ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

15 N ꞊dhegblü ˗nu, ˗yö n ˈˈpiʋ̈ ꞊dhɛ nɔɔn˗ ˗së ˈa˗ pö ka ˗dhɛ ˈö ˈka ˗we ˗a ˗bha, ˈö ˈka ˗klu ˗sü ˈka ˗a ˗bha ꞊dedewo bhë, ˈa ka ˗zo ˗buö ˗a ˈka ˈzü. 2 Nɔɔn˗ ˗së ˈa˗ pö ka ˗dhɛ bhë ˈka ˈto ˗klu ˗sü ˈka ˗a ˗bha, kö ka dhasü ꞊slɔɔ ˗ni ˈgü ˈnën bhë ˗a ˈsaa˗ ˈgü. ˈYaa ˈˈdhʋ̈ kö ka ˗kë -zo ˗yö Yesu ˗dhɛ ˗mɛn ˗nu ˈka ˈˈwɛɛwɛ.

3 Pë ˗wɔn ˈˈgbɩɩ˗ ˗sü ˗nu ˈa ˗an ˗zɔn ka ˗dhɛ* bhë, ˗a ˈbhaa ˗nu ˈwo n ꞊klaŋ ˗kë ˗an ˈka* ˈpö ˈyö ˈwo ꞊nɛn: Klito ˗yö ˗ga kwa ˗bha ꞊sɔŋ yaa ˗wɔn ˈgü ꞊dhɛ ˗kɔ ˈö ˗bɛnzë ˗sü ˈka ˗a ˈka ˗Zlan ˗Wo ˈgü ˗a ˈdhö, 4 ˈö ˈwo˗ ˗wɛɛ bho, ˈö go ga ˈgü ˗dhɛkpaɔyi ˗yaaga ˗naan ˈka ꞊dhɛ ˗kɔ ˈö ˗Zlan ˗Wo ˗ya pö ˗a ˈka ˗a ˈdhö. 5 ˈDhɛ ˈö ˗kë ˈˈdhʋ̈, ˗yö ö ˗de ˗zɔn Sefasö* ˗dhɛ, ˈö go mü ˈö ö ˗de ˗zɔn mɛn ˗kɔŋ do ö ga ꞊plɛ ˈwo bhë ˗an ˗dhɛ. 6 ˗Yö ˗go mü ˈzü ˈö ö ˗de ˗zɔn kwa ꞊dhegblü ˗nu ˈwo ˗ʒiö këŋ ˈˈsoodhu (500) ˗ta, ˈö ˈwo kun wo ˈkwëëdhö ˗dhɛ do ˈgü ˗an ˗dhɛ. Mɛn ˗nu ˈwo ˈˈdhʋ̈, ˗a mɛn ˈbhaa ˗nu ˗wa ga,* ˈˈkɛɛ ˗a mɛn ꞊vadhɛ ˗wo ꞊kun kwa ˈˈpiʋ̈ ꞊dɛɛ. 7 ˈDhɛ ˈö go mü, ˗yö ö ˗de ˗zɔn ˈzü Zakö ˗dhɛ, ˈö go mü ˈö ö ˗de ˗zɔn bɔmɛn ˗nu ˗todhʋ̈sü ˗dhɛ. 8 ˗A ˈˈdhiʋ̈tadhɛ ˈgü, ˗yö ö ˗de ˗zɔn man ˗de ˈpö n ˗dhɛ. ˗A ˗wɔn ˈgü a ꞊dhɛ ˈnën ˈö ö bhɔ ˈˈtʋ̈ŋ to ˈˈdhiʋ̈ ˈö bhɔ ˗a ˈdhö.

