ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

3 ˗Ya kë ˈˈdhʋ̈ ˈsa kö ˗kë Zuifö ˈka ˗sü ꞊trɔɔn ˈnën ˗tɔ ˗mën? Ɛɛnˈˈ kö ˗dho ˈˈbɔnŋ ˗sü ꞊bhlëë ˈnën ˗tɔ ˗mën? 2 ˗A ꞊trɔɔn ˈö˗ ˈgü ˗yö ꞊va. ˗A ˗blɛɛsü ˈö ˈdhö ˈyö ˗tɔ wo ˈnën ˈö ˗Zlan ˗yö ö ˗wo ˈˈslʋ̈ʋ̈slʋ̈ ˗nu ˈˈklɔɔn bho ˗an ˗bha. 3 ˗Ya kë ˈˈdhʋ̈ kö Zuifö ˈbhaa ˗nu ˈö ˗zoyödhe ˈyaa kun ˗an ˗gɔ bhë ꞊wɛ? ˗Zoyödhe ˈö ˈyaa kun ˗an ˗gɔ bhë ˗a ˗wɔn ˈgü, ˗Zlan ˈyaa ˗zo ˗yö ˗a ˗dhɛ ˗mɛn ˈka ˈzü ˗ee? 4 ˗Abin toŋtoŋdhö! ˈKö ˗kë ꞊dhɛ mɛn ꞊gban ˈˈpɛpɛ ˗wo ˗kë ꞊suakëmɛn ˈka, ˗Zlan ˗yö gagade pö ˗mɛn ˈka ˗kplawo, ꞊dhɛ ˗kɔ ˈö ˗bɛnzë ˗sü ˈka ˗a ˈˈdhiwo ˈgü ˗a ˈdhö. ˗Yö pö ˗sü ˈka mü: «Ü ˗dho ˗a ˗zɔn ü ˈˈdhiwo ˈgü ꞊dhɛ ü kpɛnŋdhö, ˈö ˗wa za ˗ya ü ˗bha, ü ˗bha za ˗yö ˗dhi.» 5 ˈDhɛ ˈö ˈˈdhʋ̈, kwa ˗bha ˈwɔn yaa kë ˗sü ˗ya ˗Zlan ˗bha kpɛnŋdhödhɛ ˗zɔn, ˗mën ˈˈwɛɛ ˈbhaa ˈö kwa ˗gɔ ˈzü kö ˈkwa˗ pö? ˈWɔn ˗ya ˗shiö ˗Zlan ˗dhɛ ꞊yaa˗ ˗zɔn, kö ˈyaa kpɛnŋdhö ˈnën ˈö bhë ˗ee? (Mɛnbhɩɩdhe ˗nu ˗bha ˈwɔn yö ˗kɔ ˈnën ˈa˗ blɛɛˈˈ ˗ni ˈgü bhë.) 6 ˗Abin toŋtoŋdhö! ˈYaa ˈˈdhʋ̈ ˗be, ˗Zlan ˗dho za dɔ ˈˈkpɔnŋtaadhɛ ˗bha ˗kɔ ˗kë ꞊dhɛ?

7 ˗Ya ˈgo mü ˈzü, n ˗man ꞊sua ˗ya ˗Zlan ˗bha ˗kë gagade pö ˗mɛn ˈka ˗sü ˗zɔn ˈzü ˈˈpuu ˈka, ˗a ˈtɔ ˗ya bhɔ, ˈmën ˗kë ˈsa ˈö za ˈdhö dɔ ˗ni ˈgü n ˗bha ꞊dhɛ ˈpë ˈa ˈwɔnyaakëmɛn ˈka ˗a ˈdhö? 8 ˈDhɛ ˈö ˈˈdhʋ̈, ˈmën ˗kë ˈkwaa˗ pö, «˗Kwa ˈwɔn yaa kë kö ˈwɔn ˗së ˗yö ˈgo ˗a ˈgü» ꞊dhɛ ˗kɔ ˈö mɛn ˈbhaa ˗nu ˗wo ꞊sua ˗kë yi ˗bha ˈö ˈwo˗ pö yi˗ ˗pö ˈˈdhʋ̈ bhë ˗a ˈdhö? Mɛn ꞊suu ˗nu ˈwo ˈˈdhʋ̈, ˈwɔn ˈö ˗Zlan dho ˗a bho ˗an ˈgü bhë ˗ya ˗kë kpɛnŋdhödhɛ ˈgü.

