ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

14 ˗Ka ka ˈgü dɔ ˈˈgbɩɩ˗ ˈka ˈwɔn ˗nu kë ˗dhɔ ˈgü ˗kplawo. ˗Kɔmɔnwɔnbhasü ˗nu ˈwo ˗kë ˗Zlan ˗bha gbɔɔdhe ˗nu ˈka bhë, ˗ka ˗an mɛɛnˈˈ ˈpö ˗kplawo. ˈˈKɛɛ ˗a ˈdhɛ ˈö ˗kë ˗Zlan ˗wo ˈˈdhiʋ̈ ˗lo ˗sü ˈka bhë, ˗kaa mɛɛnˈˈ ka ꞊faan ˈka. 2 ˗A ˗gɛn ˗mü ꞊dhɛ mɛn ˈö ˈwɔn ꞊blɛɛ ˗wo ˈˈwɛɛ ˗nu ˈgü, kö ˗ya ˗blɛɛ ˗Zlan ˗dhɛ, yö ˈti˗ blɛɛˈˈ mɛnbhɩɩdhe ˗nu ˗dhɛ. ˈKö ˗kë ꞊dhɛ ˗a ˗mɛn ˗yö ˈwɔn ˗nu ˈö ˈwo ˗bin ˗sü ˈka ˗an ˗blɛɛ ˗zuu ˈˈslʋ̈ʋ̈slʋ̈ ˈsaa˗ ˈgü, mɛn ˈˈwɛɛ ˈbhaa ˈyaa˗ ˈgüman. 3 ˈˈKɛɛ mɛn ˈkö yö ˗zë ˈö ˗Zlan ˗wo ˈˈdhiʋ̈ ˗lo, ˗a ˈˈdhiwo ˗yö mɛn ˗zo ˗gban, ˈö mɛn ꞊faanmën, ˈö mɛn zuʋ̈ˈˈ ꞊dhuaa. 4 Mɛn ˈö ˈwɔn ꞊blɛɛ ˗wo ˈˈwɛɛ ˈgü, kö yö dosɛnŋ ˈˈkpaan ö ˗zo ˗gban ˈnën ˈö˗ wo. ˈˈKɛɛ mɛn ˈö ˗Zlan ˗wo ˈˈdhiʋ̈ ˗lo, yö ˗zë ˗yö ˗zlanwokɔdhi ˈgümɛn ˗nu ꞊gban ˈˈpɛpɛ ˗zo ˗gban. 5 ˗Yö n ˈˈpiʋ̈ ꞊dhɛ ka ꞊gban ˈˈpɛpɛ ˈka ˈwɔn blɛɛˈˈ ˗wo ˈˈwɛɛ ˗nu ˈgü, ˈˈkɛɛ ˗a ˈdhɛ ˈö n ˈgü ˗së ꞊dedewo ˈyö ˗tɔ ˈka ˗Zlan ˗wo ˈˈdhiʋ̈ ˗lo. ˗A ˗gɛn ˗mü ꞊dhɛ ˈmɛn ˈö ˗Zlan ˗wo ˈˈdhiʋ̈ ˗lo, ˗a ꞊bhlëë ˗yö ˈkpii˗ ˈö ˗ʒiö ˗a ˈka mɛn ˈö ˈwɔn ꞊blɛɛ ˗wo ˈˈwɛɛ ˈgü, ˈö˗ ˗wo ꞊dhiëëtamɛn* ˈyaa ˈdhö kö ˗yö ˗zlanwokɔdhi ˈgümɛn ˗nu ˗zo ˗gban ˗a ˗ta. 6 N ꞊dhegblü ˗nu, ˈman nu ka ˈˈpiʋ̈ ˈmü, ˈman ˈwɔn ˈö ˗Zlan ˗yö ˈˈdhɛ bho ˗a ˗ta, ˈwɔndɔdhe, ˗Zlan ˗wo ˈˈdhiʋ̈ ˗lo ˗sü ɛɛnˈˈ ꞊klaŋwo ˈö go ˗Zlan ˈˈpiʋ̈ ˗an ˈto, ˈman ˈwɔn blɛɛˈˈ ka ˗dhɛ ꞊ʒiaan ˗wo ˈˈwɛɛ ˈgü dosɛnŋ, ˗a ꞊trɔɔn ˗dho kë ˗mën ˈka?

