ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

2 Yö ˈnën ˈö˗ ˗wɔn ˈgü n ꞊dhegblü ˗nu, ˈˈtʋ̈ŋ ˈa nu ˗a ˈka ka ˈˈpiʋ̈ kö ˗Zlan ˗bha ˈwɔn ˈö ˗bin ˗sü ˈka ˈa˗ blɛɛˈˈ ka ˗dhɛ bhë, n ˈti˗ blɛɛˈˈ ka ˗dhɛ ˗wo ˈˈgblʋ̈gblʋ̈ pö ˗sü ɛɛnˈˈ n ˗de ˗bha ˈwɔndɔdhe ˈka. 2 ˈYö sü ꞊dhɛ ˈmaan kun ˗a ˈˈpiʋ̈ kö ˈa ˈwɔn ˈˈwɛɛ ˈbhaa blɛɛˈˈ kö yö ˈti kë Yesu Klito waa ˗a zë ˈö ˈwo˗ wo ˈˈdhü ˗bha bhë ˗a ˗wɔn ˈka. 3 ˈˈTʋ̈ŋ ˈa nu ˗a ˈka ka ˈˈpiʋ̈ ˈmü bhë, a ˗kun ˗bhaasü, ˈˈsuʋ̈ ˗kun n ˈgü, ˈa kun ꞊zii ˗ni ˈgü ꞊dedewo. 4 N ˈˈdhiwo waa ˈwɔn ˈa ka ꞊klaŋ ˗kë ˗a ˈka bhë, ˈwaa kun ˈwɔn ˗nu ˈa ˗an ꞊blɛɛ ꞊kpɔɔdhɛ ˗bha ˈˈwɛɛwɛ kö ˈa ka zuʋ̈ˈˈ ˈsü ˗an ˈka. ˗Wo ˗kun ꞊ʒiaan ˗wo ˗nu ˈwo ˗zuu ˈˈslʋ̈ʋ̈slʋ̈ waa ˗Zlan ˗bha ˈˈpiigbɩɩdhɛ ˗zɔn ˗an ˈka, 5 ˗yö kë ˈˈdhʋ̈ kö ˈkaa ˗dho ka ˗zo yö mɛnbhɩɩdhe ˗nu ˗bha ꞊kpɔɔdhɛ ˗dhɛ, kö ˈka ka ˗zo yö ꞊ʒiaan ˗Zlan ˗bha ˈˈpiigbɩɩdhɛ ˗dhɛ.

6 ˗Yö ˈˈdhʋ̈ ꞊dhɛ kwa ꞊kpɔɔdhɛ ˗wɔn ˗blɛɛ mɛn ˗nu ˈö ˗wa ˗kian ˗an ꞊zinŋgü. ˈˈKɛɛ ˗a ꞊kpɔɔdhɛ ˈö ˈˈdhʋ̈, ꞊kpɔɔdhɛ ˈö go ˈˈkpɔnŋ ꞊taa yö ɛɛnˈˈ ˗a ˈdhɛ ˈö ˈˈkpɔnŋtaadhɛ ˈö yö ˗a ꞊kɔɔnmɛn ˗nu ˈö ˈwo ˗dho kë ˗dhɛfuöödhɛ ˈka ˗an ˗gɔ bhë, ˈyaa ˗mü. 7 ˗Zlan ˗bha ꞊kpɔɔdhɛ ˈö ˈˈdhɛ to ˗a ˗ta ˗a ˗bha ˈwɔn ˈö ˗bin ˗sü ˈka ˗a ˈgü bhë, yö ˈnën ˈkwa˗ ˗wɔn ꞊blɛɛ ꞊ʒiaan. ˗Zlan ˗yö ˈˈkpɔnŋtaadhɛ ꞊kɔɔnmɛn ˗nu ˈwo ꞊dɛɛ ˗an ˗bha ˈˈtʋ̈ŋ ˗to ˈˈdhiʋ̈ ˈö ˈwɔn ˗nu ˗kë ꞊kpɔɔdhɛ ˈö ˈˈdhʋ̈ ˗a ˈka ˗sü ˗ya ö zuʋ̈ˈˈ ˈˈpiʋ̈ kö ˈkwa ˈtɔbhɔdhe ꞊slɔɔ ˗a ˈgü. 8 ꞊Kpɔɔdhɛ ˈö bhë, ˗gɔmɛn ˗nu ˈwo ˈˈkpɔnŋ ꞊taa yö ˗a mɛn dosɛnŋ ˈö ˗dho ˗a dɔ ˈyaa ˈdhö. ˈYö sü ꞊dhɛ ˗wa ˗dɔ ˗be, wo ˈti ˗dho kwa Dëmɛn ˈö ˈtɔbhɔdhe ˈdhö˗ ˗gɔ bhë ˗a dɔ ˈˈdhü ˗bha.* 9 Pë ˈö ˗bɛnzë ˗sü ˈka ˈyö ꞊nɛn: «Mɛn ˈbhaa ˈˈɲan yö ˈti ˗da ˗an ˈgü, ɛɛnˈˈ mɛn ˈbhaa yö ˈti ˗an man. Pë ˗nu ˈö ˗Zlan ꞊yaa ˗an ˗yökodhiʋ̈ kë mɛn ˗nu ˈö ˗a ˗dhɔ ˗yö ˗an ˗kë ˗an ˗bha ˈka bhë, yö ˈti˗ ˗da mɛn ˈˈoo ˗mɛn zuʋ̈ˈˈ ˈˈpiʋ̈ do.» 10 Kwa ˈnën ˈö ˗Zlan ˗yö bɔ ö ˗bha ˗zuu ˈˈslʋ̈ʋ̈slʋ̈ ˗ta ˈö ˈˈdhɛ bho ˗an ˗ta kwa ˗dhɛ, ˗a ˗gɛn ˗mü ꞊dhɛ ˗zuu ˈˈslʋ̈ʋ̈slʋ̈ ˗yö ˈwɔn ꞊gban ˈˈpɛpɛ, ˈö dho ˈö yö ˗a ˈka ˗ʒiaanwo ˗Zlan ˗bha ˈwɔn ˗nu ˈwo ˗bin ˗sü ˈka ˗an ˗bha, ˗an ˈˈpiʋ̈ ˗pɔn.

