ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

3 N ꞊dhegblü ˗nu, n ˈti ˈwɔn blɛɛˈˈ ka ˗dhɛ ˈˈtʋ̈ŋ ˈö bhë ˗a ˈgü ꞊dhɛ mɛn ˈwɔn ꞊blɛɛ mɛn ˗nu ˈö ˗Zlan ˗bha ˈwɔn yö ˗kɔ ˈdhö ˗an ˗gɔ ˗an ˗dhɛ. A˗ ˗blɛɛ ꞊ʒiaan ꞊dhɛ mɛn ˈwɔn ꞊blɛɛ mɛn ˗nu ˈö mɛnbhɩɩdhe ˗nu ˗bha ˈwɔn yö ˗kɔ ˈdhö ˗an ˗gɔ, ˈö ˈwo ˈnën ˈsɛɛn˗ ˗nu ˈka Klito ˗bha ʒiaan ˗ta ˗an ˗dhɛ. 2 ˈƝɔnyi ˈnën ˈa˗ nu ka ˗dhɛ, n ˈti ˗bhöpë ˈgbinŋ˗ nu ka ˗dhɛ, ˈyö sü ꞊dhɛ ˗a ˈˈtʋ̈ŋ ˈö bhë ˗a ˈgü kö ˗a ˗bhö ˗sü ꞊faan ˈyaa ka ˗gɔ. Dɔ ˗de ˈö ˈkwa˗ wo ꞊dɛɛ yö, ˗a ˗bhö ˗sü ꞊faan ˈyaa ka ˗gɔ ꞊köŋ. 3 ˗A ˗gɛn ˗mü ꞊dhɛ mɛnbhɩɩdhe ˗bha ˈwɔn yö ˗kɔ ˈnën ˈö ꞊kun ka ˗gɔ. ˗A kë ˗sü kö ꞊druɛɛ˗ ˗yö kë ka ˈgü, kö ˈkowogümandhe ˈyaa ka ꞊zinŋgü bhë, ˈyaa˗ ˗zɔn ꞊dhɛ mɛnbhɩɩdhe ˗nu ˗bha ˈwɔn yö ˗kɔ ˈnën ka ˗gɔ, ˈö ˈka ˈwɔn ˗nu ˗kë ꞊dhɛ ˈˈkpɔnŋtaamɛn ˗nu ˈdhö ˗ee? 4 ˗A ˗gɛn ˗mü ꞊dhɛ mɛn ˈbhaa ꞊yaa˗ pö: «A Pɔdhö ˗bha ˈka,» mɛn ˈˈwɛɛ ˈbhaa ꞊yaa˗ pö ˈzü: «A Apodhɔsö ˗bha ˈka,» kö ˈkaa ˈwɔn ˗nu kë ˗ni ˈgü ꞊dhɛ ˈˈkpɔnŋtaamɛn ˗nu ˈdhö ˗ee?

5 De ˗mü Apodhɔsö ˈka? Ɛɛnˈˈ de ˗mü Pɔdhö ˈka? Dëmɛn ˗bha yökëmɛn ˗nu ˈö ˈka bɔ ˗an ˗ta ˈka ˗kë ˗zo ˗yö ˗Zlan ˗dhɛ ˗mɛn ˗nu ˈka yö ˗mü ˗an ˈka. ˗A yö ˈö ˈˈdhʋ̈ ˗Zlan ˗ya ˗nu ka ˗dhɛ ˈpö. 6 Man ˈnën ˈa pë ta, ˈyö Apodhɔsö ˗yö ˈˈyi ˗lo ˗a ˗ta, ˈˈkɛɛ ˗Zlan ˈnën ˈö˗ ˗kë ˈö pë ˈö ˈˈdhʋ̈ ˈö bhɔ. 7 ˗Ya kë ˈˈdhʋ̈, kö mɛn ˈö pë ta ɛɛnˈˈ mɛn ˈö ˈˈyi ˗lo ˗a ˗ta ˗a ˈtɔ bhɔ ˗gɛn ˈyaa ˈdhö. ˗Zlan ˈö˗ ˗kë ˈö pë ˗yö bhɔ bhë, yö ˈnën ˈö˗ ˈtɔ ˈdhö ˈdhö. 8 ˈKö ˗kë ꞊dhɛ mɛn ˈö pë ta waa mɛn ˈö ˈˈyi ˗lo ˗a ˗ta ˗wo do, ˗a mɛn ˈö ˈdhö ꞊trɔɔn ˈö dan ˗a ˗bha yö ˈö˗ ˗kë ˗a ˈka, ˈyö ˗dho ˗a ꞊slɔɔ˗. 9 ˗A ˗gɛn ˗mü ꞊dhɛ ˗Zlan yökëyoo ˗nu ˗mü yi ˈka. Ka ˈnën ˈka ˗tɔ ˗a ˗bha ˈbhladhɛ ˈö˗ ˗yö kë ˗ni ˈgü, ˈö ˈka ˗a ˗bha ˈkɔ ˈö˗ dɔ ˗ni ˈgü ˗a ˈka ˈpö.

