CCANGKUNAW 59
Tuaasanaw Kha Zyntynte Na Teing Kho
Khrihccaw balyn tuh ccyhkhakheit kya rawsenaw te tuaasanaw a tungkuh kho. Tuh-e hanglang thinphang lang a ccang tou?
1. Tuaasanaw tung lang cite pawcce ah ngaehoi oh?
Baebu nynh hynhte a ci: “Khri Jesu kya Pachia rawrinaw te a hiin rypaw ccungccaw balyn nynh tuh tuaasahkunaw kha a teing cih hae.” (2 Timote 3:12) Zisu tuh Setan laephi te a ccuepekuh khyh keiccuze tuaasanaw a la tung. Aening mah e laephi te ah ccuepe khyh oh keiccuze accohzah hae te beihnaw phu hae tuaasanaw ah tung oh ze ngaeang thua lang ccang khyh.—Johan 15:18, 19.
2. Tuaasanaw tung ccyh hanglang pawtemou paccynkuh lang?
Atu mawte Zahova tungvaw doliakunaw tyn nawlang cyi ahoo. Nin takyh Pachia kalang sawsang lang, Baebu ccaw ria lang accyh pya. Khrihccawbuu pungkunaw hae kha merarihte pungkuh. Tuhte thua langze innbyng rawsenaw thuasah, pawta hawpaw tuaasanaw tung zemah thuasah teing kho nawlang thawzung nae hoi cih. Tuaasanaw leih a tungpaw zuitu Paul nynh hynhte a zei: “Bawipaw tuh kae yn bawmtu thua zah ka rih lan khyh.”—Hebru 13:6.
Phunghonaw kya merarihte hobuapaw nynh mah rawthungnaw yn hoisah kho. Phunghonaw nynh Zahova tungvaw doliakuh lang, ccungccaw kha ri khyh nawlang yn bung. (Phungtangbya 29:25) Atu mawte phungho lang rawthungnaw hoi lang na zuakuh ze accohzah kheenaw tung ccyh kya mah pou ho kho nawlang ae bung cih.—1 Thesalon 2:2.
3. Tuaasanaw kha zyntynte teing langze paw thanenaw mou mue lang oh?
Tuaasanaw tung vae ze ah lungpaw khyh zemah zyntynte teing vae ze ah zynnaw houh yn tyn. Teingnaw ka hoi vae khyh cite tua ccyh kya Zahova bungnaw kha a muekuh keiccuze Zahova te houh ah naekuh vae oh. (James 1:2-4 kha ria.) Zahova nynh tuaasawnaw ah tung vae oh ze a thinlung ccih zah zyntynte ah teing oh zetuh a lungpaw. Baebu nynh hynhte a ci: “Ahoypaw rya na lah oh zah tuh-e hanlan lungsaete na ngaesang oh ze, tuh-e tuh Pachia malang thehoysah lan accangpaw nynh thua.” (1 Peter 2:20) Zyntynte a teing hae paw kha Zahova nynh laephi thawpaw kya zungzae hingnaw lasung a pya cih hae. Tuh-e ccyh kya amepaw beihnaw kha a rawsepaw ung vae lang khyh.—Matthai 24:13.
HOUH CCANGKUH LANG HOUH MUIH LANG
Tuaasanaw tung ccyh kya Zahova tungvaw zyntynkhonaw kong, zyntyn hae paw kha Zahova nynh pawtemou lasung a pya cih hae cihkuhpaw kong kha leihla.
4. Innbyng rawsenaw kha zyntynte na teing kho
Zahova kha beih khyh nawlang innbyng abang nynh a rawse cih hae cipaw kha Zisu nynh ahoyte a ny. Matthai 10:34-36 kha ria tuhkoute e bakhianaw kha hokuh oh:
Innbyng lukheit nynh Zahova kha beih lang bya a paekuh vae ze pawmou a tungkuh kho?
