ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

2 ˈDhɛ ˈö ˈˈdhʋ̈, n ꞊dhegblü, ü ˗kë mɛn ˈˈoo ˗mɛn ˈka, ü ˗bha za ˗dɔ mɛn ˗bha ˗gɛn ˈyaa ˈdhö. ˗A ˗gɛn ˗mü ꞊dhɛ ˈbha za dɔ mɛn ˗bha, kö ˈbha ü ˗de zë za ˈka. ˈYö sü ꞊dhɛ pë ˗nu ˈü ˗an ˗za dɔ ˗ni ˈgü mɛn ˗nu ˗bha bhë, bhi ꞊dede ü ˗an ˗kë. 2 Kwa˗ ˈwɔn ˗dɔ ˈpö ꞊dhɛ ˗Zlan ˗yö ˗gban gagade ˗ta ˈö za dɔ, ˈö mɛn ˗nu ˈwo ˈwɔn ꞊suu ˗nu ˈwo ˈˈdhʋ̈ ˗an ˗kë ˗an zë za ˈka.

3 Ü ˗bha ˈgü ˈbha za dɔ mɛn ˗nu ˈwo ˈwɔn ꞊suu ˗nu ˈwo ˈˈdhʋ̈ ˗an ˗kë ˗an ˗bha, ˈˈkɛɛ kö bhi ꞊dede ü ˗an kë ˗ni ˈgü, ü ˗dho dha ˗Zlan ˗bha za ˗gɔ ˗ee? 4 Ɛɛnˈˈ ˗a ˈwɔn ˈnën ˈö ˈbhaa˗ dɔ ꞊dhɛ ˈˈgblüsë ˈkpii˗ ˈnën ˗Zlan ˗ya ˗kë ü ˈka, ˈö ü ˗bhawɔn to, ˈö ö zuʋ̈ˈˈ ˗kë ü ˈˈpiʋ̈ ˗saa ˗ee? ˗A ˈwɔn ˈnën ˈö ˈbhaa˗ dɔ ˈpö ꞊dhɛ ü ˗ta ˈnën ˈö˗ ˈkun ˗ni ˈgü zuʋ̈sëdhɛ ˈka, kö ˈü ü zuʋ̈ˈˈ slëëˈˈ ö ˈˈpiʋ̈ bhë ˗ee? 5 ˈˈKɛɛ ˈdhɛ ˈö ˗kë ꞊dhɛ ü ꞊gɔɔ ˗yö ˈˈgbɩɩ˗, ˈö ˈbhaa ˈˈwɩ ˗a ˗bha kö ˈü ü zuʋ̈ˈˈ slëëˈˈ bhë, ˗Zlan ˗bha ˗naanzuëëdhe waa˗ ˗bha za ˈö kpɛnŋdhö ˗a yi ˈka, ˗yö ˗dho ˈwɔn bho ü ˈgü. 6 ˗Yö ˗dho ˗gban mɛn ˈö ˈdhö ˗a këwɔn ˗nu ˗ta ˈö ˈwɔn ˗së ˗kë ˗a ˗dhɛ ɛɛnˈˈ ˈö ˈwɔn bho ˗a ˈgü. 7 Mɛn ˗nu ˈö ˈwo ˗klu ˈwɔn ˗së kë ˗sü ˗bha, ˈtɔbhɔdhe, ꞊bhlëë waa ˗këdhösü ˈö ˈyaa shiʋ̈ˈˈ ˈö go ˗Zlan ˈˈpiʋ̈ ˗a mɛɛnˈˈ ˗sü ˈka, ˗yö ˗dho ˗tosɛta ˈö ˈyaa ɲën ˗a nu ˗an ˗dhɛ. 8 ˈˈKɛɛ mɛn ˗nu ˈö zɔɔdhe ˗man ˗sü ˗dhɔ ˗yö ˗an ˗kë, ˈö ˈwaa wo ˗gɔ ˈdho ˈˈshia˗ gagade ˗dhɛ, ˈö ˈwɔn ˈö ˈyaa kpɛnŋdhö ˈwo to ˗a ˈˈpiʋ̈ bhë, ˈwɔn ˗dho ˗shiö ˗a ˗dhɛ ˗an ˗bha ˈö ˈwɔn bho ˗an ˈgü. 9 ˈˈKlʋʋbhɔdhe waa saanˈˈ ˗wo ˗dho wɔ mɛn ˈˈoo ˗mɛn ˈö