Yesu ˗bha bɔmɛn ˗nu këwɔn ˗nu
6 ˗A ˈˈtʋ̈ŋ ˈö bhë ˗a ˈgü, ˈdhɛ ˈö Yesu ˗bha gwëëˈˈ ˗nu kun kë ˗ni ˈgü ꞊va, Zuifö ˗nu ˈdhɛ ˈwo Glɛkö ˗wo pö ˗wo ˗kun ˈwɔn blɛɛˈˈ ˗ni ˈgü wo ˗wo ꞊löö Zuifö ˗nu ˈwo Eblö ˗wo pö ˗an ˗bha. ˗A ˗gɛn ˗mü ꞊dhɛ ˗bhöpë ˈwo kun ˗a ˗gblü ˗ni ˈgü ˗dhɛkpaɔyi ˈˈpɛpɛ ˈka bhë, ˗an ˗bha ꞊gɛandhe ˗nu ˈwaa kun ˗a ꞊slɔɔ ˗ni ˈgü. 2 ˈDhɛ ˈö ˗kë ˈˈdhʋ̈, ˈyö bɔmɛn ˗nu ˗kɔŋ do ö ga ꞊plɛ bhë ˈwo Yesu ˗bha gwëëˈˈ ˗nu ꞊gban ˈˈpɛpɛ ˗dhɛ wo ˈkwëëdhö ˈö ˈwo˗ pö ˗an ˗dhɛ: «˗A ˗dhɛ ˈyaa˗ ˗bha kö ˈyi yi ꞊kwaa mɛn ˗nu ꞊klaŋ -kë ˗Zlan ˗Wo ˈka ˗yö ˗zü kö ˈyi ˗bhöpë ˗gblü ˈtaablö ˈˈdhiʋ̈. 3 ˈDhɛ ˈö ˈˈdhʋ̈, yi ꞊dhegblü ˗nu, ˗ka ka ˗kɔ ˈˈyɛ gɔɔn˗ ˗nu ˈˈsɔɔplɛ ˈö mɛn ꞊gban ˗wo ˗an ˈtɔ ˗së pö, ˈö ˗zuu ˈˈslʋ̈ʋ̈slʋ̈ ˈdhö ˗an pa ˗sü ˈka, ˈö ˈwo ꞊kpɔɔsü ˗an ˗bha ka ꞊zinŋgü kö ˈyi yö ꞊bhlëësü ˈö bhë ˗a ˈˈklɔɔnbho ˗an ˗bha kö ˗wa kë, 4 kö yi ˗zë ˈyi yi ˈˈɲan ˗klu ˗bhɛɛ ˗Zlan ˗dhɛ ˗sü waa yö ˈö ˗gban mɛn ꞊klaŋ ˗kë ˗a ˗wo ˈka ˗sü ˗bha, ˗an ˗bha.» 5 ˈDhɛ ˈwo˗ pö ˈˈdhʋ̈, ˗a ˈˈyi ˗yö ˗kan mɛn ꞊gban ˈˈpɛpɛ ˈˈdhi, ˈyö ˈwo wo ˗kɔ ˗yɛ Etiɛnö ˈö ˗zoyödhe ˗kë ˗a ˗gɔ ꞊dedewo, ˈö ˗zuu ˈˈslʋ̈ʋ̈slʋ̈ kun ˗a pa ˗sü ˈka bhë waa Filipö ˗an ˗bha. ˗Wo wo ˗kɔ ˗yɛ ˈpö Plokɔdhö, Nikanɔɔ, Timɔnö, Paamenasö waa Nikola ˈö go Antiɔshö ˈö ˗da zuifö ˗nu ˗bha ˗zlanwo ˈgü bhë ˗an ˗bha. 6 ˗Wo ˗dho ˗an ˈka bɔmɛn ˗nu ˗kuu ˈˈdhiʋ̈, ˈyö ˈdhɛ ˈwo wo bo bhɛɛˈˈ ˗sü ˈka, ˈwo wo ˗kɔ ˗ya ˗an ˗ta.
7 ˈDhɛ ˈö ˗kë ˈˈdhʋ̈, ˈyö ˗Zlan ˗wo ˗yö ˗ya ˗dho ˈˈdhiʋ̈ ˗sü ˗bha ˈzü, ˈö Yesu ˗bha gwëëˈˈ ˗nu ˗wo ˗ya kë ˗sü ˗bha ꞊va ꞊dedewo Zedhizadhɛmö. ˈYö ˈˈsaabhomɛn ˗nu ꞊vadhɛ ˗wo wo ˗zo yö ˗Zlan ˗wo ˈwo kun ˗a pö ˗ni ˈgü bhë ˗a ˗dhɛ.
