Yesu ˗bha bɔmɛn ˗nu këwɔn ˗nu

5 Gɔndënën do ˈbhaa ˈwo˗ ˗dhɛ Ananiasö waa ö ˗bha dhebɔ Safidha ˗an ˗wo ˗yö ˗mɔn ˈö ˈwo dho ˈpö ˈwo wo ˗bha ˗dhɛ do ˈbhaa ˈˈdhoodɔ. 2 ˈˈKɛɛ ˈyö˗ gɔndënën ˗ya ˈwëëga ˈbhaa ˗bin ö ˈbɔɔ ˈˈɲaan ˈka, ˈyö˗ ˗dhɛ ˈö to ˈö dho ˈö˗ nu bɔmɛn ˗nu ˗dhɛ. 3 ˈDhɛ ˈö ˗kë ˈˈdhʋ̈, ˈyö Piɛɛ ˗ya pö: «Ananiasö, ˈmën ˗kë ˈö ˈü ü ꞊kwaa Sɔtraan ˗zü ˈö ü ˗blü ˈü ꞊sua ˗kë ˗zuu ˈˈslʋ̈ʋ̈slʋ̈ ˗gɔ, ˈö ü ˗bha ˗dhɛ ˈü˗ ˈˈdhoodɔ bhë ˈü˗ ˈwëëga ˈbhaa ˗bin? 4 Ü ˈti˗ ˈˈdhoodɔ ˗be, kö ü ˗bha ˗dhɛ ˈyaa ˗mü ˗kplawo ˗ee? Ɛɛnˈˈ ˈwëëga ˈü˗ ˈˈdhoodɔ ˗a ˗bha bhë, ü ˗bha ˈyaa ˗mü ˗ee? Pë ˈö ˗dhi ü ˗dhɛ ˈbhaa ꞊mɔɔn˗ ˗bha ˈü˗ kë ˗a ˈka ˗ee? ˈMën ˈö ˗kë ˈsa ˈö ˈwɔn ꞊suu ˈö ˈˈdhʋ̈ ˈü˗ ˗yökodhiʋ̈ ˗kë ü zuʋ̈ˈˈ ˈgü? ꞊Sua ˈü˗ ˗kë bhë ü˗ ˗kë ˗Zlan ˗gɔ, ü ˈti˗ ˗kë mɛnbhɩɩdhe ˗nu ˗gɔ.» 5 ˈDhɛ Ananiasö ˗yö ˗wo ˗nu ˈwo bhë ˗an man, ˗yö ˗puö ˈˈshia˗ mü ˈö ga. Mɛn ˈˈpɛpɛ ˈö ˈwo ˈwɔn ˈö bhë ˗a man, ˈˈsuʋ̈ ˗zizisü ˗yö ˗da ˗an ˈgü. 6 ˈDhɛ ˈö ˗kë ˈˈdhʋ̈, ˈyö wlüünën gɔɔn˗ ˗nu ˗wo ꞊luu ˈö ˈwo sɔ ꞊plʋʋ ˗a ˈka ˈö ˈwo dho ˈwo˗ ˗wɛɛ bho.

7 ˈDhɛ ˈö ˈˈlɛlɛ ˈö ˗mɔn ˗yaaga ˗bha ˈö ˗ʒiö, ˈyö˗ ˗bha dhebɔ ˗yö nu ˈö ˗da ˈkɔɔ kö ˈwɔn ˈö ˗kë bhë yö ˈti˗ man ꞊köŋ. 8 ˈYö Piɛɛ ˗ya pö ˗a ˗dhɛ: «˗Dhɛ ˈö ˈka˗ ˈˈdhoodɔ bhë, ˗a ˈwëëga ꞊gban ˈnën ˈö yö ˗ee?» ˈYö˗ ˗yɔ bɔ ˈö˗ pö: «꞊Ii, ˗a ꞊gban ˈnën ˈö bhë.» 9 ˈDhɛ ˈö˗ pö ˈˈdhʋ̈, ˈyö Piɛɛ ˗ya pö ˗a ˗dhɛ: «ˈMën ˗kë ˈö mɛn ꞊plɛ ꞊gban ka ˗wo ˗yö ˗kë do kö ˈka Zoova ˗bha ˗zuu ˈgüdan? ˗Dhɛ ˗ga, mɛn ˗nu ˈö ˈwo go ü ꞊gɔn ˗wɛɛ bho bhë ˗wa yö ˈˈkpan ˈˈdhiʋ̈ ˈsaadhö, ˗wo ˗dho ˈdho ü ˈka ˈpö ˈwo ü ˗wɛɛ bho.» 10 ˗A dhebɔnën ˗to ˈˈshia˗ mü ˈö ˗puö ˗a ꞊gɛnŋdhö ˈö ga. ˈDhɛ ˈö wlüünën gɔɔn˗ ˗nu bhë ˈwo ˗da ˈkɔɔ ˈö ˈwo˗ yö ꞊dhɛ ˗ya ga, ˈyö ˈwo dho ˗a ˈka ˈpö ˈwo˗ ˗wɛɛ bho ˗a ꞊gɔn ˈˈsuee. 11 ˗A ˈwɔn ˈö bhë ˗yö ˈˈsuʋ̈ ˗ziisü ˗da ˗Zlan ˗bha ˈkɔdhigümɛn ˗nu waa mɛn ˈˈpɛpɛ ˈö ˈwo˗ man ˗an ˈgü.

