Yesu ˗bha bɔmɛn ˗nu këwɔn ˗nu

4 Mɛn ꞊plɛ ˈwo bhë ˗wo ˗to ˈwɔn blɛɛˈˈ ˗sü ˗bha ˈˈsɛgümɛn ˗nu ˗dhɛ ˈyö ˈˈsaabhomɛn ˗nu, ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗gɔmɛn waa Sadusiɛn ˗nu ˗wo to mü ˈwo ˗wo. 2 ˈWɔn ˗yö ˗kun ˗shiö ˗sü ˈka ˗an ˗dhɛ, ˗a ˗gɛn ˗mü ꞊dhɛ bɔmɛn ˗nu ˗wo ˗kun mɛn ˗nu ꞊klaŋ kë ˗ni ˈgü, ˈö ˈwo kun ˗a pö ˗ni ˈgü mɛn ꞊gban ˈˈpɛpɛ ˈˈɲan ˈˈdhiʋ̈ ꞊dhɛ Yesu ˗ya ˈgo ga ˈgü. 3 ˈDhɛ ˈwo nu, ˈyö ˈwo ˗an kun ˈö ˈwo wo ˗kɔ yö ˗an ˗ta ˈö to ˈˈdhʋ̈ ˈö ˗dhɛ ˗yö ꞊kpɔɔ ˗a ˈka, ˗a ˗gɛn ˗mü ꞊dhɛ ˈö ˗kë ˈˈdhʋ̈ kö ˈˈbin ˗ya ˈmën ˈsaadhö. 4 ˈˈKɛɛ mɛn ˗nu ˈwo wo ˈˈtʋ to bhë ˗a mɛn ꞊vadhɛ ˗wo ˗we ˗wo ˈwo˗ man bhë ˗a ˗bha, ˈö gɔɔn˗ ˗nu ˈwo Yesu ˗bha gwëëˈˈ ˗nu ˈka ˈwo ˗kë ꞊va, ˈö ˈwo ˗mɔn ˈˈgblü ˈˈsoodhu (5.000) ˗bha.

5 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö Zuifö ˗nu ˗gɔmɛn ˗nu, mɛn zii ˗nu waa ˈtɔŋ˗ ˗gɔmɛn ˗nu ˗wo dho wo ˈkwëëdhö Zedhizadhɛmö. 6 ˈˈSaabhomɛn ˈkpii˗ Anö, Kaifö, Zan, Alɛzandrö waa mɛn ˈˈpɛpɛ ˈwo kun ˈˈsaabhomɛn ˈkpii˗ ˗bha ˈkɔɔmɛn ˗nu ˈka, ˗wo ˗kun mü ˈpö. 7 ˈYö ˈwo Piɛɛ waa Zan ˗an dɔ wo ꞊zinŋgü ˈö ˈwo ˗ya dhɛɛˈˈ ˗kpɔ ˗an ˗gɔ ˗sü ˗bha ˈwo˗ pö: «ˈˈPiigbɩɩdhɛ ˈö ˈka ˈwɔn ˈö bhë ˗a ˗kë ˗a ˈka bhë ka ˗go ˗a ˈka ˈˈmɛn, ɛɛnˈˈ ˈka˗ ˗kë ˈˈdhʋ̈ de ˈtɔ ˈgü?» 8 ˈDhɛ ˈö ˗kë ˈˈdhʋ̈, ˈyö ˗zuu ˈˈslʋ̈ʋ̈slʋ̈ ˗yö pa Piɛɛ ˈgü, ˈö Piɛɛ ˗ya pö ˗an ˗dhɛ:

«˗Gɔmɛn ˗nu kaa mɛn zii ˗nu, 9 ˗ya kë ꞊dhɛ ˈwɔn ˗së ˈö ˈyi˗ ˗kë mɛn ˈö ꞊niɔɔnmɛn ˈka ˗a ˗dhɛ yö ˈnën ˈö ˈka˗ dhɛɛˈˈ ˈkpɔ ˗ni ˈgü yi ˗gɔ ꞊dɛɛ, ˈö ˈka˗ ˈˈpiʋ̈ ꞊dhɛ ˗kɔ ˈö ˗kë ˗a ˈka ˈö˗ ˗dhɛ ˗yö bo ˈka˗ dɔ bhë, 10 kö ˗a ˈwɔn ˗yö kë kaa Izraɛdhö ˗mɛn ˗nu ˈˈpɛpɛ ka ˈˈɲaan ꞊dhɛ Yesu Klito ˈö go Nazadhɛtö ˈö ˈka˗ zë ˈˈdhü ˗bha, ˈˈkɛɛ ˈö ˗Zlan ˗ya bho ga ˈgü bhë, yö ˈnën ˈyi˗ ˗kë ˗a ˈtɔ ˈgü. Yö ˈnën ˈö˗ ˈsaa˗ ˈgü ˈö gɔndënën ˈö bhë ˗ya kë ö ˈflëëgü ˈö dɔ ka ˈˈɲan ˈˈdhiʋ̈ bhë. 11 Yö ˈnën ˈö ˗tɔ ‹˗gwö ˈö mɛn ˈö ˈka ˈkɔdɔmɛn ˗nu ˈka ˈka˗ sü ˗gwö ˈö˗ ꞊bhlëë ˈyaa ˈdhö ˗a ˈka, ˈˈkɛɛ ˈyö ˗ya kë ˗gwö ˗wɔn ˈˈgbɩɩ˗ ˗sü* ˈka› bhë. 12 ˗Ya ˈgo mü ˈzü, mɛn ˈˈwɛɛ ˈbhaa ˈö dhasü dho bɔ ˗a ˗ta kö yö ˈti kë ˗a ˈka ˈyaa ˈdhö. ˗A ˗gɛn ˗mü ꞊dhɛ ˈtɔ ˈbhaa ˈkö dho kë ˈˈkpɔnŋ ꞊taa yö ˈö ˈwo˗ nu mɛnbhɩɩdhe ˗dhɛ ˈö kwa dua ˈdhö ˗mü kö ˈkwa bɔ ˗a ˗ta ˈkwa dha, ˈyaa ˈdhö.»

13 ˈDhɛ ˈwo Piɛɛ waa Zan ˗an ˗bha ˈwɔn blɛɛˈˈ ˗sü ˈö ˗zogbandhe ˈka bhë ˗a yö, ˈö ˈwo˗ yö ˈpö ꞊dhɛ wo ˈti ꞊klaŋ kë, mɛn ˗bhaasü ˗nu ˗mü ˗an ˈka, ˗a ˈwɔn ˗yö ˗an ˗kun ꞊dedewo. ˈDhɛ ˈö ˗kë ˈˈdhʋ̈, ˈyö ˈwo˗ ˈgüman ꞊dhɛ mɛn ꞊plɛ ˈwo bhë ˗wo ˗kun Yesu ꞊kee˗. 14 ˈˈKɛɛ kë ˈö˗ wo ꞊dhɛ mɛn ˈwo˗ ˗dhɛ bo bhë ˗yö ˗kun dɔ ˗sü ˈka ˗an ˈˈsuee, ˈö ˗an ˈˈɲan ˗yö kun ˗a ˗bha bhë, pë ˈwo ˗dho ˗a pö ˗an ˗dhɛ ˈwaa kun ˗a dɔ ˗ni ˈgü. 15 ˈYö ˈwo˗ pö ˗an ˗dhɛ ˗wo ˈgo za ˗kan ˗a ˈgü ˗kɔ ˈö bhë ˗a ˈgü ˗wo yö ˈˈkpɛnŋ. ˈDhɛ ˈwo wo bo ˗an ˗yö ˈˈkpɛnŋ ˗sü ˈka, ˈyö ˈwo wo ˗gɔ dun, 16 ˈö ˈwo˗ pö wo ˈko ˗nu ˗dhɛ: «ˈMɛn ˈwo yö ˗mën ˈö ˈkwa dho ˗a kë ˗an ˈka? ˗Wa ˗dhidha ˈkpikpi do ˈö Zedhizadhɛmö ˗mɛn ˗nu ꞊gban ˈˈpɛpɛ ˗wa yö ˗a kë. ˈKwaa ꞊mɔɔn˗ ˗bha ˈkwa˗ ˗da zɔɔdhe ˈgü. 17 ˈKwa˗ pö ˈwɔn ˈö bhë ˗a ˗tɔɔ ˈyaa ˗dho ˗pɛn, ˗kwa ˈˈsuʋ̈ ˗da ˗an ˈgü, ˈkwa˗ pö ˗an ˗dhɛ ˈwaa ˗dho ˈwɔn blɛɛˈˈ mɛn ˈbhaa ˗dhɛ ˈzü mɛn ˈö bhë ˗a ˈtɔ ˈgü.»