10 ˗Zlan ˗bha ˗gasitɛ ˈö˗ ˗kë n ˗dhɛ bhë ˗a ˈsaa˗ ˈgü, man ˈnën ˈa ˈkɔ ˈˈkpan ˗ya ꞊dhɛ ˈkɔdɔmɛn kwɛɛˈˈ ˗së ˗sü* ˈdhö, ˈyö mɛn ˈˈwɛɛ ˗yö ˈkɔ dɔ ˗a ˗ta. ˈˈKɛɛ ˗kɔ ˈö mɛn ˈö ˈdhö ˈö ˈkɔ dɔ ˗ni ˈgü ˗a ˈka ˈkɔ ˈˈkpan ˈö bhë ˗a ˗ta, ˗yö ö ˗zokë ˗a ˈˈpiʋ̈ ˗së ˈka. 11 ˗A ˗gɛn ˗mü ꞊dhɛ mɛn ˈbhaa ˈyaa ꞊mɔɔn˗ ˗bha kö ˗yö ˈkɔ ˈˈkpan ˈˈwɛɛ ˈbhaa ˗ya ˈzü kö yö ˈti kë ˗a ˈdhɛ ˈö ˗ya ˗sü ˈka ˈsaadhö, ˈö ˗kë Yesu Klito ˈka bhë ˗a ˈka. 12 Mɛn ˈˈoo ˗mɛn ˈö ˈkɔ dɔ ˈkɔ ˈˈkpan ˈö bhë ˗a ˗ta, ˗ya ˗dɔ ˈˈsënŋ ˈka oo, ˗ya ˗dɔ ˈwëë˗, ˗gwö ꞊bhlëësü ˗nu, ˈˈdhü, ˈˈyɛ, ɛɛnˈˈ dɛn ˈka oo, 13 ˗kɔ ˈö mɛn ˈö ˈdhö ˈö ö ˗bha dɔ ˗a ˈka, ˈyö ˗dho yö ˗a ˈka zaŋta. ˗A ˗gɛn ˗mü ꞊dhɛ ˗a yi ˗dho ˗wo ˈö bɔ ˈˈshiʋ̈ ˈgü, ˈö ˈˈshiʋ̈ ˗yö pë ˈö˗ ˈka ˗a ˗zɔn. ˗A ˈˈshiʋ̈ ˈö bhë, ˗yö ˗dho mɛn ˈö ˈdhö pë ˈö˗ këyö ˈdhö˗ ˈka ˗a ˗zɔn. 14 Mɛn ˈö˗ ˗bha ˈkɔ ˗yö dɔ ˈkɔ ˈˈkpan ˈö bhë ˗a ˗ta, ˈˈshiʋ̈ ˗kɔ yö ˈti ꞊mɔɔn˗ ˗bha, ˗yö ˗dho ˗a ꞊trɔɔn ꞊slɔɔ˗. 15 Mɛn ˈö ˈˈshiʋ̈ ˗ya këyö ˗nu ˗gʋ̈ ˈpapadhö, pë ˗dho shiʋ̈ˈˈ ˗a ˗gɔ, ˈˈkɛɛ yö ꞊dede ˗yö ˗dho dha. ˗A ˗bha dhasü ˈö ˈˈdhʋ̈ ˗yö ˗dho kë ꞊dhɛ ˗dha ˈˈshiʋ̈ ˗gɔ ˗sü ˈdhö.