12 ˗Ya ˈgo mü ˈzü, bɔmɛn ˗nu ˗wo ˗kun ˗dhidha ꞊va ꞊dede waa ˈwɔn ˈˈmlünmlünsü ˗nu kë ˗ni ˈgü ˈˈsɛgümɛn ˗nu ꞊zinŋgü mü ˗kplawo. ˗An ꞊gban ˈˈpɛpɛ ˗wo ˗kun ˈdho ˗ni ˈgü wo ˈkwëëdhö Sadhomɔn bɔdhɛ ˈö ꞊gban ˈˈdhü ˗nu ꞊zinŋgü bhë ˗a ˈgü. 13 ˗Yö ˈˈdhʋ̈ ꞊dhɛ ˗dho ˗an ˈˈpiʋ̈ ˗sü ꞊faan ˈyaa kun mɛn ˈˈwɛɛ ˈbhaa ˗gɔ, ˈˈkɛɛ mɛn ˗nu ˗wo ˗kun ˗an ˗wɔn ˗së blɛɛˈˈ ˗ni ˈgü. 14 ˗Ya ˈgo mü ˈzü, gɔɔn˗ ˗nu waa dhebɔ ˗nu ꞊va ꞊dede ˗wo ˗kun ˗da ˗ni ˈgü ˗an ˈˈpiʋ, ˈö ˗zo ˗yö Dëmɛn ˗dhɛ ˗mɛn ˗nu kun kë ˗ni ˈgü ꞊va ˗kplawo. 15 Mɛn ˗nu ˗kun nu ˗ni ˈgü ˗ʒiaanwo mɛn ˗nu ˈö ˈwaa wo ˈflëëgü ˗an ˈka, ˈö ˈwo ˗an ˗wɔ ˈlii˗ ˈsɛɛn˗ ˗nu, ɛɛnˈˈ sɛɛˈˈ ˗nu ˗ta ˗kpinŋ ˈˈpiʋ̈, ˗yö kë ˈˈdhʋ̈ kö Piɛɛ ˗ya bɔ ˗dhɛ ˈö bhë ˗a ˈgü, ˗a ˈˈbin ˈˈkpaan ˗yö ˗man ˗a mɛn ˈbhaa ˗nu ˗bha kö ˗wo dha. 16 ˗Ya ˈgo mü ˈzü, mɛn ˗nu ˗kun ˈgo ˗ni ˈgü ˈpödhɛ ˗nu ˈwo Zedhizadhɛmö ˗dhɛ ˗züzü ˗an ˈgü, ˈö ˈwo nu ˈˈyuamɛn ˗nu waa mɛn ˗nu ˈö ˗zuu yaa ˈdhö ˗an ꞊sëëbho ˗ni ˈgü ˗an ˈka, ˈö ˗an ꞊gban ˈˈpɛpɛ ˗dhɛ ˗yö bo.

