ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

12 N ꞊dhegblü ˗nu, ˈwɔn ˈdhɛ ˈö ˗gban ˗kɔmɔnwɔnbhasü ˈö ˗Zlan ˗ya nu mɛn ˗dhɛ* ˗a ˗bha bhë, a˗ ˈˈpiʋ̈ kö ˈka˗ ˈgüman ˗së ˈka. 2 Ka ꞊dede ka˗ ˈwɔn ˗dɔ ꞊dhɛ ˈdhɛ ˈka kun ˈˈsɛ ˈˈwɛɛ ˈgümɛn ˗nu ˈka,* mɛn ˗nu ˗wo ka zuʋ̈ˈˈ ˗sü ˈö ˈwo dho ka ˈka gbapë ˗nu ˈö ˈwaa ˈˈwɩ ˗an ˈˈpiʋ̈, ˈö ˗dhɛ ˈˈoo ˗dhɛ ˈwo dho ka ˈka ˗a ˗bha ˈka ˗ʒiö ˗an ꞊kee˗. 3 ˈˈKɛɛ ˈˈtʋ̈ŋ ˈö yö ˗a ˈgü, ˗yö n ˈˈpiʋ̈ kö ˈka˗ ˈwɔn dɔ ꞊dhɛ mɛn ˈö ˗Zlan ˗bha ˗zuu ˈdhö˗ ˗ta ˈyaa˗ pö: «ˈˈDhaŋ ˗yö Yesu ˗bha!» Mɛn ˈö ˗zuu ˈˈslʋ̈ʋ̈slʋ̈ ˈyaa˗ ˗ta ˈpö ˈyaa ꞊mɔɔn˗ ˗bha ˗ya pö: «Yesu ˈnën ˗tɔ Dëmɛn!»

4 ˗Kɔmɔnwɔnbhasü ˈö ˗Zlan ˗ya nu mɛn ˗dhɛ ˗a ˗gɔa ˗yö ꞊va, ˈˈkɛɛ ˗zuu ˈö bɔ ˗a ˗ta ˈö˗ nu mɛn ˗dhɛ ˗yö do. 5 ˗Zlan ˗bha yö ˗gɔa ˗yö ꞊va, ˈˈkɛɛ kwa Dëmɛn ˗yö dosɛnŋ. 6 ˗Kɔ ˈö ˗Zlan ˗yö bɔ ˗a ˈka mɛn ˗ta ˈö ˈwɔn ˗nu ˗kë ˗a ˗gɔa ˗yö ꞊va, ˈˈkɛɛ ˗a ˗Zlan ˈö ˈˈdhʋ̈ ˗yö dosɛnŋ. 7 Pë ˈö ˗zuu ˈˈslʋ̈ʋ̈slʋ̈ ˗yö mɛn ˈö ˈdhö ˗a ˗takun ˈö˗ ˗kɔ ˗yö ˗mɔn ˗a kë ˗sü ˗bha, mɛn ꞊gban ˈˈɲan ˗ya ˗yö. ˗Zlan ˗yö ö ˗bha ˗zuu ˗nu ˗an ˗dhɛ ˈˈdhʋ̈ kö ˗a ˈgüwɔn ˗së ˗yö kë mɛn ꞊gban ˗dhɛ. 8 ˗Zuu ˈˈslʋ̈ʋ̈slʋ̈ ˈsaa˗ ˈgü mɛn ˈbhaa ˗nu ˗wo ˈwɔn ˗blɛɛ ꞊kpɔɔdhɛ ˈka, ˈö ˗zuu ˈˈslʋ̈ʋ̈slʋ̈ do ˈö bhë ˈö˗ ˗kë ˈpö ˈö mɛn ˈbhaa ˗nu ˗wo ˈwɔn ˈö mɛn ˈˈwɛɛ ˗nu ˈwaa˗ dɔ ˗a ꞊blɛɛ. 9 ˗Zuu ˈˈslʋ̈ʋ̈slʋ̈ do ˈö bhë ˈzü ˗yö mɛn ˈbhaa ˗nu ˗takun ˈö ˗zoyödhe ˗yö ˗kë ˗an ˗gɔ, ˈö yö do bhë ˈö ˈˈyua ˗bho mɛn ˗nu ˗bha ˗sü gbɔɔdhe ˗kë ˈpö mɛn ˈbhaa ˗nu ˗gɔ. 10 ˗Ya ˗kë ˈzü ˈö mɛn ˈbhaa ˗nu ˗wo ˈwɔn ˈˈmlünmlünsü ˗nu ˗kë, ˈö mɛn ˈbhaa ˗nu ˗wo ˗Zlan ˗wo ˈˈdhiʋ̈ ˗lo, ˈö mɛn ˈbhaa ˗nu ˗de ˈpö ˈwo ˗wo ˈdhɛ ˈö go ˗Zlan ˈˈpiʋ̈ ˗a ˗bhokoo dɔ. ˗Ya ˗kë ˈpö ˈö mɛn ˈbhaa ˗nu ˗wo ˈwɔn ꞊blɛɛ ˗wo ˈˈwɛɛ ˗nu ˈgü, ˈö mɛn ˈbhaa ˗nu ˗wo mɛn ˗nu ˈwo ˈwɔn ꞊blɛɛ ˗wo ˈˈwɛɛ ˗nu ˈgü ˗an ˗wo ˈˈdhiʋ̈ ˗lo. 11 ˈWɔn ˈˈpɛpɛ ˈwo bhë, ˗zuu ˈˈslʋ̈ʋ̈slʋ̈ do ˈö bhë, yö ˈnën ˈö˗ kë ˗sü gbɔɔdhe ˗kë mɛn ˈö ˈdhö ˗a ˗gɔ ꞊dhɛ ˗kɔ ˈö ˗dhi ˗a ˈka ˗a ˗dhɛ ˗a ˈdhö.

12 ˗Kɔ do ˈö mɛn ˗dhü do dɔɔ˗ ˗nu ˈdhö˗ ˗bha ꞊va, ˈˈkɛɛ ˈö˗ dɔɔ˗ ˗nu ˈwo ˈˈdhʋ̈ ˗an ˗dhokwëësü ˗yö ˗kë mɛn ˗dhü do ˈka bhë, ˗kɔ ˈö bhë ˈyö Klito ˈdhö˗ ˈka. 13 ˈDhɛ ˈö ˈˈdhʋ̈, kwa ˗kë Zuifö ɛɛnˈˈ Glɛkö ˈka, kwa ˗kë ꞊dhuëŋ ɛɛnˈˈ mɛn ˈö ˈyaa ˈˈgan ˈgü ˗a ˈka, ˗zuu ˈˈslʋ̈ʋ̈slʋ̈ do ˈö bhë yö ˈnën ˈö˗ ˈsaa˗ ˈgü ˈö ˈkwa bɔ ˈˈyi ꞊bhaa, ˈö mɛn ꞊gban ˈˈpɛpɛ ˈkwa ˗kë mɛn ˗dhü do ˈka. ˗Zuu ˈˈslʋ̈ʋ̈slʋ̈ do ˈö bhë, yö ˈnën ˈö mɛn ꞊gban ˈkwa˗ ꞊slɔɔ.*

14 Mɛn dɔɔ˗ ˈö mɛn ˗dhü ˗bha ˈyaa do, ˗yö ꞊va. 15 ˗Ya kë ꞊dhɛ mɛn ˗gɛndhɛ ꞊yaa˗ pö: «ˈDhɛ ˈö ˗kë ꞊dhɛ ˈmaan ˗kɔdhɛ ˈka bhë, ˈmaan mɛn bun ˈˈpian ˈbhaa ˈka,» kö ˈyaa˗ ˈka ꞊dedewo ˗ee? 16 ˗Ya kë ꞊dhɛ mɛn ˈˈtʋ ꞊yaa˗ pö: «ˈDhɛ ˈö ˗kë ꞊dhɛ ˈmaan mɛn ˈˈɲanga ˈka bhë, kö ˈmaan mɛn bun ˈˈpian ˈbhaa ˈka,» kö ˈyaa˗ ˈka ꞊dedewo ˈnën ˈö bhë ˗ee? 17 ˗Ya kë ꞊dhɛ mɛn bun ˗todhʋ̈sü ˗yö mɛn ˈˈɲanga ˈka ˗be, mɛn ˗dho ˈwɔn man ˗kɔ ˗kë ꞊dhɛ? ˗Ya kë ˈpö ꞊dhɛ mɛn ˗dhü ˗todhʋ̈sü ˗yö ˗kë mɛn ˈˈtʋ ˈka ˗be, mɛn ˗dho pë ꞊fii man ˗kɔ ˗kë ꞊dhɛ? 18 ˗Zlan ˗yö mɛn dɔɔ˗ ˈdhɛ ˈö ˈdhö ˗a ˗ya mɛn ˗dhü ˗bha, ˗a ˗yadhɛ ˈö ˗dhi ˗a ˗dhɛ ˗a ˈgü.

