ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ
12 ˈDhɛ ˈö ˈˈdhʋ̈, n ꞊dhegblü ˗nu, a ˗bhɛɛ ka ˗dhɛ ˗Zlan ˗bha mɛn ˗wëëzësü ˗wɔn ˈgü kö ˈka ka ˗de* nu ꞊dhɛ ˈˈsaapë ˈö ˈˈbhɩɩ˗, ˈö ˈˈslʋ̈ʋ̈slʋ̈, ˈö ˗Zlan ˗yö ˗we ˗a ˗bha ˗a ˈdhö, ˗yö kë ˈˈdhʋ̈ kö ˈka yö kë ˗Zlan ˗dhɛ ka ˗bha ˈwɔnbhokoodɔsü ˈka. 2 ˈKaa ˗dho ka ꞊kwaa ka ˗de ˗zü ˈzü kö ˈˈkpɔnŋtaadhɛ ˗yö ˈˈdhiʋ̈sü ka ˈka. ˗Ka ka ˗zota ˗kɔ bho ˈˈgblʋʋ ꞊ʒiaan kö ˈka kë mɛn ꞊suu ˗dɛɛ ˈka, ˗yö kë ˈˈdhʋ̈ kö ˗Zlan dhɔɔbhaawɔn ˈö ˗kë ˈwɔn ˈö ˗së, ˈö ˗dhi ˗a ˗dhɛ, ˈö pö ˈyaa˗ ˗bha ˗a ˈka bhë, ka ꞊dede ˈka ˗mɔn ˗a dɔ ˗sü ˗bha.
3 ˗Gasitɛ ˈö˗ ˗kë n ˗dhɛ bhë ˗a ˗wɔn ˈgü, a˗ ˗pö mɛn ꞊gban ˈˈpɛpɛ ka ˗dhɛ ꞊dhɛ ˈkaa ˗dho ka ˗de ˈsü ˗tiaandhö ˈgbɛ ˈö ˗ʒiö ˗a ˈka mü. ˗Zota ˗kɔ ˗së ˗yö kë mɛn ˈö ˈdhö ˗a ˗gɔ ꞊ʒiaan, ˗ya dan ˗zoyödhe ˈdhɛ ˈö ˗Zlan ˗ya nu ˗a ˗dhɛ bhë ˗a ˈka. 4 ˗A ˗gɛn ˗mü ꞊dhɛ ˗kɔ do ˈö mɛn dɔɔ˗ ˗nu ˈdhö˗ ˈka mɛn ˗dhü dosɛnŋ ˗bha ˈˈkɛɛ ˈö ˗an ꞊gban ˈˈpɛpɛ kë ˗yö ˈyaa do ˗a ˈdhö bhë, 5 ˗kɔ do ˈö bhë ˗a ˈka, ˈkö ˗kë ꞊dhɛ kwa ꞊va, kwa ˗dhokwëësü ˗yö mɛn ˗dhü do ˈka kwa ˗bha ˗kpa Klito ˗bha ˗sü ˈgü. ˈˈKɛɛ ˗kɔ ˈö ˈkwa˗ ˗bha do do ˈka, kwa ꞊dhɛ mɛn dɔɔ˗ ˗nu ˈö ˈwo ˗gban ˗sü ˈka wo ˈko ˗nu ˗bha ˗an ˈdhö.