Zu tuhkhyhze vawpaw tuh zyntu a thua khyh ze innbyng hoysah kho nawlang pawmou na cyi kho?
7. Kuihkyngkunaw hanglang Zahova phunglang hae kha zui
Kuihkyngkunaw hanglang Zahova phunglang hae kha zui kho nawlang thawte zuakunaw ahoo kho.c Thuasalama tuhte a zuakuh hae paw kha Zahova nynh hythua a pya hae. VIDEO kha pia.
Hebru 13:4 kha ria tuhkoute e bakhianaw hae kha hokuh oh:
Kuihkyngnaw hanglang Zahova phunglang hae tuh a thane cite na tua tou? Pawccemou?
Zahova nynh Khrihccaw hae kuihkyngkuh vae ze, myakuh vae ze tazavuin shethuh hae sah ci a ry. Ram a lunghua e accohzah kawhoitu hae nynh mah tuhte nynh a ngia hae. Titu 3:1 kha ria tuhkoute e bakhianaw kha hokuh oh:
Nang tuh zu tuhkhyhze vawpaw na hoipaw thua ze nae kuihkyngkunaw tuh accohzah upadi hawte a thua tou?
CCUNGCCAW LUKHEIT NYNH KHIAPAW: “Kuihkyngkuh leite so pyngkheih lang ung lang zae khyh tou?”
Nang pawtemou na phi cih?
ADYNGNAWTE
Zu tuhkhyhze vawpaw hoipaw, hoi leipaw tuh Zahova kyate a muekuhpaw lasung nynh thua. Zahova rynaw te a ung hae ze lungpawnaw te lung ngaengannaw a mue kho hae.
Bua Liathuinaw
Zu tuhkhyhze vawpaw hoi leipaw hingnaw kha pawtemou thanenaw ung lang a mangkuh kho?
Baebu nynh Khrihccaw te Khrihccaw kele kha zu tuhkhyhze vawpaw lang hoi lang pawcce thaw yn pya?
Myakuhkhonaw a konglang ccangkheit kele tuh pawmou?
HOUH CCUNGCHIH
“Bawipaw nuh zuipaw kele” te kuihkyngkuh cipaw tuh pawmou a ho ry?
“Ccaw Ria Hae Paw Kyate Bakhianaw” (Rawvianaw, July 1, 2004)
Chingkunaw (dating), kuihkyngkunaw te asekuhte ahoypaw byapaenaw rae kho nawlang video ccangning kha do tua.
Unopaw lukheit tuh a vuapaw laeze houh aphute huapaw kha Zahova nynh a pya keiccuze pawtemou a ung cipaw kha do tua.
Myakuh lang, pyngkheih lang ungkheih le lang cite tuamaw ze paw kong hae mou tua bia lang?
“‘Pachia Nynh A Ungsah Kheih Hae Paw Kuihkyngkunaw’ Kha Phu-esah” (Rawvianaw, December 2018)
a Nupi pise seinaw keiccu thua leite pyngkheih lang ungkheih leinaw kong kha Ccaesanaw 4 kya do tua.
b Ungtuzia abang kya, nungpaw hae nynh mih ccaw hae hanglang zu tuhkhyhze vawpaw kha a dypya hae. Sungsakunaw hoipaw nungpaw hae tuh paepaw lang, monung lang a po hae ze phua, anya ahang cipaw kha thua leite Zahova kha a sungsah tou sungsah khyh tou cipaw kha nynh masaty lang a tua bia hae.
c Kuihkyngkuh leite lukhakheit te na ung lang thua ze phiakuh lang tou, kuihkyngkuh lang tou cipaw kha namaw nynh byapaenaw na rae cih.