CCANGKUNAW 58
Zahova Tungvaw Pou Zyntyn
Amepaw Khrihccaw hae nynh ccangkhakheit tuhkhyhze lukhakheit keiccuze Zahova beih vae khyhpaw a thua khyh nawlang bya a paekuh hae. Nangmah tuhhawte bya na paekuh maming cih. Zahova nynh zyn na tynnaw kha phu a tesah. (1 Sherianaw 28:9 kha ria.) Pawta hawpaw hae kya mou Pachia tungvaw zyntyn lang a ruu kho? Zyntyn lang pawnynhmou ae bung kho?
1. Zahova tungvaw zyntyn nawlang a ruu ccaw ccungccaw abang nynh pawtemou a cyi kho hae?
Zahova beih vae khyh nawlang ccungccaw abang nynh yn khee cih hae. A hung hae nynh mou yn khee cih hae? Byaccing kha a vua hae paw abang nynh ah zynnaw ro nawlang Pachia bupi kong ame lei lang a ho hae. Minming kha zynnaw vuatu hae (apostate) cite ko a thua. Beihnaw cciakhaetu abang nynh mah raeringnaw a hoi lei hae paw kha byaccing kyate a toikuh nawlang hae ame leipaw thungpang kha a ho hae. Rawsetu hae te eikuhpaw, mih ccah-uh, website ccaw hae riapaw, mih video hae kha dopaw tuh ri lang myarya ung. Zahova tungvaw zyntyn te a beih hae paw kha a cciasahsei hae paw te asekuhte, Zisu nynh hynhte a ci: “Minmin tuh khamawte um hae sah; minmin tuh mitmoh hae a cciakhaetu hae mitmoh hae nynh thua hae. Te mitmohpaw nynh mitmohpaw kha a cciakhae ze parouhte hunghua lungkhu lang a ccah cih hae.”—Matthai 15:14.
Mawte ah nyhkuhpaw lukhakheit nynh Zahova Ccaeccei lang ka thua ry vae khyh cite a ho ze so? Amaw tuh na sungsahpaw vaeccaw a thua langze na ngae a thah maming cih. Kamaw tou nae pokuh cih, Zahova tou na pokuh cih cite yn nangse kho. Pawpaw lae langze Pachia tungvaw pou zyntyn nawlang byapaekuh lang. (Matthai 10:37) Tuhta hawpaw ccungccaw hae te mungkuh nang oh cihkuhpaw Pachia kawbya kha ah ngae oh.—1 Korin 5:11 kha ria.
2. Maw byapaenaw kya Zahova tungvaw zyn ka tyn cipaw pawtemou langsah lang?
Zahova kha sungsanaw nynh ame leipaw beihnaw te ccuepekuh khyh nawlang ah lung yn thosah. Maw ah ryalaw, maw pabuapaw phu, cyinaw miakaw tuh ame leipaw beihnaw te a ccuepekuhpaw thua lang ccang khyh. Zahova nynh hynhte raeringnaw yn pya: “Ka ccungccaw hae, [Alesaepaw Babilon] kyate oun pou oh.”—Byaphy 18:2, 4.
HOUH CCANGKUH LANG HOUH MUIH LANG
Lukhakheit keiccuze Zahova tungvaw zyntynnaw a zya khyh nawlang cyikhonaw zia, Alesaepaw Babilon kyate pounaw liate zyn ka tyn cipaw na langsahkhonaw kong hae kha ccangkuh tua.
3. Ame leipaw ccangpahtu hae kha raeringkuh oh
Zahova bupi kong ame leipaw kong thae vae ze pawtemou liaru lang a ccang? Phungtangbya 14:15 kha ria tuhkoute e bakhianaw kha hokuh oh:
Thaepaw miakaw zynsei khyh nawlang pawcce pekikuh lang?
2 Johan 10 kha ria tuhkoute e bakhianaw hae kha hokuh oh:
Zynnaw vua hae paw kha pawtemou ccuepe lang a ccang?
Zynnaw vua hae paw te directte ccuepekuh khyh zemah mih ccangpyanaw hae te pawtemou ccuepekuh sei lang?
Zahova kong, bupi kong ameleite a ho hae paw kha ngae langze Zahova tuh pawtemou ung cih citemou na tua?