9 ˗A ˗kë ˈˈdhʋ̈ ˗sü ˈgü, man ˈnën ˈa ˗tɔ bɔmɛn ˗nu bhë ˗a mɛn ˈˈtɩɩsü. N ˗dhɛ ˗sü ˈö bɔmɛn bhë, ˈyaa n ˗man ˈkun ˗ʒiaanwo, ˗a ˗gɛn ˗mü ꞊dhɛ a ˗zlanwokɔdhi ˈgümɛn ˗nu ˈˈklʋʋ ˗bhɔ. 10 ˈˈKɛɛ ˗Zlan ˗bha ˗gasitɛ ˈnën ˈö˗ ˈsaa˗ ˈgü ˈa mɛn ˈa˗ ˈka ꞊dɛɛ ˗a ˈka. ˗Gasitɛ ˈö˗ ˗kë n ˗dhɛ ˈˈdhʋ̈ bhë yö ˈti ˈto ˈˈwɛɛwɛ, ˗a ˗gɛn ˗mü ꞊dhɛ a yökë ˈgbɛ ꞊dedewo ˈa ˗ʒiö ˗a ˈka ˗an ꞊gban ˈˈpɛpɛ ˗ta. ˈˈKɛɛ ˗a yö ˈö ˈˈdhʋ̈ n ˈti˗ kë n ˗de ꞊faan ˈka, a˗ ˗kë ˗Zlan ˗bha ˗gasitɛ ˈö˗ ˗kë n ˗dhɛ bhë ˗a ˈsaa˗ ˈgü. 11 ˈˈKɛɛ ˗yö ˗kë n ˈka oo, ɛɛnˈˈ ˗yö ˗kë ˗an ˈka oo, ˗kɔ ˈö mɛn ꞊gban ˈyi ˗zlanwopö ˗a ˈka ˈö ˈka ka ˗zo yö ˗a ˗dhɛ ˈpö ˈyö bhë.

12 Kwa ˗zlanwopö ˈö ˈkwa˗ pö ꞊dhɛ Klito ˗ya ˈgo ga ˈgü. ˗Yö ˗kë mü ꞊dhɛ ˈsa ˈö mɛn ˈbhaa ˗nu ˈwo ka kpö ˈgü ˈmü ˈwo˗ pö ꞊dhɛ ˗go ga ˈgü ˗sü ˈyaa ˈdhö? 13 ˗Ya kë ꞊dhɛ ˗go ga ˈgü ˗sü ˈyaa ˈdhö ꞊dedewo, kö Klito yö ˈti ˈgo ga ˈgü. 14 ˗Ya kë ˈpö ꞊dhɛ Klito yö ˈti ˈgo ga ˈgü, kö ˗zlanwo ˈö ˈkwa˗ pö ˗ni ˈgü bhë, kwa˗ ˗pö ˈˈwɛɛwɛ ɛɛnˈˈ kö ˗zoyödhe ˈö ka ˗gɔ ˈpö bhë ˗a ˗gɛn ˈyaa ˈdhö. 15 ˗Ya kë ˈˈdhʋ̈ ˈpö kö ˈkwa kë ˗zlanwo ˗blɛɛ ꞊sua ˈka ˗mɛn ˗nu ˈka, ˗a ˗gɛn ˗mü ꞊dhɛ ˗ya kë ꞊dhɛ ˗go ga ˈgü ˗sü ˈyaa ˈdhö ꞊dedewo, kö ˗Zlan yö ˈti Klito bho ga ˈgü, kö ˗a pö ˈö ˈkwa˗ wo ˗ni ˈgü ˈpö ꞊dhɛ ˗Zlan ꞊yaa˗ bho ga ˈgü bhë, ꞊sua ˈnën ˈö ˈkwa˗ ˗kë ˗Zlan ˗bha. 16 ˗Ya kë ꞊dhɛ mɛn ˗nu ˈti ˗dho ˈgo ga ˈgü, kö Klito ˗de ˈpö yö ˈti ˈgo ga ˈgü. 17 ˗Ya kë ˈpö ꞊dhɛ Klito yö ˈti ˈgo ga ˈgü, kö ka ˗bha ˗zoyödhe ˗gɛn ˈyaa ˈdhö, kö ka ꞊kun ka ˗bha ꞊sɔŋ yaa ˈgü. 18 ˗Ya kë ˈˈdhʋ̈ ˈpö kö mɛn ˗nu ˈö waa Klito ˗nu ˗an ˗kɔ ˗yö to ˈkoo ˈö ˈwo ga bhë, ˗an ˈgü ˗ya shiʋ̈ˈˈ ˈpapadhö ˈnën ˈö bhë. 19 ˗Ya kë ꞊dhɛ ˗tosɛta ꞊suu ˈö bhë yö ˈnën ˈö˗ ˗wɔn ˈgü ˈkwa kwa ˗zo yö Klito ˗dhɛ, kö kwa ˈnën ˈö ˈkwa ˗tɔ ˗wëëmɛn ˗nu ꞊gban ˈˈpɛpɛ ˈˈdhiʋ̈todhɛ.

