CCANGKUNAW 36
Pawpaw Kya Zemah Ding
Ccungccaw miakaw nynh adingpaw kha vaeccaw lang a tang ry hae. Zahova nynh mah a vaeccaw hae kha adingsah ry hae. Ading leipaw ccungccaw hae a lungnaw laephivaw kya ding lang tuh zoi khyh. Thuasalama pawpaw kya zemah ding lang zetuh paw thanenaw mou a ung cih?
1. Ding lang a ccangnaw abapi akong tuh pawmou?
Minccang paw hae tungvaw dingpaw tuh Zahova kha ah sungsah oh zah saw ah tua oh cipaw langsahpaw nynh thua. Zahova nynh ah tua oh paw te ah cyih oh paw miakaw kha a nyh. (Hebru 4:13) Ding lang ah zuakuh oh paw kha mah nyh zah phu a tesah. Baebu nynh hynhte a ci: “A ccouseikuhpaw tuh BAWIPAW hanlan anungsikuhpaw nynh thua, thuasalama miding hae tuh BAWIPAW nynh a zyn hae paw nynh thua.”—Phungtangbya 3:32.
2. Nin takyh hingnaw kya dingkhonaw zia abang tuh pawhaemou?
Zahova nynh “lu kheit te lu kheit byaccing kha hokuh” hae sah ci a ry. (Zekhariah 8:16, 17) Tuh-e tuh pawmou a ho ry? Innbyng, rya lakheihtu, unopaw unonung hae te accohzah kawhoi hae paw te bya hokuh vae ze ah hyn khyh oh zah ame leipaw kong hae mah ah ho khyh oh. Adingpaw tuh ruh khyh zah hyn khyh. (Phungtangbya 24:28 te Efesa 4:28 kha ria.) Ngunto hae kha merarihte a pya hae. (Rom 13:5-7) ‘Pawpaw kya balyn ading hae.’—Hebru 13:18.
3. Dingnaw thanenaw hae tuh pawmou?
Adingpaw cite minhoy ah muekuh oh zah aening kha minccang paw hae nynh yn zyn hae. Khrihccawbuu kya daenaw te khynnaw ungsah zah innbyng hawte yn tuasah. Athah ahoy phiathyanaw thinlung kha a thyaasah. Tuh piaze dingnaw nynh “Khumtu Pachia ccangpyanaw kha a paccan” kho. Minccang paw hae kha Zahova beih rynaw thinlung a hoisah kho hae.—Titu 2:10.
HOUH CCANGKUH LANG HOUH MUIH LANG
Dingnaw nynh Zahova te namaw tungvaw thanenaw ungnaw zia te hingnaw zia aphuinphuin kya dingkhonaw kong kha do tua.
4. Dingnaw kha Zahova nynh a ry
Sam 44:21 te Malakhi 3:16 kha ria tuhkoute e bakhianaw hae kha hokuh oh:
Zahova a ny khyh nawlang phishi kho a thua cite pawcce tua lang a ccang khyh?
Byaccing ho lang a zoi khyh ccyh kya zemah merarihte ho langze Zahova tuh pawtemou ung cih cite mou na tua?
Imua hae nynh merarihte a ho hae ze nungpaw hae tuh mih lung a paw. Aening nynh merarihte ah ho oh ze Zahova a lungpaw
5. Ccyh takyh kya ding
Ccungccaw patae nynh zungzae ding lang tuh thua kho lang khyh cite a tua hae. Thuasalama pawcce ccyh takyh kya ding lang a ccang cipaw kong kha tuatua. VIDEO kha pia.
Hebru 13:18 kha ria tuhkoute akaw lang-e hae kya dingkhonaw kong kha tuatua . . .
innbyng kya.
ryalaw te siainn kya.
ccangpaw hae kya.
6. Dingnaw nynh thanenaw yn muesah
Ding keiccuze ruunaw a tungkuh kho. Thuasalama dingnaw tuh ahoy huapaw hingnaw zia nynh thua. Sam 34:12-16 kha ria tuhkoute e bakhianaw kha hokuh oh:
Dingnaw nynh hingnaw kya paw thanenaw mou a ungsah?
Ading hae paw zuvaw hae innbyng tuh hoy zah a tyn
Adingpaw ryalahtupaw kha ryalaw nawtupaw nynh a zyn
Adingpaw ram ccugccaw tuh accohzah kawhoitu hae paw kya minhoy a mue
CCUNGCCAW ABANG NYNH HO HAE PAW: “Beihtaraw hynpaw tuh sei khyh.”
Zahova nynh hynpaw miakaw kha a hua cite pawcce na zyn?
ADYNGNAWTE
Zahova nynh a vaeccaw hae kha honaw, cyinaw miakaw kya adingsah ry hae.
Bua Liathuinaw
Dingkhonaw zia abang tuh pawmou?
Zahova a ny khyh nawlang phishi kho a thua cite pawcce tua lang a ccang khyh?
Ccyh takyh kya pawcce na ding ry?
HOUH CCUNGCHIH
Nungpaw hae nynh ccaw hae kha ding lang pawtemou a ccangpya kho hae?
Ah byaking hawte cyipaw tuh pawcce ahoy?
Ngunto kha amelei langte a mang hae zemah pawcce pya lang a ccang.
Ahynpaw ccungccaw lukheit pawcce adingpaw lang a tang?
“Zahova Tuh Thawccinaw Te Ngaethyakunaw A Hoipaw Pachia Cipaw Ka La Ny” (Rawvianaw, May 1, 2015)