4. Uno lukheit nynh seinaw rae vae ze Pachia tungvaw pou zyntyn
Khrihccawbuu kya lukhakheit nynh alepaw seinaw a rae cipaw ah ny oh ze pawcyi lang mou taevue ah hoi oh? Langmaw Israel hae kha Pachia nynh a pya hae paw kawbya kya-e phunglang ccangkheit kha tuatua. Levitikas 5:1 kha ria.
E Baebu ccaw liate lukhakheit nynh alepaw seinaw a rae cipaw kha ah ny oh ze Khrihccaw piccang hae kha hopya lang a ccang. Hopya hae maw seinaw a raepaw amaw maw nynh Khrihccaw piccang hae kalang cciate seinaw phykuh lang hopyapaw tuh sungsakunaw langsahpaw nynh thua. Seinaw a phykuh khyhze aening nynh Zahova tungvaw zyntynnaw liate Khrihccaw piccang hae kha hopya lang hae ahoo. Tuhte cyipaw nynh . . .
Zahova Pachia tungvaw a tynpaw sungsakunaw ka hoi cipaw pawtemou a langsah?
Seinaw a raepaw tungvaw a tynpaw sungsakunaw ka hoi cipaw pawtemou a langsah?
Khrihccawbuu kya ung hae paw tungvaw a tynpaw sungsakunaw ka hoi cipaw pawtemou a langsah?
Zynnaw lokuhpaw lukhakheit piahccahnaa a tung ze bung!
5. Alesaepaw Babilon kyate pou oh
Luka 4:8 te Byaphy 18:4, 5 kha ria tuhkoute e bakhianaw hae kha hokuh oh:
Ka min tuh ame leipaw beihnaw min ccazin kya a ung ung tou?
Ccangpaw beihnaw te asekuhpaw aphu phukheit kya ka pabua tou?
Ka ryalaw tuh ame leipaw beihnaw kha langpi ccangkhakheit te a bung tou?
Ka hingnaw kya ame leipaw beihnaw te ccuepekuh leite unglang ahoopaw a ung tou?
E bakhianaw hae ccangkhakheit kha athua cite phi langze paw hae mou rulaekuh lang a ccang?
Pawte thua zemah athah ahoy phiathyanaw thinlung a thyasah cihpaw, Zahova tungvaw zyn ka tyn cipaw a langsahpaw byapaenaw kha rae.
Beihnaw hanglang ahlu phua a khoi hae ze pawmou na cyih cih?
CCUNGCCAW ABANG NYNH HO HAE PAW: “Zahova Ccaeccei hae kong zynnaw vua hae paw nynh pawmou a ho hae cipaw ny ze nynh bua liaru kho lang.”
Tuh-e tuh a hawpaw tuanaw a thua tou? Pawccemou?
ADYNGNAWTE
Zahova tungvaw pou zyntyn kho nawlang tuh Pachia kha a vua hae paw te mungkuh leilang. Ame leipaw beihnaw temah ccuepekuh leite unglang ahoo.
Bua Liathuinaw
Zynnaw vua hae paw kya-e ccangpyanaw hae kha dopaw, riapaw, ngaepaw kha pawcce sihaekuh lang a ccang?
Zahova Ccaeccei lang a thua ry vae lei hae paw kha pawtemou ccuepe lang a ccang?
Ame leipaw beihnaw kyate pou oh cihkuhpaw raering pyanaw kha pawtemou ah ngae kho oh?
HOUH CCUNGCHIH
Zahova Ccaeccei hae kong ameleite a ho hae ze liarukhonaw kong kha leihla.
Bu tuhkhyhze cyisanaw ccangkheit nynh Alesaepaw Babilon kha a bung tou bung khyh tou cipaw pawtemou ny kho lang?
“‘Nyathya Ccyh’ A Thangnaw Kya Ryalaw Lung Te Ung Oh” (Rawvianaw, October 2019, paragraph 16-18)
Rawsetu abang nynh ah zynnaw a zya nawlang pawmou la cyi hae?
Ame leipaw beihnaw kha a poutawpaw Shinto siabawipaw kong “Imua Lya Mawte Pachia Ka Lah Ccung” cihkuhpaw ccaw kya ria tua.
“Baebu Nynh Hingnaw Hae Kha A Rulaesah Kho” (Rawvianaw, July 1, 2011)