9 ꞊Ya kë ˈˈdhʋ̈ kö ꞊dhɛ ˈnën bhë? Kö kwa ꞊fiëë ˗yö ˗dhö mɛn ˈˈwɛɛ ˗nu ˈwo to ˗an ˗bha ˗ee? ˗Abin toŋtoŋdhö! ˗A ˗gɛn ˗mü ꞊dhɛ Zuifö ˗nu oo, Glɛkö ˗nu oo, mɛn ꞊gban ˈˈpɛpɛ kwa ˈwɔn yaa ˗gɔ ꞊dhuëŋdhɛ ˈgü, ꞊dhɛ ˗kɔ ˈa˗ ˈgü ˗pʋ ˗a ˈka ˈˈdhuŋ bhë ˗a ˈdhö. 10 ˗Yö ˗bɛnzë ˗sü ˈka ˈˈdhʋ̈ ˗Zlan ˗Wo ˈsëëdhɛ ˈgü ꞊dhɛ: «Mɛnbhɩɩdhe ˈö kpɛnŋdhö ˈyaa ˈdhö. ˗A mɛn dosɛnŋ ˈyaa ˈdhö ˗ʒiaanwo. 11 Mɛn ˈˈoo ˗mɛn ˈö ˗dho kë ˈwɔnbhokoodɔmɛn ˈka ˈyaa ˈdhö. Mɛn dosɛnŋ ˗ʒiaan ˈö ˗dho ˗Zlan mɛɛnˈˈ ˈyaa ˈdhö. 12 Mɛnbhɩɩdhe ꞊gban ˈˈpɛpɛ ˗wa ʒiaan ˈto, ˗an ꞊bhlëë ˈyaa ˗dhö ˈzü. ˗A mɛn dosɛnŋ ˈö ˗dho kë ˈwɔnsëkëmɛn ˈka ˈyaa ˈdhö.» 13 «˗An ˈˈdhi* ˗yö ꞊dhɛ mɛn buntadhɛ ˈö˗ ˈˈdhi ˈdhö ˈˈpʋ ˗sü ˈka ˗a ˈdhö. ˗Wo ˈˈkpënŋ˗ ˗kë mɛn ˗nu ˗gɔ wo ˈnɛɛnga ˈka.» «Pë ˈö go ˗an ˈˈdhii ˗yö ˗kë ꞊dhɛ ꞊mlɛɛn ˈˈyi ˈdhö.» 14 «˗An ˈˈdhiidhɛ ˗yö pa ˗sü ˈka ˈˈdhaŋ ˗ya mɛn ˗bha ˗sü waa ˗wo yaa ˗nu ˈka.» 15 «˗An ˗gɛn ˗yö ˈˈgbɩɩ˗ mɛn ꞊ɲɔɔn ꞊wɛnŋ ˗sü ˗bha.» 16 «˗Dhɛ ˈˈpɛpɛ ˈwo bɔ ˗a ˗bha, pë ˈgü shiʋ̈ˈˈ ˈnën ˈwo˗ wo, ˈö ˈwo saanˈˈ to mü. 17 Pë ˈwo˗ ˗dhɛ ˗dhikodhɛ ˗ʒian ˈwaa˗ dɔ.» 18 «˗An ˈˈɲan ˗yö ˗ʒiö ˗Zlan ˈgü, ˈö ˈwaa ˈˈsuʋ̈ ˗a ˗gɔ.»