Tousenaw ccangkheit kha do lang, VIDEO kha pia, tuhkoute akaw lang-e bakhianaw kha hokuh oh.
Zahova beih khyh nawlang puizia, bang lukhakheit nynh ae khee langze pawtemou na cyih cih?
Sam 27:10 te Marka 10:29, 30 kha ria. Baebu ccaw ccangkheit cci kha ria koute e bakhianaw kha hokuh oh:
Innbyng, bang hae nynh ae rawse hae ze e Baebu byaking nynh pawtemou ae bung kho?
5. Tuaasanaw tung zemah Zahova kha pou beih
Rawsenaw hae laku Zahova kha pou beih kho nawlang rawthungnaw hoi ahoo. VIDEO kha pia, tuhkoute akaw lang-e bakhianaw kha hokuh oh.
Video kya-e a cyihkuh hae paw nynh pawtemou thawzung ae hoisah?
Locceihtu 5:27-29 te Hebru 10:24, 25 kha ria. Baebu ccaw ccangkheit cci kha ria koute e bakhianaw kha hokuh oh:
Phunghonaw ryalaw te pungkunaw hae kha yn khee hae zemah Zahova kha pou beih lang pawcce azici?
6. Zyntynte teing kho nawlang Zahova nynh ae bung cih
Kum, ungtuzia a lokuh lei hae paw Zahova Ccaeccei hae tuh tuaasanaw a tung hae zemah Zahova kha zyntynte pou a beih hae. Pawnynhmou a bung hae cipaw ny nawlang, VIDEO kha pia. Tuhkoute akaw lang-e bakhianaw kha hokuh oh.
Video kya-e Witness hae kha teingnaw hoi nawlang pawnynhmou a bung hae?
Rom 8:35, 37-39 te Filipi 4:13 kha ria. Baebu ccaw ccangkheit cci kha ria koute e bakhianaw kha hokuh oh:
Paw tuh-ounaw mah thuasah zyntynte teing kho athua cipaw e Baebu ccaw nynh pawtemou ae zynngan sah kho?
Matthai 5:10-12 kha ria tuhkoute e bakhianaw kha hokuh oh:
Tuaasanaw tung zemah pawcce na lungpaw kho?
Zahova Ccaeccei patae tuh rawsenaw kha zyntynte a teing hae. Nang mah na teing kho!
CCUNGCCAW ABANG NYNH HO HAE PAW: “Tuaasanaw kha ka teing kho lang khyh.”
Paw Baebu ccaw hae nynh mou minming kha zynkunaw a hoisah kho hae?
ADYNGNAWTE
Tuaasanaw tungnaw laku zyntynte beihpaw kha Zahova nynh phu a tesah. Zahova bungnaw te ah teing kho oh!
Bua Liathuinaw
Tuaasanaw kha Khrihccaw hae nynh pawcce ngaehoi lang?
Tuaasanaw tung ccyh hanglang ungty nawlang atu mawte pawmou na cyi kho?
Paw tuh-ounaw tung zemah Zahova kha beih kho athua cipaw pawnynhmou ae zynngan sah kho?
HOUH CCUNGCHIH
Ngawphuepaw unopaw pawkalang mah pang leite alaku a ung keiccuze thung a ccaw ccyh kya teingnaw hoi lang Zahova nynh a bungnaw kong kha do tua.
Rawsenaw hae laku zuvaw hae nynh Zahova kha kum sepi a beihkhonaw hae kong kha do tua.
Tuaasanaw kha rawthungnaw te teingkhonaw kong kha ria tua.
“Tuaasanaw Hanglang Atu Mawte Paccynkuh Ty” (Rawvianaw, July 2019)
Innbyng rawsenaw kha pawtemou tua lang a ccang, rawsenaw kha pawtemou phishing kho lang?
“Byaccing Nynh, ‘Daenaw Thua Leite Thaloi Kha Yn Thua Khae’” (Rawvianaw, October 2017)