CCANGKUNAW 52
Ah Uccaw Te Ccaankupaw Tuh Pawcce Abapi?
Ah balynte uccaw ah lawkuh vae oh ze ah ry oh paw kocci ah hoi oh. Thuasalama, a ruu leipaw Baebu phunglang abang kha ah zui oh zetuh ah rypaw kha lawkuh kho a piaze Zahova rynaw mah mue kho lang. Tuh-e Baebu phunglang abang kha tuatua oh sih.
1. Uccaw te ccaankupaw kya paw Baebu phunglang hae mou zui lang a ccang?
“Khing unglang lawkuh te, angaekuh langte, dohoy langte ccaankuh” lang a ccang. “Pachia tungvaw rawri sawtuawnaw a hoipaw” cipaw kha a langsahpaw athyapaw ccaankunaw hoi lang a ccang. (1 Timote 2:9, 10) E Baebu phunglang ccangpali kha tuatua: (1) Aening nynh “dohoy langte” ccaankuh lang a ccang. Khrihccawbuu pungkunaw kya na muih hawte Zahova minphuin hae tuh rynaw kocci a hoiku zemah uccaw lawkunaw, sang ccaankunaw liate Pachia kha saw kae tua cipaw kae langsah. (2) “Khing unglang te” ccaankupaw cipaw tuh maw ccaankunaw nynh nupi pise sei rynaw thinlung a ung nawlang, minccang paw hae nynh myarya pe yn ki nawlang hae thua lang ccang khyh cipaw asuilang nynh thua. (3) Kheihsapaw uccaw tuhkhyhze style hae lawkuhpaw kha sihaekunaw liate “angaekuh langte” kae ccaankuh cipaw kha kae langsah. (4) Ah ccaankuhnaw zia nynh “Pachia tungvaw rawri sawtuanaw a hoipaw” nynh thua cipaw kha zungzae langsah lang a ccang, tuhte ze nynh amepaw Pachia a beih hae paw nynh thua hae cipaw kha ccungccaw hae nynh a nyh cih hae—1 Korin 10:31.
2. Ah ccaankunaw zia nynh unonung unopaw hae tungvaw pawtemou thanenaw a ungsah kho?
Maw nynh ah rypaw uccaw lawkuh kho a thua zemah minccang paw hae tungvaw pawtemou a ungsah kho cipaw kha tuabia lang a ccang. Minccang paw thinlung thusah khyh nawlang taening thyhte kae zuakuh zah, ‘kae ning nynh innpaw paw elang hoynaw kha tuate zynnaw kya a lethung nawlan a rynaw kha kae ccangpya.’—Rom 15:1, 2 kha ria.
3. Ah ccaankunaw zia nynh amepaw beihnaw kalang ccungccaw hae kha pawtemou a hyy kho hae?
Kaening tuh a ccyh te a ngaekuh langte kae lawkuh zemah Khrihccawbuu pungkunaw te phunghonaw kya tuh uccaw te ccaankuhpaw kha kae raeringkuh. Kae uccaw keiccuze azicipaw thehoypaw kha ccungccaw hae nynh a ry khyh nawlang hae kae thuasah ry khyh. Byaccing kalang ccungccaw hae kha a hyypaw “oun khumtu Pachia ccangpyanaw kha a paccan cih” paw ccaankupaw lang nynh kae thuasah ry.—Titu 2:10.
HOUH CCANGKUH LANG HOUH MUIH LANG
Ah uccaw, ccaankunaw liate Khrihccaw nynh ka thua cipaw pawtemou langsah kho lang cipaw kong kha leihla.
