CCANGKUNAW 60
Pou Kaethung
E Baebu ccangkunaw kyate Zahova kong patae nae nyh vae. Tuhkeiccuze Pachia kha houh na sungsah zah pyng pyakuh te tuipi na ingpaw a thua kho. Aromaw tuipi-ing lang cite na tuakuhpaw a thua kho. Thuasalama tuipi-ing koute pou zuakuh lang hoo vae khyh cipaw a ho rypaw thua khyh. Zahova te houh naekuh nawlang zungzae zuakuh ahoo. Pawtemou?
1. Zahova te ahoypaw vaeccawkunaw pawcce pou hoi lang a ccang?
Zahova te ahoypaw vaeccawkunaw hoi lang zuakuh lang ahoo. Pawccemou? Amaw kyate “cciasei khyh nawlan” nynh thua. (Hebru 2:1) Zahova kha zyntynte pou beih kho nawlang pawnynhmou yn bung kho cih? Phunghonaw ryalaw kha accyh patae pyate law langzah accing langte Pachia beihkhonaw paw langpi hae kha ah ccung kho oh. (Filipi 3:16 kha ria.) Zahova rya lawpaw tuh ahoy huapaw hingnaw nynh thua!—Sam 84:10.
2. Pawhaemou pou cyi lang a ccang?
E Baebu ccangkunaw tuh a thang vae zemah Khrihccaw hingnaw langpi hawte pou ung lang a ccang. Baebu nynh “athawpaw ccungccaw lawku” lang ahoo cite a ci. (Efesa 4:23, 24) Baebu kha pou leihla lang, pungkunaw hae pungkuh langze Zahova te Zahova ziazae hae kong houh nae nyh cih. Pachia ziazae hae kha taening thyhte dosuinkuh lang zuakuh. Zahova a lung pawsah nawlang ahoo thyhte rulaekuh.
3. Pou kaethung nawlang Zahova nynh pawtemou ae bung cih?
Baebu nynh hynhte a ci: “Pachia nynh . . . ae ccingsah cih oh, ae thadynsah cih oh, thaw ae saesah cih oh zah ae tynsah cih oh.” (1 Peter 5:10) Ah balynte tuh-ounaw hae ah tung oh. Thuasalama Zahova nynh tuh-ounaw kha dou kho nawlang ahoopaw bungnaw kha yn pya. (Sam 139:23, 24) Zahova kha zyntynte beih rynaw thinlung kyalya thua leite beihkhonaw thawzung mah kae pya cih oh cihte amaw nynh bya yn king pyakuh.—Filipi 2:13 kha ria.
HOUH CCANGKUH LANG HOUH MUIH LANG
Pou kaethung nawlang pawhaemou cyi lang, Zahova nynh pawtemou hythuanaw ae pya cih cipaw kha leihla.
4. Ahoy huapaw bang te pou bya hokuh oh
Sawsangnaw, Baebu ccangkunaw nynh Zahova vaeccaw lang tang lang ae bung vae. E hae nynh Zahova te houh vaeccawkuh kho nawlang pawtemou ae bung kho?
Sam 62:8 kha ria tuhkoute e bakhianaw kha hokuh oh:
Zahova te houh vaeccawkuh nawlang na sawsangnaw zia kha pawtemou na kaethung sah kho?
Sam 1:2 kha ria tuhkoute e bakhianaw kha hokuh oh:
Zahova te houh vaeccawkuh nawlang Baebu ccaw kha pawtemou thanenaw ung lang na ria kho?
Maw leihlanaw kyate thanenaw houh mue kho nawlang pawtemou cyi lang? Ny nawlang, VIDEO kha pia, tuhkoute e bakhianaw hae kha hokuh oh.
E video kya-e paw tuanaw pyanaw hae kha mou na zui kho?
Paw konglang mou na leihla ry?
5. Muihsaw kuetung hae nungkuh
Zahova ryalaw kya kuetung hae nungkupaw nynh pou ae kaethungsah cih. VIDEO kha pia, tuhkoute akaw lang-e bakhianaw kha hokuh oh.
E video kya, muihsaw kuetung hae a nungkuh keiccuze Cameron nynh paw thanenaw mou a mue?
Ccangpaw ram lang phungho lang ccungccaw miakaw nynh nuekuh kho khyh hae. Thuasalama, phya kho ungpaw kuetung hae nungkuh kho a thua. Phungtangbya 21:5 kha ria tuhkoute akaw lang-e akong hae kha tuatua.
Khrihccawbuu kya paw kuetung hae mou na nungkuh ry.
Phunghonaw kya paw kuetung hae mou na nungkuh ry.
Kuetung hae phya kho nawlang e Baebu kya-e phunglang nynh pawtemou ae bung kho?
Nungkuhkhopaw kuetung hae
Sawsangnaw zia kaethung nawlang cyi lang.
Baebu uhkheit phe thang lang ria lang.
Khrihccawbuu kya-e ung hae paw miakaw te ny kaleihkuh lang zuakuh lang.
Baebu ccangpyanaw ccangkheit hoi lang zuakuh lang.
Ccungccyh pioneer (auxiliary pioneer) tuhkhyhze hmanhman pioneer hae lang.
Unopaw na thua ze, Khrihccawbuu bungtu lang thua nawlang zuakuh lang.
6. Lungpaw te zungzae hing!
Sam 22:26 kha ria tuhkoute e bakhianaw kha hokuh oh:
Lungpaw lang ungpaw hingnaw kha atu kele thua leite zungzae mue kho nawlang pawmou na cyi kho?
ADYNGNAWTE
Zahova te houh vaeccawkuh lang zuakuh lah muihsaw kuetung hae kha nungkuh. Tuhte na cyi langze lungpaw te zungzae na hing kho cih!
Bua Liathuinaw
Zahova nynh amaw kha zyntynte beih kho nawlang ae bung cih cipaw pawcce na zyn kho?
Zahova te houh vaeccawkuh nawlang pawtemou na cyi kho?
Muihsaw kuetung hae nungkupaw nynh pou kaethung nawlang pawtemou ae bung kho?
HOUH CCUNGCHIH
Pachia doliakunaw langsahpaw alaepaw cyisanaw ccangkheit cyipaw tuhkhyhze hingnaw balyn kya zyntynte beihpaw pawkhamou Zahova nynh houh a phute sah?
Zahova kha zyntynte a beihpaw thua zemah lungpawnaw a vae kho. Lungpawnaw pawtemou bua a muekuh kho cipaw kha do tua.
Muihsaw lang kuetung hae nungkuh te ccingkhonaw kong kha ria tua?
“Raetu Phu-enaw Kha Langsah Lang Muihsaw Kuetung Hae Kha Mang” (Rawvianaw, July 15, 2004)
Muihsaw lang accingpaw Khrihccaw lang thua lang pawcce azici, pawtemou thua kho lang?