20 ˈˈKɛɛ Klito ˗yö ˗go ga ˈgü ꞊dedewo, ˈö ˗kë mɛn ˗nu ˈwo ˗dho ˈgo ga ˈgü ˗a mɛn ˗blɛɛsü ˈka.* 21 ˈDhɛ ˈö ˗kë ꞊dhɛ mɛn dosɛnŋ ˈnën ˈö ga ˗yö bɔ ˗a ˗ta ˈö ˗da ˈˈkpɔnŋ ꞊taa bhë, ˗go ga ˈgü ˗sü ˗yö ˗bɔ ˈpö mɛn do ˗ta ˈö nu ˈˈkpɔnŋ ꞊taa. 22 ˗Kɔ do ˈö pë ˈö Adan ˗ya ˗kë ˗a ˗wɔn ˈgü mɛn gban ˈˈpɛpɛ ˗wo ga bhë, ˗kɔ do ˈö bhë ˗a ˈka pë ˈö Klito ˗ya ˗kë ˗a ˗wɔn ˈgü mɛn ꞊gban ˗dho ˈgo ga ˈgü. 23 ˈˈKɛɛ mɛn ˈö ˈdhö ˗a ˗bha ˗go ga ˈgü ˈˈtʋ̈ŋ ˗yö ˗dhö. Klito ˈnën ˈö ˗tɔ ˗a mɛn ˗blɛɛsü ˈö dɔ ˈˈdhiʋ̈. ˗Ya ˈgo mü ˈyö yö mɛn ˗nu ˈwo Klito ˗bha ˈka ˗an ˗bha, ˗a nu ˗yi ˈka. 24 ˗A ˈˈdhiʋ̈tadhɛ ˈgü, ˗ya ö bo mɛnkɔɔnsü ˗nu, ˗wogbinŋdhɛ ˗nu waa ˈˈpiigbɩɩpë ˗nu ˗an ꞊gban ˈˈpɛpɛ ˈgüshiʋ̈ ˗sü ˈka, ˗yö ˗dho ˗Gblüdëdhɛ ˗lo ˗a ˗bha ˗Zlan ˈö˗ Dë ˈka bhë ˗a ꞊kwɛɛ˗. 25 ˈˈKɛɛ ˗a dua ˗mü ꞊köŋ kö ˗yö ˗gblüdëdhɛ kë kö ˗yö ˈto ˗a ˈka ˈˈdhʋ̈ ˗yö yö ˈˈtʋ̈ŋ ˈö ˗Zlan dho ö bo ö ˈyɔɔ˗ ˗nu ꞊gban ˈˈpɛpɛ ˗da ˗a ˗gɛn ꞊löö ˗sü ˈka bhë ˗a ˗bha. 26 ˗A ˈyɔɔ˗ ˗nu ˈwo ˈˈdhʋ̈, ˗a ˗totaabhasü ˈö ˗kë ga ˈka bhë, ˗yö ˗dho ˈgo ˈˈshia˗ ˈpapadhö. 27 ˈYö sü ꞊dhɛ pë ˈö ˗bɛnzë ˗sü ˈka ˈyö ˗tɔ: ˗Zlan ˗ya «pë ꞊gban ˈˈpɛpɛ ˗da ˗a ˗gɛn ꞊löö.» ˈˈKɛɛ ꞊waa˗ pö ˈˈdhʋ̈ kö wo ˈti˗ pö ꞊dhɛ ˗Zlan ˈö «pë ꞊gban ˈˈpɛpɛ ˗da ˗a ˗gɛn ꞊löö» bhë ˗yö ö ˗de ˗da ˈpö ˗a ˗gɛn ꞊löö. 28 ˈˈKɛɛ ˗Zlan ˗ya ö Gbö ˗ya pë ꞊gban ˈˈpɛpɛ ˗gɔ ˈˈdhiʋ̈ ꞊dhɛ ˗kɔ ˈö bhë ˗a ˈdhö, ˗a Gbö ˗de ˈpö ˗yö ˗dho ö ˗de ˈdho ˈˈshia˗ ö Dë ˈö pë ꞊gban ˈˈpɛpɛ ˗da ö ˗gɛn ꞊löö bhë ˗a ˗dhɛ, ˗yö kë ˈˈdhʋ̈ kö ˗Zlan ˗yö kë pë ꞊gban ˈˈpɛpɛ ˗gɔ ˈˈdhiʋ̈.

