ˈö Matiö ˗ya ˗bɛnzë
20 «ˈYö ˗tɔ ꞊dhɛ ˗Gblüdëdhɛ ˈö dhaŋ˗ ˈgü ˗yö ꞊dhɛ ˈkɔdë do ˈö ˗soo dhiapiʋ̈ ˈö yö ˈˈkpɛnŋ kö ˈö mɛn ˗nu ˈsü kö ˗wo yö kë ö ˗bha ˗drɔɔn ˗bhla ˈgü ˗a ˈdhö. 2 ˈDhɛ ˈö waa˗ yökëmɛn ˗nu ˗an ˗wo ˗yö ˗mɔn ˗a ˈgü ꞊dhɛ ˗an ˗bha ˗dhɛkpaɔyi do ꞊saa ˗dho kë denie* do ˈka, ˈyö ˗an bɔ ö ˗bha ˗drɔɔn ˗bhla ˈgü kö ˗wo yö kë. 3 ˈDhɛ ˈö˗ ˈkɔdë ˗yö yö ˈˈkpɛnŋ ˈzü kö ˈˈlɛlɛ ˗ya kë ˈˈseishiö* dhiapiʋ̈, ˗yö ˗kpan ˈzü mɛn ˈbhaa ˗nu ˗bha ˈˈdhookwëëdhö kö wo ˈti yö ꞊slɔɔ ꞊köŋ. 4 ˈYö˗ pö ˗an ˗dhɛ: ‹ˈKa ˗de ˈpö ˗ka ˈdho n ˗man ˗drɔɔndhɛ ˈgü kö ˈka yö kë, a ˗dho ˗a ꞊saa ˈö ˗mɔn ˗a ˈka ˗a bho ka ˗gɔ.› 5 ˈYö ˈwo dho. ˈYö˗ ˈkɔdë ˗yö yö ˈˈkpɛnŋ ˈzü kö ˈɲaan˗ ˗ya ˗ya mɛn ˗gɔ ꞊zinŋgü,* ˈyö yökëmɛn ˈbhaa ˗nu sü. ˈYö yö ˈˈkpɛnŋ ˈˈdooka kö ˈˈlɛlɛ ˗ya kë ˗kɔŋ do ö ga ˈˈsoodhu,* ˈyö mɛn ˈbhaa ˗nu ˈsü ˈzü. 6 ꞊Taabha, ˈdhɛ ˈˈlɛlɛ ˗yö ˗kë ˗kɔŋ do ö ga ˈˈsɔɔplɛ,* ˈyö dho ˈö ˗kpan mɛn ˈbhaa ˗nu ˗bha kö ˗wo ˈduannu ˗sü ˈka, ˈyö˗ pö ˗an ˗dhɛ: ‹Ka ˗gloo ˗dhɛ ˈö yö ˗a ˈgü ꞊dɛɛ ˈö ka ˈti yö kë. ˈMën ˈö ˗kë?› 7 ˈYö ˈwo˗ ˗yɔ bɔ ˗a ˗gɔ ˈwo˗ pö: ‹Mɛn ˈbhaa yö ˈti yi ˈsü kö ˈyi yö kë ˗a ˗bha ˈka yö ˗mü.› ˈDhɛ ˈwo˗ pö ˈˈdhʋ̈ ˈyö˗ pö ˗an ˗dhɛ: ‹ˈDhɛ ˈö ˈˈdhʋ̈, ˗ka ˈdho ˈpö ˈka yö kë n ˗gɔ ˈbhlaa.›