7 ˗A ꞊tɛɛ˗ ˗yö ˗kë ꞊dhɛ trʋʋˈˈ ˗kwɛɛ ˗nu ˈö ˈwo ˗kë ꞊dhɛ ˈˈtruunën waa ꞊kɔŋ˗ ˗nu ˈdhö bhë ˗an ˈdhö. Mɛn ˈö ˈˈtruunën ˗piö ɛɛnˈˈ ˈö ꞊kɔŋ˗ zë, yö ˈti˗ ˗wo bho ˈko ˗ta, mɛn ˗nu ˗dho ˗a ˈˈtan ˈgüman ˗kɔ ˗kë ꞊dhɛ? 8 Mɛn ˈö ˗gblü ˈˈtruu ˗piö, yö ˈti˗ ˗piö ˗së ˈka, de ˈö ˗dho ö ˗de baaˈˈ ˗gblü ˗bha? 9 ˗Kɔ do ˈö bhë ˗a ˈka, ˈka ˗wo ˗nu ˈö ˗an ˈgüman ˗dhɛ ˈdhö ˈˈgbɩɩ˗ ˗an pö, pë ˈö ˈka˗ pö mɛn ˗nu ˗dho ˗a ˈgüman ˗kɔ ˗kë ꞊dhɛ? ˗Yö ˗dho kë ꞊dhɛ ˈpë ˈka ˈwɔn ꞊blɛɛ ˗dhɛfuöödhɛ ˈgü ˗a ˈdhö. 10 ˗Wo ˗nu ˈwo ˈˈkpɔnŋ ꞊taa yö ˗wo ꞊va, ˈˈkɛɛ ˗a ˈdhɛ ꞊waa˗ pö ˈö mɛn ˈyaa ꞊mɔɔn˗ ˗bha kö ˗ya ˈgüman, ˈyaa ˈdhö. 11 Mɛn ˗ya ˈwɔn blɛɛˈˈ n ˗dhɛ ˗wo ˈö ˈmaan˗ man ˗a ˈgü, a ˗dho kë ˗a mɛn ˈgü ꞊dhɛ ˗dhɛŋ ˈdhö, ˈö yö ˗de ˈpö ˈö ˗kë n ˈgü ꞊dhɛ ˗dhɛŋ ˈdhö. 12 ˗A ˗kë ˈˈdhʋ̈ ˗sü bhë ˗a ˈgü, ˈdhɛ ˈö ˗kë ꞊dhɛ ˗kɔmɔnwɔnbhasü ˗nu ˈö ˗zuu ˈˈslʋ̈ʋ̈slʋ̈ ˗ya nu mɛn ˗dhɛ ka ˗de ˈpö ka˗ ˈˈpiʋ̈ ꞊dedewo ˈka˗ ꞊slɔɔ bhë, ˗kaa ˈˈslö mɛɛnˈˈ kö ˗a ˗dhɛ ˗nu ˈwo ˗dho ˗zlanwokɔdhi ˗nu ˗gɛn ˗gban ˗wo kë ka ˗gɔ ˈgbɛ.

