Poi Miakaw Kha Pachia Nynh A Ry Tou?

Zahova nynh aening kha ah lung yn pawsah ry zah lungpaw lang ungpaw poi hae tua hae sah cyi yn ry. Thuasalama poi miakaw kha Pachia nynh a rypaw thua khyh? E kong kya Zahova kha ah sungsah oh cipaw pawtemou langsah kho lang?

1. Poi hae a lunghua kha Zahova nynh pawcce a ry khyh?

Poi hae a lunghua tuh Baebu ccangpyanaw te alokuh leipaw, Khrihccaw thua lei hae paw kyate yn thopaw cipaw kha na nyh tuh na ngae na ang a thua kho. Tuh-e poi hae tuh ame leipaw beihnaw te a ccuepekuh hae paw nynh thua. Muihsaw hoyleipaw thyanaw, ccungccaw chii ze muihsaw chih khyh cipaw zynnaw, vehoynaw zynnaw, ame leipaw rinaw te zynnaw (superstition) hae kha abapi lang a nung hae paw poi hae mah a ung. (Isaiah 65:11) Tuhkeiccuze Zahova nynh aening kha hynhte raeringnaw yn pya: “Minmin kyate phiakuh oh; athyaa leipaw kha hae nan oh.”​—2 Korin 6:17.a

2. Ccungccaw hae kha alue langte phu-esahpaw poi hae kha Zahova nynh pawtemou a tua?

Zahova nynh “ccungccaw basi kha doliakuh” paw kang kalang ccaw khyh nawlang raeringnaw yn pya. (Jeremiah 17:5 kha ria.) Abang poi hae nynh uhtu te rawkaw hae kha phu-esah hae. Tuhkoute minphuin poi hae, luenaw a muekuh nin poi hae a ung. (1 Johan 5:21) Nainganzei phu, ccungccaw bungpaw phu hae kha phu-esahpaw poi hae mah a ung. Ccungccaw lukheit thua khyhze phu phukheit kha a lue langte phu-esahpaw poi hae, Pachia eenaw te a lokuh leipaw tuanaw kha thaw a pyapaw poi hae kya na pabua ze Zahova tuh pawtemou ung cih?

3. Paw ziazae hae nynhmou poi hae kha lehkhang khyh nawlang a thuasah?

“Ruinaw, eih hoysah kaesynaw, zu-aete hoysahnaw” hae kha Baebu nynh a khee. (1 Peter 4:3) Abang poi hae kya ccungccaw hae tuh eih hoysah kaesy hae zah a ohhuakuh hae. Zahova te vaeccaw lang pou tang ry ze ziazae a thyaasah lei hae paw kha sihaekuh lang.

HOUH CCANGKUH LANG HOUH MUIH LANG

4. Zahova kha phu-esah leipaw poi hae kha sihaekuh

Efesa 5:10 kha ria tuhkoute e bakhianaw hae kha hokuh oh:

• Poi ccangkheit tua lang a ccang, ccang khyh cipaw byapaenaw rae vae ze pawmou tua bia lang a ccang?

• Na ungnaw kya ccungccaw hae nynh paw poi hae mou a ry hua hae?

• Tuh-e poi hae kha Zahova nynh a ry cih cite na tua tou?

Tousenaw langze, pui nin tuapaw kha Pachia nynh pawtemou a tua cih cipaw na nyh ry tou? Zahova a beih hae paw nynh pui nin a tua hae paw kong Baebu kya ung khyh. Thuasalama Pachia a beih lei hae paw nynh a tua hae paw pui nin poi ccangning kong kele nynh a langsah. Genesis 40:20-22 te Matthai 14:6-10 kha ria. Tuhkoute e bakhianaw hae kha hokuh oh:

• Pui nin poi ccangning kya paw lokunaw mou a ung?

• E Baebu kong hae liate Zahova nynh pui nin tuapaw kha pawtemou a tua?

‘Pui nin, Baebu te a rawsekuhpaw poi hae tuapaw, tua leipaw tuh Zahova hanglang azici zaw tou?’ cite na tua kho. Exodus 32:1-8 kha ria. Tuhkoute, VIDEO kha pia lah akaw lang-e bakhianaw hae kha hokuh oh.

VIDEO: Zahova Nynh A Ry Leipaw Poi Hae (5:07)

• Zahova nynh leh a khangpaw kha pawcce ny ahoo?

• Tuhte ny nawlang pawmou cyi lang?

Zahova nynh a ry leipaw poi nynh thua cipaw nykhonaw kong

• Baebu te a rawsekuhpaw ccangpyakunaw hae kyate tou yn tho? Poi nin a thonaw kong kha ccung.

• Ccungccaw, phu, minphuin poi hae kha a lue langte phu-esah tou? Kaening nynh pawpaw lae ze Zahova kha phu kae esah. Laephi piahccahnaa hae phishing nawlang Pachia kele nynh kae doliakuh.

• E phungzae hae tuh Baebu phunglang te a lokuh tou? Ziazae thyaa te ung lang ahoo.

5. Maw zynnaw kha minccang paw hae nynh sawtua nawlang hae bung hae

VIDEO: Maw Zynnaw Kha Hawnaw Te Hopah Hae (2:01)

Matthai 7:12 kha ria tuhkoute e bakhianaw hae kha hokuh oh:

• E Baebu ccaw liate poi nin tua leilang cite zyntu thua lei hae paw innbyng hae kha hopya lang hae a ccang tou?

• Poi nin kya pabua khyh zemah na innbyng hae kha na sungsah hae zah phu na tesah hae cipaw a ny nawlang hae pawmou na cyi kho?

6. Zahova nynh aening kha ah lung yn pawsah ry

Zahova nynh aening kha innbyng, vaeccaw hae ryte lungtua lungpaw te yn ungsah ry. Phunghotu 8:15 kha ria tuhkoute e bakhianaw kha hokuh oh:

• Zahova nynh aening kha ah lung yn pawsah ry cipaw e Baebu ccaw nynh pawtemou a langsah?

Zahova nynh aening kha pyngkheih lang mungkuh te hoysah hae sah ci yn ry. Tuh-e kha ram takyh civoipi hae kya muih kho a thua. Tuh-e kong ny nawlang, VIDEO kha pia.

VIDEO: Ram Takyh Civoipi Hae Kya Mihkhia Sungsanaw Langsanaw (5:40)

Galati 6:10 kha ria tuhkoute e bakhianaw hae kho hokuh oh:

• Minccang paw hae tungvaw “hoynaw rae” lang ccungccaw a lunghua nynh a ry hae paw poi hae tua lang ahoo tou?

• Pawta hawpaw pyanaw nynhmou na lung ae pawsah​—pya lang ahoo keiccuze na pyapaw nynh tou tuhkhyhze lungtho te na pyapaw nynh tou?

• Zahova Ccaeccei a lunghua nynh mih ccaw hae mih lungpaw nawlang a paccyn pya hae. Ngaeang thuate mih lungpaw nawlang lasung hae a pya hae. Ccaw na hoi ze, na ccaw hae hanglang pawtemou lungpaw lang ungpaw hae na paccyn pya kho hae?

ADYNGNAWTE

Zahova nynh aening kha innbyng, vaeccaw hae ryte lungtua lungpaw te yn ungsah ry. Thuasalama amaw nynh a ry leipaw poi hae kha tuh yn sihaesah kuh ry.

Bua Liathuinaw

• Zahova nynh a ry leipaw poi nynh thua cipaw ny nawlang paw bakhianaw hae mou ah khia kho oh?

• Poi nin te asekuhte na byapaenaw kha innbyng, vaeccaw hae a thaethya nawlang hae pawtemou na ccaesah cih?

• Zahova nynh aening kha ah lung yn pawsah ry cipaw pawtemou na ny?

HOUH CCUNGCHIH

Khrihccaw hae nynh a tua lei hae paw poi kong abang kha tuatua.

“Zahova Ccaeccei Hae Tuh Pawcce Poi Hae A Tua Khyh Hae?” (Website ccaw)

Pui nin poi tuapaw kha Pachia nynh a rykhyhnaw kong ccangpali kha ria tua.

“Zahova Ccaeccei Hae Nynh Pui Nin Poi Kha Pawcce A Tua Khyh Hae?” (Website ccaw)

Siainn Christmas poi kya pabua khyh zah saryanaw a tung ccyh kya ngawphue paw lukheit nynh hawnaw te a liarunaw kong kha do tua.

Saryanaw Kha Phishingkhonaw (2:04)

Khrihccaw ccang patae nynh Christmas poi tua khyh hae. Mih byapaenaw hanglang pawtemou a tua hae?

“Christmas Poi Lae Ahoy Huapaw Kha A Muih Hae” (Rawvianaw, December 1, 2012)