ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

11 ˗Ka ˈto n ˗man ˈwɔnzuan ˈˈpiʋ̈ ꞊dhɛ ˗kɔ ˈö man ˗de ˈpö ˈa ʒiö ˗ni ˈgü ˗a ˈka Klito ˗bha ˈwɔnzuan ˈˈpiʋ̈ bhë ˗a ˈdhö.

2 A ka ˈˈnuɛ ˗bho, ˈyö sü ꞊dhɛ ˈwɔn ꞊suu ˈˈoo ˗su ˈgü, ka ˗zo ˈyaa bhɔ n ˈka. ˗Ya ˈgo mü ˈzü, wɔkɔ ˗nu ˈa ka ꞊klaŋ ˗kë ˗an ˈka bhë, ka ˗to ˗an ˈˈpiʋ̈ ˗së ˈka ꞊dedewo. 3 ˈˈKɛɛ ˗yö n ˈˈpiʋ̈ kö ˗yö kë ka ˈˈɲaan ꞊dhɛ Klito ˈnën ˈö ˗tɔ gɔɔn˗ ˗nu ˈˈpɛpɛ ˗gɔmɛn. ˈYö gɔɔn˗ ˗de ˈpö ˈö ˗kë dhebɔ ˗gɔmɛn ˈka. ˈYö Klito ˗gɔmɛn ˗yö ˗kë ˗Zlan ˈka. 4 Gɔɔn˗ ˈö pë to ö ˗gɔ ˗bha ˈö ꞊bhɛɛ ɛɛnˈˈ ˈö ˗Zlan ˗wo ˈˈdhiʋ̈ ˗lo, kö ˗ya ˈlëë˗ dɔ ö ˗gɔmɛn ˗bha. 5 Dhebɔ ˗de ˈpö, ˗ya pë bho ö ˗gɔ ˗bha ˗ya bhɛɛˈˈ ɛɛnˈˈ ˗ya ˗Zlan ˗wo ˈˈdhiʋ̈ ˗lo, kö ˗ya ˈlëë˗ dɔ ö ˗gɔmɛn ˗bha. ˗A ˗gɛn ˗mü ꞊dhɛ ꞊yaa˗ kë ˈˈdhʋ̈, kö ˗yö ꞊dhɛ dhebɔ ˈö ꞊waa˗ ˗gɔ ˈˈkpla bho ˗a ˈdhö. 6 Dhebɔ ˈö ˈyaa˗ ˈˈpiʋ̈ ˈö pë ˗ya ö ˗gɔ ˗bha, wun ˈö˗ ꞊troo bhë ˗ya ˈˈkan ˈsa. ˈˈKɛɛ ˗ya kë ꞊dhɛ dhebɔ ˗bha ö ˗bha wun ˈˈkan ˗sü ɛɛnˈˈ ˈö ˗gɔ ˈˈkpla bho ˗sü ˗yö ˈlëë˗ ˗sü, ˗a dua ˗mü kö ˗yö pë ˗ya ö ˗gɔ ˗bha.

7 Gɔɔn˗ dua ˈyaa ˗mü kö ˗yö pë ˗ya ö ˗gɔ ˗bha, ˈyö sü ꞊dhɛ ˗Zlan ˗ya ˗da ö ˗bhɔ ˗a ˗bha ˈka, ˈö ˗Zlan ˗bha ˈtɔbhɔdhe ˈbhü ˈka. ˈˈKɛɛ dhebɔ ˗zë, ˗yö gɔɔn˗ ˗bha ˈtɔbhɔdhe ˈbhü ˈka. 8 ˗A pö ˈa˗ wo ˈˈdhʋ̈ bhë ˗a ˈklɔɔ ˗mü ꞊dhɛ, gɔɔn˗ yö ˈti ˈgo dhebɔ ˈgü, dhebɔ ˈnën ˈö go gɔɔn˗ ˈgü. 9 ˗Ya ˈgo mü ˈzü, ˗Zlan yö ˈti gɔɔn˗ ˗da dhebɔ ˗bha ˈka, dhebɔ ˈnën ˈö˗ ˗da ꞊ʒiaan gɔɔn˗ ˗bha ˈka. 10 Yö ˈnën ˈö˗ ˗wɔn ˈgü ˈö dhebɔ dua ˈdhö ˗mü kö ˗yö pë ˗ya ö ˗gɔ ˗bha kö ˗ya ˗zɔn ꞊dhɛ ö ö ˗gɔ ˗dho ˈˈshia˗ gɔɔn˗ ˗dhɛ, kö ˈˈkiö ˗nu ˗wa yö.