8 «ˈDhɛ ˈö ˈˈbin ˗yö mën, ˈyö ˈbhladëmɛn ˗ya pö ö ˗bha ˈbhladhɛ ˈwɔnyëë˗ ˗dhɛ: ‹˗Bhö yökëmɛn ˗nu ˗dhɛ kö ˈü ˗an ꞊saabho. ˗A züdɔ mɛn ˗nu ˈö ˈwo nu ꞊taabha bhë ˗an ˗ta, kö ˈü˗ ˈˈdhiʋ̈ta ˗a mɛn ˗blɛɛsü ˗nu ˗ta.› 9 ˈDhɛ ˈö˗ mɛn ˗nu ˈö ˈwo yö züdɔ ˈˈlɛlɛ ˗kɔŋ do ö ga ˈˈsɔɔplɛ ˗naan ꞊taa bhë ˈwo nu, ˈyö˗ mɛn ˈö ˈdhö ˗a gba denie do ˈka. 10 ˈDhɛ ˈö˗ mɛn ˗nu ˈwo yö züdɔ ˗blɛɛsü bhë ˈwo nu, ˗an ˗bha ˈgü ˗be wo ꞊saa ˗dho kë ꞊va kö ˗yö ʒiö ˗a ˈka mü. ˈˈKɛɛ denie do ˈnën ˈwo˗ nu ˗a mɛn ˗dhɛ ˈö ˈdhö ˗a ˗dhɛ ˈpö. 11 ˈDhɛ ˈwo kun ˗a nu ˗ni ˈgü ˗an ˗dhɛ, ˈyö ˈwo ˗ya ˈwɔn blɛɛˈˈ ˗sü ˗bha ˈbhladëmɛn ˈö bhë ˗a ˈka wo ˗wo ꞊löö, 12 ˈö ˈwo˗ pö: ‹Mɛn ˗nu ˈö ˈwo nu ꞊taabha ˈö ˈwo yö ˗kë ˈˈlɛlɛ dosɛnŋ ˈˈkpaan ˈˈpiʋ̈ bhë, ü yaa˗ ˗nu yi ꞊saa ˗kë do, ˈˈkɛɛ kö yi ˗zë yi yö ˈˈgbɩɩ˗ ˗kë ˈɲaan˗ ˈˈdhiʋ̈˗ ˗dhɛ ˈö sü ˗dhiapiʋ̈ ˗bha ˈö ˈˈbin ˗yö mën ˗a ˈka.› 13 ˈYö ˈbhladëmɛn ˗ya pö ˗a mɛn do ˗dhɛ: ‹N ˈti ˈwɔn yaa kë ü ˈka ꞊zɔɔ ˗wa, n ˈˈtɔŋdë. Ü ꞊saa ˈö ko ˗wo ˗yö ˗mɔn ˗a ˈgü ˈyaa ˈnën ˈö ˗tɔ denie do ˗ee? 14 ˗Bhö ü ˗kɔ yö ü ꞊saa ˈö bhë ˗a ˗bha kö ˈü ˈdho. Pë ˈö n zuʋ̈ˈˈ ˗we ˗a ˗bha kö ˈa˗ nu yökëmɛn ˗nu ˈwo nu ꞊taabha bhë ˗an ˗dhɛ ˈpö ˈyö bhë. 15 N ˗de ˗bha ˈwëëga ˈyaa ˗mü ˗ee? Pë ˈö ˗dhi n ˗dhɛ ˈmaan ꞊mɔɔn˗ ˗bha ˈa˗ kë ˗a ˈka ˗ee? Ɛɛnˈˈ n ˗man ˈˈgblüsëdhɛ ˈnën ˈö˗ ˗wɔn ˈgü ˈö ꞊druɛɛ* ˗yö ˗da ü ˈgü ˗ee?› 16 ˗Kɔ do ˈö bhë ˗a ˈka, mɛn ˗nu ˈwo to ꞊taabha ˗wo ˗dho kë mɛn ˗blɛɛsü ˗nu ˈka, ˈö mɛn ˗nu ˈwo mɛn ˗blɛɛsü ˗nu ˈka ˈwo to ꞊taabha.»
