CCANGKUNAW 50
Innbyng Hoysakhonaw Zia—Phianaw 2
Ccaw hae tuh Zahova kyate a muekupaw lasung nynh thua hae. Pachia nynh e lasung kha nungpaw hae nynh ahoyte do-oih hae sah ci a ry. Tuhkeiccuze Zahova nynh nungpaw hae nynh ccaw hae kha pawtemou do-oih lang cipaw kha tuanaw a pya hae. Innbyng hoysah kho nawlang ccaw hae nynh pawmou a cyi kho hae cipaw kha mah tuanaw a pya hae.
1. Zahova nynh nungpaw hae kha paw tuanaw mou a pya hae?
Nungpaw hae nynh ccaw hae kha sungsah lang, taening thyhte a ccyh pya lang Zahova nynh a ry. Nungpaw hae nynh ccaw hae kha rilang ungpaw hae kyate thungkhaw te Baebu phunglang hae hawte ccangpah hae sah ci a ry. (Phungtangbya 1:8) Zahova nynh paaw hae kha hynhte a ci hae: “Bawipaw kya-e ccangpyanaw te [nae ccaw hae kha] cciakhae thung oh.” (Efesa 6:4 kha ria.) Ccaw hae do-oihnaw kya Zahova langhroinaw kha zui langze, e taevue kha minccang paw hae pya leilang zetuh Zahova a lungpaw cih.
2. Zahova nynh ccaw hae kha paw tuanaw mou a pya hae?
Zahova nynh ccaw hae kha hynhte a taw hae: “Ccaaw hae, pawpaw kya balyn nae nung nae paaw hae kaw la ngae oh.” (Kolose 3:20 kha ria.) Ccaw hae nynh nungpaw kaw kha sawtua te a ngae lang hae ze Zahova te nungpaw hae tuh mih lung a paw. (Phungtangbya 23:22-25) Zisu nynh ccaw hae hanglang ahoypaw dosuinkuh lang paw la langsah. Amaw tuh accingpaw a thua zemah nungpaw kaw kha sawtua te a ngae.—Luka 2:51, 52.
3. Innbyng balyn te Pachia te pawtemou naekuh kho lang?
Nang tuh nungpaw na thua langze, na ccaw hae kha namaw hawte Zahova a sungsah hae paw lang na thuasah ry cih hae. Pawtemou na cyi kho? ‘[Zahova bya kha] na ccaw hae nynh mih thinlung kya syntaw nawlang hae hopah bua hae lah, innvaw na um ze thuasah, langpi na ccia lya ze thuasah hopah hae.’ (Deuteronomy 6:7) “Thinlung kya syntaw nawlang hopah” cipaw tuh vaeleih vaeleih ccangpyapaw kha nynh a ho ry. Ccaw hae nynh a syntaw nawlang hae vaeleih vaeleih hopya lang hae. E Baebu ccaw liate a ccyh mue kho thyh hawte ccaw hae kha Zahova kong merarihte ccangpya lang hae a ccang. Naw takyh innbyng balyn te Baebu leihla nawlang a ccyh nungkuhpaw tuh ahoy. Ccaw na hoi khyh zemah, a ccyh nungkuh te naw takyh Baebu na leihla zetuh thanenaw na mue cih.
HOUH CCANGKUH LANG HOUH MUIH LANG
Daenaw te lungpawnaw ungpaw innbyng hingnaw hanglang zuilang a ccangpaw tuanaw pyanaw hae kha tuatua.
4. Ccaw hae kha sungsakunaw te ccangpya hae
Ccaw hae kha ccangpya lang hae a ruu kho. Baebu nynh pawtemou ae bung kho? James 1:19, 20 kha ria tuhkoute e bakhianaw hae kha hokuh oh:
Nungpaw hae nynh ccaw hae te bya hokuh lya sungsakunaw kha pawtemou a langsah kho hae?
Thinria ccyh kya ccaw hae kha pawcce thuiheih lang a ccang khyh?a
5. Ccaw hae kha thungkhaw hae
Ccaw hae kha thungkhaw nawlang zu te vaw thuanaw kong kha hopya lang hae azici. Tuh-e kong ho lang a ruu kho. VIDEO kha pia, tuhkoute akaw lang-e bakhianaw hae kha hokuh oh.
Ccaw hae kha zu te vaw thuanaw kong hopya lang nungpaw hae abang tuh pawcce a ruusah hae?
Nungpaw abang nynh paw zia hae mangte mou ccaw hae kha zu te vaw thuanaw kong a hopya hae?
Baebu nynh a hoty hawte Setan laephi tuh houhouh hoy vae khyh. 2 Timote 3:1, 13 kha ria tuhkoute e bakhianaw kha hokuh oh:
Adihpaw 13 kya a langsahpaw ccungccaw hoylei hae abang nynh imua hae kha a dyde hae. Tuhkeiccuze, ccaw hae kha zu te vaw thuanaw kong ccangpya lang, dydetu hae raw kyate mawtemaw thungkhawkuh thya nawlang ccangpya lang pawcce azici?