11 ˈˈKɛɛ Dëmɛn ˗bha ʒiaan ˗ta, dhebɔ ˈyaa ˈdhö, gɔɔn˗ ˈyaa ꞊mɔɔn˗ ˗bha kö ˗yö kë ˗dhö, ɛɛnˈˈ gɔɔn˗ ˈyaa ˈdhö ˈpö, dhebɔ ˈyaa ꞊mɔɔn˗ ˗bha kö ˗yö kë ˗dhö. 12 ˗A ˗gɛn ˗mü ꞊dhɛ ˗kɔ do ˈö dhebɔ ˗yö go ˗a ˈka gɔɔn˗ ˈgü bhë, ˗kɔ do ˈö bhë ˗a ˈka ˈpö gɔɔn˗ ˗yö ˗bɔ dhebɔ ˗ta ˈö bhɔ. ˈˈKɛɛ ˗Zlan ˈnën ˈö pë ꞊gban ˗da. 13 Ka ꞊dede ˗a ˗ga ˈö ˈka˗ wo bhë, ˗yö ˗së kö dhebɔ ˗yö ö ˗gɔ ˈto ˈˈkpaan ˈka ˈˈdhʋ̈ ˗yö bhɛɛˈˈ ˗ee? 14 ˗Kɔ ˈö ˗Zlan ˗yö mɛnbhɩɩdhe ˗da ˗a ˈka bhë, ˗ya ˗zɔn ˗ʒiaanwo ꞊dhɛ gɔɔn˗ ˗bha wun ˈto ˗sü ˈö ˗kë ꞊gblɛɛn bhë, ˗yö ˈlëë˗ ˗sü ˗a ˗bha ˈka. 15 ˈˈKɛɛ dhebɔ ˗zë ˗a ˗bha wun ˗ya kë ꞊gblɛɛn, ꞊bhlëë ˗wɔn ˗mü ˗a ˗bha ˈka. ˗A ˗gɛn ˗mü ꞊dhɛ ˗Zlan ˗yö ˗a ˗bha wundhɛ ˗kë ꞊va ˈˈdhʋ̈ kö ˗yö ˈˈgblü ˗a ˗gɔ ˗ta ꞊dhɛ ˈfaan˗ ˈdhö. 16 ˈˈKɛɛ ˗ya kë ꞊dhɛ wɔkɔ ˈö bhë ˈyaa mɛn ˈbhaa ˈgü ˗së, yi ˗zë ˗a ˈˈwɛɛ ˈbhaa ˈyi ˗dho ˗a dɔ ɛɛnˈˈ ˈö ˗zlanwokɔdhi ˈˈpɛpɛ ˈgümɛn ˗nu dho ˗a dɔ ˈyaa ˈdhö.

17 ˈˈKɛɛ ˗dhioo ˗nu ˈa ˗an dɔ ˗ni ˈgü ka ˗ta bhë, n ˈti˗ kë ˈˈdhʋ̈ kö ˈa ka ˈˈnuɛ bho, ˗a ˗gɛn ˗mü ꞊dhɛ ˈka kë ka ˗bha ˗bhɔkwëë ˗nu ˗ta, ka pë ˈˈdhiʋ̈˗ ˗kë ka ˈko ˗nu ˈka ˈö ˗ʒiö ˗a ˈka ˈwɔn ˗së ˗kë ka ˈko ˗nu ˗dhɛ ˗sü ˗ta. 18 ˈPë ˗kë ˈa˗ pö ˈˈdhʋ̈ ˗a ˗gɛn ˗blɛɛsü ˈnën ˗tɔ, a˗ ˗man ꞊dhɛ ˈka ˈdho ka ˈkwëëdhö, ˗kankwëëdhe ˗yö ˗kë ka ꞊zinŋgü. A˗ ˈwɔn ˗dɔ ꞊dhɛ ˈwɔn ˈa˗ man bhë ˗a ꞊gban ˈyaa ꞊sua ˈka. 19 ˈWɔnbhopiʋ̈këmɛn ˗nu kpö kpö ˗dho kë ka ꞊zinŋgü ˗ʒiaanwo, ˗yö kë ˈˈdhʋ̈ kö mɛn ˈö ˗Zlan dhɔɔbhaamɛn ˈka mɛn ꞊gban ˗wa dɔ.