29 ˈYaa ˈˈdhʋ̈ ˗be kö mɛn ˗nu ˈwo bɔ ˗ni ˈgü ˈˈyi ꞊bhaa kö ˗wo kë ga ˗mɛn ˗nu ˈka bhë, ˗a ꞊trɔɔn ˗dho kë ˗an ˗gɔ ˗mën ˈka? ˗Ya kë ꞊dhɛ ˗go ga ˈgü ˗sü ˈyaa ˈdhö ˗be, kö ˗an ˗bha ˗bɔ ˈˈyi ꞊bhaa ˗sü ˗gɛn ˈnën ˈö ˗tɔ ˗mën? 30 ˈYaa ˈˈdhʋ̈ ˈpö ˗be, kö kwa kwa ˗de ˗dɔ ga ˗yɛ ˈˈdhiʋ̈ ˗kplawo ˗mën ˗wɔn ˈgü? 31 ˗Dhɛkpaɔyi ˈˈpɛpɛ ˈka, a ˗bɔ ga ˗yɛ ˈˈdhiʋ̈. N ꞊dhegblü ˗nu, ka˗ ˈwɔn ˗dɔ ˈkpakpadhö ꞊dhɛ a ˈˈgɔɔgɔ ka ˗bha ˗kë kwa Dëmɛn Yesu Klito* ˗bha ˈka ˗sü ˗wɔn ˈgü. ˗Kɔ do ˈö bhë ˗a ˈka, ˗kaa ˈwɔn dɔ ꞊dhɛ pë ˈa˗ pö bhë ˈyaa ꞊sua ˈka. 32 A ˈko ˗zë wü ˈˈdhiʋ̈˗ ˗nu ˈka Efɛzö. ˗Ya kë ꞊dhɛ ˗a ˈko ˈö ˈˈdhʋ̈, ˗a zë ˗gɛn ˗yö ꞊dhɛ mɛn ˈˈwɛɛ ˗nu ˈwo to ˗an ˗bha ˈdhö, ˗a ꞊trɔɔn ˗dho kë n ˗gɔ ˗mën ˈka? ˗Ya kë ꞊dhɛ mɛn ˗nu ˈö ˗wa ga wo ˈti ˗dho ˈgo ga ˈgü, kö «˗kwa pë ˗bhö ˈkwa pë mü, ˗a ˗gɛn ˗mü ꞊dhɛ dhiʋ̈ˈˈ kwa ˗dho ga.» 33 ˈKaa ˗dho ka ꞊kwaa ka ˗de ˗zü ˈö ˈwo ˈˈkpënŋ˗ ˗kë ka ˗gɔ. ˗Nënŋ mɛn yaa ˗nu ˗bha ˗sü ˗yö mɛn ˈˈtakɔ ˗shiʋ̈. 34 ˗Ka ˗buö ˈka ˈgo yi ˈgü ˈwɔn ˗së kë ˗sü ˈka, ˈkaa ˗dho ˈwɔn yaa kë. ˗A ˗gɛn ˗mü ꞊dhɛ ka kpö ˈgü, mɛn ˈbhaa ˗nu ˈwaa -Zlan dɔ. A˗ ˗blɛɛ ˈˈdhʋ̈ kö ˗a ˈlëë˗ ˗yö ka kë.

