ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

11 ˗Ya kë ˈˈdhʋ̈ kö ö ˗kɔ ˈnën ˈö ˗Zlan ˗ya bho ö ˗bha ˈˈsɛgümɛn ˗nu ˈgü bhë ˗ee? ˗Abin toŋtoŋdhö! ˈYö sü ꞊dhɛ man ˗de ˈpö Izraɛdhö mi ˗mü n ˈka, a Ablaamö ꞊suugünën ˈka, ˈa go Bɛnzamɛn ˗gɔ ˈkɔdhi ˈgü. 2 ˗Zlan yö ˈti ö ˗kɔ bho ö ˗bha ˈˈsɛgümɛn ˗nu ˈö ö ˗kɔ ˗yɛ ˗an ˗bha ˗blɛɛsü* bhë ˗an ˈgü. Pë ˈö ˗Zlan ˗Wo ˈsëëdhɛ ˗ya pö ˈö ˗gban Edhi ˗bha, ˈkaa˗ dɔ ˗ee? Edhi ˗yö ˗bhɛɛ, ˈö Izraɛdhö ˗mɛn ˗nu ˗wɔn ˗da ˗Zlan ˗dhɛ 3 ˈö˗ pö: «Zoova, ˗wa ü ˗wodhiʋ̈lomɛn ˗nu zë, ˗wa ü ˗bha ˈˈsaa˗ ˗bho ˗a ˗ta ˗pë ˗nu ˈˈgblëënnu, man do ˈnën ˈman ˈto, ˈö ˈwo˗ ˈˈpiʋ̈ kö ˈwo n zë ˈpö.» 4 ˈDhɛ ˈö˗ pö ˈˈdhʋ̈, ˗a ˗daa ˈö ˗Zlan ˗ya ˗kë ˈyö ˗tɔ ˗mën? ˗Ya ˗pö ˗a ˗dhɛ: «Gɔɔn˗ ˗nu ˈˈgblü ˈˈsɔɔplɛ (7.000) ˈö ˈwo n ˗bha ˈka, ˈö wo ˈti yö wo kpɔn ˈgü Baadhö ˈˈdhiʋ̈ kö ˗wa ˗dhɔkë, ˗wo ꞊kun ˗dhö.» 5 ˗Kɔ do ˈö bhë ˗a ˈka, ˈˈtʋ̈ŋ ˈö yö ˗a ˈgü ˈpö, mɛn kpö ˈdɛdɛ ˗wo ꞊kun ˗dhö ˈö ˗Zlan ˗ya ˗gasitɛ kë ˗an ˗dhɛ, ˗ya ö ˗kɔ ˈˈyɛ ˗an ˗bha. 6 ˈDhɛ ˈö ˈˈdhʋ̈, ˗ya kë ꞊dhɛ ˗gasitɛ ˈnën ˈö ˗Zlan ˗ya ˗kë, kö ˈyaa ˈsü mɛn këwɔn ˗nu ˗bha ˈzü. ˗Yö ˗sü mɛn këwɔn ˗nu ˗bha ˗be kö ˗gasitɛ ˈö˗ ˗kë ˗an ˗dhɛ bhë ˈyaa ˗gasitɛ ˈka ˈzü.