20 ˈKa ˈdho ka ˈkwëëdhö ˗dhɛ do ˈgü, ˈkaa ˗a kë ꞊dhɛ ˈmɛn ˈwo dho kö ˗wo Dëmɛn ˗bha ˈˈdooka ˗bhöpë ˗bhö ˗an ˈdhö. 21 ˗A ˗gɛn ˗mü ꞊dhɛ Dëmɛn ˗bha ˗bhöpë ˗bhö ˈˈtʋ̈ŋ ˗ya ˗wo, ˈyö mɛn ˈö ˈdhö ˈö ö ˗de ˗bha ˗bhöpë ˗bhö ꞊köŋ ˗blɛɛsü. ˗A ˗wɔn ˈgü din˗ ˗yö mɛn ˈbhaa ˗nu kë ˗ni ˈgü, kö mɛn ˈbhaa ˗nu ˗zë we ꞊yaa˗ ˗an ˈkun. 22 ˈKɔ ˈyaa ka ˗gɔ kö ˈka pë ˗bhö ɛɛnˈˈ kö ˈka we mü ˗a ˈgü ˗ee? Ɛɛnˈˈ ˗Zlan ˗bha ˈkɔdhi ˈnën˗ ˗san ˗yö ka ˗kë, ˈö ˈka˗ ˈˈpiʋ̈ kö ˈlëë˗ ˗yö mɛn ˗nu ˈö pë ˈbhaa ˈyaa ˗an ˗gɔ ˗an kë ˗ee? ˈMën ˈka˗ ˈˈpiʋ̈ ˈa˗ pö ka ˗dhɛ? ˈA ka ˈˈnuɛ bho ˗ee? ˗Abin, ˗a ˈdhɛ ˈö bhë, n ˈti ˗dho ka ˈˈnuɛ bho ˗a ˗wɔn ˈgü.

23 ˗A ˗gɛn ˗mü ꞊dhɛ, man ˗zë pë ˈö Dëmɛn ˗ya ˗zɔn n ˗dhɛ ˈyö ˈa ka ꞊klaŋ ˗kë ˗a ˈka. A˗ ˗zɔn ka ˗dhɛ ꞊dhɛ gbeŋyi ˈö ˈwo kwa Dëmɛn Yesu ˈˈdhoodɔ ˗a ˈgü bhë ˗a ˈka, ˗yö ˈbluu˗ ˗sü 24 ˈyö ˈdhɛ ˈö ö bo bhɛɛsü ˈka ˗a ˗ta ˈö ˗Zlan ˈˈnuɛ bho, ˈö˗ ˈˈkluklu bho ˈö˗ pö: «N kwi ˈa ˗dho ˗a nu ka ˗wɔn ˈgü bhë, ˗a ꞊zuaan ˈnën ˈö bhë. ˗Kaa kë ꞊dhɛ ˗kɔ ˈö yö ˗a ˈdhö ˗kplawo, kö ka ˗zo ˗yö ˗buö n ˈka.» 25 Pë do ˈö bhë ˈyö˗ ˗kë ˈpö we ˗kɔɔ ˈka kö ˗wa wo bo pë ˗bhö ˗sü ˈka, ˈyö˗ pö ˗an ˗dhɛ: «We ˗kɔɔ ˈö yö, yö ˈnën ˈö ˗tɔ ˗mlɛɛn ˗dɛɛ ꞊zuaan. ˗Mlɛɛn ˗dɛɛ ˈö ˈˈdhʋ̈ ˗a zübhotapë ˈnën ˗tɔ n ꞊ɲɔɔn. ˗Kaa kë ꞊dhɛ ˗kɔ ˈö yö ˗a ˈdhö ˗kplawo, kö ˈˈtʋ̈ŋ ˈˈpɛpɛ ˈö ˈka ˗dho ˗a mü ˗a ˈka, ka ˗zo ˗yö ˗buö n ˈka.» 26 ˗A ˗gɛn ˗mü ꞊dhɛ ˈö dho ˈö yö ˗a ˈka Dëmɛn nu ˗yi ˗bha, ˈˈtʋ̈ŋ ˈˈpɛpɛ ˈö ˈka ˈbluu˗ ˈö bhë ˗a ˗bhö, ˈö ˈka we ˈö bhë ˗a mü, kö ka ˗a ˗bha ga ˗wɔn blɛɛˈˈ ˗ni ˈgü ˗kplawo ˈnën bhë.

