CCANGKUNAW 47
Tuipi-ing Lang Na Paccynkuh Vae Tou?
Baebu na ccangkuh keiccuze Zahova kong patae na nyh vae. Na ccangkuh hae paw kha zui lang, rulaekunaw hae mah na cyih ma ming cih. Tuhmaw hae hei, Zahova kalang pyng pyaku te tuipi-ing lang ka paccynkuh la khyh cite na tua kho. E ccangkunaw kya tuipi-ing maw a tungkuh thyapaw kheenaw hae te taekhonaw kong hae kha hokuh lang.
1. Tuipi-ing maw Baebu hawnaw hohzeihmou hoi ahoo?
Tuipi-ing maw ‘byaccing kha ny’ lang ahoo. (1 Timote 2:4) Thuasalama Baebu aphi miakaw kha ny ahoo cite a ho rypaw thua khyh. Tuipi-ingnaw a saw vae paw Khrihccaw hae hei pou a leihla ung hae. (Kolose 1:9, 10) Tuipi na ing maw aleihpaw Baebu ccangpyanaw hae kha tuh ny lang ahoo. A buu Khrihccaw piccang hae nynh Baebu hawnaw a zawnawte na hoi tou, na hoi khyh tou cipaw ny lang ae bung cih hae.
2. Tuipi na ing maw pawhaemou na cyih cih?
Tuipi-ing maw ‘ngaesikuh te paleihkuh’ lang. (Locceihtu 3:19 kha ria.) Asuilang tuh na la raepaw seinaw hae hanglang myarya ngaethya te Zahova kalang yn ngaethya cite ngiakuh lang cipaw nynh a ho ry. Ahoy leipaw ziazae hae kha sihaekuh te Pachia nynh a rypaw phunglang hawte ung lang byapaenaw raekuh lang. Tuh apiaze, a buu pungkunaw kya pungku nawlang, tuipi-ing lei ungpaw phunghotu lang phunghonaw liate Khrihccaw a buu te a mungkupaw thua lang ahoo.
3. Rinaw kha pawcce yn kheepaw lang thuasah lang a ccang khyh?
Ccungccaw abang nynh Zahova kya byakingkuh hawte kae cyih kho lang khyh cite a rih hae. Baebu kya-e zyntyng hae paw nopi, pise hae hei seinaw a rae sei hae keiccuze nang mah seinaw na rae sei kho. Thuasalama Zahova nynh amaw a beih hae paw kyate ccingnaw kha ngaehoi khyh. (Sam 103:13, 14 kha ria.) Na cyi kho thyh cia cyipaw kha Zahova nynh a ry! Amaw nynh ae bung cih. “Pawpaw uccaw nynh mah Pachia sungsakunaw kyate aening kha oun phia kho lan khyh” cite bya yn kingpya kuh.—Rom 8:38, 39 kha ria.
HOUH CCANGKUH LANG HOUH MUIH LANG
Zahova kong houh ny lang leihla lang zah, Pachia bungnaw lehkhang langze tuipi-ing lang kheenaw hae taekhonaw kong kha leihla.
4. Zahova kong houh ny lang zuakuh
Tuipi-ing maw Zahova kong hohzeihmou ny lang ahoo? Pachia kha sungsah te amaw rynaw mue rynaw thinlung a ung cia ny lang ahoo. Laephi pyngpi kya Baebu ccangkuh hae paw nynh pawtemou a cyi hae cipaw ny nawlang VIDEO kha pia. Tuhkoute akaw lang-e bakhianaw kha hokuh oh.
E video kya, ccungccaw abang kha tuipi-ing lang paccynkuh nawlang pawnynhmou a bung hae?
Rom 12:2 kha ria tuhkoute e bakhianaw hae kha hokuh oh:
Baebu ccangpyanaw, Zahova Ccaeccei hae ccangpyanaw tuh ame tou mekhyh tou cite tuanaw na hoi boi tou?
Tuhte na tua ze pawmou na cyi kho?