18 ˈDhɛ ˈwo wo bo, ˈyö ˈwo ˗an ˗dhɛ ˈö ˈwo ˈtɔŋ˗ dɔ ˗an ˗ta ˈwo˗ pö ˈwaa ˗dho ˈwɔn blɛɛˈˈ mɛn ˗nu ˗dhɛ ɛɛnˈˈ mɛn ˗nu ꞊klaŋ kë Yesu ˈtɔ ˈgü ˈzü toŋtoŋdhö. 19 ˈˈKɛɛ ˈdhɛ ˈwo˗ pö ˈˈdhʋ̈, ˈyö Piɛɛ waa Zan ˈwo˗ pö ˗an ˗dhɛ: «˗Ya kë ꞊dhɛ ˗a ˗ga ˈö ˈka˗ wo bhë ˗yö ˗Zlan ˗dhɛ ˗së kö ˈyi yi ˈˈtʋ ˈto ka ˗zë ka ˗wo ˗bha kö ˗yö ʒiö ˗a ˈka pë ˈö˗ pö yi ˗dhɛ ˗a kë ˗sü ˗ta, ˗a ˗dhɛ ˈö bhë ka ˗bha ˈwɔn ˈnën ˈö bhë. 20 ˈˈKɛɛ yi ˗zë ˈyaa ꞊mɔɔn˗ ˗bha kö ˈwɔn ˗nu ˈö yi ˈˈɲan ˗yö ˗da ˗an ˈgü waa ˈwɔn ˗nu ˈö ˈyi ˗an man, ˈyi yi ꞊kwaa ˗an ˗wɔn blɛɛˈˈ ˗sü ˗zü.» 21 ˈDhɛ ˈwo wo bo ˈˈsuʋ̈ ˗da ˗an ˈgü ˗sü ˈka ˈzü, ˈyö ˈwo wo ꞊kwaa ˗an ˗zü, ˗a ˗gɛn ˗mü ꞊dhɛ pë ˈwo ˗dho ˗gban ˗a ˗ta kö ˗wo ˈwɔn bho ˗an ˈgü ˈyaa ˈdhö. ˗Ya ˈgo mü ˈzü, ˗wo ˗kun ˈˈsuʋ̈ ˗ni ˈgü ˈˈsɛgümɛn ˗nu ˗gɔ, ˈyö sü ꞊dhɛ mɛn ꞊gban ˈˈpɛpɛ ˗wo ˗kun ˗Zlan ˈtɔ bhɔ ˗ni ˈgü ˈwɔn ˈö ˗kë bhë ˗a ˗wɔn ˈgü. 22 Gɔndënën ˈwo˗ ˗dhɛ bo ˗dhidha kë ˗sü ˈka bhë, ˗a ˈˈtʋ̈ŋ ˈö bhë ˗a ˈgü kö ˗a ˗kwɛ ˗ya ʒiö ˗kɔŋ ˗yiishiö (40) ˗ta.