7 ˈMën ˈkwa ꞊mɔɔn˗ ˗bha ˈkwa˗ pö ˈzü? Pë ꞊dede ˈö Izraɛdhö ˗mɛn ˗nu kun ˗a mɛɛnˈˈ ˗ni ˈgü wo zuʋ̈ˈˈ ꞊gban ˈka bhë wo ˈti˗ ꞊slɔɔ, ˈˈkɛɛ mɛn ˗nu ˈö ˗Zlan ˗yö ö ˗kɔ ˗yɛ ˗an ˗bha bhë ꞊waa˗ ꞊slɔɔ. ˗A mɛn ˈdhɛ ˈwo to ˗an ꞊gɔɔ ˗ya kë ˈˈgbɩɩ˗, 8 ꞊dhɛ ˗kɔ ˈö ˗bɛnzë ˗sü ˈka ˗a ˈka ˗Zlan ˗Wo ˈsëëdhɛ ˈgü bhë ˗a ˈdhö. ˗Ya ˗pö: «˗Zlan ˗yö ˗an ˗da yi ꞊gblɛɛn ˈgü, ˈö ˗an ˈˈɲan ˗nu ˈti ˗dhɛ yö ɛɛnˈˈ ˗an ˈˈtʋ ˗nu ˈti ˈwɔn man ˈö dho ˈö yö ˗a ˈka ꞊dɛɛ ˗bha.» 9 ˗Ya ˈgo mü ˈzü, Davi ˗ya ˗pö: «˗An ˗bha ˈtaablö ˗yö kë ˗an ˗gɔ ꞊döŋ, ˈˈkplʋ̈, ˗an ˗gɛn ˈˈdhiʋ̈ ˗zuö ˗a ˗bha ˗gwö ɛɛnˈˈ ˈwɔn ˗bho ˗an ˈgü ˗pë ˈka. 10 ˗An ˈˈɲan ˈgü ˗yö tröö, ˗yö kë ˈˈdhʋ̈ kö ˈwaa ˗dho ˗dhɛ yö. ˗A kë ˈpö kö ˗an ko ˗yö kë ˈˈgblëënnu ˗sü ˈka ˗kplawo.»

11 Dhɛɛˈˈ ˈö n ˗gɔ ˈyö ꞊nɛn: ˗Ya kë ˈˈdhʋ̈ kö ˗an ˗gɛn ˈˈdhiʋ̈ ˈö ˗zuö bhë, ˗wo ˗puö ˈö ˗an luuˈˈ ˗dhɛ ˈyaa ˈdhö ˗ee? ˗Abin toŋtoŋdhö! ˗An ˗gɛn ˈˈdhiʋ̈ ˈö ˗zuö bhë ˗ya ˗kë ˈö ˈˈsɛ ˈˈwɛɛ ˈgümɛn ˗nu ˗wo dha, ˗yö kë ˈˈdhʋ̈ kö ꞊druɛɛ˗ ˗yö ˗da ˗an ˈgü. 12 ˗An ˗gɛn ˈˈdhiʋ̈ ˗bha ˗zuö ˗sü ˗ya kë ˈdhuëë˗ ˈka ˈˈkpɔnŋtaadhɛ ˗bha ˈka ꞊dhɛ ˗kɔ ˈö bhë ˗a ˈdhö, ˗an ˗bha ˗dho ˈˈshia˗ ˗sü ˗ya kë ˈpö ˈdhuëë˗ ˈka ˈˈsɛ ˈˈwɛɛ ˈgümɛn ˗nu ˗bha ˈka, kö ˈdhuëë˗ ˈö ˗dho ˈgo ˗an ꞊gban ˈˈpɛpɛ ˗lo ˈko ˗ta ˗sü ˗wɔn ˈgü, ˗yö ˗dho kë ꞊va ˈsa ˗kɛɛ!

