ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

16 ˗A ˈdhɛ ˈö ˗gban pë bho ˗sü ˗bha kö ˈka˗ bɔ ˗Zlan ˗bha mɛn ˈˈslʋ̈ʋ̈slʋ̈ ˗nu ˗dhɛ bhë, ˗ka ˈto ˗dhioo ˗nu ˈa ˗an dɔ ˗zlanwokɔdhi ˗nu ˈwo Galatö ˗sɛ ˈgü ˗an ˗ta bhë ˗an ˈˈpiʋ̈. 2 ˈˈDhoogɔ ˈˈpɛpɛ ˗dhɛkpaɔyi ˗blɛɛsü* ˈka, mɛn ˈö ˈdhö ˗yö pë ˈdhɛ ˈö ꞊slɔɔ ˗a ˗gɔ ˗a ˗ya ö ˗kɔ ˈˈsuee, ˗yö kë ˈˈdhʋ̈ kö ˈka ˗dho ˈka ˈˈɲan ˈto n nu ˗yi ˗gɔ kö ˈka ꞊kun pë bho. 3 ˗Ya kë ˈˈdhʋ̈, ˈyö ˈman ˗lo ˈmü, ˈa mɛn ˗nu ˈö ˈka˗ pö ka ˗bha ˈsëëdhɛ ˗nu ˈgü ꞊dhɛ ka ˈdhaŋ˗ ˗bho ˗an ˈˈdhiʋ̈ bhë, ˗an bɔ kö ˗wo ˈdho ka ˗bha gbɔɔdhe ˗nu ˈö ˈka ˗an ˗kë zuʋ̈sëdhɛ ˈka bhë ˗an ˈka Zedhizadhɛmö. 4 ˈˈKɛɛ ˗ya kë ꞊dhɛ ˗yö ˗dho kë ˗së kö man ˗de ˈpö ˈa ˈdho, ˗wo ˗dho kpa n ˗bha ˈö yaa˗ ˗nu ˈyi dho.

5 ˈˈKɛɛ ˈman bɔ Maseduanö ˗sɛ ˈgü ˈyö ˈa ꞊kun nu ka ˈˈpiʋ̈ ˈmü. ˗A ˗gɛn ˗mü ꞊dhɛ ˗yö n ˈˈpiʋ̈ ꞊dedewo ˈa bɔ Maseduanö. 6 ˗A ˈbhaa ˗ya kë a ˗dho ˈˈtʋ̈ŋ ˈnën ˈbhaa kë ka ˈˈpiʋ̈ ˈmü. ˗Ya ˈto ˗a ˗bha ˗ʒiaanwo, a ˗dho ˈˈnɛnnɛn ˈˈtʋ̈ŋ kë ka ˈˈpiʋ̈ ˈmü, ˗yö kë ˈˈdhʋ̈ kö ˗dhɛ ˈˈoo ˗dhɛ ˈa ˗dho ˈdho ˗a ˗bha, ˈka n dɔ ʒiaan˗. 7 ˈYaa n ˈˈpiʋ̈ ꞊dhɛ ˈa nu ˈa ˗kpan ka ˗bha ˈˈtʋ̈ŋ ˈö yö ˗a ˈgü kö ˈa ˈto mü ˗a ʒiö. ˗A ˗gɛn ˗mü ꞊dhɛ a˗ ˈˈpiʋ̈ kö Zoova ˗ya ˈˈwɩ ˗a ˗bha ˈa ˈˈtʋ̈ŋ ˈnën ˈbhaa kë ka ˈˈpiʋ̈ ˈmü. 8 ˈˈKɛɛ a ˗dho ˈto ꞊köŋ Efɛzö ˈö dho ˈö yö ˗a ˈka Pantekɔtö ˈwlaan˗ ˈˈtʋ̈ŋ ˗bha, 9 ˗a ˗gɛn ˗mü ꞊dhɛ Dëmɛn ˗bha yö ˈˈkwee ˈˈgbɛɛ ˗ya ˈˈpʋ n ˗gɔ. ˈˈKɛɛ mɛn ꞊va ꞊dede ˗wo ˗gban ˗ni ˈgü n ˗gɔ.

10 Timote ˗ya ˗lo ˈmü, ˗ka pë ꞊gban ˈˈpɛpɛ kë kö ˈˈtʋ̈ŋ ˈö ˗dho ˗a kë ka ˈˈpiʋ̈ ˈmü bhë pë ˈˈoo ˗pë ˈˈsuʋ̈ ˈyaa ˗dho ˗a kë, ˗a ˗gɛn ˗mü ꞊dhɛ Zoova ˗bha yökëmɛn ˗mü ˗a ˈka ˈpö ꞊dhɛ n ˈdhö. 11 ˈDhɛ ˈö ˈˈdhʋ̈, mɛn ˈbhaa dua ˈyaa ˗mü kö ˗ya ꞊bhlëë ˗shiö. ˗Ka pë ꞊gban ˈˈpɛpɛ kë kö ˗a ˗së ˗yö nu ˗yö ˗lo n ˗dhɛ, ˗a ˗gɛn ˗mü ꞊dhɛ yaa kwa ꞊dhegblü ˗nu yi ˈˈɲan ˗ya ˗gɔ.*

