CCANGKUNAW 51
Zahova Nynh A Rypaw Byaho
Zahova nynh aening yn rae lyakhe bya hokhonaw cihkuhpaw nageang lang ungpaw lasung kha yn pya. E lasung mangnaw zia tuh Zahova hanglang azici tou? Myarya azici! (James 1:26 kha ria.) Tuhte thua langze Zahova nynh a rypaw hawte pawtemou ho kho lang?
1. Bya hokhonaw lasung kha pawtemou mang lang a ccang?
Baebu nynh “thawzung pyakuh kalang oh lah, lu kheit te lu kheit tynsakuh oh” cite yn ci. (1 Thesalon 5:11) Thawzung pya lang ahoo hae paw kha na tuaboi tou? Thawzung a hoi nawlang hae pawtemou na bung kho hae? Minming kha pe kae ki oh cipaw na hopya kho hae. Mihmaw hoynaw kong kha mah na hopya kho hae. Lukhakheit kha thawzung a hoisah cihpaw Baebu ccaw ccangkheit kha na tua kho tou? Na pokuh khopaw Baebu ccaw patae a ung. Na hopaw bya kele thua leite honaw zia nynh mah minccang paw kha thawzung myarya a hoisah kho cipaw kha ningnang. Tuhkeiccuze thawccinaw te nebaleih te ho lang zungze zuakuh.—Phungtangbya 15:1.
2. Pawta hawpaw byaho mou sihaekuh lang?
Baebu nynh hynhte a ci: “anungsikuhpaw bya kaw kheit san nae khalang kyate pou nan sah.” (Efesa 4:29 kha ria.) A ho rypaw tuh ccungccaw lukheit thinlung cci nawlang ahoy leipaw bya, ngaethyaungsakunaw a ung leipaw bya hae kha ho lang ccang khyh. Ccungccaw thang hopaw te thethyasahpaw bya hae kha mah sihaekuh lang.—Phungtangbya 16:28 kha ria.
3. Thawzung a hoisahpaw bya hae ho lang pawnynhmou yn bung cih?
Ah hopaw bya nynh ah thinlung kya pawhaemou a ung tuhkhyhze pawmou ah tua oh cipaw kha a langsah. (Luka 6:45) Tuhkeiccuze adingpaw, athyaapaw, ry lang ungpaw, thehoysah lang ungpaw hae kha tuathya lang zuakuh lang. (Filipi 4:8) Tuhte cyi kho nawlang hoysanaw te bangrui hae kha hawnawte pokuh lang. (Phungtangbya 13:20) Tuh-e nynh bya ah ho maw oh a ccyh pyate tuaty lang yn bung cih. Ah bya keiccuze minccang paw hae pawtemou ung cih hae cipaw kha tua. Baebu nynh hynhte a ci: “Tuase leite hopaw bya tuh ccezung te thuingpaw te nynh aloku, thuasalama mihawpaw bya nynh tuh dannaw kha a thuakhae.”—Phungtangbya 12:18.
HOUH CCANGKUH LANG HOUH MUIH LANG
Zahova nynh a rypaw zia, minccang paw hae thawzung a hoisahpaw zia te hokhonaw kong kha leihla.
4. Byaho kha raeringkuh
Vaekhakheit tuh ah balynte nyalangte ngaesikuh lang ungpaw bya hae ah hothya oh. (James 3:2) Galati 5:22, 23 kha ria tuhkoute e bakhianaw hae kha hokuh oh:
Na byaho raeringkuh kho nawlang e Baebu ccaw kya-e paw ziazae hae mou hoi lang saw na sang kho? E ziazae hae nynh pawtemou ae bung kho?
1 Korin 15:33 kha ria tuhkoute e bakhianaw kha hokuh oh:
Na pokupaw bangrui te hoysanaw nynh na byaho tungvaw pawtemou thanenaw a ungsah kho?
Na byaho kha pawhae nynhmou hoynaw a ungsah kho?
Phunghotu 3:1, 7 kha ria tuhkoute e bakhianaw kha hokuh oh:
Paw ccyh kyamou zya dae lang, a ccyh do koute hopaw tuh ahoy?
5. Minccang paw hae hoynaw kong kha ho
Minccang paw hae thinlung a ccisahpaw byaho tuhkhyhze thawccikunaw a ung leipaw byaho kha pawtemou sihaekuh lang? VIDEO kha pia, tuhkoute akaw lang-e bakhianaw hae kha hokuh oh.
E video kya-e unopaw nynh minccang paw hae kong a byaho zia kha pawcce a rulae ry?
Rulaekuh nawlang pawmou la cyi?
Phunghotu 7:16 kha ria tuhkoute e bakhianaw kha hokuh oh:
Minccang paw hoyleinaw kong ho langpaw a ung ccyh kya pawkhamou tua lang a ccang?
Phunghotu 7:21, 22 kha ria tuhkoute e bakhianaw kha hokuh oh:
Lukhakheit nynh maw hoyleinaw kong a ho vae ze thinria khyh nawlang e Baebu ccaw hae nynh pawtemou ae bung kho?
6. Innbyng kya nebaleihte ho
Zahova nynh ah innbyng kya nebaleih te sungsakunaw te ho hae sah ci a ry. VIDEO kha pia, tuhkoute akaw lang-e bakhianaw kha hokuh oh.
Innbyng kya nebaleihte ho lang pawnynhmou ae bung cih?
Efesa 4:31, 32 kha ria tuhkoute e bakhianaw kha hokuh oh:
Pawta hawpaw byaho nynh mou innbyng kha ahoysah?
Zahova nynh a Ccapaw Zisu kha a sungsanaw kong a ho. Matthai 17:5 kha ria tuhkoute e bakhianaw kha hokuh oh:
Innbyng te bya hokuh vae ze Zahova kha pawtemou na dosuinkuh kho?
Minccang paw hae kha thehoysah lang ccyh hoy ccung
CCUNGCCAW ABANG NYNH HO HAE PAW: “Ka thinlung kya ungpaw nynh ka ho. Minccang paw hae nynh a ry khyh hae zemah pawtua ung khyh.”
Nangso tuhte na tua tou? Pawcce?
ADYNGNAWTE
Bya hae tuh a thawsae. Pawmou ho lang, paw ccyh kya mou ho lang, pawtemou ho lang cipaw kha ahoyte tua lang ahoo.
Bua Liathuinaw
Minccang paw hae kha thawzung hoisah nawlang pawtemou na ho kho?
Pawta hawpaw byaho mou na sihaekuh ry?
Thawzung ungpaw bya hae kha sungsakunaw te zungzae ho lang pawnynhmou yn bung kho cih?
HOUH CCUNGCHIH
Thawzung yn hoisahpaw bya hae ho lang pawnynhmou yn bung kho?
Ahoy leipaw bya hosei khyh nawlang pawnynhmou ae bung kho cipaw kha leihla tua.
Thanghopaw kha pawtemou sihaekuh lang cipaw kha ria tua.
Ccungccaw lukheit a pethyapaw ziazae kha tae kho nawlang Zahova nynh a bungnaw kong kha leihla.
“Ka Hingnaw Tuh Paw Kalang Mou A Ee Cipaw Kha Ahoyte Ka Tua Vae” (Rawvianaw, August 1, 2013)