13 ˗A ˈdhɛ ˈa ˗dho ˗a blɛɛˈˈ yö, a˗ ˗blɛɛ mɛn ˗nu ˈö ˈka ˈˈsɛ ˈˈwɛɛ ˈgümɛn ˗nu ˈka ka ˗dhɛ. ˈDhɛ ˈö ˗kë ꞊dhɛ bɔmɛn ˈwo˗ bɔ ˈˈsɛ ˈˈwɛɛ ˈgümɛn ˗nu ˈˈpiʋ̈ yö ˗mü n ˈka bhë, a ꞊bhlëë ˗ya n ˗man yö ˗bha, 14 ˗yö kë ˈˈdhʋ̈ kö ˈa˗ ˈˈslö mɛɛnˈˈ ˈa ꞊druɛɛ˗ ˗da n ˗man ˈˈsɛgümɛn ˗nu ˈgü, kö ˗a mɛn ˈbhaa ˗nu ˗wo kë dhamɛn ˈka. 15 ˈDhɛ ˈö ˈˈdhʋ̈, ˗ya kë ꞊dhɛ ˗Zlan ˗bha ö ˗kɔ ˗bho ˗an ˈgü ˗sü ˗yö waa ˈˈkpɔnŋtaamɛn ˗nu ˗an ˗kɔ ˗lo ˈkwëë˗, kö ˗a ˗bha ö ˗kɔ ˗kpɔ ˗an ˗gɔ ˗sü ˗dho kë ˗mën ˈbhaa ˈka ˈzü kö yö ˈti kë ˗an ˗bha ˗go ga ˈgü ˗sü kö ˗wo kë ˈˈbhɩɩ˗ ˗a ˈka? 16 ˗Ya kë ꞊dhɛ ˈbluu˗ ˗böö pë ˈˈtɩtɩ ˈwo˗ sü ˗a ˗ta ˈwo˗ nu ˗Zlan ˗dhɛ pë ˗blɛɛsü ˈka ˗yö ˈˈslʋ̈ʋ̈slʋ̈, kö ˗a ˈbluu˗ ˗böö ˗todhʋ̈sü ˗yö ˈˈslʋ̈ʋ̈slʋ̈ ˈpö. ˗Ya ˈgo mü ˈzü, ˈˈdhü ɲun ˗ya kë ˈˈslʋ̈ʋ̈slʋ̈, kö ˗a kwɛɛˈˈ ˗nu ˗wo ˈˈslʋ̈ʋ̈slʋ̈ ˈpö.

17 ˗Zlan ˗ya olivö ˗dhü ꞊dede kwɛɛˈˈ ˈbhaa ˗nu ˈˈkan, ˗ya bhi ˈü ˗kë olivö ˗dhü ˈö bhɔ ö ꞊diëë ˈˈblüü ˗a kwɛɛˈˈ ˈka bhë ü ˈsü ˗ya ü ˗gban ˗an pin˗ ˈgü, ˗yö kë ˈˈdhʋ̈ kö pë ˗së ˗nu ˈwo go olivö ˗dhü ˈö bhë ˗a ɲun ˈgü ˈü ˗an ꞊slɔɔ ˈpö, 18 ˈbhaa ˗dho ˗a pö ˈü ü ˗de ˈsü ˗tiaandhö ˗a kwɛɛˈˈ ˗nu ˈwo to ˗an ˗ta. ˗Ya kë ꞊dhɛ ü ü ˗de ˈsü ˗ni ˈgü ˗tiaandhö ˗an ˗ta, kö ˗yö kë ü ˈˈɲaan ꞊dhɛ ˈbhaa ˈnën ˈü ˈˈdhü ɲun ˈö bhë ˗a bun ˗ni ˈgü, ˈˈkɛɛ yö ˈnën ˈö ü bun ˗ni ˈgü. 19 Ü ꞊mɔɔn˗ ˗bha ˈü˗ pö ü ˗de ˗dhɛ: «˗Wo ˈˈdhü kwɛɛˈˈ ˗nu ˈwo bhë ˗an ˗kan kö ˗wo n ˗gban ˗an pin˗ ˈgü.» 20 ˗Yö ˈˈdhʋ̈ gagade ˈka! ˗Zoyödhe ˈö ˈyaa kun ˗an ˗gɔ bhë yö ˈnën ˈö˗ ˗wɔn ˈgü ˈö ˈwo ˗an ˗kan. ˈˈKɛɛ bhi ˗zë ü ˗bha ˗zoyödhe ˈnën ˈö˗ ˗wɔn ˈgü ˈü ˗gban ˗sü ˈka ˗dhɛ ˈö bhë ˗a ˈgü. ˈDhɛ ˈö ˈˈdhʋ̈, ˈbhaa ˗dho ü ˗de ˈsü ꞊va, ü dua ˗mü ꞊ʒiaan kö ˈˈsuʋ̈ ˗yö ü kë. 21 ˗A ˗gɛn ˗mü ꞊dhɛ ˗Zlan ˗ya olivö ˗dhü ꞊dede kwɛɛˈˈ ˗nu ˈˈkan, kö bhi ˗de ˈpö ˗yö ꞊mɔɔn˗ ˗bha ˈö ü ˗kan. 22 ˈBha ü ˗zota ˗së ˈka, ü ˗dho ˗a yö ꞊dhɛ ˗Zlan zuʋ̈ˈˈ ˗yö ˗së, ˈˈkɛɛ ˈwɔn ˗yö ˗shiö ˗a ˗dhɛ ˈpö. Mɛn ˗nu ˈö ˗zoyödhe ˈyaa ˗an ˗gɔ ˈö ˈwo ˗puö, ˈwɔn ˗yö ˗shiö ˗Zlan ˗dhɛ ˗an ˗bha, ˈˈkɛɛ bhi ˗zë ˗a zuʋ̈ˈˈ ˗yö ˗së ü ˈka. Kö pë ˈö ꞊waa˗ kë ˈö zuʋ̈ˈˈ ˗së ˗kë mɛn ˈka bhë ˈü˗ kë ˈü ˈdho ˗a ˈka ˈˈdhiʋ̈, ˗yö ˗dho ˗a kë ü ˈka ˗kplawo. Ü ˈti˗ kë ˈˈdhʋ̈, ˗yö ˗dho ü ˈˈkan ˈpö. 23 Wo ˗de ˈpö kö ˗zoyödhe ˗yö kë ˗an ˗gɔ ˈzü, ˗Zlan ˗dho ˗an ˈsü ˈö ˗an ˗gban olivö ˗dhü ˈö bhë ˗a ˗bha ˈzü, ˈyö sü ꞊dhɛ ˗a ˈˈse ˗ya ˗dhɛ kö ˗yö ˗an ˗gban mü ˈzü ˗dɛɛwo. 24 Bhi ˈü ˗kë olivö ˗dhü ˈö bhɔ ö ꞊diëë ˈˈblüü ˗a kwɛɛˈˈ ˈka, ˗wa ü bho mü ˗wa ü ˗gban olivö ˗dhü ˈwo˗ ta ˈˈdhüdhɛɛdhö ˗a ˗bha, kö ˗a kwɛɛˈˈ ˗nu ˗dhɛ ˈkö ˈwo go ˗a ˈˈdhü ꞊dede ˗bha bhë ˈwaa ꞊mɔɔn˗ ˗bha kö ˗wo ˗an ˗gban ˗an ˗de ˗dhü ˈö bhë ˗a ˗bha ˈzü ˗ee?

25 ˈDhɛ ˈö ˈˈdhʋ̈, n ꞊dhegblü ˗nu, a˗ ˈˈpiʋ̈ kö ˈwɔn ˈbhaa ˈö ˗Zlan ˗ya to ˗bindhe ˈgü bhë, ˈa˗ blɛɛˈˈ ka ˗dhɛ kö ˗yö kë ka ˈˈɲaan, ˗yö kë ˈˈdhʋ̈ kö ˈkaa ˗dho ka ˗de ˈsü ˈwɔndɔmɛn ˗nu ˈka. Izraɛdhö ˗mɛn ˈbhaa ˗nu ˗wo ꞊gɔɔgbɩɩdhɛ ˗kë, ˈö ˗dho ˈto ˗a ˈka ˈˈdhʋ̈ ˈö yö ˗a ˈka ˈˈsɛ ˈˈwɛɛ ˈgümɛn ˗nu ˈˈdhi ˗bha ˗mɔn ˈˈkwöö ˗sü ˗bha. 26 ˗Ya kë ꞊dhɛ ˗kɔ ˈö bhë ˗a ˈdhö, ˈyö Izraɛdhö ˗mɛn ˗nu ꞊gban ˈˈpɛpɛ dho dha. ˈYö sü ꞊dhɛ pë ˈö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˈyö ˗tɔ: «Mɛndhamɛn ˗dho ˈgo Siɔn ˈö nu, ˈö ˈwɔn ˈˈpɛpɛ ˈö ˗Zlan ꞊bhlëë ˗shiö ˗wɔn ˈka ˗a bhɔ Zakɔbö ˗dhɛ ꞊taa. 27 ˈMan ˗an ˗bha ꞊sɔŋ yaa ˗nu bho ˗an ˗bha, a ˗dho ˗mlɛɛn ˗da yaa˗ ˗nu yi ꞊zinŋgü.» 