Yesu ˗bha bɔmɛn ˗nu këwɔn ˗nu

2 Pantekɔtö ˈwlaan˗ yi ˈka, Yesu ˗bha gwëëˈˈ ˗nu ˗wo ˗kun wo ˈkwëëdhö ˈkɔ do ˈgü. 2 ˈDhɛ ˈwo ˗dho ˈˈkan wo ˗ta, ˈyö ˈwo pë ˗vin do ˈbhaa man kö ˗yö ˈgo ˗ni ˈgü dhaŋ˗ ˈgü. ˗A pë ˗vin ˈö ˈˈdhʋ̈ ˗yö ˗kë ꞊dhɛ ˈˈtɛɛ ˈˈgbɩɩ˗ ˗bha ʒiö ˗sü ˈdhö, ˈyö nu ˈö ˗da ˈkɔ ˈwo kun ˗ya ˗sü ˈka ˗a ˈgü bhë ˗a ˈgü, ˈö ˗dhɛ ꞊gban sü. 3 ˈYö ˈwo pë ˈbhaa ˗nu ˈwo ˗kë ꞊dhɛ ˈˈshiʋ̈ ˈnɛɛn˗ ˗nu ˈdhö ˗an yö. ˈYö pë ˗nu ˈwo ˈˈdhʋ̈ ˈwo ˗pɛn, ˈö ˈwo ˗ya mɛn ˈö ˈdhö ˗a ꞊troo. 4 ˈDhɛ ˈö ˗kë ˈˈdhʋ̈, ˈyö ˗zuu ˈˈslʋ̈ʋ̈slʋ̈ ˗yö ˗an pa, ˈö ˈwo ˗ya ˈwɔn blɛɛˈˈ ˗sü ˗bha ˗wo ˈˈwɛɛ ˗nu ˈgü ꞊dhɛ ˗kɔ ˈö˗ ˗zuu ˈˈslʋ̈ʋ̈slʋ̈ ˗ya ꞊faan nu ˗a ˈka ˗an ˗dhɛ ˗a ˈdhö.

5 ˗A ˈˈtʋ̈ŋ ˈö bhë ˗a ˈgü kö Zuifö ˗nu ˈö ˈwo ˗Zlan ꞊bhlëë ˗ya ꞊dedewo, ˈö ˈwo go ˈˈsɛ ꞊gban ˈˈpɛpɛ ˈgü, ˗wa nu Zedhizadhɛmö. 6 ˈDhɛ ˈö pë ˗vin bhë ˈwo˗ man, ˈyö mɛn ꞊va ꞊dede ˗wo dho wo ˈkwëë˗. ˗A ˈwɔn ˗yö mɛn ꞊gban ˈˈpɛpɛ ˗kun ꞊dedewo, ˗a ˗gɛn ˗mü ꞊dhɛ ˗a mɛn ˈö ˈdhö ˗yö ˗kun pë ˈwo kun ˗a pö ˗ni ˈgü bhë ˗a man ˗ni ˈgü ö ˗de ˗wo ˈgü. 7 ˗An ˈˈdhi ˗yö ˗pa, ˈö ˈwo ˗ya ˗a pö ˗sü ˗bha wo ˈko ˗nu ˗dhɛ: «˗Ka dɔ ˗ɔɔ, mɛn ˈˈpɛpɛ ˈwo ˈwɔn blɛɛˈˈ ˗ni ˈgü yö, Galile ˗mɛn ˗nu ˈyaa ˗mü ˗an ˈka ˗ee? 8 ˗Yö ˗kë ꞊dhɛ ˈsa ˈö pë ˈwo˗ pö ˗ni ˈgü bhë ˈö mɛn ˈö ˈdhö ˈkwa˗ man kwa ˗de ˗wo ˈgü? 9 Paatö ˗sɛ ˈgümɛn ˗nu, Mɛdö ˗sɛ ˈgümɛn ˗nu, Edhamö ˗mɛn ˗nu, Mezopotami ˗mɛn ˗nu, Zude ˗mɛn ˗nu waa Kapadɔsö ˗mɛn ˗nu, ˈPɔn ˗mɛn ˗nu waa Azi ˗sɛ ˈgümɛn ˗nu, 10 Flizi ˗mɛn ˗nu, Panfili ˗mɛn ˗nu, Ezitö ˗mɛn ˗nu waa mɛn ˗nu ˈwo go Libi ˈˈsɛ ˗nu ˈwo Silɛnö ˗dhɛ ˈˈsuee ˗an ˈgü, mɛn ˗nu ˈwo go Wlɔmö ˈö ˈwo ˗dhɛ ˈö yö ˗a ˈgü, ˈmɛn ˈwo Zuifö ˈka ɛɛnˈˈ ˈwo Zuifö ˗nu ˗bha ˗zlanwo ˈgü, 11 Klɛtö ˗mɛn ˗nu waa Adhabi ˗sɛ ˈgümɛn ˗nu, mɛn ꞊gban ˈˈpɛpɛ pë ˈwo˗ pö ˗ni ˈgü ˈö ˗gban ˗Zlan kë ˗yö ˈˈmlünmlünsü ˗nu ˗bha bhë, kwa ˗an ˗man kwa ˗de ˗wo ˈgü.» 12 ˗A ˈwɔn ˗yö ˗an ꞊gban ˈˈpɛpɛ ˗kun ˈö ˗an ˈˈdhi ˗yö pa, ˈyö ˈwo˗ pö wo ˈko ˗nu ˗dhɛ: «˗Mën ˗wɔn ˈö ꞊ni?» 13 ˈˈKɛɛ mɛn ˈˈwɛɛ ˈbhaa ˗nu ˗wo ˗kun ꞊wɛɛ˗ dɔ ˗ni ˈgü ˗an ˗bha ˈö ˈwo˗ pö: «We* ꞊yaa ˗an ˈkun.»

14 ˈˈKɛɛ ˈdhɛ ˈö ˗kë ˈˈdhʋ̈, ˈyö Piɛɛ waa bɔmɛn ˗nu ˗kɔŋ do ö ga do ˈwo to bhë, ˈwo ꞊luu ˈwo dɔ wo ˗gɛn ˗ta. ˈYö Piɛɛ ˗yö ö ˗wo ˈˈdhiʋ̈ ꞊luu ˈö˗ pö: «Zude ˗mɛn ˗nu waa Zedhizadhɛmö ˗mɛn ˗nu ˈˈpɛpɛ, ˗ka ka ˈˈtʋ ˈto ˗së ˈka kö pë ˈa ˗dho ˗a pö yö ˈka˗ ˈgüman. 15 Mɛn ˗nu ˈka ˗an ˗ga ˗ni ˈgü bhë, we ˈyaa ˗an ˗bha ꞊dhɛ ˗kɔ ˈö ˈka ka ˗zo gɔn ˗ni ˈgü ˗a ˈka bhë ˗a ˈdhö, ˗a ˗gɛn ˗mü ꞊dhɛ ˗dhɛ ˗yö ˗kpɔɔ ˗dɛɛ.* 16 ˈˈKɛɛ pë ˈö ˗Zlan ˗wodhiʋ̈lomɛn Ʒoɛdhö ˗ya to ˈˈdhiʋ̈ ˈö˗ pö, yö ˈnën ˈö yö ˗ni ˈgü ˈko ˈˈdhiʋ̈ bhë. ˗Ya ˗pö: 17 ‹˗Zlan ˗ya ˗pö: «ˈˈTʋ̈ŋ ˗totaabhasü ˈgü,» «a ˗dho n ˗man ˗zuu ˈˈslʋ̈ʋ̈slʋ̈ ˈnën ˈbhaa ˗gblü mɛn ꞊suu ˈˈpɛpɛ ˗ta, ˈö ka gbö ˗nu