23 ˈDhɛ ˈwo wo ꞊kwaa Piɛɛ waa Zan ˗an ˗zü, ˈyö ˈwo dho Yesu ˗bha gwëëˈˈ ˗nu ˈwo to ˗an ˈˈpiʋ̈. ˈYö pë ˈö ˈˈsaabhomɛn ˗nu ˗gɔmɛn ˗nu waa mɛn zii ˗nu ˗wa pö ˗an ˗dhɛ bhë ˈwo˗ ꞊blɛɛ ˗an ˗dhɛ. 24 ˈDhɛ ꞊waa˗ man ˈˈdhʋ̈, ˈyö ˗an ꞊gban ˈˈpɛpɛ ˗wo wo ˗wo ˗kë do ˈö ˈwo ꞊bhɛɛ ˗Zlan ˗dhɛ ˈwo˗ pö:

«Yi Dëmɛn ˗Gblüdë, bhi ˈnën ˈü dhaŋ˗, ˈˈsɛ, ꞊weeyi waa ˗an ˈgüpë ˗nu ꞊gban ˈˈpɛpɛ ˗da. 25 Bhi ˈnën ˈü bɔ ü ˗bha ˗zuu ˈˈslʋ̈ʋ̈slʋ̈ ˗ta ˈü dhiaŋ dɔ yi ˈˈbhɛman Davi ˈö ˗kë ü ˗bha yökëmɛn ˈka bhë ˗a ˈˈdhi, ˈö˗ pö: ‹ˈMën ˗kë ˈö ˈˈsɛgɔ ˗nu ˈgümɛn ˗nu ˗wo dɔ wo ˈˈvuu ˈgü, ˈö ˈwo wo ˗zota ˈwɔn ˗nu ˈö ˗an ˗yö ˗a ˗bha ˗pë ˈyaa ˈdhö ˗an ˈgü? 26 ˗Gblüdë ˗nu ˈwo ˈˈsɛ ˗ta ˗wa luuˈˈ, ˈö ˈˈsɛkɔɔnmɛn ˗nu ˗wa ˈdho wo ˈkwëë˗ ꞊dhɛ mɛn do ˈdhö kö ˈwo nu Zoova waa˗ ˗bha mɛn ˈö ˈˈɲɔn ˗lo ˗a ꞊troo* bhë ˗an ˗gɔ.› 27 ˗Yö ˗kë ˈˈdhʋ̈ ˈpö ꞊dede ˈka. Edhɔdö ˈdhöö, Pɔnsö Pidhatö ˈdhöö, ˈˈsɛ ˈˈwɛɛ ˈgümɛn ˗nu waa Izraɛdhö ˗mɛn ˗nu ˈdhöö, ˗wo ˗dho wo ˈkwëëdhö ˈˈkwipö ˈö yö ˗a ˈgü ˈö ˈwo nu ü ˗bha yökëmɛn ˈˈslʋ̈ʋ̈slʋ̈ Yesu ˈö ˈü ˈˈɲɔn ˗lo ˗a ꞊troo bhë ˗a ˗gɔ, 28 kö pë ˈü˗ to ˈˈdhiʋ̈ ˈü ˗we ˗a ˗bha ü ˗bha ˈˈpiigbɩɩdhɛ ˈka, ˈö ˗bɛ ü dhɔɔbhaawɔn ˗bha bhë ˗wa kë. 29 ˈDhɛ ˈö ˈˈdhʋ̈, Zoova, ˗bhö ˗an ˗bha ˈˈsuʋ̈ ˗da yi ˈgü ˗wo ˗nu bhë ˗an ˗ga kö ˈü ꞊faan nu ü ˗bha ꞊dhuëŋ ˗nu yi ˗dhɛ, kö ˈyi ü ˈˈdhiwo pö ˗kplawo ˗zogbandhe ˈka. 30 Ü ˗bha ˈˈpiigbɩɩdhɛ ˗zɔn ˈpö ˈˈyuamɛn ˗nu ˗dhɛ bo ˗sü waa ˗dhidha ˗nu kë ˗sü ˈka ü ˗bha yökëmɛn ˈˈslʋ̈ʋ̈slʋ̈ Yesu ˈtɔ ˈka.»