17 ˈDhɛ ˈö ˗kë ˈˈdhʋ̈, ˈyö ˈˈsaabhomɛn ˈkpii˗ waa mɛn ˈˈpɛpɛ ˈwo kun ˗a ꞊kee˗, ˈö ˈwo ˗kë Zuifö ˗nu ˗bha ˗zlanwo ˈgümɛn ˗nu ˈwo ˗an ˗dhɛ Sadusiɛn ˗nu ˗an ˈka bhë, ˈö ꞊druɛɛ ˗yö ˗da ˗an ˈgü ˈö ˈwo ꞊luu. 18 ˈYö ˈwo bɔmɛn ˗nu kun ˈö ˈwo ˗an ˗da ˗kasö ˈgü. 19 ˈˈKɛɛ ˈdhɛ ˈö ˈkwa dɔ gbeŋ, ˈyö Zoova ˗bha ˈˈkiö do ˗yö ˗kaso ˗kɔ ˈˈkwee ˗nu ˗pʋ ˈö ˗an yö ˈˈkpɛnŋ, ˈyö˗ pö ˗an ˗dhɛ: 20 «˗Ka ˈdho ˗Zlan ˗dhɔkë ˗a ˈgü ˗kɔ ˈgü kö ˈwɔn ꞊gban ˈˈpɛpɛ ˈö ˗gban ˗tosɛta ˈö bhë ˗a ˗bha ˈka˗ blɛɛˈˈ mɛn ˗nu ˗dhɛ ˗kplawo.» 21 ˈDhɛ ˈwo ˗wo ˈö bhë ˗a man, ˗wo ˗soo ˈö ˈwo dho ˗Zlan ˗dhɔkë ˗a ˈgü ˗kɔ ˈgü ˈö ˈwo ˗ya mɛn ˗nu ꞊klaŋ kë ˗sü ˗bha.

ˈDhɛ ˈö ˈˈsaabhomɛn ˈkpii˗ waa mɛn ˗nu ˈwo kun ˗a ꞊kee˗ bhë ˈwo nu, ˈyö ˈwo zakanmɛn ˗nu waa mɛn zii ˗nu ˈˈpɛpɛ ˈö ˈwo Izraɛdhö ˗an ˗dhɛ wo ˈkwëëdhö, ˈö ˈwo mɛn bɔ kö ˗wo ˈdho ˗wo nu bɔmɛn ˗nu ˈwo ˗an ˗da ˗kaso ˈgü bhë ˗an ˈka. 22 ˈˈKɛɛ ˈdhɛ ˈö ˗Zlan ˗dhɔkë ˗a ˈgü ˗kɔ ˗maankëmɛn ˗nu ˈö ˈwo ˗an bɔ bhë ˈwo ˗lo mü, wo ˈti ˗kpan ˗an ˗bha ˗kaso ˈgü mü. ˈYö ˈwo wo ꞊yɛɛ ˗kë ˈwo nu ˈö ˈwo˗ ꞊blɛɛ ˗an ˗dhɛ, 23 ˈö ˈwo˗ pö: «Yi ˗kpan ˗kaso ˈˈkwee ˗nu ˗bha kö ˗wo ta ˗sü ˈka ˗laklɩɩ ˈka ˗së ˈka, kö ˈˈglaadhiʋ̈sümɛn ˗nu ˗wo dɔ ˗sü ˈka ˗a ˈˈkwee ˈˈdhi ˗nu ˗bha. ˈˈKɛɛ ˈdhɛ ˈyi ˈˈkwee ˗pʋ, yi ˈti ˗kpan mɛn ˈˈwɛɛ ˈbhaa ˗bha ˈkɔɔ.» 24 ˈDhɛ ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗gɔmɛn waa ˈˈsaabhomɛn ˗nu ˗gɔmɛn ˗wo ˗wo ˈö bhë ˗a man, ˈyö ˗an zuʋ̈ˈˈ ˗yö ꞊kaankwöö, ˈö ˈwo ˗ya wo ˗de dhɛɛˈˈ ˈkpɔ ˗sü ˗bha pë ˈö ˗dho kë ˈwɔn ˈö bhë ˗a ˈgü ˗a ˈka. 25 ˈDhɛ ˈö ˗kë ˈˈdhʋ̈, ˈyö mɛn do ˈbhaa ˗yö nu ˈö˗ pö ˗an ˗dhɛ: «˗Ka ˗dhɛ ˗ga, mɛn ˗nu ˈö ˈka ˗an ˗da ˗kaso ˈgü bhë ˗wo dɔ ˗sü ˈka ˗Zlan ˗dhɔkë ˗a ˈgü ˗kɔ ˈgü ˗de ˗wo mɛn ˗nu ꞊klaŋ kë ˗ni ˈgü.» 26 ˈDhɛ ˈö ˗kë ˈˈdhʋ̈, ˈyö ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗gɔmɛn waa ö ˗bha mɛn ˗nu ˗wo dho ˈö ˈwo nu bɔmɛn ˗nu bhë ˗an ˈka, ˈˈkɛɛ wo ˈti pë ˈˈdhiʋ̈˗ kë ˗an ˈka, ˈyö sü ꞊dhɛ ˗wo ˗kun ˈˈsuʋ̈ ˗ni ˈgü ˈˈsɛgümɛn ˗nu ˗gɔ, ˈwaa kun ˗a ˈˈpiʋ̈ ꞊dhɛ ˗wo wo ˗zuö ˗gwö ˈka.