35 ˈˈKɛɛ mɛn ˈbhaa ꞊mɔɔn˗ ˗bha ˈö˗ pö: «Mɛn ˗nu ˈö ˗wa ga, ˗an ˗bha ˗go ga ˈgü ˗sü ˗dho kë ˗kɔ ˗kë ꞊dhɛ? Bun ˗mɛɛn ˈö ˈwo ˗dho ˈgo ˗a ˈka ga ˈgü?» 36 ˗Gɔ ˈgü ˈˈfuöö ˗mɛn! ˈBhaa˗ ˈwɔn dɔ ꞊dhɛ ˈbha pëga ta, ˗yö ˗ga ꞊köŋ ˗blɛɛsü ˈyö ꞊kun bhɔ* ˗ee? 37 ˈBha˗ pö ˈü pë ta, ˗yö ˗kë ˈble˗ ɛɛnˈˈ pëga ꞊suu ˈˈoo ˗su ˈka, ˗a ˗dhü* ˈö ˗ya ˈˈgla ˈsaadhö ˈyaa ˈnën ˈü˗ ˗da ˈˈsɛɛdhö, ˗a ga ˈnën ˈü˗ ˗da ˈˈsɛɛdhö. 38 ˈˈKɛɛ ˈyö ˗Zlan ˗ya kë ˈö ˗gla ˈö ˗kë ꞊dhɛ ˗kɔ ˈö ˗dhi ˗a ˗dhɛ ˗a ˈdhö, ˈyö˗ ga ˈdhɛ ˈö ˈdhö ˗a ˗de ˗dhü ˗yö ˗kë ˗dhö. 39 ˈˈTëpë ꞊gban ˈˈpɛpɛ bun ˈyaa do. Mɛnbhɩɩdhe ˗nu bun ˗yö ˗dhö, wü ˗nu bun ˗yö ˗dhö, ˗mannën ˗nu bun ˗yö ˗dhö, ˈö ˈyuö˗ ˗nu bun ˈdhö ˗dhö. 40 Bun ˈdhɛ ˈö dhaŋ˗ ˈgü ˗bun ˈka ˗yö ˗dhö, ˈö ˈˈsɛtadhɛ ˗bha ˈdhö ˗dhö. ˈˈKɛɛ bun ˗nu ˈdhɛ ˈwo dhaŋgüdhɛ ˗bha ˈka waa bun ˗nu ˈdhɛ ˈwo ˈˈsɛtadhɛ ˗bha ˈka, ˗an ˗bha ˗sëdhɛ* ˈyaa do. 41 ˈƝaan˗ ˗bha ˗sëdhɛ ˗yö ö ˗de ˗ta, ˈö ˗gbɔdë ˗bha ˗sëdhɛ ˈdhö ö ˗de ˗ta, ˈö ˈˈsusënŋga ˗nu ˗bha ˗sëdhɛ ˈdhö ö ˗de ˗ta. ˗A ˈˈsusënŋga ˗nu ˗de ˈwo bhë, ˗a ˈdhɛ ˈö ˈdhö ˗a ˗bha ˗sëdhɛ ˗yö ö ˗de ˗ta.

