CCANGKUNAW 54
“A Lungzipaw Te A Hawpaw See” Ryalaw
Zisu tuh Khrihccawbuu lu nynh thua. (Efesa 5:23) Atu she, Zisu nynh vaawlang kyate “a lungzipaw te a hawpaw see” kha mangte a zuitu hae kha lang a hroi hae. (Matthai 24:45 kha ria.) Zisu nynh a khangpaw “see” hae tuh kawhoinaw abang a hoi hae zemah Khrih kaw ngae te Khrih neitaw hae hanglang rya a lah hae. Tuh-e see tuh hung hae mou? See nynh aening kha pawtemou pe yn ki hae?
1. “A lungzipaw te a hawpaw see” tuh a hungmou?
Zahova nynh a ccungccaw hae kha langhroi nawlang pise lukheit tuhkhyhze pise phu phukheit kha leih a mang hae. (Malakhi 2:7; Hebru 1:1) Zisu a chih koute Jerusalem kya-e zuitu hae te piccang hae nynh la cciakhae hae. (Locceihtu 15:2) Atu ccyh kya mah Zahova Ccaeccei hae kya-e—Uhtu Buu—cite ko a thuapaw piccang phu phukheit nynh a cciakhae hae. Minming nynh Pachia te ahoypaw vaeccawkunaw yn hoysah khopaw Baebu konglang hae kha paccynpya te phunghonaw ryalaw kha lang a hroi hae. Tuh-e phu tuh Zisu nynh a khang hae paw “a lungzipaw te a hawpaw see” nynh thua hae. (Matthai 24:45a) Uhtu Buu phu miakaw tuh thyamuisaw te sahtho thuh hae paw thua zah laephi vaw mih hingnaw a thang vae ze vaawlang Peenaw kya Khrih ryte a uhkheih cih hae.
2. A lungzipaw see nynh ah zynnaw tyn nawlang pawhaemou yn paccynpya hae?
A lungzipaw see nynh “[Khrihccaw hae hanglang] accyh azaw vae ze looh a pya” cih hae cite Zisu nynh a ho. (Matthai 24:45b) Aening nynh ah ae oh paw aepaw nynh ah pynsaw nge yn dangsah hawte, Baebu langhroinaw a thuapaw—muihsaw looh nynh mah—Zahova tungvaw zyntyn nawlang, Zisu nynh yn pyapaw ryalaw kha cyi kho nawlang thawzung yn hoisah. (1 Timote 4:6) Pungkunaw, pungkunaw poi, civoi pi, Baebu abapi nungpaw ccah-uh hae, video hae kyate a muekupaw ccangpyanaw hae nynh Pachia rynaw kha thaethya kho nawlang te Pachia te ahoypaw vaeccawkunaw hoi kho nawlang yn bung kho.
HOUH CCANGKUH LANG HOUH MUIH LANG
“A lungzipaw te a hawpaw see” a thuapaw—Uhtu Buu kha pawcce ah hoo oh cipaw kha do tua.
Uhtu Buu hae nynh laephi pyngpi kya-e Zahova Ccaeccei hae hanglang Baebu konglang hae a paccynpya hae, lang a hroi hae, a bung hae
3. Zahova minphuin hae tuh thadynsah a thua
Zisu langhroinaw kya, Uhtu Buu nynh Zahova Ccaeccei hae ryalaw kha paccyn te a thadynsah hae. Masaty Khrihccaw hae mah tuhte nynh la thadynsah hae. VIDEO kha pia.
1 Korin 14:33, 40 kha ria tuhkoute e bakhianaw kha hokuh oh:
Zahova nynh a Ccaeccei hae kha ccyhmamyh lang thadynsah a ry hae cipaw kha e Baebu ccaw hae nynh pawtemou a langsah?
4. A lungzipaw see nynh phunghonaw ryalaw kha paccyn te a thadynsah
Phunghonaw ryalaw tuh masaty Khrihccaw hae la cyi hae paw azici huapaw ryalaw nynh thua. Locceihtu 8:14, 25 kha ria tuhkoute e bakhianaw hae kha hokuh oh:
Masaty Khrihccaw hae she kya phunghonaw ryalaw kha a hungnynhmou lang a hroi hae?