13 ˈDhɛ ˈö ˈˈdhʋ̈, mɛn ˈö ˈwɔn ꞊blɛɛ ˗wo ˈˈwɛɛ ˈgü, ˗a dua ˗mü kö ˗yö bhɛɛˈˈ kö ˗yö ˗mɔn ˗a ꞊dhiëëta ˗sü ˗bha. 14 ˗A ˗gɛn ˗mü ꞊dhɛ ˈman bhɛɛˈˈ ˗wo ˈö mɛn ˗nu ˈwaa˗ man ˗a ˈgü, kö ˗kɔmɔnwɔnbhasü ˈö ˗zuu ˈˈslʋ̈ʋ̈slʋ̈ ˗ya nu n ˗dhɛ bhë yö ˈnën ˈö˗ ˗kë ˈa ꞊bhɛɛ ˗wo ˈö ˈˈdhʋ̈ ˗a ˈgü, ˈˈkɛɛ ˈkö man ꞊dede ˈmaan˗ ˈgüman n ˗de ˗gɔ. 15 ˗Ya kë ˈˈdhʋ̈ kö ˈmën ˈö n dua ˈdhö ˗mü kö ˈa˗ kë? A ˗dho bhɛɛˈˈ ˗kɔmɔnwɔnbhasü ˈö ˗zuu ˈˈslʋ̈ʋ̈slʋ̈ ˗ya nu n ˗dhɛ bhë ˗a ˈka, ˈˈkɛɛ bhɛɛwo ˈö man ꞊dede ˈa˗ ˈgüman* ˈyö ˈa ˗dho ˗a pö ˈpö. A ˗dho ˗Zlan ˈtɔ bhɔ ˈˈtan bho ˗kɔmɔnwɔnbhasü ˈö ˗zuu ˈˈslʋ̈ʋ̈slʋ̈ ˗ya nu n ˗dhɛ bhë ˗a ˈka. ˈˈKɛɛ a ˗dho ˗a ˈtɔ bhɔ ˈˈtan, ˈö man ꞊dede ˈa˗ ˈgüman ˗a bho ˈpö. 16 ˗A ˗gɛn ˗mü ꞊dhɛ ˈbha bhɛɛˈˈ ˗wo ˈˈwɛɛ ˈgü ˗kɔmɔnwɔnbhasü ˈö ˗zuu ˈˈslʋ̈ʋ̈slʋ̈ ˗ya nu ü ˗dhɛ bhë ˗a ˈka, mɛn ˈˈwɛɛ ˈö mü ˗yö ˗dho ˗a pö «˗Yö kë ˈˈdhʋ̈!» ˗kɔ ˗kë ꞊dhɛ, ˈˈkɛɛ kö ˗Zlan ˈˈnuɛ bho ˗wo ˈü˗ pö ˗ni ˈgü bhë ˈyaa˗ ˈgüman? 17 ˈKö ˗kë ꞊dhɛ ü ˗Zlan ˈˈnuɛ ˗bho bhɛɛwo ˈgü ˗së ˈka ˈˈdhʋ̈, mɛn ˈˈwɛɛ ˗nu ˈwo mü bhë ˈyaa ˗an ꞊faanmën. 18 A ˗Zlan ˈˈnuɛ ˗bho, ˈyö sü ꞊dhɛ a ˗wo ꞊va ˗pö ˈa ˗ʒiö ˗a ˈka mɛn ꞊gban ka ˗ta. 19 ˈˈKɛɛ ˗zlanwokɔdhi ˈgü, ˈkö ˗kë ꞊dhɛ ˗wo kpö ˈˈsoodhu ˗mü ˈa˗ pö ˈa˗ ˈgüman n ˗de ˗gɔ, ˈa ˗mɔn mɛn ˈˈwɛɛ ˗nu ꞊klaŋ ˗kë ˗a ˈka ˗sü ˗bha, ˗yö n ˈgü ˗së ˈö ˗ʒiö ˗a ˈka ˗wo kpö ˈˈgblü ˗kɔŋ do pö ˗sü ˈö ˗wo ˈˈwɛɛ ˈgü ˈö mɛn ˗nu ˈwaa˗ ˈgüman bhë ˗a ˗ta.