* 6 ˗Zlan ˗bha ˗gasitɛ ˈö˗ ˗kë kwa ˗dhɛ bhë ˗a ˈgü, gbɔɔdhe ˈö˗ ˗kë mɛn ˈö ˈdhö ˗a ˗gɔ ˗yö ˗dhö. ˈDhɛ ˈö ˈˈdhʋ̈, ˗ya kë ꞊dhɛ ˗Zlan ˗yö ö ˗wo ˈˈdhiʋ̈ ˗lo ˗sü gbɔɔdhe ˗kë kwa ˗gɔ, ˗kwa ˗gban ˗zoyödhe ˈö kwa ˗gɔ bhë ˗a ˗ta ˈkwa˗ ˗wo ˈˈdhiʋ̈ ˗lo. 7 ˗Ya kë ꞊dhɛ ˗Zlan ˗bha yö ˈbhaa ˗mü, ˗a yö ˈö ˈˈdhʋ̈ ˗kwa kwa ˈgü dɔ ˈˈgbɩɩ˗ kö ˈkwa˗ kë. Mɛn ˈdhɛ ˈö˗ ˗bha ˗ya kë ˈpö mɛn ꞊klaŋ kë ˗sü ˈka, ˗yö ö ˈgü dɔ ˈˈgbɩɩ˗ ˗ya kë. 8 Mɛn ˈdhɛ ˈö˗ ˗bha ˗ya kë mɛn ˗nu ꞊faan ˈmën ˗sü ˈka, ˗yö mɛn ˗nu ꞊faan ˈmën. Mɛn ˈö˗ ˗bha ˗ya kë ˈpö pë ˗nu mɛn ˗dhɛ ˗sü ˈka, ˗yö pë nu mɛn ˗nu ˗dhɛ zuʋ̈ˈˈ ˈˈpuu ˗bha. Mɛn ˈö˗ ˗bha ˗ya kë ˈˈdhiʋ̈ ˈsü ˗sü ˈka, ˗yö ö ˈgü dɔ ˈˈgbɩɩ˗ ˗ya kë ˗së ˈka. Mɛn ˈdhɛ ˈö˗ ˗bha ˗ya kë mɛn ˗bhawɔn ˈto ˗sü ˈka, ˗yö mɛn ˗bhawɔn ˈto ˈpö ö zuʋ̈ˈˈ ꞊gban ˈka.
9 ˈˈYi ˈyaa ˗dho kë ka ˗bha ˗dhɔ ꞊löö. ˈWɔn yaa ˗ɲënŋ ˗yö ka kë, kö ˈka ˗klu ˈwɔn ˈö ˗së ˗a ˗bha. 10 Ka ˗dhɔ ˗yö ka ˈko ˗nu kë ꞊dhɛ ˈkɔdhi do ˈgümɛn ˗nu ˈdhö, kö ka ˗wɔn ˗yö kë ka ˈko ˗nu ˗gɔ ˈˈgbɩɩ˗. ˗Ka kë mɛn ˗blɛɛsü ˈka ˗kplawo ka ˈko ˗nu ꞊bhlëë ˗ya ˗sü ˈgü.* 11 ˗Ka kë yökëmɛn ˗nu ˈka, ˈkaa ˗dho kë ˈˈfiasü. ˗Zuu ˈˈslʋ̈ʋ̈slʋ̈ ˗yö ka kë ˈwɔn ˗nu ˗kë ö ꞊faan ˈka ˗mɛn ˗nu ˈka, kö ˈka yö kë ꞊dhɛ ꞊dhuëŋ ˗nu ˈdhö Zoova ˗dhɛ. 12 ˗Zo ˗yö ˗dhɛkpaɔ dhiʋ̈ˈˈ ˗së ˗dhɛ ˗sü ˗yö ka zuʋ̈ˈˈ ˈˈgblü dhi. ˈˈKlʋʋbhɔdhe ˗ya nu ka ˗ta, ˗kaa bun. Ka ˈgü ˈyaa ˗dho ga bhɛɛsü ˈka. 13 ˗Ka nu mɛn ˈˈslʋ̈ʋ̈slʋ̈ ˗nu ˗dhɛ kö ˈka ˗an ˗bhawɔnyëëpë ˗nu nu ˗an ˗dhɛ. ˗Ka pë ꞊gban ˈˈpɛpɛ kë kö ˈka ka ˗kɔ ˗ya ˗dhɛŋ ˗gɔ ˗kplawo. 