ˈwɔn yaa ˗kë ˗a ˗ta. ˗A zü ˗dho dɔ mɛn ˈö Zuifö ˈka ˗a ˗ta ˈö dho ˈö yö ˗a ˈka Glɛkö* ˗bha. 10 ˈˈKɛɛ mɛn ˈˈoo ˗mɛn ˈö ˈwɔn ˗së ˗kë, ˗yö ˗dho ˈtɔbhɔdhe, ꞊bhlëë waa zuʋ̈waannusü ꞊slɔɔ˗. ˗A zü ˗dho dɔ mɛn ˈö Zuifö ˈka ˗a ˗ta, ˈö dho ˈö yö ˗a ˈka Glɛkö ˗bha. 11 ˗A ˗gɛn ˗mü ꞊dhɛ, ˗Zlan ˈyaa mɛn ˗nu ˗zë ˈgü kë.

12 Mɛn ˈˈpɛpɛ ˈö ˈwaa kun Moizö ˗bha ˈtɔŋ˗ ꞊löö ˈö ˈwo ˈwɔn yaa ˗kë, wo ˗de ˈpö ˗wo ˗dho ga ˈkö ˗kë ˗ʒiaanwo ꞊dhɛ ˈwaa kun ˈtɔŋ˗ ˈö bhë ˗a ꞊löö. ˈˈKɛɛ mɛn ˈˈpɛpɛ ˈö ˈwo kun Moizö ˗bha ˈtɔŋ˗ ꞊löö ˈö ˈwo ˈwɔn yaa ˗kë, ˈtɔŋ˗ ˈö ˈˈdhʋ̈ bhë ˈyö za dho dɔ ˗a ˈka ˗an ˗bha. 13 ˗A ˗gɛn ˗mü ꞊dhɛ mɛn ˗nu ˈö ˈwo pë ˈö ˈtɔŋ˗ ˗ya pö ˗a man ˈwaa ˈnën ˈwo ˗tɔ mɛn kpɛnŋdhö ˗nu ˗Zlan ˈˈɲan ˈˈdhiʋ̈. Mɛn ˗nu ˈwo pë ˈö ˈtɔŋ˗ ˗ya pö ˗a ˗kë, wo ˈnën ˗Zlan dho ˗an ˗dhɛ ꞊ʒiaan mɛn kpɛnŋdhö ˗nu. 14 ˗A pö ˈa˗ wo ˈˈdhʋ̈ bhë ˗a ˈklɔɔ˗ ˗mü ꞊dhɛ, mɛn ˗nu ˈwo ˈˈsɛ ˈˈwɛɛ ˈgümɛn ˗nu ˈka ˈö ˈwaa ˗Zlan ˗bha ˈtɔŋ˗ ˗nu ꞊löö bhë, ˗wo pë ˈö ˈtɔŋ˗ ˗ya pö ˗a ˗sü wo ˗de ˈgü ˈwo˗ ˗kë. ˈKö ˗kë ꞊dhɛ ˈwaa ˈtɔŋ˗ ˗nu bhë ˗an dɔ, ˗wa ˗zɔn ꞊dhɛ ˗yö wo ˈgü. 15 Wo ꞊dede ˗an këwɔn ˗nu ˈgü, ˗wa ˗zɔn ꞊dhɛ pë ˈö ˈtɔŋ˗ ˗ya pö ˗yö ˗bɛnzë ˗sü ˈka ˗an zuʋ̈ˈˈ ˈgü. ˗An zuʋ̈ga ˈö ˈwɔn yö ˈkö ˈˈdhiʋ̈ bhë ˗ya ˗zɔn ˗an ˗dhɛ ˈˈdhʋ̈. ˗A ˗wɔn ˈgü ˗wa ˈwɔn ˗së kë ˗an zuʋ̈ˈˈ ˗yö ˈwaannu, ˈö ˗wa ˈwɔn yaa kë ˗an zuʋ̈ˈˈ ˗yö za dɔ ˗an ˗bha. 16 ˗Yö ˗dho kë ˈˈdhʋ̈ ˗dhɛkpaɔyi ˈö ˗Zlan dho bɔ ˗a ˈka Yesu Klito* ˗ta kö ˗yö za dɔ mɛnbhɩɩdhe ˗nu ˗bha ˈwɔn ˗nu ˈö ˈwaa wo ˈˈdhi bho ˗an ˗ta ˗an ˗bha bhë ˗a ˈka, ꞊dhɛ ˗kɔ ˈö nɔɔn˗ ˗së ˈa˗ pö ˗ni ˈgü bhë ˈö˗ ꞊blɛɛ ˗a ˈka ˗a ˈdhö.