16 ˈKaa˗ ˈwɔn dɔ ꞊dhɛ ˗Zlan ˗dhɔkë ˗a ˈgü ˗kɔ ˗mü ka ˈka, ˈö ˗Zlan ˗bha ˗zuu ˈdhö ˗ya ˗sü ˈka ka ˈgü ˗ee? 17 Mɛn ˈö ˗Zlan ˗dhɔkë ˗a ˈgü ˗kɔ wü, ˗Zlan ˗dho ˗a ˗mɛn ˈgüshiʋ̈. ˗A ˗gɛn ˗mü ꞊dhɛ ˗Zlan ˗dhɔkë ˗a ˈgü ˗kɔ ˗yö ˈˈslʋ̈ʋ̈slʋ̈, ˗a ˗dhɔkë ˗a ˈgü ˗kɔ ˈö ˈˈdhʋ̈ yö ˗mü ka ˈka.

18 Mɛn ˈbhaa ˈyaa ˗dho ˗a pö ˈö ˈˈkpënŋ˗ kë ö ˗de ˗gɔ. Mɛn ˈˈoo ˗mɛn ˈö ka ꞊zinŋgü ˈö ö ˗de sü ˈwɔndɔmɛn ˈka ˈˈkpɔnŋtaadhɛ ˈö yö ˗a ˈgü, ˗yö kë ˈˈblɔɔnmɛn ˈka, ˗yö kë ˈˈdhʋ̈ kö ˗yö kë ˈwɔndɔmɛn ꞊dede ˈka. 19 ˗A ˗gɛn ˗mü ꞊dhɛ ˈwɔndɔdhe ˈö ˈˈkpɔnŋtaadhɛ ˈö yö ˗a ˈgü, ˗yö ˗Zlan ˈgü ˈˈblɔɔnwɔn ˈka. ˈYö sü ꞊dhɛ pë ˈö ˗bɛnzë ˗sü ˈka ˈyö ˗tɔ: «˗Yö ˈwɔndɔmɛn ˗nu ˗kun ˗an ˗de ˗bha ꞊döŋ* ˈka.» 20 ˗Ya ˈgo mü ˈzü: «Zoova ˗ya ˈwɔn ˗dɔ ꞊dhɛ ˈwɔndɔmɛn ˗nu ˗bha ˈwɔn ˗yökodhiʋ̈ ˗sü ˗yëëpë ˈyaa ˈdhö.» 21 ˈDhɛ ˈö ˈˈdhʋ̈, mɛn ˈbhaa ˈyaa ˗dho ö ˗de ˈsü ꞊va mɛnbhɩɩdhe ˗wɔn ˈgü, ˈyö sü ꞊dhɛ pë ꞊gban ˈˈpɛpɛ ˗yö ka ˗bha ˈka. 22 ˗Yö ˗kë Pɔdhö ˈka oo, ˗yö ˗kë Apodhɔsö ˈka oo, ˗yö ˗kë Sefasö ɛɛnˈˈ ˈˈkpɔnŋtaadhɛ ˈka oo, ˗yö ˗kë ˈzü ˗tosɛta ɛɛnˈˈ ga, ɛɛnˈˈ ˈzü pë ˈbhaa ˈö ꞊dɛɛ ɛɛnˈˈ ˈö ˗dho kë ˗dhɛkpaɔ dhiʋ̈ˈˈ ˈgü ˗a ˈka, pë ꞊gban ˈˈpɛpɛ ˗wo ka ˗bha ˈka. 23 Ka ˗zë mɛn ˈö ˈka˗ ˗bha ˈka ˈyö ˗tɔ Klito. ˈYö Klito ˗de ˈpö ˈö ˗Zlan ˗bha ˈka.