19 ˈˈKɛɛ ˈsa kwa˗ ˈwɔn ˗dɔ ꞊dhɛ pë ˈˈpɛpɛ ˈö ˈTɔŋ˗ ˗ya pö, ˗ya ˗pö mɛn ˗nu ˈwo ˈTɔŋ˗ ꞊löö ˗an ˗dhɛ, ˗yö kë ˈˈdhʋ̈ kö ˗yö yö mɛn ꞊gban ˈˈdhi ˗ta, kö ˗Zlan ˗bha za ˗yö ˈˈkpɔnŋtaamɛn ꞊gban ˈˈpɛpɛ ˈkun. 20 ˗A ˗kë ˈˈdhʋ̈ ˗sü ˈgü, mɛn ˈbhaa ˈyaa ꞊mɔɔn˗ ˗bha kö ˗yö kë kpɛnŋdhö ˗Zlan ˈˈɲan ˈˈdhiʋ̈ pë ˈö ˈtɔŋ˗ ˗ya pö ˗a kë ˗sü ˗wɔn ˈgü, ˗a ˗gɛn ˗mü ꞊dhɛ pë dosɛnŋ ˈö ˈtɔŋ˗ ˗yö kwa ˗takun ˗a kë ˗sü ˗bha ˈyö ˗tɔ kö pë ˈwo˗ ˗dhɛ ˈwɔn yaa kë ˗sü ˈkwa˗ dɔ ˗së ˈka.

21 ˈˈKɛɛ ˈˈtʋ̈ŋ ˈö yö ˗a ˈgü, ˗kɔ ˈö ˗Zlan ˗yö ö ˗bha kpɛnŋdhödhɛ ˗zɔn ˗a ˈka ˗yö ꞊dhɛ ˗kɔ ˈö ˈtɔŋ˗ waa ˗Zlan ˗wodhiʋ̈lomɛn ˗nu ˗wa ˗to ˈˈdhiʋ̈ ˈwo˗ pö ˗a ˈka ˗a ˈdhö, ˈyaa ˗gban ˈTɔŋ˗ ˗bha. 22 Mɛn ˈˈpɛpɛ ˈö ˗zoyödhe ˈdhö ˗an ˗gɔ ˗wo ˗kë kpɛnŋdhö ˗Zlan ˈˈɲan ˈˈdhiʋ̈ ˗an ˗bha ˗zo ˗yö Yesu Klito ˗dhɛ ˗sü ˈsaa˗ ˈgü. ˗A ˗gɛn ˗mü ꞊dhɛ ˗Zlan ˈˈɲan ˈˈdhiʋ̈ ˗an ˗bhokopiʋ̈dhɛ ˈyaa ˈdhö. 23 ˗A pö ˈa˗ wo ˈˈdhʋ̈ bhë, ˗a ˈklɔɔ˗ ˗mü ꞊dhɛ mɛn ꞊gban ˈˈpɛpɛ ˗wo ˈwɔnyaakëmɛn ˈka, ˈö ˈwaa ꞊mɔɔn˗ ˗bha kö ˗wo kë ˈˈslʋ̈ʋ̈slʋ̈ ꞊dhɛ ˗Zlan ˈdhö. 24 ˗A kë ˗sü kö ˗Zlan ˗yö ˗gasitɛ kë ˗an ˗dhɛ, kö ˗yö ˗an bho ˈˈgan ˈgü ˗gɔtadhɔpë ˈö Yesu Klito ˗ya nu ˗a ˈsaa˗ ˈgü, kö ˗ya pö ˗wo kpɛnŋdhö bhë, gbɔɔdhe ˈö˗ ˗kë ˗an ˗gɔ ˈˈwɛɛwɛ yö ˗mü. 25 ˗Zlan ˗yö Yesu ˗nu ꞊dhɛ ˗dhikodhɛ ˈˈsaapë ˈdhö, kö mɛn ˗nu ˈwo ˗dho wo ˗zo yö ˗a ꞊ɲɔɔn ˈö ꞊wɛnŋ bhë ˗a ˗dhɛ, waa˗ ˗nu ˗dhikodhɛ ˗yö kë wo ꞊zinŋgü ˗a ˈsaa˗ ˈgü. ˗Ya ˗kë ˈˈdhʋ̈ kö ˈö ö ˗bha kpɛnŋdhödhɛ ˗zɔn, ˗a ˗gɛn ˗mü ꞊dhɛ ˗yö ö zuʋ̈ˈˈ ˗kun ö ˗bha,* ˈö ˈwɔn yaa ˗nu ˈwo kun kë ˗ni ˈgü ꞊kwɛŋzü ˗an ˗bhawɔn to. 26 ˗Ya ˗kë ˈˈdhʋ̈ ˈpö kö ˈö ö ˗bha ˗kë kpɛnŋdhö ˗sü bhë ˗a ˗zɔn ˈˈtʋ̈ŋ ˈö yö ˗a ˈgü, kö ˈya˗ pö ˗ʒiaanwo ꞊dhɛ mɛn ˈö ö ˗zo yö Yesu ˗dhɛ ˗yö kpɛnŋdhö ö ˈˈɲan ˈˈdhiʋ̈, pö ˈyaa ˗dho kë ö ˗bha ˗kë kpɛnŋdhö ˗sü ˗bha.