20 N ꞊dhegblü ˗nu, ˗a ˈdhɛ ˈö ˗gban ˈwɔn ˈgüman ˗sü ˗bha bhë, ˈkaa ˗dho kë ˈnën ˈsɛɛn˗ ˗nu ˈka ˗a ˈgü, ˗ka kë ꞊ʒiaan ˈnën ˈsɛɛn˗ ˗nu ˈka ˈwɔn yaa kë ˗sü ˈgü. ˈWɔn ˈgüman ˗sü ˈgü, ˗ka kë mɛn ˈˈgblʋ̈gblʋ̈ ˗nu ˈka. 21 Pë ˈö ˗bɛnzë ˗sü ˈka ˈTɔŋ˗ ˈsëëdhɛ ˈgü ˈyö ˗tɔ: «‹A ˗dho bɔ ˗wo ˈˈwɛɛ pö ˗mɛn ˗nu waa ˗dhɛŋ ˗nu ˗ta ˈa ˈwɔn ꞊blɛɛ ˈˈsɛ ˈö yö ˗a ˈgümɛn ˗nu ˗dhɛ. ˈˈKɛɛ ˈkö ˗kë ˈˈdhʋ̈, wo ˈti ˗dho ˈˈwɩ ˗a ˗bha kö ˈwo wo ˈˈtʋ ˈto n ˗bha,› pë ˈö Zoova ˗ya pö ˈyö bhë.» 22 ˗A ˗kë ˈˈdhʋ̈ ˗sü bhë ˗a ˈgü, ˈwɔn ˗blɛɛ ˗wo ˈˈwɛɛ ˗nu ˈgü ˗sü ˗yö mɛn ˗nu ˈö ˈwaa wo ˗zo yö Yesu ˗dhɛ ˗an ˗bha ˈwɔn ˈsuan˗ ˗bho ˗a ˗bha ˗pë ˈka. ˈYaa mɛn ˗nu ˈwo wo ˗zo yö Yesu ˗dhɛ ˗an ˗bha ˈwɔn ˈsuan˗ ˗bho ˗a ˗bha ˗pë ˈka. ˈˈKɛɛ ˗Zlan ˗wo ˈˈdhiʋ̈ ˗lo ˗sü ˗zë, ˗yö mɛn ˗nu ˈwo wo ˗zo yö Yesu ˗dhɛ ˗an ˗bha ˈka, ˈyaa mɛn ˗nu ˈö ˈwaa wo ˗zo yö ˗a ˗dhɛ ˗an ˗bha ˈka. 23 ˈDhɛ ˈö ˈˈdhʋ̈, kö ˗zlanwokɔdhi ˈgümɛn ˗nu ˈˈpɛpɛ ˈka ˈdho ka ˈkwëëdhö, kö mɛn ꞊gban ˈka ˈwɔn blɛɛˈˈ ˗wo ˈˈwɛɛ ˗nu ˈgü, mɛn ˈˈwɛɛ ˗nu ɛɛnˈˈ mɛn ˗nu ˈö ˈwaa ˗zo ˗yö Yesu ˗dhɛ ˗mɛn ˗nu ˈka ˗wa ˗da ˈkɔɔ, wo ˈti ˗dho ˗a pö slaaˈˈ ˗ya ˗da ka ˈgü ˗ee? 24 ˈˈKɛɛ mɛn ꞊gban ka ˗Zlan ˗wo ˈˈdhiʋ̈ ˗lo ˗ni ˈgü, mɛn ˈö ˈyaa ˗zo ˗yö Yesu ˗dhɛ ˗mɛn ˈka ɛɛnˈˈ mɛn ˈˈwɛɛ ˗ya ˗da ˈkɔɔ, ˗yö ˗dho ˗a yö ꞊dhɛ ˗wo ˈˈpɛpɛ ˈö ˈka˗ pö ˗ni ˈgü bhë ˗yö ˗gban ö ˗bha, ˈö ˗dhɛ ˗ga ö ˗bha ˗tosɛta ˈgü ˗së ˈka. 25 ˗Ya kë ˈˈdhʋ̈, ˈˈdhɛ ˗dho ˈgo ˈwɔn ˈö ˗bin ˗sü ˈka ˗a zuʋ̈ˈˈ ˈgü bhë ˗a ˗ta, ˈö yö ö kpɔn ˈgü, ˈö ö ˗gɔ ˈˈgblëënnu ˈˈshia˗ ˈö ˗Zlan ˗dhɔkë, ˈö˗ pö: «˗Zlan ˗yö ka ꞊zinŋgü ꞊dedewo.»