31 ˈDhɛ ˈwo wo bo ꞊gbɛ ˈˈoo kë ˗sü ˈka ˗Zlan ˗dhɛ ꞊dhɛ ˗kɔ ˈö bhë ˗a ˈdhö, ˈyö ˗dhɛ ˈwo kun ˗a ˗bha wo ˈkwëëdhö bhë ˈö ꞊zii, ˈö ˗zuu ˈˈslʋ̈ʋ̈slʋ̈ ˗yö ˗an ꞊gban ˈˈpɛpɛ pa ˈö ˈwo ˗ya ˗zlanwopö ˗sü ˗bha ˗zogbandhe ˈka.

32 ˗Ya ˈgo mü ˈzü, Yesu ˗bha gwëëˈˈ ˗nu ꞊va ꞊dede ˈwo bhë ˗wo ˗kun ꞊dhɛ mɛn do ˈdhö ˈö ˗an ˗zotagüwɔn kun do.* Mɛn ˈdhɛ ˈö ˈdhö pë ˈö kun ˗a ˗gɔ ˈyaa kun ˗a pö ˗ni ˈgü ꞊dhɛ yö do ö ˗bha ˗mü, ˗wa ꞊gban ˈˈpɛpɛ ˗lo ˈko ˈˈpiʋ̈. 33 Bɔmɛn ˗nu ˗kun Dëmɛn Yesu ˗bha ˗go ga ˈgü ˗sü ˗wɔn blɛɛˈˈ ˗ni ˈgü ˈpö ˗kplawo ˈˈpiigbɩɩdhɛ ˈka, ˈö ˗Zlan kun ˈdhuëë˗ ˈkpɔ ˗ni ˈgü ˗an ꞊gban ˈˈpɛpɛ ˗bha* ꞊dedewo. 34 Pë ˈbhaa ˗wɔn ˗kpla ˈyaa kun mɛn ˈˈoo ˗mɛn ˗bha ˗an kpö ˈgü, ˗a ˗gɛn ˗mü ꞊dhɛ mɛn ˈˈpɛpɛ ˈö ˗dhɛ ˗nu waa ˈkɔ ˗nu ˗wo kun ˗an ˗gɔ, ˗wo ˗an ˈˈdhoodɔ ˈö ˈwo nu ˗a ˈwëë˗ ˈka 35 ˈwo˗ nu bɔmɛn ˗nu ˗dhɛ. ˈYö bɔmɛn ˗nu ˗wa ˗gblü, ˈyö ˗a mɛn ˈö ˈdhö pë ˈö ˗dho ˗kpla bho ˗a ˗bha ˈwo˗ nu ˗a ˗dhɛ. 36 Zozɛfö ˈö bɔmɛn ˗nu ˗wa ˗dhɛ ˈpö Baanabasö (꞊waa˗ pö ˈˈdhʋ̈ ˗a ˗gɛn ˈnën ˗tɔ «Mɛn ꞊faanmënmɛn»)* ˈö ˗kë Levi mi ˈö go Shiplë ˗a ˈka bhë, 37 ˗dhɛ do ˈbhaa ˗yö ˗kun ˗a ˗gɔ, ˈyö˗ ˈˈdhoodɔ ˈö nu ˗a ˈwëëga ˈka ˈö˗ nu bɔmɛn ˗nu ˗dhɛ.