42 ˗Kɔ do ˈö bhë ˈyö mɛn ˗nu ˈö ˗wa ga ˗an ˗bha ˗go ga ˈgü ˗sü ˈdhö˗ ˈka. Bun ˈdhɛ ˈwo˗ ˗da ˈˈsɛɛdhö bhë, shiʋ̈ˈˈ ˗pë* ˗mü. ˈˈKɛɛ ˗wo ˗go ga ˈgü bun ˈö ˈyaa* shiʋ̈ˈˈ ˗a ˈka. 43 ˗A ˗da ˈˈsɛɛdhö ˈˈtʋ̈ŋ ˈka, kö ꞊bhlëë ˈyaa˗ ˗bha. ˈˈKɛɛ ˗a ˗go ga ˈgü ˈˈtʋ̈ŋ ˈka, kö ˗ya kë ꞊bhlëësü. ˗A ˗da ˈˈsɛɛdhö ˈˈtʋ̈ŋ ˈka, kö ˈˈse ˈyaa˗ ˗dhɛ. ˈˈKɛɛ ˗ya ˈgo ga ˈgü kö ˗a ˈˈpii ˗ya kë ˈˈgbɩɩ˗. 44 Mɛnbhɩɩdhe ˗bun ˈnën ˈwo˗ ˗da ˈˈsɛɛdhö, ˈˈkɛɛ ˗a ˗go ga ˈgü ˈˈtʋ̈ŋ ˈka kö ˗ya kë ˗zuu ˈka. Mɛnbhɩɩdhe ˗bun ˗ya kë ˗dhö, kö bun ˈdhɛ ˈö ˗zuu ˈka ˈpö ˗yö ˗dhö. 45 Pë ˈö ˗bɛnzë ˗sü ˈka ˈyö ˗tɔ: «Gɔɔn˗ ˗blɛɛsü ˈö ˗kë Adan ˈka bhë, ˗yö ˗kë mɛn* ˈˈbhɩɩ˗ ˈka.» ˈYö Adan ˗totaabhasü ˗yö ˗kë ˗zuu ˈö ˗këdhösü nu mɛn ˗dhɛ ˗a ˈka. 46 ˈˈKɛɛ bun ˈdhɛ ˈö ˗zuu ˈka ˈyaa ˈnën ˈö nu ˗blɛɛsü. Mɛnbhɩɩdhe ˗bun ˈnën ˈö nu ˗blɛɛsü, ˈyö bun ˈdhɛ ˈö ˗zuu ˈka ˈö ꞊kun nu. 47 Gɔɔn˗ ˗blɛɛsü ˗yö ˗go ˈˈsɛ ˗ta yö, ˈö ˈwo˗ ˗yökë ˈˈsɛ ˗bi ˈka. ˈˈKɛɛ gɔɔn˗ ꞊plɛ ˗naan ˗zë ˗yö ˗go dhaŋ˗ ˈgü. 48 ˗Kɔ do ˈö mɛn ˈwo˗ ˗yökë ˈˈsɛ ˗bi ˈka bhë ˈö˗ ˈka, ˈyö mɛn ˈˈpɛpɛ ˈwo ˗an ˗yökë ˈˈsɛ ˗bi ˈka ˈwo˗ ˈka ˈpö. ˈYö ˗kɔ do ˈö mɛn ˈö go dhaŋ˗ ˈgü ˈö˗ ˈka bhë, ˈyö mɛn ˈˈpɛpɛ ˈwo dhaŋ˗ ˈgü ˗mɛn ˈka ˈwo˗ ˈka ˈpö. 49 ˗Kɔ do ˈö mɛn ˈwo˗ ˗yökë ˈˈsɛ ˗bi ˈka, ˈkwa˗ ˗bhɔ ˗a ˗bha ˈka bhë, ˗kɔ do ˈö bhë ˗a ˈka, kwa ˗dho kë ˈpö mɛn ˈö go dhaŋ˗ ˈgü ˗a ˗bhɔ ˗a ˗bha ˈka.