waa ka ˈdhu ˗nu ˗wo n ˗wo ˈˈdhiʋ̈ ˗lo, ˈö ka ˗bha wlüünën gɔɔn˗ ˗nu ˈˈɲan ˈgü ˗yö ˗da ˈö ˈwo pë ˈa ˗dho ˗a ˗zɔn ˗an ˗dhɛ ˗a yö, ˈö ka ˗bha gɔndë zii ˗nu ˗wo ˈˈɲɛɛn ˗nu bho. 18 ˗A ˈˈtʋ̈ŋ ˈö bhë ˗a ˈgü, a ˗dho n ˗man ˗zuu ˈˈslʋ̈ʋ̈slʋ̈ ˈnën ˈbhaa ˗gblü n ˗man ꞊dhuëŋ gɔɔn˗ ˗nu waa˗ dhebɔ ˗nu ˗an ˗ta ˗ʒiaanwo, ˈö ˈwo n ˗wo ˈˈdhiʋ̈ ˗lo. 19 A ˗dho ˗dhidha ˗wɔn ˗nu kë dhaŋ˗ ˗bha, ˈa ˈwɔn ˈˈmlünmlünsü ˗nu ˗kë ˈˈshia˗ ˈˈkpɔnŋ ꞊taa, ˈö ꞊ɲɔɔn ˗nu, ˈˈshiʋ̈ ˗nu waa ˈˈshiʋ̈ ˈˈtöö kpö tii ˗nu ˗wo ˗kë ˗dhö. 20 ˗Yö dɔ kö Zoova ˗bha ˗dhɛkpaɔyi ˈkpii˗ ˗zizisü bhë ˗yö ˗wo, ˈɲaan˗ ˗dho kë ˗dhɛtiidhɛ ˈka, ˈö ˗gbɔdë ˗yö ˗gla ꞊ɲɔɔn ˈgü. 21 Mɛn ˈˈoo ˗mɛn ˈö Zoova ˈtɔ pö, ˈö ˗takundhe ˗dhɛ ˗a ˗gɔ, ˗yö ˗dho dha.»›

22 «Izraɛdhö ˗mɛn ˗nu, ˗ka ka ˈˈtʋ ˈto: ˗Zlan ˗ya ˗zɔn mɛn ꞊gban ˈˈpɛpɛ ˈˈɲan ˈˈdhiʋ̈ ꞊dhɛ Yesu ˈö go Nazadhɛtö bhë, yö ˈnën ˈö˗ bɔ. ˗Ya ˗zɔn ˈˈdhʋ̈ ˈwɔn ˈˈmlünmlünsü ˗nu waa ˗dhidha ˗nu ˈö bɔ ˗a ˗ta ˈö ˗an ˗kë ka ꞊zinŋgü bhë ˗an ˈka, ꞊dhɛ ˗kɔ ˈö ka ꞊dede ˈka˗ ˈwɔn dɔ ˗a ˈka bhë ˗a ˈdhö. 23 Gɔndënën ˈö bhë, ˗wa ˈˈdhiʋ̈ ˗dɔ ka ˗gɔ ꞊dhɛ ˗kɔ ˈö ˗Zlan ˗ya to ˈˈdhiʋ̈ ˈö˗ ˈwɔn dɔ ˗a ˈka, ˈö ˗we ˗a ˗bha kö ˗yö kë bhë ˗a ˈdhö. ˈYö ˈka bɔ mɛn ˗nu ˈö ˈwaa ˈtɔŋ˗ ꞊bhlëë ˗ya ˗an ˗ta ˈö ˈka˗ dɔ ˈˈdhü ˗bha, ˈö ˈka˗ zë. 24 ˈˈKɛɛ ˗Zlan ˗ya ˗bho ga ˈgü, ˈö go ga ˗bha ˈˈdhiʋ̈dhɛ* ˗gɔ ˈˈgan ˈgü, ˗a ˗gɛn ˗mü ꞊dhɛ ˗a ˗dhɛ ˈyaa kun ˗a ˗bha kö ga ˗yö ö ˗kɔ yö ˗a ˗ta. 25 ˈWɔn ˈö ˗gban ˗a ˗bha Davi ˗ya ˗to ˈˈdhiʋ̈ ˈö˗ ꞊blɛɛ ˈö˗ pö: ‹A n ˈˈɲan ˗klu Zoova ˗bha ˗kplawo, ˗a ˗gɛn ˗mü ꞊dhɛ ˗yö dɔ ˗sü ˈka n ˗kɔ ˗së ˈgü, ˗yö kë ˈˈdhʋ̈ kö n zuʋ̈ˈˈ ˈyaa ˗dho ˈˈkaankwöö toŋtoŋdhö. 26 Yö ˈnën ˈö˗ ˗wɔn ˈgü ˈö n zuʋ̈ˈˈ ꞊nii ˗yö ˗da, ˈa ˈwɔn ˗nu ꞊blɛɛ zuʋ̈gblüdhi ˈka. A ˗dho n ˗man ˗tosɛta kë ˗zo ˗yö ü ˗dhɛ ˗sü ˈka ˗kplawo. 27 ˗A ˗gɛn ˗mü ꞊dhɛ, ü ˈti ˗dho n* ˈto Ga ˗gblü* ˈgü, ɛɛnˈˈ ü ˈti ˗dho ü ꞊kwaa ü ˗bha mɛn ˈö ˗klu ü ˗bha ˗a ˗zü kö ˗yö ˈˈbu. 28 ˈBha ˗këdhösü ˗ʒian ˗zɔn n ˗dhɛ. Ü ˗dho ˗a kë ˈö n zuʋ̈ˈˈ ˈˈgblü ˗yö ˗dhi ꞊dedewo ü ˈˈɲan ˈˈdhiʋ̈.›*

29 «N ꞊dhegblü ˗nu, ˗ka ˈˈwɩ ˗a ˗bha n ˗gɔ kö ˈwɔn ˈö ˗gban ˈˈkwɛnŋdë Davi ˗bha bhë ˈa˗ blɛɛˈˈ ka ˗dhɛ. Davi ˗yö ˗ga ˈö ˈwo˗ ˗wɛɛ bho, ˈö˗ blɔɔndhɛ ˈdhö ꞊kun kwa ˈˈpiʋ̈ yö ꞊dɛɛ. 30 Kë ˈö˗ wo ꞊dhɛ ˗yö ˗kun ˗Zlan ˗wodhiʋ̈lomɛn ˈka, ˈö kun ˗a ˈˈɲaan ˈpö ˈkpakpadhö ꞊dhɛ ˗Zlan ˗yö ö ˗wo ˗bhö ö ˗dhɛ ˈö˗ pö ö ˗dho ö ꞊suugünën do ˗ya ö ˗bha ˈˈgɔ ˗gbloo ˈgü bhë, 31 ˗yö Klito ˗bha ˗go ga ˈgü ˗sü ˗to ˈˈdhiʋ̈ ˈö˗ yö, ˈö˗ ˗wɔn ꞊blɛɛ ˈö˗ pö ꞊dhɛ ˗Zlan ˈyii˗ ˈto Ga ˗gblü ˈgü ɛɛnˈˈ ˗a kwi ˈyii ˈˈbu. 32 ˗Zlan ˗yö Yesu ˈö bhë ˗a ˗bho ga ˈgü, ˈö mɛn ꞊gban ˈˈpɛpɛ yi ˈˈɲan ˗yö ˗da ˗a ˈgü. 33 Kë ˈö˗ wo ꞊dhɛ ˗Zlan ꞊yaa˗ ˗gɔ ˈˈdhiʋ̈ luuˈˈ ꞊yaa˗ ˗ya ö ˗kɔ ˗së ˈgü, ˈö ˗zuu ˈˈslʋ̈ʋ̈slʋ̈ ˈö˗ Dë ˗ya ˈˈplünŋ bho ˗a ˗dhɛ ꞊yaa˗ ꞊slɔɔ bhë, ˈyö pë ˈö ˈka˗ yö ˗ni ˈgü ɛɛnˈˈ ˈka˗ man ˗ni ˈgü bhë ˈö˗ ˗gblü ka ˗ta. 34 ˗A ˗gɛn ˗mü ꞊dhɛ, Davi yö ˈti ˈdho dhaŋ˗ ˈgü, ˈˈkɛɛ yö ꞊dede ˗ya ˗pö: ‹Zoova ˗ya ˗pö n Dëmɛn ˗dhɛ: «˗Bhö ˗ya n ˗kɔ ˗së ˈgü, 35 kö ˗yö ˈto ˗a ˈka ˈˈdhʋ̈ ˗yö yö ˗a ˈka ˈˈtʋ̈ŋ ˈa ˗dho ü ˈyɔɔ˗ ˗nu ˗da ˗a ˈka ü ˗gɛn ꞊löö kö ˗wo kë ü ˗gɛn ˗dɔ ˗a ˗ta ˗pë ˈka bhë ˗a ˗bha.»› 36 ˈDhɛ ˈö ˈˈdhʋ̈, ˗a ˈwɔn ˗yö kë Izraɛdhö ˈˈsɛgümɛn ˗nu ˈˈɲaan ˈka ˈkpakpadhö ꞊dhɛ Yesu ˈö ˈka˗ zë ˈˈdhü ˗bha bhë, ˗Zlan ꞊yaa˗ kë Klito ˈka, ˗ya kë kwa Dëmɛn ˈka.»

37 ˈDhɛ ˈwo˗ man ˈˈdhʋ̈, ˗yö ˗pa ˗an zuʋ̈ˈˈ ˈka ꞊dedewo ˈö ˈwo Piɛɛ waa bɔmɛn ˈˈwɛɛ ˗nu ˈwo to ˗an dhɛɛˈˈ kpɔ ˈö ˈwo˗ pö: «Yi ꞊dhegblü ˗nu, ˈmën ˈö yi dua ˈdhö ˗mü kö ˈyi˗ kë?» 38 ˈYö Piɛɛ ˗ya pö ˗an ˗dhɛ: «˗Ka ˈgo ka ˗bha ꞊sɔŋ yaa ˈgü, ˈka ka zuʋ̈ˈˈ slëëˈˈ, kö mɛn ˈö ˈdhö ˗yö bɔ ˈˈyi ꞊bhaa Yesu Klito ˈtɔ ˈgü, kö ˗a ˗bha ˈwɔn yaa ˗nu ˗bhawɔn ˗yö ˈto. ˗Ya kë ˈˈdhʋ̈, ˗a ˗bha gbɔɔdhe ˈö˗ nu ˈˈwɛɛwɛ ˈö ˗kë ˗zuu ˈˈslʋ̈ʋ̈slʋ̈ ˈka bhë ka ˗dho ˗a ꞊slɔɔ˗. 39 ˗A ˗gɛn ˗mü ꞊dhɛ, ˗a ˈˈplünŋ ˈö˗ bho bhë, ˗ya ˗bho kaa ka ˗bha ˈnën ˗nu ka ˗dhɛ, ˈö˗ bho ˈpö mɛn ˗nu ˈwo mü ꞊gblɛɛn waa mɛn ˈˈpɛpɛ ˈö Zoova kwa ˗bha ˗Zlan dho ˗an ˗dhɛ ö ˈˈpiʋ̈ ˗an ˗dhɛ.» 40 ˗Yö dhiaŋ ˈˈwɛɛ ˈbhaa ˗nu ˗zë, ˈö ˈwɔn ꞊vadhɛ ˈgü ˗pʋ ˗an ˗dhɛ ˈzü ˈkpakpadhö, ˈö ˗an ꞊faanmën ˈö˗ pö: «˗Ka ˈgo ˈˈtʋ̈ŋ ˈö yö ˗a ˈgümɛn ˗nu ˈö