27 ˈDhɛ ˈwo nu ˗an ˈka, ˈwo ˗an dɔ zakanmɛn ˗nu bhë ˗an ˗kuu ˈˈdhiʋ̈, ˈyö ˈˈsaabhomɛn ˈkpii˗ ˗yö dhɛɛˈˈ kpɔ ˗an ˗gɔ. 28 ˈYö˗ pö ˗an ˗dhɛ: «Yi ˈtɔŋ˗ ˗dɔ ka ˗ta ꞊glɔɔglɔɔdhö ˈö ˈyi˗ pö ꞊dhɛ ˈkaa ˗dho mɛn ˗nu ꞊klaŋ kë mɛn ˈö bhë ˗a ˈtɔ ˈgü ˈzü. ˈˈKɛɛ ˗ka ˗dhɛ ˗ga, ka ˗bha ꞊klaŋ ˗wo ˗nu ˗wa Zedhizadhɛmö ˗dhɛ ꞊gban ˈˈpɛpɛ ˈsü, ˈö ˈka˗ ˈˈpiʋ̈ gboŋgboŋdhö ꞊dhɛ ˈka mɛn ˈö bhë ˗a zë ˗wɔn ˈto yi ˗bha.» 29 ˈYö Piɛɛ waa bɔmɛn ˗nu ˈwo to ˈwo˗ pö ˗a ˗dhɛ: «Yi dua ˗mü ˈyi yi ˗gɔ ˈdho ˗Zlan ˗dhɛ ˈˈshia˗ kö ˗yö ʒiö ˗a ˈka mɛnbhɩɩdhe ˗ta. 30 Yesu ˈö ˈka˗ dɔ ˈˈdhü ˗bha, ˈö ˈka˗ zë bhë, kwa ˈˈbhɛman ˗nu ˗bha ˗Zlan ꞊yaa˗ bho ga ˈgü. 31 ˗Zlan ꞊yaa˗ ˗gɔ ˈˈdhiʋ̈ luuˈˈ ꞊yaa˗ ˗ya ö ˗kɔ ˗së ˈgü, ꞊yaa˗ kë Mɛn ˈö ˗këdhösü dho bɔ ˗a ˗ta waa Mɛndhamɛn ˈka, ˗yö kë ˈˈdhʋ̈ kö Izraɛdhö ˗yö bɔ ˗a ˗ta kö ˗yö ˈgo ö ˗bha ꞊sɔŋ yaa ˈgü ˗yö ö zuʋ̈ˈˈ slëëˈˈ, kö ˗a ˗bha ˈwɔn yaa ˗nu ˗bhawɔn ˗yö ˈto. 32 ˈWɔn ˗nu ˈwo bhë yi ˗an ꞊gbɛkiö ˈka, ˈö ˗zuu ˈˈslʋ̈ʋ̈slʋ̈ ˈö ˗Zlan ˗ya nu mɛn ˗nu ˈwo wo ˗gɔ dho ˗a ˗dhɛ ˈˈshia˗ ˗an ˗dhɛ bhë, ˈö˗ ꞊gbɛkiö ˈka ˈpö.»