17 ˈDhɛ ˈwo kun ˈdho ˗ni ˈgü Zedhizadhɛmö, ˈyö Yesu ˗yö ö ˗bha gwëëˈˈ ˗nu ˗kɔŋ do ö ga ꞊plɛ (12) ˈwo bhë ˗an sü wo dʋʋˈˈ ˈka ʒiaan ˗ta mü, ˈyö˗ pö ˗an ˗dhɛ: 18 «˗Ka ka ˈˈtʋ ˈto! ˈDho ˈö ˈkwa˗ wo ˗ni ˈgü Zedhizadhɛmö bhë, ˗wo ˗dho mɛn Gbö ˈˈdhoodɔ ˈˈsaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗gɔ. ˗Wo ˗dho za yaa dɔ ˗a ˗bha kö ˗wa zë, 19 ˈö ˈwo˗ ˗da ˈˈsɛ ˈˈwɛɛ ˈgümɛn ˗nu ꞊kwɛɛ˗ kö ˗wo ꞊wɛɛ˗ dɔ ˗a ˗bha, ˗wa ˗man ˗klaaga ˈka, kö ˗wa zë ˈˈdhü ˗bha. ˈˈKɛɛ ˗a ˗dhɛkpaɔyi ˗yaaga ˗naan ˈka ˗yö ˗dho ˈgo ga ˈgü.»
20 ˈYö Zebede ˗bha dhebɔ waa ö gbö ˗nu ˈwo ꞊ɲɔɔn Yesu ˈˈsuee, ˈö ˈwo ˈˈgblëënnu ˗a ˈˈdhiʋ̈ kö ˈwo pë ˈbhaa ˗dhɛ ˗a ˗gɔ. 21 ˈYö Yesu ˗ya pö ˗a dhebɔnën ˗dhɛ: «ˈMën ˈü˗ ˈˈpiʋ̈?» ˈYö˗ ˗yɔ bɔ ˈö˗ pö: «Ü ˗bha ˗Gblüdëdhɛ kë ˈˈtʋ̈ŋ ˈka, ˗bhö ˗a kë kö n gbö ˗nu ꞊plɛ ˈwo yö ˗wo ˗ya ü ˈˈsuee. ˗A mɛn do ˗yö ˗ya ü ˗kɔ ˗së ˈgü, kö ˗a mɛn do ˗yö ˗ya ü ꞊kwaa˗ ˈgü.» 22 ˈYö Yesu ˗ya pö ˗an ˗dhɛ: «ˈPë ˈka˗ ˗gbadhɛ ˗ni ˈgü bhë ˈkaa˗ dɔ. Pë ˈa dho ˗a ˈˈyi mü bhë, ka ꞊mɔɔn˗ ˗bha ˈka˗ mü ˗ee?» ˈYö ˈwo˗ ˗yɔ bɔ ˗a ˗gɔ ˈwo˗ pö: «꞊Ii, yi ˗mɔn ˗a ˗bha.» 23 ˈYö Yesu ˗ya pö ˗an ˗dhɛ: «˗Yö ˈˈdhʋ̈, ka ˗dho ˗a mü. ˈˈKɛɛ ˗a ˗dhɛ ˈö ˗gban mɛn ˗bha ˗ya n ˗kɔ ˗së ɛɛnˈˈ n ꞊kwaa˗ ˈgü ˗sü ˗bha bhë, ˈmaan ˈnën ˈö sü n ˗bha. Mɛn ˗nu ˈö n Dë ˈö dhaŋ˗ ˈgü ˈö ˗yadhɛ bhë ˗a ˗pë ˗kë ˗an ˗bha ˈka, ˈyö ˈwo ˗dho ˗ya mü.»