50 ˈˈKɛɛ n ꞊dhegblü ˗nu, a˗ ˗pö ka ˗dhɛ ꞊dhɛ mɛnbhɩɩdhe ˗bun ˈö ˗kë ꞊nënŋ waa ꞊ɲɔɔn ˗an ˈka bhë, ˈyaa ꞊mɔɔn˗ ˗bha kö ˗yö ˗da ˗Zlan ˗bha ˗Gblüdëdhɛ ˈgü. Ɛɛnˈˈ pë ˈö ˈyaa shiʋ̈ˈˈ ˗pë ˈka, ˈyaa ꞊mɔɔn˗ ˗bha kö ˗yö ˈto pë ˈö shiʋ̈ˈˈ ˗pë ˈka ˗a ˗gɔ ˈkɛnŋpë ˈka. 51 ˗Ka ˗dhɛ ˗ga! ˗Zlan ˗bha ˈwɔn do ˈbhaa ˈö ˗bin ˗sü ˈka, ˈa ˗dho ˈˈdhɛ bho ˗a ˗ta ˈyö ꞊nɛn: Mɛn ˈö ˈkwa bhë, mɛn ꞊gban ˈyaa ˈnën ˈwo ˗dho yi zë ga ˈgü. ˈˈKɛɛ mɛn ꞊gban kwa ˗dho ˈˈgla ˈgü 52 ˈzozodhö ˗wɔn ˈka ꞊dhɛ mɛn ö ˈˈɲan zë, ˈˈtruu ˗totaabhasü ˈˈwɩ ˈˈtʋ̈ŋ ˈka. ˗A ˗gɛn ˗mü ꞊dhɛ ˈˈtruu ˗dho ˈˈwɩ, ˈö mɛn ˗nu ˈö ˗wa ga ˈwo go ga ˈgü bun ˈö ˈyaa shiʋ̈ˈˈ bhë ˗a ˈka, ˈö ˈkwa ˗gla ˈgü ˈpö. 53 ˗A ˗kë ˈˈdhʋ̈ ˗sü ˈgü, pë ˈö shiʋ̈ˈˈ ˗pë ˈka ˗a dua ˗mü kö ˗yö kë pë ˈö ˈyaa shiʋ̈ˈˈ ˗a ˈka, kö pë ˈö ga ˗pë ˈka ˗yö kë pë ˈö ˈyaa ga ˗a ˈka. 54 Pë ˈö shiʋ̈ˈˈ ˗pë ˈka, ˗ya ö bo kë ˗sü ˈka pë ˈö ˈyaa shiʋ̈ˈˈ ˗a ˈka, ˈö pë ˈö ga ˗pë ˈka ˈpö ˗ya kë pë ˈö ˈyaa ga ˗a ˈka, ˈyö pë ˈö ˗bɛnzë ˗sü ˈka ˗Zlan ˗Wo ˈgü ˈö ˗dho yö ˈko ˈˈdhiʋ̈. ˗Ya ˗pö: «Ga ˗ya ˈgo ˈˈshia˗ ˗toëpö ˈka.» 55 «Ga, ü ˗bha ˈˈgbɩɩdhɛ ˗yö ˈˈmɛn? Ü weŋ ˈˈdhiʋ̈˗ ˈü kun ˗a ˗gban ˗ni ˈgü mɛn ˗nu ˗bha bhë ˗yö ˈˈmɛn?» 56 ˗A weŋ ˈˈdhiʋ̈˗ ˈö mɛn zë bhë, yö ˈnën ˈö ˗tɔ ꞊sɔŋ yaa. ˈYö pë ˈö˗ ˗kë ˈö ꞊faan ˗yö ˗kë ꞊sɔŋ yaa ˗bha ˈyö ˗tɔ ˈTɔŋ˗.* 57 ˈˈKɛɛ kwa ˗Zlan ˈˈnuɛ ˗bho, ˗a ˗gɛn ˗mü ꞊dhɛ yö ˈnën ˈö˗ ˗kë ˈö ˈkwa bɔ kwa Dëmɛn Yesu Klito ˗ta ˈö ˈkwa to ˗a ˈˈgbɩɩ˗ ˈka!

58 ˈDhɛ ˈö ˈdhʋ̈ n ꞊dhegblü dhɔɔbhaasü ˗nu, ˗ka dɔ gɛnŋdhö, pë ˈbhaa ˈyaa ˗dho ka bho ʒiaan ˗ta. Ka ˗kɔ ˗yö kë Dëmɛn ˗bha yö ˈgü ˗kplawo ka ꞊faan ˈka. ˗Yö kë ka ˈˈɲaan ꞊dhɛ yö ˈö ˈka˗ kë ˗ni ˈgü Dëmɛn ˗dhɛ bhë, yö ˈˈfuöö ˈyaa ˗mü.