14 ˗Ka ˈdhuëë˗ ˈkpɔ ˗kplawo mɛn ˗nu ˈwo ka ˈˈklʋʋ bhɔ ˗ni ˈgü ˗an ˗bha. ˗Ka ˈdhuëë˗ ˈkpɔ mɛn ˗bha, ˈkaa ˗dho ˈˈdhaŋ ˗ya mɛn ˗bha. 15 Ka zuʋ̈ˈˈ ꞊nii ˗yö ˗da mɛn ˗nu ˈö ˗an zuʋ̈ˈˈ ꞊nii ˈdhö ˗da ˗sü ˈka ˗an ˈˈpiʋ̈, kö ˈka ˈˈgbʋ bɔ mɛn ˗nu ˈwo ˈˈgbʋ bɔ ˗ni ˈgü ˗an ˈˈpiʋ̈. 16 ˗Ka mɛn ˈˈwɛɛ ˗nu ˈsü ꞊dhɛ ˗kɔ ˈö ˈka ka ˗de sü ˗a ˈka ˗a ˈdhö. ˈKaa ˗dho ˗de ˗sü ꞊va ˗wɔn ˗nu ˗ya ka ˗zo ˈˈpiʋ̈, ˗ka ˗dekëtɩɩsü yö ka ˗bha ˈwɔn ꞊gban ˗dhɛ ˈˈdhiʋ̈. ˈKaa ˗dho ka ˗de ˈsü ˈwɔndɔmɛn ˗nu ˈka.
17 ˈKaa ˗dho ˈwɔn yaa ˈˈyɔɔ bho mɛn ˈbhaa ˗gɔ ˈwɔn yaa ˈka. ˈWɔn ˈö mɛn ꞊gban ˈgü ˗së ˗kaa kë. 18 ˗A ˈˈse ˗ya kë ka ˗dhɛ, ˗ka pë ꞊gban ˈˈpɛpɛ kë kö ˗dhikodhɛ ˗yö kë kaa mɛn ꞊gban ka ꞊zinŋgü. 19 N dhɔɔbhaamɛn ˗nu, ˈkaa ˗dho ˈwɔn yaa ˈwo˗ ˗kë ka ˈka ˗a ˈˈpɔ bho, ˗kaa ˈto ˈˈdhʋ̈ kö ˗Zlan ˗yö ö ˗bha ˗naanzuëëdhe ˗zɔn. ˗A ˗gɛn ˗mü ꞊dhɛ pë ˈö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˈyö ˗tɔ: «Pë ˈö Zoova ˗ya pö ˈyö ꞊nɛn: ‹Man ˈnën ˈa ˗tɔ ˈwɔn yaa ˈwo˗ ˗kë mɛn ˈka ˗a ˈˈpɔ bho ˗mɛn. Man ˈnën ˈa ˗dho ü ˗bha ˈˈyɔɔ bho.›» 20 ˈˈKɛɛ «˗ya kë ꞊dhɛ din˗ ˗yö ü ˈyɔɔ˗ kë ˗ni ˈgü, ˗bhö ˗bhöpë nu ˗a ˗dhɛ. ˈˈYi mü ˗dhɔ ꞊yaa˗ ˈkun, ˗bhö ˈˈyi nu ˗a ˗dhɛ kö ˗ya mü. ˗A ˗gɛn ˗mü ꞊dhɛ ˈbha˗ kë ˈˈdhʋ̈, ü ˗dho ˈˈshiʋ̈ ꞊dhuu ˗lo ˗a ꞊troo.»* 21 ˈBhaa ˗dho ü ꞊kwaa ˈwɔn yaa ˗zü kö ˗a ˗kɔ ˗yö ʒiö ü ˗gɔ, ˈˈkɛɛ ü ˗kɔ ˗yö ʒiö ˈwɔn yaa ˗gɔ ˗kplawo ˈwɔn ˗së kë ˗sü ˈka.