24 ˈDhɛ ˈö gwëëˈˈ ˗nu ˗kɔŋ do ˈwo to ˈwo˗ man, ˈyö ˈwɔn ˗yö ˗shiö ˗an ˗dhɛ ꞊dhegblüzë ˗nu ꞊plɛ ˈwo bhë ˗an ˗bha. 25 ˈˈKɛɛ ˈyö Yesu ˗yö ˗an ˗dhɛ ˈö˗ pö ˗an ˗dhɛ: «Ka˗ ˈwɔn ˗dɔ ꞊dhɛ ˈˈsɛkɔɔnmɛn ˗nu ˗wo ˗ya ˈˈsɛgümɛn ˗nu ˗gɔ ˗ta, ˈö mɛn ˗nu ˈö ˗duɛɛ ˈkpii˗ ˈdhö ˗an ˗gɔ ˈwo mɛn ˗nu ꞊kɔɔn. 26 ˈˈKɛɛ ka ˗zë ka dua ˈyaa ˗mü kö ˈka˗ kë ˈˈdhʋ̈. Mɛn ˈö˗ ˈˈpiʋ̈ ꞊ʒiaan ˈö kë mɛn ˈkpii˗ ˈka ka kpö ˈgü, ˗a dua ˗mü kö ˗yö yö kë ka ˈˈdhiʋ̈. 27 Mɛn ˈö˗ ˈˈpiʋ̈ ˈpö ˈö kë mɛn ˗blɛɛsü ˈka, ˗a dua ˗mü kö ˗yö kë ka ˗bha ꞊dhuëŋ ˈka. 28 ˗Kaa kë ꞊dhɛ mɛn Gbö ˈdhö. Yö ˈti nu kö ˗wo yö kë ˗a ˈˈdhiʋ̈, ˈˈkɛɛ ˗yö ˗nu kö ˗yö yö kë mɛn ˗nu ˈˈdhiʋ̈, kö ˗yö ö ˗bha ˗tosɛta* nu mɛn ꞊va ꞊dede ˗gɔtadhɔpë ˈka.»
29 ˈDhɛ ˈwo kun ˈgo ˗ni ˈgü Zedhiko, mɛn ꞊va ꞊dede ˗wo ˗ya ʒiö ˗sü ˗bha Yesu ꞊kee˗. 30 ˈDhɛ ˈö ˈˈɲɛɛntiimɛn ˗nu ꞊plɛ ˈö ˈwo kun ˗ya ˗sü ˈka ʒiaan ˈˈdhiʋ̈ mü ˈwo˗ man ꞊dhɛ Yesu ˈnën ˈö ʒiö ˗ni ˈgü bhë, ˈyö ˈwo ˗ya ˈˈgbla ˗sü ˗bha ˈwo˗ pö: «Yi Dëmɛn Davi Gbö, ˗bhö yi ˗wëëdhɛ yö!» 31 ˈYö mɛn ˗gbaa ꞊va ˈö ˈwo kun Yesu ꞊kee˗ bhë, ˈwo ˗gbla ˗an ˗ta ˈö ˈwo˗ pö ˗wo wo ˈˈdhi ta. ˈˈKɛɛ ˈyö ˈˈɲɛɛntiimɛn ˗nu ˈwo bhë ˈwo ˗ya ˈˈgbla ˗sü ˗bha ˈzü ˈˈgbɩɩ˗ ˈka ˈwo˗ pö: «Yi Dëmɛn Davi Gbö, ˗bhö yi ˗wëëdhɛ yö!» 32 ˈDhɛ ˈö ˗kë ˈˈdhʋ̈ ˈyö Yesu ˗yö ˈduannu, ˈyö ˗an ˗dhɛ ˈö˗ pö ˗an ˗dhɛ: «ˈMën ˈö ˈka˗ ˈˈpiʋ̈ ˈa˗ kë ka ˗dhɛ?» 33 ˈYö ˈwo˗ ˗yɔ bɔ ˗a ˗gɔ ˈwo˗ pö: «Yi Dëmɛn, dɔ ˈˈgbɩɩ˗ kö ˈü yi ˈˈɲan ˈˈpʋ.» 34 ˈDhɛ ˈwo˗ pö ˈˈdhʋ̈, ˈyö ˗an ˗wëë ˗yö Yesu ˗kë ꞊dedewo ˈö ö ˗kɔ pa ˗an ˈˈɲan ˈka, ˈyö ˈwo to ˈˈshia˗ mü ˈwo ˗dhɛ yö, ˈö ˈwo ˗ya ʒiö ˗sü ˗bha Yesu ꞊kee˗.