27 ˗A ˗kë ˈˈdhʋ̈ ˗sü ˈgü, mɛn ˈö ˈbluu˗ ˈö bhë ˗a ˗bhö ɛɛnˈˈ ˈö Dëmɛn ˗bha we ˈö bhë ˗a mü ˈˈkɛɛ kö ˗a ˗dhɛ ˈyaa˗ ˗bha kö ˗ya kë ˈˈdhʋ̈, kö ˗a ˗mɛn ˗ya za ˗lo ö ˗de ꞊troo ˈwɔn ˈö ˗gban Dëmɛn bun waa˗ ꞊ɲɔɔn ˗bha bhë ˗a ˈgü. 28 ˈDhɛ ˈö ˈˈdhʋ̈, mɛn ˈö ˈdhö ˗yö ö ˗de ˗ga ˗së ˈka ꞊köŋ, kö ꞊yaa˗ yö ꞊dhɛ ˈwɔn ˈyaa ö ˗bha, kö ˗yö ꞊kun ˈbluu˗ ˈö bhë ˗a ˗bhö, ˗yö we ˈö bhë ˗a mü. 29 ˗A ˗gɛn ˗mü ꞊dhɛ mɛn ˈö ˈbluu˗ ˈö bhë ˗a ˗bhö ɛɛnˈˈ ˈö we ˈö bhë ˗a mü ˈˈkɛɛ kö pë ˈö Dëmɛn bun ˈdhö˗ ˈka ˈyaa˗ ˗bhokoo dɔ, kö pë ˈö ˗dho ˗a ˈkun za ˈka ꞊yaa˗ ˗bhö, ɛɛnˈˈ ꞊yaa˗ mü. 30 Yö ˈnën ˈö˗ ˗wɔn ˈgü ˈö mɛn ꞊vadhɛ ˈwo ka kpö ˈgü ˈwo ˈˈtëëtë, ˈö ˈwaa wo ˈflëëgü, ˈö ˗a mɛn ꞊vadhɛ ˗wa ga.* 31 ˈˈKɛɛ kö ˈkwa kwa ˗de ˗ga ˗së ˈka kö pë ˈö ˈkwa ˗dho ˗a kë ˈkwa˗ dɔ, za yö ˈti ˗dho dɔ kwa ˗bha. 32 ˈˈKɛɛ ˗ya kë ꞊dhɛ za ˗ya dɔ kwa ˗bha, kö Zoova ˈnën ˈö ˈwɔn bho kwa ˈgü bhë, ˗yö kë ˈˈdhʋ̈ kö ˈyaa ˗dho kwa kpa ˈˈkpɔnŋtaamɛn ˗nu ˗bha ˈö˗ ˗bha za ˗yö kwa kun. 33 ˈDhɛ ˈö ˈˈdhʋ̈ n ꞊dhegblü ˗nu, ˈka ˈdho ka ˈkwëëdhö kö ˈka Dëmɛn ˗bha ˗bhöpë ˗bhö, ˗ka ka ˈˈɲan ˈto ka ˈko ˗nu ˗gɔ. 34 Mɛn ˈö din˗ ˈdhö˗ ˗bha, ˗yö pë ˗bhö ꞊köŋ ö ˗gɔ ˈkɔɔ, ˗yö kë ˈˈdhʋ̈ kö ˈka nu ka ˈkwëëdhö, za ˈyaa ˗dho mɛn ˈbhaa ˈkun mü. ˈWɔn ˈˈwɛɛ ˗nu ˈwo to, ˈman nu ˈmü kö ˈa ˗an ˈˈɲan bhɔ.