11 Mɛnbhɩɩdhe ˗mɛɛn ˈö ꞊mɔɔn˗ ˗bha kö ˗yö ˈwɔn ˗nu ˈwo mɛn ˈbhaa zuʋ̈ˈˈ ˈgü ˗an dɔ kö yö ˈti kë mɛn ˈö ˈˈdhʋ̈ ˗a ˗de zuʋ̈ga ˈka? ˗Kɔ do ˈö bhë ˗a ˈka ˈpö mɛn ˈˈwɛɛ ˈbhaa ˗kɔ yö ˈti ˗mɔn ˗Zlan ˗zopiʋ̈wɔn ˗nu dɔ ˗sü ˗bha kö yö ˈti kë ˗Zlan ˗bha ˗zuu ˈka. 12 ˈˈKɛɛ kwa ˗zë, ˗zuu ˈdhɛ ˈö ˈkwa˗ ꞊slɔɔ bhë ˈyaa ˈˈkpɔnŋ ꞊taa ˗zuu ˈka, ˗zuu ˈö go ˗Zlan ˈˈpiʋ̈ yö ˗mü. ˗Yö ˗kë ˈˈdhʋ̈ kö pë ˗nu ˈö ˗Zlan ˗yö ˗an nu kwa ˗dhɛ ˈˈgblüsëdhɛ ˈka bhë ˈkwa ˗mɔn ˗an dɔ ˗sü ˗bha. 13 Pë ˗nu ˈwo bhë kwa ˗an ˗wɔn ˗blɛɛ ˈpö. ˈˈKɛɛ ˈkwaa ˗an ˗wɔn blɛɛˈˈ ꞊klaŋwo ˗nu ˈö ˈwo go mɛnbhɩɩdhe ˗nu ˗bha ꞊kpɔɔdhɛ ˈgü ˗an ˈka. Kwa ˗an ˗wɔn ˗blɛɛ ꞊ʒiaan ꞊klaŋwo ˗nu ˈwo go ˗zuu ˈˈslʋ̈ʋ̈slʋ̈ ˈˈpiʋ̈ ˗an ˈka. ˗Kɔ ˈö bhë ˗a ˈka, kwa ˗bɔ ˗wo ˗nu ˈwo go ˗zuu ˈˈslʋ̈ʋ̈slʋ̈ ˈˈpiʋ̈ ˗an ˗ta, ˈö ˈkwa ˈwɔn ˗nu ˈwo ˗gban ˗Zlan ˗bha ˗an ˈgü ˗pʋ ˗an ˈka.

14 Mɛn ˈö˗ ˗de dhɔɔbhaawɔn ˗nu ˈnën ˈwo ˈˈdhiʋ̈sü ˗a ˈka, ˈyaa ˈˈwɩ ˈwɔn ˗nu ˈö ˗Zlan ˗bha ˗zuu ˗yö ˈˈdhɛ bho ˗an ˗ta ˗an ˗bha, ˈyö sü ꞊dhɛ ˗yö ˗an ˗sü ˈˈwlaawɔn ˗nu ˈka. ˈYaa ꞊mɔɔn˗ ˗bha kö ˗yö ˈwɔn ˗nu ˈwo bhë ˗an dɔ, ˈyö sü ꞊dhɛ mɛn ˈö ˗zuu ˈˈslʋ̈ʋ̈slʋ̈ ˈyaa˗ ˗ta, ˈyaa ˗an ˗bhokoo dɔ. 15 ˈˈKɛɛ mɛn ˈö ˗Zlan ˗bha ˗zuu ˗yö ˈˈdhiʋ̈sü ˗a ˈka ˗yö ˈwɔn ꞊gban ˈˈpɛpɛ ˗bhokoo ˗dɔ, ˈö mɛn gbɛ˗ ˈyaa ꞊mɔɔn˗ ˗bha kö ˗yö za dɔ ˗a ˗bha. 16 ˗A ˗gɛn ˗mü ꞊dhɛ, «de ˈö ꞊mɔɔn˗ ˗bha kö ˗yö Zoova ˗zopiʋ̈wɔn ˗nu dɔ kö ˗ya pö ˈö ˗gleŋ ˗da ˗a ˗bha?» ˈˈKɛɛ kwa ˗zë Klito ˗bha ˈwɔn yö ˗kɔ ˗yö kwa ˗gɔ.