Na nyh tou?
Ccaw hae kha zu te vaw thuanaw kong ccangpya lang, dydetu hae raw kyate thungkhawkuh thya nawlang ccangpya lang nungpaw hae hanglang akaw lang-e ccaw hae kha Zahova Ccaeccei hae nynh a tho hae:
Na Ccaw Hae Kha Thungkhaw Hae (video)
“Ccaw Hae Kha Zu Te Vaw Thuanaw Kong Ccangpya Hae” (Thaekuh! No. 5 2016)
6. Nungpaw Kha Sawtua
Ccaw hae, kum haw lae hae nynh nungpaw hae te bya hokuh vae ze sawtuanaw kha langsah kho a thua. VIDEO kha pia, tuhkoute akaw lang-e bakhianaw hae kha hokuh oh.
Nungpaw kya sawtua te bya hopaw tuh pawcce thanenaw a ung?
Nungpaw te bya hokuh vae ze sawtuanaw kha pawtemou langsah kho lang?
Phungtangbya 1:8 kha ria tuhkoute e bakhianaw kha hokuh oh:
Maw nungpaw nynh tuanaw yn pya hae ze pawtemou liaru lang?
7. Innbyng balyn te Zahova kha beih oh
Zahova Ccaeccei hae innbyng hae tuh naw takyh pungkuh kheih lang a ccyh a pya hae. Innbyng pungkunaw kha pawtemou a cyi hae? VIDEO kha pia, tuhkoute akaw lang-e bakhianaw hae kha hokuh oh.
Innbyng pungkunaw kha pawtemou merarihte cyi kho lang?
Nungpaw hae nynh innbyng pungkunaw kha a ngaekuh lang te lungpaw lang unglang pawtemou a cyi kho hae?—E ccangkunaw kya-e a thonaw sahkhung kha do.
Innbyng balynte pyngkheih lang leihla kheih lang pawcce a ruu kho?
Langmaw Israel innbyng hae nynh Pachia bya kha pyngkheih lang hokuh lang Zahova nynh a taw hae. Deuteronomy 6:6, 7 kha ria tuhkoute e bakhiannaw kha hokuh oh:
E Baebu phunglang kha pawtemou na zui kho?
Innbyng pungkunaw hanglang tuanaw pyanaw hae:
Khrihccawbuu pungkunaw hanglang paccyn kuh ty.
Na innbyng hae nynh a ry cih hae paw Baebu phunglang kha ria te hokuh oh.
Imua na hoi ze, jw.org kya-e imua hae hanglang cyi lang hae paw kha kukuh tuhkhyhze print tho.
Kum haw lae ccaw hae na hoi ze, jw.org kya-e kum haw lae hae hanglang ccaw ccangkheit kha hokuh oh.
Na ccaw hae ryte Baebu phungpaw ccangkheit kha tang tua oh.
Jw.org kya-e video ccangkheit kha do te hokuh oh.
CCUNGCCAW ABANG NYNH HO HAE PAW: “Baebu tuh imua hae hanglang myarya a ruu.”
Nangso pawtemou na tua?
ADYNGNAWTE
Nungpaw hae nynh ccaw hae kha sungsah lang, ccangpya lang te thungkhaw lang, ccaw hae nynh mah nungpaw hae kha sawtua te bya ngae lang, amaw kha innbyng balyn te beihkheih lang Zahova nynh a ry.
Bua Liathuinaw
Nungpaw hae nynh ccaw hae kha pawtemou ccangpya te a thungkhaw kho hae?
Ccaw hae nynh nungpaw hae kha saw ka tua cipaw kha pawtemou a langsah kho hae?
Innbyng balynte naw takyh innbyng pungkunaw hanglang a ccyh pya langze paw thanenaw mou mue lang?
HOUH CCUNGCHIH
Nae ccaw hae kha piccang ccyh hanglang pawhaemou na paccyn pya kho oh?
“Imua Hae Nynh Ccangkuh Langpaw Ccangkunaw Ccangtaruh” (Thaekuh! No. 2 2019)
Do-oihtu hae hanglang zui lang a ccangpaw Baebu tuanaw pyanaw hae kha leihla tua.
“Kum Tang Hae Paw Nungpaw Hae Kha Do-oihnaw Kong Te Asekuhte Baebu Nynh Pawmou A Ho?” (Website ccaw)
Imua do-oihnaw kong a nyh leipaw pisepaw lukheit ahoypaw paaw lang yn thuanaw kong kha do tua.
Paaw hae nynh ccaw hae te houh ccawkukhonaw kong kha tuatua.
“Paaw Hae Nae Ccapaw Hae Te Pawtemou Ccawkuh Te Na Ung Kho Oh?” (Rawvianaw, November 1, 2011)
a Baebu kya-e “thuiheih” cihkuhpaw byaccang tuh ccangpyanaw, langhroinaw te raethuinaw kha nynh a ho ry. Kiareih te ziapaw buapaw kha ho ry khyh.—Phungtangbya 4:1.