CCANGKUNAW 53

Zahova Nynh A Rypaw Hoysanaw Kha Poku

Printed Edition

Zahova tuh ‘a lungpaw paw Pachia’ nynh thua. (1 Timote 1:11) Pachia nynh aening kha ah lung yn pawsah ry zah ah hingnaw kya hoysah hae sah ci yn ry. Ryalaw haebang te hoysapaw kha mah a ry. E ccangkunaw kya, amaw maw nynh lungpaw ngaengankhaekuh a piaze Zahova nynh mah a rypaw—hoysanaw kha pokukhonaw kong kha ccangkuh lang.

1. Hoysanaw pokuh vae ze pawmou tuabia lang a ccang?

Haebang ccyh kya pawmou na cyi ry? Ccungccaw abang tuh innvaw kya daerarihte—ccaw a ria hae, law a ngae hae, video a do hae, tuhkhyhze internet a mang hae. Minccang paw hae tuh bang hae ryte—hoysanaw khycce cciapaw, tui zeihkuhpaw, tuhkhyhze zuepaw kha a ry hae. Pawpaw te thua zemah maw nynh ah pokupaw hoysanaw tuh “Bawipaw lungrythuapaw uccaw” lang thua ahoo. (Efesa 5:10) Pawccecize ccungccaw a lunghua nynh a ry hae paw hoysanaw hae kya Zahova nynh a huapaw puathonaw, nupi pise seinaw te muihsaw hoyleipaw thyanaw hae a pabua keiccu nynh thua. (Sam 11:5 kha ria.) Hoysanaw kha hawnawte pokuh kho nawlang pawnynhmou yn bung cih?

Zahova kha a sungsah hae paw te mungkuh langze maw hoynaw a muekuh kho hawte hoysanaw pokunaw kya mah thanenaw a ungsah. A thang vae paw ccangkunaw kya ah ccangkuh oh hawte, “mihaw hae ryte a mungkuh hae paw tuh a haw cih.” Pachia phunglang a zui lei hae paw te mungkuh lang zetuh, “vawsawnaw tung” lang.—Phungtangbya 13:20.

2. Hoysanaw ccyh kha khyakuh lang pawcce azici?

Ahoypaw hoysanaw a thua zemah accyh patae pyasei khyh nawlang raeringkuh lang. Tuhte thua khyhze houh azicipaw cyi lang hae paw hanglang accyh zaw leite a ung kho. Baebu nynh “accyh kha mangkuh thya oh” cite thaw yn pya.—Efesa 5:15, 16 kha ria.

HOUH CCANGKUH LANG HOUH MUIH LANG

Hoysanaw te asekuhte ahoypaw byapaenaw raekhonaw kong kha ccangkuh tua.

3. Thanenaw ungleipaw hoysanaw kha sihaekuh

Hoysanaw kha raeringkuh te pawcce pokuh lang a ccang? VIDEO kha pia, tuhkoute akaw lang-e bakhianaw hae kha hokuh oh.

VIDEO: Pawte Cihpaw Hoysanaw Mou Ka Pokuh Lang A Ccang? (4:39)

Langmaw Rom hae chiakuh buakuh poi hae tuh atu she hoysanaw te pawtemou a loku?
E video kya hoysanaw te asekuhte Danny nynh pawmou a ny?

Rom 12:9 kha ria tuhkoute e bakhianaw kha hokuh oh:

Hoysanaw pokunaw kya e Baebu ccaw nynh pawtemou ae bung kho?

Zahova nynh a huapaw abang tuh pawhaemou? Phungtangbya 6:16, 17 te Galati 5:19-21 kha ria. Baebu ccaw ccangkheit cci ria koute e bakhianaw kha hokuh oh:

E Baebu ccaw hae kya-e paw kong hae mou atu she hoysanaw hae kya muih lang a ung?

Hoysanaw kha hawnawte pokukhonaw zia

Namaw te namaw khiakuh:

Pawhaemou a pabua? E hoysanaw kya Zahova nynh a huapaw hae a pabua tou?
Accyh houhzeihmou a thang cih? Houh azicipaw cyi langpaw hae hanglang accyh ung leilang a thuasah kho tou?
Hunghae te mou? E hoysanaw nynh Zahova kha a sungsah lei hae paw te yn naesah kuh cih tou?

Rilang ungpaw tuh a sawnaw te sihaekuh kho ze ahoyhua. Tuhkeiccuze maw hanglang thanenaw ung khyh cite tuapaw hoysanaw hae kha sihaekuh lang a ccang

Muavaw langpi king kya a mungkuh cciamang paw mawtaw sahkheit. Mawtaw a nuhlang tuh a king kalang a nue kuh.

4. Accyh kha thanenaw unglang mang

VIDEO kha pia, tuhkoute akaw lang-e bakhianaw kha hokuh oh.

VIDEO: Na Ccyh Kha Pawtemou Na Mang? (2:45)

E video kya-e unopaw tuh dolang a ccang leipaw a do khyh zemah amaw a hoysanaw zia tuh paw rilang mou a ung?

Filipi 1:10 kha ria tuhkoute e bakhianaw kha hokuh oh:

Hoysanaw hanglang accyh hohzeihmou pya lang cipaw byapaenaw raenaw kya e Baebu ccaw nynh pawtemou yn bung kho?

5. Thanenaw ungpaw hoysanaw kha poku

Zahova nynh a ry leipaw hoysanaw abang a ung zemah Zahova nynh a rypaw hoysanaw hae patae a ung. Phunghotu 8:15 te Filipi 4:8 kha ria tuhkoute e bakhianaw kha hokuh oh:

Athanepaw paw hoysanaw hae mou na ry?

Collage: Kum a phuinphuin a cyih hae paw ccungccaw hae tuh thanenaw ungpaw zia hae te a hoysah hae. 1. Nupinung lukheit tuh law ngaebia te a zuh a sue. 2. Pise taraw hae luthung nynh basketball a bia hae. 3. Pise taraw hae luning sehbing a ccikuh hae. 4. Pise taraw lukheit nynh a zuh mawtaw a rae. 5. Drum a khuapaw ccungccapaw lukheit. 6. A paaw ryte video game a zuepaw pisepaw taraw. 7. Sahkhung a khungpaw nopinung. — Athanepaw zia hae te na hoysah kho

CCUNGCCAW ABANG NYNH HO HAE PAW: “Muihsaw hoyleipaw thyanaw, puathonaw, nupi pise seinaw hae a papaw hoysanaw hae tuh sei khyh. Maw nynh cyi buapaw thua leipaw.”