Maw ccaankunaw zia nynh kawhoitu hae tungvaw sawtuanaw ung tou ung khyh tou cipaw a langsah kho. Zahova nynh thinlung kha a do zemah maw ccaankunaw zia nynh mah Pachia kha saw ka tua cipaw langsah lang a ccang
4. Ahoypaw ccaankunaw nynh Zahova kha saw ka tua cipaw a langsah
Ah balynte ah ccaankunaw kha pekikuh lang a ccangnaw abapi akong tuh pawmou? Sam 47:2 kha ria tuhkoute e bakhianaw hae kha hokuh oh:
Ah uccaw lawkunaw zia nynh Zahova tungvaw ccungccaw hae muihnaw kha thanenaw a ungsah keiccuze pawtemou poku te lawkuh lang?
Pungkuh vae ze, phungho vae ze ah ccaankunaw zia kha pekikuh lang a ccang cite na tua tou? Pawccemou?
5. Ah uccaw te ccaankunaw te asekuhte ahoypaw byapaenaw raekhonaw zia
Ah uccaw tuh ame ru zemah tuhkhyhze ame zoi zemah a thyaa cih zah a ccyh te a ngaekuh nawlang azici. 1 Korin 10:24 te 1 Timote 2:9, 10 kha ria. Tuhkoute akaw lang-e uccaw hae kha pawcce sihaekuh lang a ccang cipaw kha hokuh oh . . .
do ahoy leipaw te a ngaekuh leipaw uccaw.
eih a reihpaw, eih a langsahpaw, tuhkhyhze nupi pise sei rynaw thinlung a ungsahpaw uccaw.
Moses kawbya kha Khrihccaw hae nynh zui lang ahoo vae khyh zemah Zahova tuanaw zia kha ccangkuh kho a thua. Deuteronomy 22:5 kha ria tuhkoute e bakhianaw kha hokuh oh:
Pise nynh nopi hawte tuhkhyhze nopi nynh pise hawte uccaw lawkuh te ccaankuhpaw kha pawcce sihaekuh lang?
1 Korin 10:32, 33 te 1 Johan 2:15, 16 kha ria tuhkoute e bakhianaw hae kha hokuh oh:
Maw ccaankunaw keiccuze ungnaw pepang kya tuhkhyhze Khrihccawbuu kya-e ccungccaw abang mih thinlung a thu khyh nawlang pawcce peki lang a ccang?
Na ungnaw pepang kya pawtemou uccaw lawkuh te a ccaankuh thya hae?
Pawta hawpaw uccaw lawkuh te ccaankuhpaw mou Khrihccaw hae hanglang ngaekuh khyh cite na tua? Pawccemou?
Maw rypaw kha lawkuh la liate Zahova rynaw kha mah a muekuh kho
CCUNGCCAW ABANG NYNH HO HAE PAW: “Ka rypaw uccaw ka lawkuh kho.”
Nangso tuhte na tua tou? Pawccemou?
ADYNGNAWTE
Ahoypaw ah ccaankunaw zia nynh Zahova te minccang paw hae kha saw ka tua cipaw ah langsah oh.
Bua Liathuinaw
Ah uccaw te ccaankunaw zia tuh Zahova hanglang pawcce azici?
Uccaw te ccaankunaw kya paw Baebu phunglang hae mou zui lang a ccang?
Ah ccaankunaw nynh amepaw beihnaw tungvaw ccungccaw hae muihnaw kha pawtemou thanenaw a ungsah kho?
HOUH CCUNGCHIH
Maw uccaw nynh maw kong pawmou a langsah cipaw kha ria tua.
Tattoo na suekuh maw pawcce tuaty lang a ccang cipaw kha leihla.
Ah byapaenaw kha lang yn hroipaw ccangpaw Baebu phunglang hae kha leihla.
“Ah Uccaw Lawkunaw Zia Nynh Pachia Phu A Esah Tou?” (Rawvianaw, September 2016)
A thinlung amepaw nopinung lukheit minccang paw hae uccaw te ccaankunaw zia te asekuhte atarawte muihnaw pawtemou yn hoi?
“Uccaw Te Ccaankunaw Tuh Ka Hanglang Kheenaw Lang A La Thua” (Thaekuh!, December 22, 2003)