19 Mɛn dɔɔ˗ ꞊gban ˈˈpɛpɛ ˗wo ˗kë do ˗be, mɛn ˗dhü ˗dho kë ˗dhö ˗ee? 20 Mɛn dɔɔ˗ ˗nu ˈwo˗ ˗bha ˗wo ꞊va ˈˈdhʋ̈, ˈˈkɛɛ mɛn ˗dhü ˗yö do. 21 Mɛn ˈˈɲanga ˈyaa ꞊mɔɔn˗ ˗bha kö ˗ya pö mɛn ˗kɔ ˗dhɛ: «N ˗bhawɔn ˈyaa ü ˗bha,» ɛɛnˈˈ mɛn ˗gɔ ˈyaa ꞊mɔɔn˗ ˗bha kö ˗ya pö mɛn ˗gɛn ˗nu ˗dhɛ: «N ˗bhawɔn ˈyaa ka ˗bha.» 22 Mɛn dɔɔ˗ ˗nu ˈö ˈwo mɛn ˈgü ˗bhaasü ꞊ʒiaan bhë, ˗an ˗wɔn ˗yö ˈˈgbɩɩ˗. 23 Kwa bun ˈˈpian ˗nu ˈö kwa ˗bha ˈgü ˗an ˗wɔn ˈyaa ˈˈgbɩɩ˗ bhë, wo ˈnën ˈö ˈkwa ꞊bhlëë ˗ya ˗an ˗bha ˈgbɛ. Yö ˈnën ˈö˗ ˗wɔn ˈgü, ˈö˗ ˗dhɛ ˗nu ˈö ˈkwaa˗ ˈˈpiʋ̈ kö mɛn ˗nu ˗wo ˗an yö bhë ˈö ˈkwa ꞊baa ˗an ˗bha ˗së ˈka, 24 ˈˈkɛɛ kö ˗a ˗dhɛ ˗nu ˈö mɛn ˗nu ˈˈɲan ˗yö bɔ ˗an ˗ta ˈgbɛ bhë, ˗an ˗bhawɔn ˈyaa pë ˈbhaa ˗bha. ˗Zlan ˗yö mɛn bun ˗yö ˗kë ꞊dhɛ ˗kɔ ˈö bhë ˗a ˈdhö, ˈö ꞊bhlëë ˗ya mɛn dɔɔ˗ ˗nu ˈö ꞊bhlëë ˈyaa kun ˗an ˗bha bhë ˗an ˗bha. 25 ˗Yö ˗kë ˈˈdhʋ̈ kö mɛn ˗dhü ˈyaa ˗dho kë ˈˈpɛ ˗sü ˈka ö ˈgü, ˈˈkɛɛ kö ˗a dɔɔ˗ ˗nu ˈwo˗ ˗bha ˗wo ˗ya wo ˈko ˗nu ˗wɔn ꞊zɔnŋ ˗ta. 26 Pë ˈˈdhiʋ̈˗ ˗ya kë mɛn dɔɔ˗ do ˗bha, mɛn dɔɔ˗ ˈˈpɛpɛ ˈwo to ˗wo saanˈˈ ˗sü ˈpö. Kö ˗wo ꞊bhlëë ˗ya dɔɔ˗ do ˗bha, mɛn dɔɔ˗ ˈˈpɛpɛ ˈwo to ˗an zuʋ̈ˈˈ ꞊nii ˗yö ˗da ˗a ˗wɔn ˈgü.