8 ˗A ˈˈtʋ̈ŋ ˈö bhë ˗a ˈgü, Etiɛnö ˈö ˗Zlan ˗yö ˗kë ˗a ˈˈpiʋ̈ ꞊dedewo, ˈö ˈˈpiigbɩɩdhɛ nu ˗a ˗dhɛ bhë, ˗yö ˗kun ˗dhidha ˗nu waa ˈwɔn ˈˈmlünmlünsü ˗nu kë ˗ni ˈgü ˈö ˈˈsɛgümɛn ˗nu ˗wa yö. 9 ˈDhɛ ˈö ˗kë ˈˈdhʋ̈, ˈyö mɛn kpö ˈbhaa ˗nu ˈwo ˗an ˗dhɛ ˗Go ꞊dhuëŋdhɛ ˈgü ˗mɛn ˗nu waa mɛn ˈbhaa ˗nu ˈwo go Silɛnö, ˈö ˈwo go Alɛzandri, ˈö ˈwo go ˈpö Silisi ˗sɛ waa Azi ˗sɛ ˗nu ˈgü, ˈwo nu kö ˈwo zɔɔdhe ˗man Etiɛnö ˈka. 10 ˈˈKɛɛ ˈdhɛ ˈö ˗kë ꞊dhɛ ˗yö ˗kun ꞊kpɔɔsü, ˈö ˗zuu ˈˈslʋ̈ʋ̈slʋ̈ kun ˗a ˗ta bhë, ˈwaa kun ˗mɔn ˗ni ˈgü ˗a ˗bha. ˗Ya ˈwɔn blɛɛˈˈ, ˗yö ˗yö ˗an ˈˈdhi ˗ta. 11 ˈDhɛ ˈö ˗kë ˈˈdhʋ̈, ˈyö ˈwo dho ˈwo mën mɛn* ˈbhaa ˗nu ˈˈpiʋ̈ ˗bindhe ˈgü kö ˗wa pö: «Yi ˗kpan ˗a ˗bha kö ˗yö ˈwɔn yaa blɛɛˈˈ ˗ni ˈgü Moizö waa ˗Zlan ˗an ˗bha.» 12 ˗Wo ˈˈsɛgümɛn ˗nu, mɛn zii ˗nu waa ˈtɔŋ˗ ˗gɔmɛn ˗nu ˗an zü ˗blü, ˈö ˈwo dho ˈwo sɔ Etiɛnö ˗ta ˈö ˈwo˗ kun ˈˈgbɩɩdhɛ ˈka ˈwo dho ˗a ˈka zakanmɛn ˗nu ˗kuu ˈˈdhiʋ̈. 13 ˈYö ˈwo nu mɛn ˈbhaa ˗nu ˈka ˈzü kö ˗wo ꞊suawɔn ˗nu ˗ya ˗a ˗bha. ˈYö mɛn ˗nu ˈwo ˈˈdhʋ̈ ˈwo˗ pö: «Gɔndënën ˈö yö ˗yö ˈwɔn yaa ˗blɛɛ ˗kplawo ˗Zlan ˗dhɔkë ˗a ˈgü ˗kɔ waa kwa ˗bha ˈTɔŋ˗ ˗an ˗bha. 14 ˗A ˈwɔnzuan ˈnën ˗tɔ yi ˗kpan ˗a ˗bha kö ˗ya pö ˗ni ˈgü ꞊dhɛ Yesu ˈö go Nazadhɛtö bhë ˗yö ˗dho ˗Zlan ˗dhɔkë ˗a ˈgü ˗kɔ ˈwü, ˈö kwa ˗bha wɔkɔ ˈö Moizö ˗ya to kwa ˗gɔ bhë ˗a bho ˈˈgblʋʋ.»
15 Zakanmɛn ˗nu ˈˈpɛpɛ ˈwo kun mü, ˗wo ˗kun Etiɛnö ˗ga ˗ni ˈgü ˗pinŋdhö, ˈyö ˈwo˗ yö ꞊dhɛ ˗a ˈwëëdhɛ ˗ya kë ꞊dhɛ ˗Zlan ˗bha ˈˈkiö ˈwëëdhɛ ˈdhö.