26 ˈDhɛ ˈö ˈˈdhʋ̈ n ꞊dhegblü ˗nu, ˈmën ka dua ˈdhö ˗mü kö ˈka˗ kë? ˈKa ˈdho ka ˈkwëëdhö, mɛn ˈbhaa ˗yö ˈˈtan ˗bho, ˈö mɛn ˈbhaa ˗yö mɛn ꞊klaŋ ˗kë, ˈö mɛn ˈbhaa ˗yö pë ˈö ˗Zlan ˗yö ˈˈdhɛ bho ˗a ˗ta ˗a ꞊blɛɛ, ˈö mɛn ˈbhaa ˗yö ˈwɔn ꞊blɛɛ ˗wo ˈˈwɛɛ ˈgü, ˈö mɛn ˈbhaa ˗ya ˗wo ˈˈdhiʋ̈ ˗lo. ˗Ka ˈwɔn ˗nu ˈwo bhë ˗an ꞊gban ˈˈpɛpɛ kë ka ˈko ˗nu ˗zo ˗gban ˗sü ˈka. 27 Mɛn ˈbhaa ˗nu ꞊waa˗ pö ˈwo ˈwɔn blɛɛˈˈ ˗wo ˈˈwɛɛ ˗nu ˈgü, ˗yö kë mɛn ꞊plɛ ɛɛnˈˈ mɛn ˗yaaga ˈka, ˈyaa ˗dho ʒiö ˗a ˗ta. ˗Ya ˈgo mü ˈzü ˗wo ˈwɔn blɛɛˈˈ do do, kö mɛn ˈbhaa ˗yö ˗an ˗wo dhiëëta.* 28 ˈˈKɛɛ ˗ya kë ꞊dhɛ ˗an ˗wo ꞊dhiëëtamɛn ˈyaa ˈdhö, ˗wo dɔ wo ˈˈdhi ˈˈtun ˗zlanwokɔdhi ˈgü, kö pë ˈwo˗ ˈˈpiʋ̈ ˈwo˗ pö ˗wa pö wo ꞊dede waa ˗Zlan wo ˗dhɛ. 29 ˗Zlan ˗wodhiʋ̈lomɛn ˗nu ꞊waa˗ pö ˈwo ˈwɔn blɛɛˈˈ, ˗yö kë mɛn ꞊plɛ ɛɛnˈˈ mɛn ˗yaaga ˈka kö mɛn ˗nu ˈwo to ˗wo wo ˗zota ˗a ˈklɔɔ˗ ˈgü. 30 ˈˈKɛɛ ˗ya kë ꞊dhɛ ˗Zlan ˗ya ˈˈdhɛ bho ˈwɔn ˈbhaa ˗ta mɛn ˈbhaa ˗dhɛ kö ˗yö ˈɲaannu ˗sü ˈka mü, ˗a mɛn ˗blɛɛsü ˈö ˈwɔn blɛɛˈˈ ˗ni ˈgü ˗yö dɔ ö ˈˈdhi ˈˈtun. 31 ˗A ˗gɛn ˗mü ꞊dhɛ ka ˈˈpɛpɛ ka ꞊mɔɔn˗ ˗bha ˈö ˈka yö ˈˈdhɛɛdhö do do, ˈö ˈka ˗Zlan ˗wo ˈˈdhiʋ̈ ˗lo, kö ˗yö kë mɛn ꞊klaŋ kë ˗sü ˈka, ˗yö mɛn ꞊gban ꞊faanmën. 32 ˗Ya ˈgo mü ˈzü ˗Zlan ˗wodhiʋ̈lomɛn ˗nu dua ˗mü kö ˗kɔmɔnwɔnbhasü ˈö ˗zuu ˈˈslʋ̈ʋ̈slʋ̈ ˗ya nu ˗an ˗dhɛ bhë, ˗wo dɔ ˈwɔn ˗nu ˗kë ˗a ˈka ˗dhɛ ˈka. 33 ˗A ˗gɛn ˗mü ꞊dhɛ ˗Zlan ˈyaa ˗Zlan ˈö ˗bhluubhludhe ˈdhö ˗a ˗bha ˈwɔn ˗nu ˈgü ˗a ˈka, ˗dhikodhɛ ˗Zlan ˗mü ˗a ˈka.