27 ˗Ya kë ˈˈdhʋ̈ kö kwa ˗de ˗sü ꞊va ˗gɛn ˗yö ˗dhö ˗ee? ˗Abin toŋtoŋdhö! ˈTɔŋ˗ ˗mɛɛn ˈö ˈkwa ˗dho ˗gban ˗a ˗ta kö ˈkwa kwa ˗de ˈsü ꞊va? ˈTɔŋ˗ ˈö ˗gban pë ˈö mɛn ˗ya ˗kë ˗a ˗bha yö ˗mü ˗ee? ˗Abin toŋtoŋdhö! ˈTɔŋ˗ ˈdhɛ ˈö ˗gban ꞊ʒiaan ˗zoyödhe ˗bha ˗kë mɛn ˗gɔ ˗sü ˗bha bhë, yö ˈnën ˈkwa ˗dho ˗gban ˗a ˗ta. 28 ˗A ˗gɛn ˗mü ꞊dhɛ pë ˈö mɛn ˗kë kpɛnŋdhö ˈyö ˗tɔ ˗a ˗bha ˗zoyödhe. ˈYaa ˈsü ˈtɔŋ˗ ˗ya ꞊bhlëë ˈgü ˗sü ˗bha. 29 Ɛɛnˈˈ ˗a ˗ga ˈö ˈka˗ wo bhë, ˗Zlan ˗yö Zuifö ˗nu dosɛnŋ ˗bha ˗Zlan ˈka ˗ee? ˈYaa ˈˈsɛ ˈˈwɛɛ ˈgümɛn ˗nu ˗bha ˗Zlan ˈka ˈpö ˗ee? ˗Yö ˈˈsɛ ˈˈwɛɛ ˈgümɛn ˗nu ˗bha ˗Zlan ˈka ˈpö. 30 ˈDhɛ ˈö ˗kë ꞊dhɛ ˗Zlan ˗yö dosɛnŋ bhë, mɛn ˗nu ˈö ˗wa ˈgo ˈˈbɔnŋ ˗an ˗bha ˗zoyödhe ˈnën ˗dho ˗a kë ˈö ˗an yö ꞊dhɛ mɛn kpɛnŋdhö ˗nu ˈdhö. Mɛn ˗nu ˈö wo ˈti ˈgo ˈˈbɔnŋ ˈpö, ˗an ˗bha ˗zoyödhe ˈnën ˗dho ˗a kë ˈö ˗an yö ꞊dhɛ mɛn kpɛnŋdhö ˗nu ˈdhö. 31 ˗Ya kë ˈˈdhʋ̈ kö kwa ˗bha ˗zoyödhe ˗ya ˈtɔŋ˗ bho ˈˈshia˗ ˈnën ˈö bhë ˗ee? ˗Abin toŋtoŋdhö! ˗Ya ˗kë ꞊ʒiaan ˈö ˈkwa kwa ˗kɔ ˗ya ˈtɔŋ˗ ˗gɔ.