28 ˗Yö ˈˈdhʋ̈ ꞊dhɛ ka ˗wɔn ˈgü, ˈwɔn ˈdhɛ ˈö ˗gban nɔɔn˗ ˗së ˗bha bhë ˗wo ˗Zlan ˈyɔɔ˗ ˗nu ˈka ˗a ˈgü. ˈˈKɛɛ ˗an ˈˈbhɛman ˗nu ˗wɔn ˈgü, ˗a ˈdhɛ ˈö ˗gban ˗Zlan ˗bha ö ˗kɔ ˗yɛ mɛn ˗bha ˗sü ˗bha bhë, ˗wo ˗Zlan dhɔɔbhaamɛn ˗nu ˈka ˗a ˈgü. 29 ˗A ˗gɛn ˗mü ꞊dhɛ ˗Zlan ˗bha gbɔɔdhe ˗nu kë ˗sü waa˗ ˗bha ö ˗kɔ ˗yɛ mɛn ˗bha ˗sü ˈö bhë, ˗a zuʋ̈ˈˈ ˈti ˗dho ˈto ˈzlöö ˗a ˗wɔn ˈgü. 30 ˈYö sü ꞊dhɛ, ˗kɔ do ˈö ˈkpa ˗be ˈö ˈka ꞊gɔɔgbɩɩdhɛ ˗kë ˗a ˈka ˗Zlan ˗ta, ˈˈkɛɛ ˈö ꞊dɛɛ ˗ya ka ˗bhawɔn ˈto ˗an ˗bha ꞊gɔɔgbɩɩdhɛ kë ˗sü ˗wɔn ˈgü bhë, 31 ˗kɔ do ˈö bhë ˗a ˈka ˈpö, ˈyö ˗wa kë ꞊gɔɔgbɩɩmɛn ˗nu ˈka ꞊dɛɛ ˈö ˗Zlan ˗ya ka ˗bhawɔn ˈto. Wo ˗de ˈpö ˗Zlan ˗dho ˗an ˗bhawɔn ˈto ꞊dhɛ ˗kɔ ˈö ka ˗bhawɔn to ˗a ˈka bhë ˗a ˈdhö. 32 ˗Zlan ˗yö ö ˗kwaa ˗an ꞊gban ˈˈpɛpɛ ˗zü ˈö ˈwo ˗kë ꞊gɔɔgbɩɩdhɛ ˗gɔ ꞊dhuëŋdhɛ ˈgü, ˗yö kë ˈˈdhʋ̈ kö ˈö ˗an ꞊gban ˗bhawɔn ˈto.

33 ˗Zlan ˗bha ˈˈgblüsë,* ˗a ˗bha ꞊kpɔɔdhɛ waa˗ ˗bha ˈwɔndɔdhe ˗wo ˈˈmlünmlünsü ꞊dhɛ! ˗A ˗bha za ˗nu waa˗ këwɔn ˗nu ꞊gban ˈgüman ˗sü ˈö ˈkpakpadhö ˗yö ˈˈgbɩɩ˗. 34 ˗A ˗gɛn ˗mü ꞊dhɛ, «de ˈö ꞊mɔɔn˗ bha kö ˗yö Zoova zuʋ̈piʋ̈wɔn ˗nu dɔ, ɛɛnˈˈ de ˈö ˗ya kë ˗dhioo ˗dɔ ˗a ˗ta ˗mɛn ˈka?» 35 «De ˈö pë nu ˗a ˗dhɛ ˗blɛɛsü, ˈö˗ dua ˈdhö ˗mü kö ˗yö ˗a ˗bha ˈˈpɔ bho?» 36 Yö ˈnën ˈö pë ꞊gban ˈˈpɛpɛ ˗da, ˈö˗ ˈsaa˗ ˈgü ˈyö pë ꞊gban ˈˈpɛpɛ ˈdhö ˗dhö, ˈö pë ꞊gban ˈˈpɛpɛ ˈdhö˗ ˗bha ˈka. Kö ˗a ˈtɔ ˗yö bhɔ ˗toëpö ˈka bhë, ˈaa ˗yö kë!