12 Apodhɔsö ˗de ˈpö a ˗gban ˗a ˗bha ꞊dedewo kö waa kwa ꞊dhegblü ˗nu ˗wo nu ka ˈˈpiʋ̈ ˈmü. ˗Nu ˈmü ˗sü ˈö ˈˈtʋ̈ŋ ˈö yö ˗a ˈgü ˈyaa kun ˗a ˗zo ˈˈpiʋ̈ ˗be, ˈˈkɛɛ ˗a ˈˈtʋ̈ŋ ˗së ˗ya ˗lo ˗yö ˗dho nu.

13 ˗Ka ˗ya ka ˈˈɲaan, ˈka ka ˗bha ˗zoyödhe ˈkun ˈˈgbɩɩ˗. ˗Ka kë ˗zogbinŋmɛn ˗nu* ˈka, ka ˈgü ˗yö kë ˈˈgbɩɩ˗ ˗kplawo. 14 ˈWɔn ꞊gban ˈˈpɛpɛ ˈö ˈka ˗dho ˗a kë, ˗kaa kë ˗dhɔ ˈgü.

15 N ꞊dhegblü ˗nu, ˈwɔn do ˈa ka ꞊faanmën ˗a kë ˗sü ˗bha ˈyö ꞊nɛn: Ka˗ ˈwɔn ˗dɔ ꞊dhɛ Sefanasö waa ö ˗bha ˈkɔɔmɛn ˗nu ˈnën ˈwo ˗kë Yesu ˗bha gwëëˈˈ ˗blɛɛsü* ˗nu ˈka Akai ˗sɛ ˈgü, ˈö ˈwo ˗Zlan ˗bha mɛn ˈˈslʋ̈ʋ̈slʋ̈ ˗nu ˗takun ꞊dedewo wo zuʋ̈ˈˈ ꞊gban ˈka. 16 ˈDhɛ ˈö ˈˈdhʋ̈, ka ˗de ˈpö ˗ka ꞊bhlëë ˗ya mɛn ꞊suu ˗nu ˈwo bhë waa mɛn ˈˈpɛpɛ ˈö waa˗ ˗nu ˈwo yö ˈˈgbɩɩ˗ kë ˗ni ˈgü wo ˈkwëë˗ bhë ˗an ˗bha ˗kplawo. 17 N zuʋ̈ˈˈ ˈˈgblü ˗yö dhi ˗sü ˈka ꞊dedewo Sefanasö, Fɔɔtunatusö waa Akaikusö ˗an ˗bha ˗nu n ˈˈpiʋ̈ ˈyö ˗sü ˗wɔn ˈgü, ˗a ˗gɛn ˗mü ꞊dhɛ ˗wo n ˗takun ꞊dedewo ˈö n ˗zo ˗yö bhɔ ꞊dhɛ ˈkaa n ˈˈpiʋ̈ ˈyö. 18 ˗Wo n ꞊faanmën, ˈö ˈwo ka ꞊faanmën ˈpö. ˈDhɛ ˈö ˈˈdhʋ̈, mɛn ꞊suu ˗nu ˈwo bhë ˗ka ˗an ꞊bhlëë dɔ.

19 ˗Zlanwokɔdhi ˗nu ˈwo Azi ˗sɛ ˈgü ˗wa ka ꞊tuaabho. Akidhasö waa Plisüka, waa ˗zlanwokɔdhi ˈö ˗bhɔkwëë ˗kë ˗an ˗gɔ ˈkɔɔ bhë ˗a ˈgümɛn ˗nu ˗wa ka ꞊tuaabho ˈˈwowosü ˈka Dëmɛn ˈtɔ ˈgü. 20 Kwa ꞊dhegblü ˗nu ˈˈpɛpɛ ˗wa ka ꞊tuaabho. ˗Ka ka ˈko ˗nu ꞊tuaabho ˈpö ˈˈwowosü ˈka.*

21 ꞊Tuaabho ˗wo ˈdhɛ ˈö yö, maan Pɔdhö ˗mɛn man ꞊dede ˈnën ˈa˗ ˗bɛnzë.

22 Mɛn ˈˈoo ˗mɛn ˈö Dëmɛn ˗dhɔ ˈyaa˗ kë, ˈˈdhaŋ ˗ya ˈkun. Yi Dëmɛn ˗bhö dɔ ˈˈgbɩɩ˗ ˈü nu! 23 Kö kwa Dëmɛn Yesu ˗yö ö ˗bha ˗gasitɛ kë ka ˗dhɛ bhë, ˈaa ˗yö kë! 24 Mɛn ꞊gban ˈˈpɛpɛ ˈö ˈka ˗kë Dëmɛn Yesu Klito ˗bha gwëëˈˈ ˗nu ˈka, ˗kaa ˈwɔn dɔ ꞊dhɛ ka ˗dhɔ ˗yö n ˗kë ꞊dedewo.