Zuitu hae langhroinaw kha Peter te Johan nynh pawtemou a liaru hae?
Phunghonaw ryalaw tuh Uhtu Buu hae nynh a paccyn hae paw azici huapaw ryalaw nynh thua. VIDEO kha pia.
Phunghonaw ryalaw myarya azicinaw kong kha Zisu nynh a la ho. Marka 13:10 kha ria tuhkoute e bakhianaw hae kha hokuh oh:
Phunghonaw ryalaw tuh Uhtu Buu hae hanglang pawcce hyncihcia azici?
Laephi pyngpi kya e ryalaw kha paccyn te thadynsah lang “a lungzipaw te a hawpaw see” kha pawcce ah hoo oh?
5. A lungzipaw see nynh lang yn hroi
Laephi pyngpi kya-e Khrihccaw hae kha Uhtu Buu hae nynh lang a hroi hae. Pawtemou byapae te lang a hroi hae? Masaty Khrihccaw buu hae kya-e uhtu buu hae nynh pawtemou rya a law hae cipaw kha tuatua. Locceihtu 15:1, 2 kha ria tuhkoute e bakhianaw hae kha hokuh oh:
Masaty Khrihccaw abang tuh pawkongmou la eikuh hae?
Paul, Barnabas, te unopaw hae abang tuh piahccahnaa phishing nawlang hung hae kalang mou a ccia hae?
Locceihtu 15:12-18, 23-29 kha ria tuhkoute e bakhianaw kha hokuh oh:
Masaty uhtu buu hae nynh Pachia langhroinaw mue nawlang pawmou tuabia te byapaenaw la rae hae?—Adihpaw 12, 15 te 28 kha do tua.
Locceihtu 15:30, 31 te 16:4, 5 kha ria tuhkoute e bakhianaw hae kha hokuh oh:
Masaty Khrihccaw hae nynh uhtu buu hae langhroinaw kha pawtemou a liaru hae?
Kaw a ngae hae keiccuze Zahova nynh pawtemou hythua a pya hae?
2 Timote 3:16 te James 1:5 kha ria tuhkoute e bakhianaw kha hokuh oh:
Atu she kya so Uhtu buu hae nynh byapaenaw a rae maw hae langhroinaw mue nawlang pawmou a cyi hae?
CCUNGCCAW ABANG NYNH HO HAE PAW: “Uhtu buu hae kaw ngaepaw tuh ccungccaw nuh zuipaw nynh thua.”
Uhtu buu hae kha Zisu nynh a cciakhae hae cite pawcce na zyn?
ADYNGNAWTE
Uhtu buu hae tuh Khrih nynh a khang hae paw “a lungzipaw te a hawpaw see” nynh thua hae. Laephi pyngpi kya-e Khrihccaw hae kha langhroi te zynnaw a tynsahpaw Baebu konglang hae kha a paccynpya hae.
Bua Liathuinaw
“A lungzipaw te a hawpaw see” kha a hung nynh mou a khang?
Uhtu buu hae nynh aening kha pawtemou pe yn ki hae?
Uhtu buu hae tuh “a lungzipaw te a hawpaw see” nynh thua hae cipaw na zyn tou?
HOUH CCUNGCHIH
Uhtu buu hae ryalaw thadynsanaw kong kha ria tua.
“Zahova Ccaeccei Hae Kya-e Uhtu Buu Hae Cipaw Tuh Pawmou?” (Website ccaw)
Kyh zah amepaw akonglang hae pya nawlang Uhtu Buu hae nynh pawtemou rya a law hae cipaw kha do tua.
Uhtu Buu kya-e hae nynh Zisu nynh a pya hae paw ryalaw kha pawtemou a tua hae?
Uhtu Buu hae kha Zahova nynh lang hroi hae cipaw pungkunaw hae, civoi hae nynh pawtemou a langsah hae?