17 Bhi ˈü˗ pö ü ˗de ˗dhɛ ü Zuifö ˈka, ü ü ˗zo ˗yö ˈtɔŋ˗ ˗nu ˗dhɛ, ˈü ü ˗de ˈgü ˈˈgɔɔgɔ ˗mlɛɛn ˈö kaa ˗Zlan ka ꞊zinŋgü ˗a ˗wɔn ˈgü, 18 ˈö ˈü pë ˈö˗ dhɔɔbhaawɔn ˈka ˗a dɔ, ˈü ˈwɔn ˗nu ˈwo ꞊bhlëësü ˗an dɔ ˈyö sü ꞊dhɛ ˗wo ü ꞊klaŋ ˗kë ˈTɔŋ˗ ˈka, 19 ˈö ga ˗sü ˈka ü ˈgü ꞊dhɛ ü ʒiaan ˗bho ˈˈɲɛɛntiimɛn ˗nu ˈka ˗mɛn ˈka, ˈö mɛn ˗nu ˈwo ˗dhɛtiidhɛ ˈgü ˈü ˗an ˗bha ˗dhɛpuudhɛ ˈka, 20 bhi ˈü ˗dhioo dɔ mɛn ˗nu ˈö ˈwɔnbhokoodɔsü ˈyaa ˗an ˗gɔ ˗an ˗ta, ˈö ˈü ˈnën ˈsɛɛn˗ ˗nu ꞊klaŋkëmɛn ˈka, ˈü pë ˗wɔngbɩɩsü ˗nu waa gagade ˈö ˈTɔŋ˗ ˈsëëdhɛ ˈgü ˗an dɔ... 21 bhi ˈü ˗kë mɛn ˈˈwɛɛ ˗nu ꞊klaŋkëmɛn ˈka, ˗yö ˗kë ꞊dhɛ ˈsa ˈö ˈbhaa ü ˗de ꞊klaŋ kë? Bhi ˈü ˗zlanwopö mɛn ˗nu ˗dhɛ ˈü˗ pö: «ˈBhaa ˗dho ꞊kwaan˗,» ˗yö ˗kë ꞊dhɛ ˈsa ˈü ꞊kwaan? 22 Bhi ˈü˗ pö ˗ni ˈgü mɛn ˗nu ˗dhɛ: «Ü dua ˈyaa ˗mü kö ˈü ü ꞊gɔn ɛɛnˈˈ ü ˗bha dhebɔ ˈto ˈü niënŋˈˈ,» ˗yö ˗kë ꞊dhɛ ˈsa ˈö ˈü ꞊niënŋ? Bhi ˈü˗ pö gbapë ˗nu ˗san ˗yö ü ˗kë, ˗yö ˗kë ꞊dhɛ ˈsa ˈyö ˈü dho ˗an ˗dhɔkëdhɛ ˗nu ˈgü ˈü ꞊kwaan mü? 23 Bhi ˈö ˈtɔŋ˗ ˗wɔn ˈgü ˈü ü ˗de ˈgü ˈˈgɔɔgɔ bhë, ˈmën ˗kë ˈsa ˈü ˗Zlan ꞊bhlëë ˗shiö ˈTɔŋ˗ ˗lögü ˗sü ˈka? 24 «ˈˈSɛ ˈˈwɛɛ ˈgümɛn ˗nu ˗wo ˈwɔn yaa blɛɛˈˈ ˗ni ˈgü ˗Zlan ˈtɔ ˗bha ka ˈˈta ˗kɔ ˗wɔn ˈgü» ꞊dhɛ ˗kɔ ˈö ˗Zlan ˗Wo ˗ya pö ˗a ˈka ˗a ˈdhö.