27 Ka ˈnën ˈö ˈka ˗tɔ Klito ˗dhü, ˈö ˗kɔ ˈö ˈka˗ ˗bha do do ˈka, mɛn ˈö ˈdhö ˈö˗ dɔɔ˗ do ˈka. 28 ˗A dɔɔ˗ ˈdhɛ ˈö ˈdhö, ˗kɔ ˈö ˗Zlan ˗ya ˗ya ˗a ˈka ˗zlanwokɔdhi ˈgü ˈyö ꞊nɛn: ˗a mɛn ˗blɛɛsü ˗nu ˈnën ˈwo ˗tɔ bɔmɛn ˗nu. ˈYö ˗Zlan ˗wodhiʋ̈lomɛn ˗nu ˗wo ˗kë mɛn ꞊plɛ ˗naan ˈka. ˈYö mɛn ꞊klaŋkëmɛn ˗nu ˗wo ˗kë mɛn ˗yaaga ˗naan ˈka. ˈYö mɛn ˗nu ˈö ˗dhidha kë ˗sü ꞊faan ˈdhö ˗an ˗gɔ ˈwo yö mü. ˈYö mɛn ˗nu ˈö ˈˈyua ˗bho mɛn ˗nu ˗bha ˗sü ꞊faan ˈdhö ˗an ˗gɔ ˗wo yö mü. ˈYö yö mɛn ˗takunmɛn ˗nu ˗bha. ˈYö mɛn ˗nu ˈö ˗an ˗kɔ ˗mɔn ˈˈdhiʋ̈sü ˗sü ˗bha ˈwo yö mü. ˈYö ˈwɔn ˗blɛɛ ˗wo ˈˈwɛɛ ˈgümɛn ˗nu ˗wo yö mü. 29 ˗An ꞊gban ˈˈpɛpɛ ˗wo bɔmɛn ˗nu ˈka ˗ee? ˗An ꞊gban ˈˈpɛpɛ ˗wo ˗Zlan ˗wodhiʋ̈lomɛn ˗nu ˈka ˗ee? ˗An ꞊gban ˗wo mɛn ꞊klaŋkëmɛn ˈka ˗ee? ˗An ꞊gban ˗wo ˗dhidha ˗nu ˗kë ˗ee? 30 Mɛn ˗nu ˗dhɛ bo ˗sü ˈˈse ˗yö ˗an ꞊gban ˈˈpɛpɛ ˗dhɛ ˗ee? ˗An ꞊gban ˈˈpɛpɛ ˗wo ꞊mɔɔn˗ ˗bha ˈwo ˈwɔn ꞊blɛɛ ˗wo ˈˈwɛɛ ˗nu ˈgü ˗ee? Ɛɛnˈˈ ˈzü ˗an ꞊gban ꞊mɔɔn˗ ˗bha kö mɛn ˗nu ˈwo ˈwɔn ꞊blɛɛ ˗wo ˈˈwɛɛ ˗nu ˈgü ˗wo ˗an ˗wo ˈˈdhiʋ̈ ˗lo ˗ee? 31 ˗Kɔmɔnwɔnbhasü ˗nu ˈwo ˈkpii˗, ˗ka ˗an mɛɛnˈˈ ˗kplawo ka ꞊faan ˈka. ˈˈKɛɛ pë ˈdhɛ ˈö˗ kë ˗sü ˗wɔn ˈdhö ˈˈgbɩɩ˗ ˈö ˗ʒiö ˗a ˈka mü, a ˗dho ˗a ˗zɔn ka ˗dhɛ.