ˈwaa ˈwɔn ˗së kë bhë ˗an kpö ˈgü kö ˈka dha ˈgüshiʋ̈dhe ˗gɔ.» 41 ˈDhɛ ˈö ˗kë ˈˈdhʋ̈, mɛn ˗nu ˈwo ˗we pë ˈö˗ pö bhë ˗a ˗bha zuʋ̈gblüdhi ˈka, ˗wo ˗an ˗bɔ ˈˈyi ꞊bhaa. ˗Dhɛkpaɔyi ˈö bhë ˗a ˈka, mɛn ˗nu ˈwo ˗mɔn mɛn ˈˈgblü ˗yaaga (3.000) ˗bha ˗wo ˗da gwëëˈˈ ˗nu ˈwo bhë ˗an ˈˈpiʋ̈. 42 ˗Wo ˗kun wo ˈˈtʋ ˈto ˗ni ˈgü ˗kplawo bɔmɛn ˗nu ˗bha ꞊klaŋwo ˗nu ˗bha, ˈö ˈwo dho wo ˈkwëëdhö, ˈö ˈwo ˗bhöpë ˗nu ˗bhö wo ˈkwëë˗, ˈö ˈwo ꞊bhɛɛ.

43 Bɔmɛn ˗nu ˗wo ˗dhidha ꞊va ꞊dede waa ˈwɔn ˈˈmlünmlünsü ˗nu ˗kë ˈö mɛn ꞊gban ˈˈpɛpɛ ˈˈɲan ˗yö ˗da ˗an ˈgü, ˈö ˈwo ˗ya ˗Zlan ꞊bhlëë ˗ya ˗sü ˗bha. 44 Mɛn ˈˈpɛpɛ ˈwo ˗we Yesu ˗wɔn ˗bha, ˗wo ˗kun wo ˈkwëëdhö, ˈö ˗an ˗bha pë ꞊gban ˈˈpɛpɛ kun ˈko ˈˈpiʋ̈. 45 ˗Wo ˗kun wo ˗bha ˗dhɛ ˗nu waa pë ˈˈpɛpɛ ˈwo ˗an ˗gɔ ˗an ˈˈdhoodɔ ˗ni ˈgü, ˈö ˈwo˗ ˈwëë˗ ˗gblü mɛn ꞊gban ˗ta, ˈö ˗a mɛn ˈö ˈdhö pë ˈö ˗dho ˗kpla bho ˗a ˗bha ˈwo˗ nu ˗a ˗dhɛ. 46 ˗Dhɛkpaɔyi ˈˈpɛpɛ ˈka, ˗wo ˗kun ˈdho ˗ni ˈgü wo ˈkwëëdhö ˗Zlan ˗dhɔkë ˗a ˈgü ˗kɔ ˈgü, ˈö ˗an zuʋ̈piʋ̈wɔn kun do. ˗Wo ˗kun ˈdho ˗ni ˈgü wo ˈko ˗nu ˗gɔ ˈkɔɔ, ˈö ˈwo ˗bhöpë ˗nu ˗bhö wo ˈkwëë˗ zuʋ̈gblüdhi ꞊dede ˈka, zuʋ̈ˈˈ ˈˈpuu ˗bha. 47 ˗Wo ˗kun ˗Zlan ˈtɔ bhɔ ˗ni ˈgü, ˈö ˗an ˈˈdhiaa ˗yö kun ˈmën ˗ni ˈgü mɛn ꞊gban ˈˈpɛpɛ ˈgü. ˈˈTʋ̈ŋ do ˈö ˈˈdhʋ̈ ˗a ˈgü, ˗dhɛkpaɔyi ꞊gban ˈˈpɛpɛ ˈka, mɛn ˗nu ˈwo ˗dho kë dhamɛn ˈka, Zoova ˗yö ˗kun ˗an ˗da ˗ni ˈgü ˗an ˈˈpiʋ̈ ˗kplawo.