25 Pë ˈö ˈtɔŋ˗ ˗ya pö ˈbha˗ ˗ya ꞊bhlëë ˈgü, kö ü ˗bha ˗go ˈˈbɔnŋ ˗sü ꞊bhlëë ˗yö ˗dhö. ˈˈKɛɛ ˈbha kë ˈtɔŋ˗ ˗lögü ˗mɛn ˈka, kö ü ˈbha ˗go ˈˈbɔnŋ ˗sü ˗ya kë ꞊dhɛ ˈpë ü ˈti ˈgo ˈˈbɔnŋ ˗a ˈdhö. 26 ˗Ya kë ˈpö ꞊dhɛ mɛn ˈö yö ˈti ˈgo ˈˈbɔnŋ, ˈwɔn ˗nu ˈö ˈtɔŋ˗ ˗ya pö ˗wo kpɛnŋdhö ꞊yaa ˗an kë ˗kplawo, kö ˗ya kë ꞊dhɛ mɛn ˈö ˗ya ˈgo ˈˈbɔnŋ ˗a ˈdhö, ˈyaa ˈˈdhʋ̈ ˗ee? 27 Bhi ˈö ˈTɔŋ˗ ˈsëëdhɛ ˗yö ˗kë ü ˗gɔ, ˈö ˈü go ˈˈbɔnŋ, ˈˈkɛɛ ˈü ˗kë ˈtɔŋ˗ ˗lögü ˗mɛn ˈka bhë, mɛn ˈö yö ˗zë yö ˈti ˈgo ˈˈbɔnŋ ˗yö ˗dho za dɔ ü ˗bha, ˈtɔŋ˗ ˗nu ˗ya ꞊bhlëë ˈgü ˗sü ˈka. 28 ˗A ˗gɛn ˗mü ꞊dhɛ mɛn ˈö Zuifö ˈka, ˈyaa ˈnën ˈö ˗tɔ mɛn ˈö Zuifö ˈka ö kwi ˗bha, ɛɛnˈˈ ˗go ˈˈbɔnŋ ˗sü ˈyaa ˈnën ˈö ˗tɔ ˗a ˈdhɛ ˈwo˗ ˗kë mɛn kwi ˗bha, ˈö mɛn ˗nu ˗wa yö. 29 Mɛn ˈö Zuifö ꞊dede ˈka ˈyö ˗tɔ mɛn ˈö Zuifö ˈka ö zuʋ̈ˈˈ ˈgü, ˈö˗ ˗bha ˗go ˈˈbɔnŋ ˗sü ˗yö ˗kë ˗zuu ˈˈslʋ̈ʋ̈slʋ̈ ꞊kɔa ˗a zuʋ̈ˈˈ ˈgü, ˈö ˈyaa ˈsü ˈtɔŋ˗ ˗nu ˈwo ˗bɛnzë ˗sü ˈka ˈsëëdhɛ ˗ta ˗an ˗bha. Mɛn ꞊suu ˈö ˈˈdhʋ̈ ˗a ˗bha ˈtɔbhɔdhe ˗yö ˗go ˗Zlan ˈˈpiʋ̈, ˈyaa ˈgo mɛnbhɩɩdhe ˗nu ˈˈpiʋ̈.