33 ˈDhɛ ˈwo˗ man ˈˈdhʋ̈, ˈyö ˈwɔn ˗yö ˗shiö ˗an ˗dhɛ ꞊dedewo, ˈyö bɔmɛn ˗nu bhë ˗an zë ˗dhɔ ˗yö ˗da ˗an ˈgü. 34 ˈˈKɛɛ ˈyö Fadhiziɛn mi do ˈö ˈwo˗ ˗dhɛ Gamaliɛdhö ˈö dɔ ö ˗gɛn ˗ta zakandhɛ ˈö bhë ˗a ˈgü mü. ˗Yö ˗kun ˈTɔŋ˗ ˗zɔnmɛndhɛmɛn do ˈö mɛn ꞊gban ˈˈpɛpɛ ˗wa ꞊bhlëë ˗ya ˗a ˈka. ˈYö˗ pö ˗wo ˈdho bɔmɛn ˗nu ˈwo bhë ˗an ˈka ˈˈkpɛnŋ ꞊köŋ ˈdɛdɛ ˈka. 35 ˈDhɛ ˈwo yö ˈˈkpɛnŋ, ˈyö˗ pö ˗an ˗dhɛ: «Izraɛdhö ˗mɛn ˗nu, ˗ka ka ˗de ˈkun pë ˈö ˈka˗ ˈˈpiʋ̈ ˈka˗ kë mɛn ˗nu ˈwo bhë ˗an ˈka bhë, ˗a ˗bha. 36 ˗A yi ˈti ꞊gwëë ꞊köŋ ˈö Teudasö ˗yö ꞊luu, ˈö˗ pö ö ˗de ˗dhɛ ö ꞊bhlëësü, ˈö mɛn ˈwo ˗mɔn mɛn* këŋ ˗yiishiö (400) ˗bha ˈwo bɔ ˗a ˈka. ˈˈKɛɛ ˗wa ˗zë, ˈö mɛn ˈˈpɛpɛ ˈwo kun ʒiö ˗ni ˈgü ˗a ꞊kee˗ bhë ˈwo ˗pɛn, ˈö ˗dhɛ ˗ta ˗yö ga ˈwɔn ˈö bhë ˗a ˈgü. 37 ˈDhɛ ˈö mɛn ˈdhɛ ˈö bhë ˗a ˗bha ˗yö ˗ʒiö, ˈˈtʋ̈ŋ ˈö mɛn dhʋŋsü ˗yö ˗kë ˗a ˈka bhë, Zuda ˈö go Galile ˗yö ˗da mɛn ꞊vadhɛ ˈˈtʋʋ, ˈö ˈwo ˗ʒiö ˗a ꞊kee˗. Yö ˗de ˈpö ˗wa ˗zë, ˈö mɛn ˈˈpɛpɛ ˈwo kun ˗a ꞊kee˗ bhë ˈwo ˗pɛn. 38 ˈDhɛ ˈö ˈˈdhʋ̈ ˈwɔn ˈdhɛ ˈö ˈkwa˗ ˈgü yö, n ˗man ˈa˗ dɔ ˈyö ꞊nɛn: ˗ka ka ˈˈtʋ bho ˈmɛn ˈwo bhë ˗an ˗bha, ˈka ka ꞊kwaa ˗an ˗zü. ˗Ya kë ꞊dhɛ ˈwɔn ˈwo ˗da ˗a ˗ʒian ˗ta ɛɛnˈˈ yö ˈwo˗ kë ˗ni ˈgü bhë mɛnbhɩɩdhe ˗nu ˈgü ˗wɔn ˗mü, yö ˈti ˗dho yö ˗an ˗gɔ pë ˈbhaa ˗bha. 39 ˈˈKɛɛ ˗ya kë ꞊dhɛ ˈwɔn ˈö go ˗Zlan ˈgü yö ˗mü, ka ˗kɔ yö ˈti ˗dho ˗mɔn ˗an ˗bha. Ka ˈti˗ kë ˗së ˈka ˗ʒiaanwo, ka ˗dho ˗gban ˗Zlan ˗gɔ ka ˗de ˈtii ˈka.» 40 ˗Wo wo ˈˈtʋ ˗to ˗a ˗bha ˗dhioo ˈö bhë ˗a ˗bha. ˈDhɛ ˈö ˈwo bɔmɛn ˗nu bhë ˗an ˗dhɛ ˈwo ˗an ˗man ˗klaaga ˈka, ˈyö ˈwo˗ pö ˗an ˗dhɛ ˈwaa ˗dho ˈwɔn blɛɛˈˈ Yesu ˈtɔ ˈgü ˈzü toŋtoŋdhö, ˈyö ˈwo wo ꞊kwaa ˗an ˗zü.

41 ˈDhɛ ˈö ˗kë ˈˈdhʋ̈, ˈyö bɔmɛn ˗nu bhë ˈwo go zakanmɛn ˗nu bhë ˗an ˗kuu ˈˈdhiʋ̈ zuʋ̈niidadhe ꞊dede ˈka. ˗A ˗gɛn ˗mü ꞊dhɛ ˗an ˈˈklʋʋ ˈö ˈwo˗ bhɔ Yesu ˈtɔ ˗wɔn ˈgü bhë, ˗yö ˗kun ˗an ˗dhɛ ꞊bhlëëwɔn ꞊dede ˈka. 42 ˗Dhɛkpaɔyi ꞊gban ˈˈpɛpɛ ˈka, ˗wo ˗kun mɛn ˗nu ꞊klaŋ kë ˗ni ˈgü ˗kplawo, ˈö ˈwo nɔɔn˗ ˗së ˈö ˗gban Yesu Klito ˗bha ˗a pö ˗an ˗dhɛ ˗Zlan ˗dhɔkë ˗a ˈgü ˗kɔ waa ˈkɔ ˈgü ˈkɔ ˈgü ˗dhɛ ˗nu ˈgü.