5. Tuipi-ing lang ae khee hae paw kha tae lang zuakuh
Zahova kalang pyng pyakuh te tuipi-ing lang byapae ccyh kya ah balynte ruunaw ah tung thya oh. Tousenaw ccangkheit do lang, VIDEO kha pia, tuhkoute akaw lang-e bakhianaw hae kha hokuh oh.
E video kya, Narangerel nynh Zahova beih lang paw kheenaw hae mou a la tae?
E kheenaw hae kha tae nawlang Zahova a sungsanaw nynh pawtemou a bung?
Phungtangbya 29:25 te 2 Timote 1:7 kha ria tuhkoute e bakhianaw kha hokuh oh:
Kheenaw hae kha tae kho nawlang pawnynhmou rawthungnaw yn hoisah?
6. Zahova nynh ae bung cih cipaw kha zyn
Zahova nynh nang kha ae bung cih. VIDEO kha pia, tuhkoute akaw lang-e bakhianaw hae kha hokuh oh.
E video kya, Baebu a ccangkuhpaw lukheit nynh tuipi-ing lang pawcce a ngankuh khyh?
A ccangkuh hae paw nynh Zahova kha zyn te doliakuh lang pawtemou a bung?
Isaiah 41:10, 13 kha ria tuhkoute e bakhianaw kha hokuh oh:
Pyng na pyakuh lya na pyapaw byaking hawte ka cyi kho cih cite pawcce na zyn?
7. Zahova sungsakunaw tungvaw phutesahnaw thinlung kha lungthungsah
Nang kha Zahova nynh hohcih ciamou ae sungsah cipaw na tua ze Pachia tungvaw na lung houh tua cih zah amaw kha zungzae beih rynaw thinlung yn ung cih. Sam 40:5 kha ria tuhkoute e bakhianaw kha hokuh oh:
Zahova kyate na muepaw paw hythuanaw hae hanglang mou na lung myarya tua?
Profeh Jeremiah nynh Zahova te a bya kha sungsah zah Zahova min phukunaw khue kha myarya a phutesah. Amaw nynh hynhte a ci: “Pou BAWIPAW, na bya tuh ka hanlan lungtuanaw lang tang zah, ka lungrythuakhaekuh; pawccecize kae tuh na min te ko ka thua.” (Jeremiah 15:16) E bakhianaw hae kha phi tua:
Zahova Ccaeccei lukheit thuapaw tuh pawcce a phute?
Zahova Ccaeccei lukheit lang tuipi na ing ry tou?
Tuipi-ing lang ae kheepaw ccangkhakheit a ung tou?
Tuipi-ing lang cipaw eenaw phya nawlang pawmou cyi hoo cih cite na tua?
CCUNGCCAW ABANG NYNH HO HAE PAW: “Tuipi-ing koute ka byaking hawte zui kho khyh langpaw kha ka thinphang.”
Nangso tuhte na tua tou?
ADYNGNAWTE
Zahova bungnaw te tuipi-ing lang ae kheepaw miakaw kha na tae kho.
Bua Liathuinaw
Tuipi-ing maw Baebu hawnaw hohzeihmou hoi lang ahoo?
Tuipi-ing maw paw rulaekunaw hae mou cyi lang ahoo kho?
Rinaw kha khee nawlang pawcce thuasah lang a ccang khyh?
HOUH CCUNGCHIH
Tuipi-ing lang eenaw nungkupaw abapi a konglang kha tuatua.
“Tuipi-ing Lang Na Paccynkuh Vae Tou?” (Rawvianaw, March 2020)
Na tungkhopaw ruunaw hae kha pawtemou tae kho lang cipaw kha leihla tua.
“Tuipi-ing Lang Pawnynhmou Yn Khee?” (Rawvianaw, March 2019)
Tuipi-ing lang alepaw kheenaw hae la taepaw lukheit kong kha do tua.
Atakaw lya, tuipi a ing ngan leipaw Ataa kha tuipi-ing kho nawlang pawnynhmou a bung cipaw kha do tua.