꞊Dhɛ ˗kɔ ˈö˗ ˈka mɛn ˈˈslʋ̈ʋ̈slʋ̈ ˗nu ˗bha ˗zlanwokɔdhi ˈˈpɛpɛ ˈgü ˗a ˈdhö, 34 dhebɔ ˗nu dua ˗mü kö ˗wo dɔ wo ˈˈdhi ˈˈtun ˗bhɔkwëë ˗nu ˗ta,* ˈyö sü ꞊dhɛ ˗a ˗dhɛ ˈyaa˗ ˗bha kö ˗wo ˈwɔn blɛɛˈˈ. ˗An dua ˗mü ꞊ʒiaan kö ˗wo wo ˗gɔ ˈdho ˈˈshia˗ ꞊dhɛ ˗kɔ ˈö ˈtɔŋ˗ ˗ya pö ˗a ˈka ˈpö bhë ˗a ˈdhö. 35 ꞊Waa˗ pö ˈwo pë ˈbhaa ˈgüman, ˗wo dhɛɛˈˈ ˈkpɔ wo ꞊gɔn ˗nu ˗gɔ ˈˈkwɛnŋdhö, ˗a ˗gɛn ˗mü ꞊dhɛ dhebɔ ˗bha ˈwɔn blɛɛˈˈ ˗sü ˈö ˗zlanwokɔɔdhö ˗yö ˈlëësü.

36 Ka ˈnën ˈö ˗Zlan ˗wo ˗yö go ka ˈgü ˗ee? Ɛɛnˈˈ ka dosɛnŋ ˈnën ˈö ˈka˗ ꞊slɔɔ ˗ee?

37 ˗Ya kë mɛn ˈbhaa ˈgü ꞊dhɛ ö ˗Zlan ˗wodhiʋ̈lomɛn ˈka, ɛɛnˈˈ ˗zuu ˈˈslʋ̈ʋ̈slʋ̈ ˗ya ˗kɔmɔnwɔnbhasü ˈbhaa nu ö ˗dhɛ, ˗a dua ˗mü kö ˗yö ˈˈwɩ ˗a ˗bha ꞊dhɛ pë ˈa˗ ˗bɛnzë ˗ni ˈgü ka ˗dhɛ yö, Dëmɛn ˗bha ˈTɔŋ˗ ˗mü. 38 ˈˈKɛɛ mɛn ˈö yö ˈti ˈˈwɩ ˈwɔn ˈö bhë ˗a ˗bha, ˗Zlan yö ˈti ˗dho ö ˗kɔ ˈkpɔ ˗a ˗mɛn ˗gɔ.* 39 ˈDhɛ ˈö ˈˈdhʋ̈, n ꞊dhegblü ˗nu, ˗kɔmɔnwɔnbhasü ˈö ˗kë ˗Zlan ˗wo ˈˈdhiʋ̈ ˗lo ˗sü ˈka bhë, ˗kaa mɛɛnˈˈ ˗kplawo ka ꞊faan ˈka, ˈˈkɛɛ ˈkaa ˗dho mɛn ˗nu ꞊kɛɛ˗ ˈˈkan ˈpö ˈwɔn ˗blɛɛ ˗wo ˈˈwɛɛ ˈgü ˗sü ˗bha. 40 ˗Ka ˈwɔn ꞊gban kë ˗së ˈka, ö ˗naan ˈka.